Bisalu ya Bantumwa 2:1-47
2 Ntangu kilumbu ya feti ya Pantekote vanda luta, ba vandaka bawu nyonso kintwadi kisika mosi.
2 Na mbala mosi, makelele mosi katukaka na zulu, mutindu makelele ya mupepe yina ke na bulaka ngolo, mpe makelele yango fulukaka na yinzo nyonso, kisika yina ba vandaka ya kuvanda.
3 Mpe baludimi mutindu ya tiya talanaka na bawu. Ya kabukaka, mpe ya kwendaka vanda na zulu ya mosi na mosi ya bawu.
4 Bawu nyonso fulukaka na mpeve ya santu mpe ba bandaka kuzonza na bandinga ya mutindu na mutindu, kaka mutindu mpeve ya santu vanda pesa bawu makoki ya kuzonza.
5 Na ntangu yina, Bazwife yina vandaka na buzitu mingi na Nzambi, yina katukaka na makanda nyonso ya ntoto vanda vanda na Yeruzalemi.
6 Na yawu, ntangu makelele yina salamaka, bantu mingi vukanaka. Bawu nyonso kamwaka samu konso muntu kuwaka bilandi kuzonza na ndinga ya yandi.
7 Ba yitukaka mingi mpe zonzaka: “Beno tala! Bantu nyonso yayi yina ke na zonzaka ke ve kwandi bantu ya Galile?
8 Na yawu, wapi mutindu mosi na mosi ya beto ke na kuwaka na ndinga ya yandi ya bwala?*
9 Bantu ya Partia, ya Mede, mpe ya Elame, bantu yina ke vandaka na Mezopotami, na Zude, mpe na Kapadose, na Ponti mpe na kizunga ya Aziya,
10 na Frizia mpe na Pamfili, na Ezipte mpe na babwala ya Libi yina ke pene-pene na Sirene, bantu yina katukaka na Roma, Bazwife mpe bantu yina ndimaka dibuundu ya Bazwife,
11 bantu ya Krete, mpe bantu ya Arabi, beto ke na kuwaka bawu kuzonza bamambu ya ngitukulu ya Nzambi, na bandinga ya beto.”
12 Ya tsyeleka, bawu nyonso yitukaka mingi mpe mayela manisaka bawu. Ba vanda zonza bawu na bawu: “Yinki mambu yayi zola zonza?”
13 Kasi ba ya nkaka vanda seka bawu mpe vanda zonza: “Ba me kola vinu ya sukadi.”*
14 Kasi Piere na bantumwa ya nkaka telamaka, mpe zonzaka na bantu yina na ndinga ya ngolo: “Babakala ya Zude mpe beno nyonso yina ke vandaka na Yeruzalemi, beno zaba mambu yayi mpe beno kuwa mbote-mbote mambu mu ke na zonzaka na beno.
15 Ya tsyeleka, bantu yayi me kola ve malafu mutindu beno ke na kanisaka, samu ya ke ngunga ya 9 ya suka.*
16 Kasi yayi ni mambu ba zonzaka na nzila ya mbikudi Yoele:
17 ‘Nzambi zonzaka, “Mpe na bilumbu ya nsuka, mu ke mwangisa ndambu ya mpeve ya munu na zulu ya bantu ya mutindu nyonso, mpe bana ya beno ya babakala mpe ya bakento ke bikula, mpe bantwenya ya beno ya babakala ke tala bimona-meso, mpe biboba ya beno ya babakala ke kuzwa bandosi,
18 mpe ata na zulu ya bisadi ya munu ya babakala mpe na zulu ya bisadi ya munu ya bakento, mu ke mwangisa ndambu ya mpeve ya munu na bilumbu yina, mpe ba ke bikula.
19 Mpe mu ke sala bimangu* na mazulu mpe bidimbu na ntoto. Ya ke vanda na menga, tiya, mpe matuti ya mulinga.
20 Ntangu ke kuma kitombi, mpe ngonda ke kuma menga, tekila kilumbu ya nene mpe ya ngitukulu ya Yehova* kwiza.
21 Mpe muntu nyonso yina ke bokila nkumbu ya Yehova* ke vuuka.”’
22 “Babakala ya Izraele, beno kuwa mambu yayi: Yesu muntu ya Nazareti vandaka muntu yina Nzambi filisaka beno. Ya talanaka pwelele na nzila ya bisalu ya ngitukulu, bimangu, mpe bidimbu yina Nzambi salaka na nzila ya yandi, na kati ya beno, kaka mutindu beno mosi beno zaba.
23 Muntu yayi, yina ba pesaka na maboko ya bambeni ya yandi na kutadilaka mukanu* ya Nzambi mpe mambu yina yandi zabaka na mantwala, beno tulaka yandi na zulu ya yinti na nzila ya maboko ya bantu yina ke vwezaka musiku, mpe beno kufwaka yandi.
24 Kasi Nzambi vumbulaka yandi na lufwa, na kukatulaka yandi na mpasi* ya lufwa, samu lufwa vandaka ve na ngolo ya kukanga yandi.
25 Ya tsyeleka, Davidi zonzaka samu na yandi: ‘Mu ke tulaka ntangu nyonso Yehova* na mantwala ya munu,* samu yandi ke na diboko ya munu ya bakala samu mu ningana ata fioti ve.
26 Ni na yawu, ntima ya munu me kuma na kilengi mpe ludimi ya munu me sepela mingi. Mpe mu* ke zinga na kivuvu,
27 samu nge ke bika ve munu* na kati ya Ndyamu,* mpe nge ke bika ve ti muntu ya nge ya kukwikama bola.
