Bisalu ya Bantumwa 18:1-28
18 Na manima ya mambu yayi, yandi katukaka na Atene mpe kwendaka na Korinto.
2 Yandi kutanaka na Zwife mosi na nkumbu ya Akila, muntu ya bwala ya Ponti, yina ntama mingi ve katukaka na Itali na kento ya yandi Prisile, samu Klode tumisaka Bazwife nyonso na kukatuka na Roma. Na yawu, yandi kwendaka na sika ya bawu.
3 Mpe samu yandi vanda salaka kisalu mosi na bawu, yandi bikanaka na yinzo ya bawu mpe vanda sala kintwadi na bawu. Kisalu ya bawu vandaka kuyidika bayinzo ya balele.
4 Konso kilumbu ya saba, yandi vanda salaka diskure mosi* na yinzo ya lusambu ya Bazwife mpe vanda ndimisaka Bazwife na Bagreke.
5 Ntangu Silase na Timote katukaka na Masedwane, mpe kumaka na Korinto, Polo bandaka kukipesa mingi na kisalu ya kusamuna dyambu ya Nzambi. Yandi vanda pesa Bazwife kimbangi na kulakisaka bawu ti Yesu ke Kristo.
6 Kasi samu Bazwife vanda bika ve kumanga mambu ya yandi mpe kuzonzila yimbi ya yandi, yandi kubulaka bilele ya yandi mpe zonzaka na bawu: “Menga ya beno ke na zulu ya bayintu ya beno mosi. Ya ke ve mambu ya munu.* Banda ntangu yayi, mu ke kwenda na sika ya bantu ya makanda.”
7 Na yawu yandi katukaka kuna* mpe kwendaka na yinzo ya bakala mosi na nkumbu ya Tituse Yusutuse. Yandi vanda sambilaka Nzambi, mpe yinzo ya yandi vandaka pene-pene na yinzo ya lusambu ya Bazwife.
8 Krispuse, ntwadisi ya yinzo ya lusambu ya Bazwife kwikilaka na Mfumu, kintwadi na bantu nyonso ya yinzo ya yandi. Bakorinto mingi yina kuwaka, bandaka kukwikila mpe kuzwaka mbotokolo.
9 Dyaka, na mpimpa, Mfumu zonzaka na Polo na kimona-meso: “Kuvanda ve na boma, kubika ve kuzonza mpe kukanga ve yinwa,
10 samu mu ke na nge, mpe ata muntu ke nwanisa nge samu na kutalisa nge mpasi, samu mu ke na bantu mingi na mbanza yayi.”
11 Na yawu yandi vandaka kuna mvula mosi mpe bangonda 6. Yandi vanda longa mambu ya Nzambi na kati ya bawu.
12 Ntangu Galione vandaka prefe* ya Akayi, Bazwife wisanaka samu na kusala Polo yimbi mpe ba nataka yandi na kisika ya kusambisa.
13 Ba zonzaka: “Bakala yayi ke na ndimisaka bantu na kusambila Nzambi na mutindu yina ke na kwelanaka ve na musiku.”
14 Kasi ntangu Polo vanda sosa kuzonza, Galione zonzaka na Bazwife: “O Bazwife, kana ya tsyeleka ya vandaka dyambu ya nene, to mavanga ya yimbi, ya zola vanda mbote mu kuwa beno na ntima ya yinda nyonso.
15 Kasi, kana ya ke mambu ya kuswana na yina me tadila banzonzolo, bankumbu to musiku ya beno mosi, ya me tala beno. Mu zola ve kuvanda zenga-mambu ya bamambu yayi.”
16 Na yawu, yandi bingisaka bawu na kisika ya kusambisa.
17 Na manima, bawu nyonso bwilaka Sostene, ntwadisi ya yinzo ya lusambu ya Bazwife, mpe ba bandaka kubula yandi na mantwala ya kisika ya kusambisa, kasi Galione kotaka ata fioti ve na bamambu yayi.
18 Polo lutisaka mwa bilumbu kuna, mpe na manima ya kuzonza yeyeye na bampangi, yandi kotaka na masuwa mpe kwendaka na Siri, kintwadi na Prisile mpe Akila. Yandi zengisaka bansuki ya yandi na Senkrea samu yandi salaka nsilulu na Nzambi.
19 Ba kumaka na Efeze, mpe yandi bikaka bawu kuna. Kasi yandi kotaka na yinzo ya lusambu, mpe longaka Bazwife na kusadisaka bawu na kubakula Masonoko.
20 Ba vanda lomba yandi na kubikana kuna bilumbu mingi. Kasi yandi mangaka.
21 Yandi pesaka bawu yeyeye mpe zonzaka na bawu: “Mu ke vutuka dyaka na sika ya beno kana Yehova* zola. Yandi katukaka na Efeze na masuwa,
22 mpe yandi kwendaka na Sezarea. Yandi kwendaka* pesa mbote na kimvuka, mpe na manima yandi kwendaka na Antyose.
23 Na manima ya kulutisa mwa ntangu kuna, yandi kwendaka, mpe lutaka na bisika mingi na yinsi ya Galate mpe ya Frizia. Yandi vanda kindisa bilandi nyonso.
24 Zwife mosi na nkumbu ya Apolose, muntu ya bwala ya Alezandriya, kumaka na bwala ya Efeze. Yandi zabaka kuzonza, mpe yandi zabaka mbote-mbote Masonoko.
25 Ba longaka yandi* nzila ya Yehova,* mpe samu yandi vandaka na tiya mingi na lusalusu ya mpeve, yandi vanda zonza mpe kulonga na matsyeleka nyonso mambu yina me tadila Yesu. Kasi yandi zabaka kaka mbotokolo ya Yoane.
26 Yandi bandaka kulonga na bukindi nyonso na yinzo ya lusambu ya Bazwife. Ntangu Prisile na Akila kuwaka yandi, ba bakaka yandi kintwadi na bawu. Ba lakisaka dyaka yandi mbote-mbote nzila ya Nzambi.
27 Dyaka, samu yandi vanda sosa kukwenda na Akayi, bampangi sonikilaka bilandi na kuyamba yandi na ntima ya mbote nyonso. Na yawu, ntangu yandi kumaka kuna, yandi sadisaka mingi ba yina kumaka bandimi na nzila ya ntima ya kulutila mbote ya Nzambi.
28 Na meso ya bantu nyonso mpe na tiya nyonso, yandi lakisaka pwelele na Bazwife ti ba vanda vunama. Yandi vanda lakisa bawu na nzila ya Masonoko ti Yesu ke Kristo.
Banote
^ To: “Yandi vanda yindulaka na bawu.”
^ Na Greke: “Mu ke ya kuvedila.”
^ Ya kele ni yinzo ya lusambu ya Bazwife.
^ Muroma yina vandaka mfumu ya kizunga. Tala Yina ya zola zonza.
^ Tala Yina ba me bwela A5.
^ Ntangu ya nkaka ya lenda vanda na Yeruzalemi.
^ Na Greke: “Longaka yandi na yinwa.”
^ Tala Yina ba me bwela A5.
