Bisalu ya Bantumwa 17:1-34
17 Ba lutaka na Amfipoli mpe na Apoloniya, mpe ba kumaka na Tesalonika. Kuna, ya vandaka na yinzo mosi ya lusambu ya Bazwife.
2 Na yawu, Polo kotaka kisika ba vandaka, mutindu yandi vandaka na kifu ya kusalaka yawu, mpe basaba tatu, yandi vanda sadila Masonoko samu na kusolola na bawu.
3 Yandi vanda zonzila mbote-mbote mpe vanda lakisa na nzila ya Masonoko ti ya vandaka mfunu ti Kristo tala mpasi, mpe ba vumbula yandi na kati ya bantu ya kufwa. Yandi vanda zonza: “Ni yandi ke Kristo, Yesu yina mu ke na zabisaka beno.”
4 Ya salaka ti ba ya nkaka na kati ya bawu kuma bandimi, mpe ba vukanaka kintwadi na Polo na Silase, mpe Bagreke mingi yina vanda sambilaka Nzambi, na bakento mingi ya kuzabana salaka mpe mutindu mosi.
5 Kasi Bazwife kumaka na kimbanda. Ba bakaka mwa ndambu ya bantu ya ntima ya yimbi yina vanda yenga-yenga na zandu, ba vukisaka bawu na kikunku mosi ya bantu, mpe ba bandaka kukotisa mvwanzi na mbanza. Ba kotaka na ngolo nyonso na yinzo ya Zasone, mpe ba vanda sosa Polo na Silase samu na kubasisa bawu na mantwala ya kikunku ya bantu yango.
6 Ntangu ba kuzwaka ve bawu, ba bendaka Zasone mpe bampangi ya nkaka na sika ya bamfumu ya bwala, mpe ba vanda zonza na ndinga ya ngolo: “Bantu yayi yina me tula muvusu* na bisika nyonso, me kuma mpe awa ntangu yayi,
7 mpe Zasone yambaka bawu na yinzo ya yandi. Bantu nyonso yayi ke na salaka mambu yina ke na zitisaka ve misiku ya Sezare. Ba me zonza ti ya ke na mfumu ya nkaka, Yesu.”
8 Mambu yayi kwamisaka mingi bantu mingi yina vandaka kuna mpe bamfumu ya bwala.
9 Kaka ni na manima ya kufutisa Zasone mpe bampangi ya nkaka mbongo ya kulunga, ba bikaka bawu ba kwenda.
10 Mbangu-mbangu na mpimpa yina, ba filisaka Polo na Silase na Bere. Ntangu ba kumaka, ba kwendaka na yinzo ya lusambu ya Bazwife.
11 Bazwife yina vandaka na Bere vandaka na mabanza ya mbote, kulutila ba yina vandaka na Tesalonika, samu ba ndimaka dyambu ya Nzambi na nsatu ya ngolo. Ba vanda fyongoninaka mbote-mbote Masonoko samu na kuzaba kana mambu yango vandaka mutindu yina.
12 Na yawu, mingi na kati ya bawu kumaka bandimi. Mpe bakento mingi ya Bagreke yina vandaka ya kuzabana mpe babakala ya nkaka salaka mpe mutindu mosi.
13 Kasi, ntangu Bazwife yina vandaka na Tesalonika kuwaka ti Polo vanda zabisa mpe dyambu ya Nzambi na Bere, ba kwizaka samu na kunata kimvuka ya bantu yina vandaka kuna na kusala mvwanzi.
14 Ni na yawu, bampangi zonzaka na Polo na kukwenda na mbangu na nzila ya nzadi ya mungwa. Kasi Silase na Timote bikanaka kuna.
15 Ba yina kwendaka bika Polo nataka yandi tii na Atene, mpe Polo zonzaka na bawu na kukwenda zonza na Silase na Timote na kulanda yandi na mbangu. Na yawu ba vutukaka.
16 Ntangu Polo vanda vingila bawu na Atene, yandi kumaka na nkele mingi na kutala ti bwala yango vandaka ya kufuluka na biteki.
17 Na yawu, na yinzo ya lusambu ya Bazwife, yandi vanda longa mpe vanda sadisa bantu ya nkaka yina vanda sambilaka Nzambi, na kubakula Masonoko. Mpe konso kilumbu, yandi vanda salaka mpe yawu na zandu na bantu yina vandaka kuna.
