Bisalu ya Bantumwa 19:1-41
19 Na manima, ntangu Apolose vandaka na Korinto, Polo lutaka na babwala yina vandaka ntama na nzadi ya mungwa, mpe kumaka na Efeze. Kuna yandi talaka ndambu ya bilandi,
2 mpe yandi yufulaka bawu: “Beno kuzwaka mpeve ya santu ntangu beno kumaka bandimi?” Ba vutulaka: “Nabunu beto kuwa ti mpeve ya santu kele.”
3 Na yawu yandi yufulaka: “Wapi mutindu ya mbotokolo beno kuzwaka?” Ba zonzaka: “Mbotokolo ya Yoane.”
4 Polo zonzaka: “Yoane botikaka na mbotokolo yina vandaka kidimbu ya kubalula ntima. Yandi vanda zonza na bantu na kukwikila na muntu yina ke na kwizaka na manima ya yandi, muntu yango ni Yesu.”
5 Ntangu ba kuwaka yawu, ba kuzwaka mbotokolo na nkumbu ya Mfumu Yesu,
6 mpe ntangu Polo tulaka bawu maboko, mpeve ya santu kwizaka na zulu ya bawu, mpe ba bandaka kuzonza na bandinga ya banzenza mpe kubikula.
7 Bawu nyonso vandaka kana babakala 12.
8 Na kati ya bangonda tatu, yandi vanda kwenda na yinzo ya lusambu ya Bazwife, mpe vanda zonza na bukindi nyonso. Yandi vanda sala badiskure mpe vanda sadila mayela samu na kundimisa bawu mambu yina me tadila Kimfumu ya Nzambi.
9 Kasi ntangu ba ya nkaka na yintu ngolo nyonso mangaka kukwikila,* mpe vanda zonzila yimbi na yina me tadila Nzila na mantwala ya bantu mingi, yandi bikaka bawu mpe nataka bilandi na yandi. Yandi vanda sala badiskure bilumbu nyonso na yinzo ya lekole ya Tiranuse.
10 Ya salamaka bamvula zole. Na yawu, bantu nyonso yina vanda zinga na kizunga ya Aziya, kuwaka dyambu ya Mfumu, ya vanda Bazwife mpe Bagreke.
11 Nzambi vanda sala bimangu ya nene na nzila ya maboko ya Polo.
12 Ba vanda natina bambevo bilele mpe bitende ya kisalu yina kuzwaka nzutu ya Polo, mpe bimbevo ya bawu vanda zimbana mpe bampeve ya yimbi vanda basika.
13 Kasi Bazwife ya nkaka yina vanda tambula kisika na kisika samu na kubingisa bampeve ya yimbi sosaka mpe kusadila nkumbu ya Mfumu Yesu na sika ya ba yina vandaka na bampeve ya yimbi. Ba vanda zonza: “Na nkumbu ya Yesu yina Polo ke na samunaka, mu ke na tumisaka beno na kubasika.”
14 Na kati ya bantu yina salaka yawu, ya vandaka na bana 7 ya mfumu mosi ya banganga-nzambi na nkumbu ya Seva.
15 Kasi mpeve ya yimbi zonzaka na bawu: “Mu zaba Yesu, mu zaba mpe Polo. Kasi beno, beno ke banani?”
16 Na yina, bakala yango yina vandaka na mpeve ya yimbi bwidilaka bawu, lutilaka mosi na mosi ya bawu na ngolo, mpe nungaka bawu. Na yawu, ba basikaka na yinzo yina mutakala, mpe ba vandaka na bamputa.
17 Mambu yango zabanaka na bantu nyonso. Bazwife mpe Bagreke yina vanda zinga na Efeze, bawu nyonso kumaka na boma, mpe nkumbu ya Mfumu Yesu vanda kuzwa lukumu.
18 Mingi ya ba yina kumaka bandimi vanda kwiza fungula mpe kuzabisa pwelele bansalulu ya bawu.
19 Ya tsyeleka, bantu mingi yina vanda sala bansalulu ya maji* vukisaka babuku ya bawu mpe yokaka yawu na mantwala ya bantu nyonso. Ba tangaka ntalu ya babuku yina, mpe ba kuzwaka ntalu ya bambongo ya bisengo 50 000.
20 Na yawu, na faso mosi ya ngolo, dyambu ya Yehova* vanda mwangana kaka, mpe vanda nunga.
21 Na manima ya bamambu yayi, Polo bakaka mukanu ya kuluta na Masedwane mpe na Akayi, mpe na manima kukwenda na Yeruzalemi. Yandi zonzaka: “Na manima ya kukwenda kuna, mu me fwana kukwenda mpe na Roma.”
22 Na yawu, yandi filisaka na Masedwane basadisi ya yandi zole, Timote na Eraste. Kasi yandi mosi bikanaka na kizunga ya Aziya samu na mwa ntangu.
