Bisalu ya Bantumwa 16:1-40
-
Polo me soola Timote (1-5)
-
Kimona-meso yina ke na lakisaka muntu ya Masedwane (6-10)
-
Lidi me kuma kilandi na bwala ya Filipi (11-15)
-
Polo na Silase na boloko (16-24)
-
Mukengi ya boloko mpe bantu ya yinzo ya yandi me kuzwa mbotokolo (25-34)
-
Polo zola ti bantwadisi ya mbanza kwiza lomba bawu mulemvo (35-40)
16 Yandi kumaka na Derbe, mpe na manima na Listre. Kuna, ya vandaka na kilandi mosi na nkumbu ya Timote. Mama ya yandi vandaka Zwife mosi yina vandaka mundimi, kasi tata ya yandi vandaka Mugreke.
2 Bampangi ya Listre mpe ya Ikoniumi vanda zonzilaka yandi na faso ya mbote.
3 Polo zolaka ti Timote kwenda na yandi. Yandi bakaka yandi mpe zengisaka yandi kibakala samu na Bazwife yina vandaka bisika yina, samu bawu nyonso zabaka ti tata ya yandi vandaka Mugreke.
4 Na babwala yina ba vanda luta, ba vanda pesa bampangi misiku yina bantumwa mpe bakuluntu yina vandaka na Yeruzalemi basisaka samu ba tumama na yawu.
5 Ni na yawu, bimvuka vanda tatamana na kukuma ngolo na kati ya kiminu, mpe kilumbu na kilumbu, bandimi vanda bwelama.
6 Dyaka, ba lutaka na Frizia mpe na yinsi ya Galate, samu mpeve ya santu niminaka bawu na kuzonzila dyambu ya Nzambi na kizunga ya Aziya.
7 Ntangu ba kumaka na Misi, ba sosaka kukota na Bitiniya, kasi mpeve ya Yesu pesaka ve bawu nzila.
8 Na yawu, ba lutaka pene-pene* ya Misi mpe ba kwendaka na Trowase.
9 Na mpimpa, Polo kuzwaka kimona-meso. Bakala mosi ya Masedwane vandaka ya kutelama, mpe vanda bondila yandi na kuzonzaka: “Luta na Masedwane mpe sadisa beto.”
10 Kaka na ntangu yina yandi kuzwaka kimona-meso yango, beto sosaka kukwenda na Masedwane, samu beto kwizaka tala ti Nzambi bokilaka beto samu beto zabisa bawu nsangu ya mbote.
11 Beto kotaka na masuwa na Trowase mpe beto kwendaka mbala mosi na Samotrase, mpe kilumbu yina landaka, beto kwendaka na Neyapolise.
12 Beto katukaka kuna mpe beto kwendaka na Filipi, mbanza yina vandaka na yisi ya luyalu ya Roma, mpe yina vandaka mbanza ya kulutila mfunu na kizunga ya Masedwane. Beto lutisaka mwa bilumbu kuna.
13 Kilumbu ya saba, beto basikaka na ngaanda ya mbanza, mpe beto kwendaka pene-pene ya mwila, kisika yina beto vanda kanisa ti ya vandaka na kisika ya kusambila kuna. Beto vandaka, mpe beto sololaka na bakento yina vandaka kuna.
14 Kento mosi na nkumbu ya Lidi, muntu mosi ya bwala ya Tiatire, yina vanda tekisaka bilele ya mbwaki-viole mpe vanda sambilaka Nzambi, vanda kuwa, mpe Yehova* fungulaka ntima ya yandi samu yandi teka dikebi na mambu yina Polo vanda zonza.
15 Ntangu yandi mpe bantu ya yinzo ya yandi kuzwaka mbotokolo, yandi bondilaka beto mutindu yayi: “Kana beno me tala ti mu ke ya kukwikama na Yehova,* beno kwiza vanda na yinzo ya munu.” Yandi salaka beto tiya samu beto ndima.
16 Kilumbu mosi, ntangu beto vanda kwenda na kisika ya lusambu, kisadi mosi ya kento yina vandaka na mpeve ya yimbi yina vanda sala ti yandi bikula mambu yina ke kwiza na mantwala bwabanaka na beto. Yandi vanda kotisa bamfumu ya yandi mbongo mingi na kisalu ya kuzonzilaka bantu mambu yina ke kumina bawu.*
17 Mwana yango ya kento vanda landa beto na Polo, mpe vanda zonza na ndinga ya ngolo: “Babakala yayi ke bisadi ya Nzambi ya Kulutila Zulu, mpe ba ke na zabisaka beno nzila yina ke vuukisaka.”
18 Yandi salaka yawu bilumbu mingi. Na nsuka, ya lembisaka Polo. Yandi balukaka mpe zonzaka na mpeve yango: “Mu ke na tumisaka nge na nkumbu ya Yesu Kristo na kubasika na nzutu ya yandi.” Kaka na ntangu yina, mpeve yango basikaka.