18 Kasi bantu ya nkaka ya filozofi ya Epikire mpe ya Sitoyika, bandaka kutudila yandi ntembe, mpe ba ya nkaka vanda zonza: “Yinki muntu ya makelele yayi ke na sosaka kuzonza?” Ba ya nkaka: “Ya lenda vanda ti yandi ke na samunaka banzambi ya banzenza.” Ba vanda zonza faso yina samu yandi vanda samuna nsangu ya mbote ya Yesu mpe mvumbukulu.
19 Ba simbaka yandi mpe nataka yandi na Areopaje, mpe ba zonzaka: “Nge lenda zonzila beto yinki ke malongi ya malu-malu yayi yina nge ke na longaka?
20 Samu bamambu ya nkaka yina nge ke na zonzaka, nabunu ntete beto kuwa yawu na makutu ya beto. Na yawu, beto ke na sosaka kuzaba yinki bamambu yango zola zonza.”
21 Ya tsyeleka, bantu nyonso ya Atene, mpe banzenza yina vanda zinga kuna vanda lutisaka ntangu ya bawu ya kupema kaka na kuzonzaka to na kuwaka mambu mosi ya malu-malu.
22 Na yawu, Polo telamaka na kati-kati ya Areopaje mpe zonzaka:
“Bantu ya Atene, mu ke na talaka ti na mambu nyonso beno me kukipesa mingi na boma ya banzambi* kuluta bantu ya nkaka.
23 Na kifwani, ntangu mu vanda luta mpe mu vanda tala mbote-mbote bima yina beno ke sambilaka, mu talaka mpe kisika mosi ya minkayulu yina ba sonikaka na zulu ya yawu: ‘Na Nzambi yina beto zaba ve.’ Ni na yawu, muntu yina beno ke na sambilaka ata ti beno zaba ve yandi, ni yandi mu ke na zabisaka beno.
24 Nzambi yina salaka yinza mpe bima nyonso yina ke na kati ya yawu, yina ke Mfumu ya zulu mpe ya ntoto, ke zingaka ve na batempelo yina ba me tunga na maboko.
25 Mpe yandi ke ve na nsatu ti maboko ya bantu sadila yandi, mutindu yandi ke na nsatu ya kima, samu ti ni yandi muntu ke pesaka bantu nyonso luzingu, kupema mpe bima nyonso.
26 Mpe na nzila ya muntu mosi, yandi salaka makanda nyonso ya bantu samu ba zinga na ntoto ya muvimba. Yandi tulaka bantangu samu bima ya nkaka salama, mpe yandi tulaka bandilu ya bisika yina bantu zola zinga,
27 samu ba sosa Nzambi ata ya lenda lomba ti ba sosa yandi na kukwendaka mekaka kisika na kisika, mpe ba kuzwa yandi. Ata ti ya tsyeleka yandi ke ve ntama na mosi na mosi na kati ya beto.
28 Ya tsyeleka, ni na nzila ya yandi beto ke na luzingu, beto ke ninganaka mpe beto kele. Mutindu misoniki ya nkaka ya beno zonzaka yawu, ‘Samu beto ke mpe bana ya yandi.’
29 “Na yawu, samu ti beto ke bana ya Nzambi, beto me bonga ve kukanisa ti Nzambi ke mutindu wolo, arza to ditadi, mutindu kima yina me salama na mayela mpe na makanisi ya bantu.
30 Ya tsyeleka, Nzambi kangaka meso na bantangu yina bantu zabaka ve mambu. Kasi awa, yandi ke na zonzaka na bantu nyonso, na bisika nyonso ti ba me lunga kubalula ntima.
31 Samu yandi me tula kilumbu yina yandi ke sambisa ntoto ya muvimba na lunungu na nzila ya muntu yina yandi me tula. Yandi vumbulaka muntu yango na lufwa mpe na mutindu yina, yandi pesaka kimbangi na bantu nyonso ti ya tsyeleka kilumbu yango ke kwiza.”
32 Ntangu ba kuwaka mambu ya kuvumbuka ya bantu ya kufwa, ba ya nkaka bandaka kuseka yandi. Kasi ba ya nkaka vanda zonza: “Beto ke kuwa dyaka nge na mambu yayi kilumbu ya nkaka.”
33 Na yawu, Polo bikaka bawu.
34 Kasi bantu ya nkaka vukanaka na yandi mpe kumaka bandimi. Na kati ya bawu ya vandaka na Dionisuse, zuzi na tribinale ya Areopaje, kento mosi na nkumbu ya Damarise, mpe bantu ya nkaka.