23 Na ntangu yina, muvusu mingi bandaka na yina me tadila Nzila.
24 Bakala mosi na nkumbu ya Demetriyuse, yina vanda yidikaka bima ya arza mpe yina vanda yidikaka batempelo ya fioti ya Artemise, vanda kotisaka bantu yina vanda salaka bisalu ya maboko mbongo mingi.
25 Yandi vukisaka bawu mpe bantu ya nkaka yina vanda salaka bima ya mutindu yina mpe zonzaka na bawu: “Babakala, beno zaba mbote-mbote ti ni kisalu yayi ke mvwamisaka beto.
26 Kasi beno ke na talaka mpe beno ke na kuwaka mutindu Polo yango, kaka ve na Efeze, kasi kana mpe na kizunga nyonso ya Aziya, yandi me ndimisa bantu mingi mpe me nata bawu na kusoba dikanisi, na kuzonzaka ti banzambi yina ba ke yidikaka na maboko ke ve banzambi.
27 Dyaka, mu ke na boma ti bantu banda kuzonza mambu ya yimbi samu na kisalu ya beto, mpe ti ba banda kutala tempelo ya nzambi ya kento ya nene Artemise mutindu kima ya mpamba. Yandi yina ba ke sambilaka na kizunga nyonso ya Aziya mpe na ntoto ya muvimba, ke kuma kima ya mpamba.”
28 Ntangu ba kuwaka yawu, babakala yango fulukaka na nkele, mpe ba bandaka kuzonza na ndinga ya ngolo: “Artemise ya Baefeze ke nene!”
29 Na yawu, mbanza fulukaka na muvusu, mpe bawu nyonso kwendaka na mbangu na yinzo ya bansaka. Ba bendaka Gayuse na Aristarke, bantu ya Masedwane, ba yina vanda salaka nzyetolo na Polo.
30 Polo sosaka kukota kisika bantu vandaka, kasi bilandi pesaka ve yandi nzila.
31 Ata mpe bantwadisi ya nkaka ya bafeti mpe ya bansaka yina vanda sepela na yandi, filisaka yandi bantu mpe bondilaka yandi na kumeka ve kukota na yinzo ya bansaka.
32 Ya tsyeleka, na ndinga ya ngolo ba ya nkaka vanda zonza mambu mosi mpe ba ya nkaka mambu ya nkaka, samu muvusu kotaka na kimvuka nyonso, mpe mingi na kati ya bawu vanda zaba ve samu na yinki ba vukanaka kuna.
33 Ba basisaka Alezandre na kati ya bantu mingi yina. Bazwife vanda tula yandi na mantwala. Mpe Alezandre nangunaka diboko samu yandi vanda sosa kuzonzila mbote-mbote mambu yango na mantwala ya bantu.
34 Kasi ntangu ba kwizaka zaba ti yandi vandaka Zwife, bawu nyonso lutisaka bangunga kana zole na kuzonzaka na ndinga ya ngolo: “Artemise ya Baefeze ke nene!”
35 Na nsuka, ntangu muntu yina ke sonikaka bamambu ya bwala salaka ti bantu mingi yango kuma swi, yandi zonzaka: “Babakala ya Efeze, nani ya tsyeleka na kati ya bantu zaba ve ti mbanza ya Baefeze kele mukengi ya tempelo ya Artemise ya nene, mpe ya kiteki yina katukaka na mazulu mpe kubwaka na ntoto?
36 Samu ata muntu lenda tula ntembe na mambu yayi, beno me lunga kuzunisa ntima mpe kusala ve mambu na mbangu-mbangu.
37 Bantu yina beno me nata awa ke ve miyibi ya batempelo to bantu yina ke vwezaka nzambi ya beto ya kento.
38 Na yawu, kana Demetriyuse mpe bantu ya bisalu ya maboko yina ke kintwadi na yandi ke na mambu ya kufunda muntu, bilumbu ya kusambisa kele mpe baprefe* kele. Bika ba kwiza fundasana.
39 Kasi kana beno ke na sosaka kima ya nkaka na zulu ya mambu yayi, ba me fwana kuzenga yawu na lukutakanu ya luyalu ya mbanza.
40 Ya tsyeleka, mambu yina me salama bubu yayi lenda sala ti ba funda beto mutindu ba yina ke nataka bantu na kusala muvusu, samu beto ke ve na mambu ya kuzonza yina me sala ti beto sala muvusu yayi.”
41 Na manima ya kuzonza mambu yayi, yandi lombaka na kimvuka ya bantu na kumwangana.
Banote
^ To: “Vanda bika ve kusala yintu ngolo mpe vanda ndima ve.”
^ Ya kele kusala bamambu ya ngitukulu na ngolo ya bampeve ya yimbi.
^ Tala Yina ba me bwela A5.
^ Prefe vandaka Muroma yina vandaka mfumu ya kizunga. Tala Yina ya zola zonza.