28 Nge me lakisa munu banzila ya luzingu. Nge me fulusa munu na kilengi mingi na mantwala ya nge.’*
29 “Bampangi, beno bika mu zabisa beno na pwelele nyonso, mambu yina me tadila mfumu ya dikanda, Davidi. Yandi kufwaka mpe ba kundaka yandi mpe ndyamu ya yandi ke na kati ya beto tii bubu yayi.
30 Samu yandi vandaka mbikudi mpe yandi zabaka ti Nzambi pesaka yandi nsilulu, mpe zengaka ndefi ti yandi ke vandisa mosi ya bana ya yandi* na kiti ya yandi ya kimfumu,
31 yandi talaka na mantwala mvumbukulu ya Kristo, mpe zonzilaka yawu. Yandi zonzaka ti, ba zimbanaka ve yandi na kati ya Ndyamu* mpe nzutu ya yandi bolaka ve.
32 Nzambi vumbulaka Yesu yango, mpe beto nyonso ke bambangi ya mambu yayi.
33 Ni na yawu, samu ba zangulaka yandi na diboko ya bakala ya Nzambi, mpe yandi kuzwaka na sika ya Tata, mpeve ya santu yina ba pesaka nsilulu, yandi me mwangisa yawu na zulu ya beto mutindu beno ke na talaka mpe ke na kuwaka.
34 Ya tsyeleka, Davidi kwendaka ve na zulu, kasi yandi mosi zonzaka, ‘Yehova* zonzaka na Mfumu ya munu: “Vanda na diboko ya munu ya bakala
35 tii ntangu mu ke tula bambeni ya nge na yisi ya makulu ya nge.”’
36 Na yawu, bika ti bantu nyonso ya Izraele zaba mbote-mbote ti Nzambi kumisaka yandi Mfumu mpe Kristo, Yesu yango yina beno kufwaka na zulu ya yinti.”
37 Ntangu ba kuwaka mambu yayi, ntima ya bawu lwalaka, mpe ba zonzaka na Piere mpe na bantumwa ya nkaka: “Bampangi, yinki beto me bonga kusala?”
38 Piere zonzaka na bawu: “Beno balula bantima mpe bika ti mosi na mosi na kati ya beno kuzwa mbotokolo na nkumbu ya Yesu samu beno kuzwa mulemvo ya masumu ya beno, mpe beno ke kuzwa mpeve ya santu yina Nzambi ke pesaka ya mpamba.
39 Mpamba ve, nsilulu ke samu na beno, mpe samu na bana ya beno, samu na ba yina nyonso ke ntama, mpe samu na ba yina nyonso Yehova* Nzambi ya beto ke bokila na sika ya yandi.”
40 Mpe na bamambu mingi ya nkaka yina yandi vanda zonza, yandi pesaka kimbangi ya kulunga mpe vanda kindisa bawu: “Beno bika bantu ya yimbi yayi samu beno kufwa ve.”
41 Na yawu, ba yina ndimaka na kilengi nyonso bamambu yina yandi vanda zonza kuzwaka mbotokolo. Kilumbu yina, bantu* kana 3 000 bwelamaka na bilandi.
42 Mpe ba vanda bika ve kutula dikebi na malongi ya bantumwa, na kuvukana kintwadi,* na kudya, mpe na kusambila.
43 Ya tsyeleka, bantu* nyonso fulukaka na boma mpe bantumwa vanda sala bimangu mpe bidimbu mingi.
44 Ba yina nyonso kumaka bandimi vandaka kintwadi mpe ba vanda vukisa bima nyonso yina vandaka na bawu.
45 Ba vanda tekisa bima ya bawu mpe bimvwama ya bawu, mpe ba vanda kabula mbongo yina ba vanda kuzwa na bantu nyonso, na kutadilaka bansatu ya muntu na muntu.
46 Kilumbu na kilumbu, ba vanda vukana ntangu nyonso na tempelo na dikanisi mosi. Ba vanda kudya na bayinzo mingi mpe vanda kabula madya na nsayi nyonso mpe na ntima mosi.
47 Ba vanda kembila Nzambi mpe bantu nyonso vanda ndima bawu. Kaka na ntangu yina, Yehova* vanda bwela bawu konso kilumbu ba yina vanda vuuka.
Banote
^ To: “Ndinga yina yandi butukaka.”
^ To: “Vinu ya malu-malu.”
^ Na Greke: “Ngunga ya tatu ya ntangu.”
^ To: “Bidimbu yina ke lakisaka bamambu yina ke kwiza.”
^ Tala Yina ba me bwela A5.
^ Tala Yina ba me bwela A5.
^ To: “Dilongi.”
^ To ya lenda vanda: “Basinga.”
^ Tala Yina ba me bwela A5.
^ To: “Na mantwala ya meso ya munu.”
^ Na Greke: “Musuni ya munu.”
^ To: “Mwela ya munu.”
^ To: “Hadesi.” Ya ke ndyamu ya bantu nyonso. Tala Yina ya zola zonza.
^ To: “Na mantwala ya kizizi ya nge.”
^ Na Greke: “Mosi na kati ya mbuma ya luketo ya yandi.”
^ To: “Hadesi.” Ya ke ndyamu ya bantu nyonso. Tala Yina ya zola zonza.
^ Tala Yina ba me bwela A5.
^ Tala Yina ba me bwela A5.
^ To: “Bamwela.”
^ To: “Na kukabula bima bawu na bawu.”
^ To: “Bamwela.”
^ Tala Yina ba me bwela A5.