19 Ntangu bamfumu ya yandi talaka ti kivuvu ya bawu ya kuzwa mbongo ke dyaka ve, ba kangaka Polo na Silase mpe ba nataka bawu na zandu na sika ya bamfumu.
20 Ba nataka bawu na sika ya bantwadisi ya mbanza mpe ba zonzaka: “Bantu yayi ke na kotisaka muvusu mingi na bwala ya beto. Ba ke Bazwife,
21 mpe ba ke na samunaka bansalulu yina beto ke ve na muswa ya kundima to ya kusadila, samu beto ke Baroma.”
22 Na yawu, bantu nyonso dasukilaka bawu, mpe bantwadisi ya mbanza tumisaka na kupasula bawu bilele mpe na kubula bawu bayinti.
23 Na manima ya kubula bawu nkuba, ba losaka bawu na boloko, mpe tumisaka mukengi ya boloko na kukengidila bawu mbote-mbote.
24 Samu yandi kuzwaka musiku yayi, yandi tulaka bawu na kisika ya nsuka ya boloko, mpe yandi kangaka makulu ya bawu na mabaya.
25 Kasi na kati-kati ya mpimpa, Polo na Silase vanda sambila mpe vanda kembila Nzambi na banzimbu, mpe bantu yina ba kangaka na boloko vanda kuwa bawu.
26 Na mbala mosi, ntoto ninganaka na ngolo nyonso, mpe yisi ya boloko ninganaka. Dyaka, bamwelo nyonso fungukaka na mbala mosi, mpe basinga ya bisengo ya bantu nyonso nyangukaka.
27 Ntangu mukengi ya boloko vumbukaka, mpe talaka ti bamwelo ya boloko vandaka mwasi, yandi basisaka mbele ya yandi mpe sosaka kufwa nzutu, samu yandi vanda kanisa ti bantu yina vandaka na boloko kimaka.
28 Kasi Polo zonzaka na ndinga ya ngolo: “Kutalisa ve nzutu ya nge mpasi. Beto nyonso kele awa!”
29 Na yawu, mukengi yango lombaka mwinda, mpe kotaka na mbangu na kati. Yandi vanda tekita na boma, mpe yandi fukamaka na mantwala ya Polo na Silase.
30 Yandi nataka bawu na ngaanda, mpe yufulaka bawu: “Batata, yinki mu me fwana kusala samu na kuvuuka?”
31 Ba zonzaka na yandi: “Kwikila na Mfumu Yesu mpe nge ke vuuka, nge na bantu ya yinzo ya nge.”
32 Na yawu, ba zabisaka yandi na bantu nyonso yina vandaka na yinzo ya yandi mambu ya Yehova.*
33 Na mpimpa yina kaka, yandi nataka bawu mpe sukulaka bamputa ya bawu. Na manima, yandi mpe bantu ya yinzo ya yandi vingilaka ve na kuzwa mbotokolo.
34 Yandi nataka bawu na yinzo ya yandi, mpe yandi tudilaka bawu madya na mesa. Yandi sepelaka mingi, yandi na bantu nyonso ya yinzo ya yandi, samu ntangu yayi, yandi kwikilaka na Nzambi.
35 Ntangu bwisi kutsyaka, bantwadisi ya mbanza filisaka bapolisie samu ba kwenda zonza: “Basisa bantu yina.”
36 Mukengi ya boloko zabisaka Polo mambu yina ba zonzaka: “Bantwadisi ya mbanza me filisa bantu samu ba basisa beno zole. Na yawu, beno basika ya beno mpe beno kwenda na kizunu.”
37 Kasi Polo zonzaka na bawu: “Ba me bula beto nkuba na mantwala ya bantu nyonso, ata kusambisa beto, beto yina ke Baroma, mpe ba me losa beto na boloko. Ntangu yayi ba ke na sosaka kubasisa beto na kinsweki? Ve, beto me manga. Ba kwiza basisa beto bawu mosi.”
38 Bapolisie zonzilaka bantwadisi ya mbanza mambu yayi. Ba kumaka na boma mingi ntangu ba kuwaka ti bantu yango vandaka Baroma.
39 Na yawu, ba kwizaka mpe bondilaka bawu. Na manima ya kubasisa bawu, ba lombaka bawu na kukatuka na mbanza yango.
40 Kasi ntangu ba basikaka na boloko, ba kwendaka na yinzo ya Lidi, mpe ntangu ba talaka bampangi, ba kindisaka bawu mpe ba kwendaka.
Banote
^ To: “Na nzila.”
^ Tala Yina ba me bwela A5.
^ Tala Yina ba me bwela A5.
^ To: “Kisalu ya kubikula.”
^ Tala Yina ba me bwela A5.
