Bisalu ya Bantumwa 20:1-38
20 Ntangu muvusu manisaka, Polo bokilaka bilandi mpe yandi kindisaka bawu. Na manima yandi pesaka bawu yeyeye, mpe yandi kwendaka na Masedwane.
2 Na manima ya kuluta na babwala yina, mpe ya kukindisa ba yina vandaka kuna, yandi kumaka na Grese.
3 Yandi lutisaka bangonda tatu kuna, kasi ntangu yandi vanda sosa kukota na masuwa samu na kukwenda na Siri, yandi kuwaka ti Bazwife salaka mfundu samu na kufwa yandi. Na yawu, yandi bakaka mukanu ya kuluta na nzila ya Masedwane samu na kuvutuka.
4 Ba yina vanda tambula na yandi vandaka Sopatere mwana ya Pyruse ya bwala ya Bere, Aristarke na Sekunduse, bantu ya Tesalonika, Gayuse muntu ya Derbe, Timote mpe Tishike na Trofime bantu ya kizunga ya Aziya.
5 Babakala yayi tekilaka mpe vanda vingila beto na Trowase.
6 Kasi beto bakaka nzila ya maza na Filipi na manima ya mukembo ya Mampa yina ke ve na levire. Bilumbu 5 lungaka ve, mpe beto kutanaka na bawu na Trowase. Beto lutisaka bilumbu 7 kuna.
7 Kilumbu ya ntete ya lumingu, ntangu beto vukanaka samu na kudya, Polo bandaka kuzonza na bawu, samu yandi zola kwenda kilumbu yina zola landa. Yandi bendaka diskure ya yandi tii na kati-kati ya mpimpa.
8 Bamwinda mingi vandaka na kisika ya zulu ya yinzo, kisika yina beto vukanaka.
9 Ntwenya mosi ya bakala na nkumbu ya Etishe vandaka ya kuvanda na fenetre, mpe yandi kwendilaka pongi ntangu Polo vanda bika ve kuzonza. Mpe samu pongi ya ngolo nataka yandi, yandi katukaka na etaje ya tatu mpe kubwaka na ntoto. Ntangu ba nangunaka yandi, yandi vandaka ya kufwa.
10 Ntangu Polo kwendaka na yisi, yandi ladilaka yandi, bakaka yandi na maboko ya yandi mpe zonzaka: “Beno bika makelele, yandi ke moyo.”*
11 Na manima, yandi vutukaka na zulu, yandi zengaka dimpa mpe bandaka kudya. Yandi zonzaka dyaka mingi tii na suka-suka, mpe na manima, yandi kwendaka.
12 Ba nataka mwana ya bakala yina vandaka moyo mpe ba kumaka na kilengi ya kulutila.
13 Beto kotaka na masuwa mpe beto tekilaka na bwala ya Asosi, kisika yina beto zola baka Polo na masuwa. Mpamba ve, yandi lombaka beto na kusala mutindu yina samu yandi vanda sosa kukwenda kuna na makulu.
14 Ntangu yandi kutanaka na beto na Asosi, beto kotisaka yandi na masuwa mpe beto kwendaka na Mitileni.
15 Kilumbu yina landaka, beto katukaka kuna na masuwa, mpe beto kumaka pene-pene na Kiyo. Kilumbu yina landaka, beto telamaka fioti na Samosi, mpe kilumbu yina landaka dyaka, beto kumaka na Mileti.
16 Polo bakaka mukanu ya kuluta na lweka ya Efeze samu na kulutisa ve ntangu mingi na kizunga ya Aziya. Yandi vanda sala mbangu samu kana ya lenda salama, yandi lenda kukuma na Yeruzalemi na kilumbu ya feti ya Pantekote.
17 Kasi na Mileti, yandi filisaka bantu na Efeze samu ba kwenda bokila bakuluntu ya kimvuka.
18 Ntangu ba kumaka kisika yina yandi vandaka, yandi zonzaka na bawu: “Beno me zaba mbote-mbote mutindu mu me dyatila na kati ya beno, kubanda kilumbu ya ntete yina mu tulaka dikulu na kizunga ya Aziya.
19 Mu sadilaka Mfumu na kukuluka nyonso mutindu ngaamba na mansangasa mpe na kati ya banzomono yina kuminaka munu samu na bamfundu yina Bazwife salaka samu na kufwa munu.
20 Mpe mu mangaka ve kuzonzila beno mambu nyonso yina vandaka mbote samu na beno,* kulonga beno na meso ya bantu nyonso mpe na yinzo na yinzo.
21 Kasi mu pesaka mbote-mbote kimbangi na Bazwife mpe na Bagreke ti ba me lunga kubalula bantima na sika ya Nzambi mpe kukwikila na Mfumu ya beto Yesu.
22 Kasi awa beno kuwa! Mpeve ke na nataka munu na kukwenda na Yeruzalemi, ata ti mu zaba ve mambu yina ke na vingilaka munu kuna.
23 Mu zaba kaka ti na konso mbanza, mpeve ya santu ke na bikaka ve kukebisa munu ti, boloko mpe bampasi ke na vingilaka munu.
24 Ata mpila yina, mu ke na talaka ve ti luzingu* ya munu ke mfunu. Mambu ya mfunu ke ti mu manisa kukima mbangu yina mu ke na kimaka mpe kisalu yina Mfumu Yesu pesaka munu, ya kupesa mbote-mbote kimbangi samu na nsangu ya mbote ya ntima ya kulutila mbote ya Nzambi.
25 “Mu samunaka Kimfumu ya Nzambi na beno nyonso. Kasi banda ntangu yayi, mu zaba ti ata muntu mosi ve na kati ya beno ke tala dyaka kizizi ya munu.
26 Na yawu, kilumbu ya bubu yayi, beno ke bambangi ti mu kele bunkete samu na menga ya bantu nyonso,
27 samu mu mangaka ve kuzabisa beno mukanu* nyonso ya Nzambi.
28 Beno keba mbote-mbote beno mosi mpe mameme nyonso ya Nzambi, yina mpeve ya santu me tula beno bakengi na zulu ya bawu, samu na kukengidila dibuundu ya Nzambi yina yandi sumbaka na menga ya Mwana ya yandi mosi.
29 Mu zaba ti na manima ya kukwenda ya munu, bayimbwa ya brusu ya ntima ya yimbi ke kota na kati-kati ya beno, mpe ba ke bakila ve mameme na lembami.
30 Mpe na kati-kati ya beno mosi, bantu ke basika mpe ke longa mambu ya luvunu samu na kubenda bilandi na kulanda bawu.
31 “Na yawu beno vanda ekenge, mpe beno zimbana ve ti na kati ya bamvula tatu, mpimpa ntangu, mu vanda bika ve kukebisa mosi na mosi na kati ya beno na mansangasa.
32 Mpe ntangu yayi mu ke na bikaka beno na maboko ya Nzambi mpe ya dyambu ya ntima ya yandi ya kulutila mbote, dyambu yina lenda tunga beno mpe kupesa beno dikabu na kati-kati ya bantu nyonso yina ba me kumisa santu.
33 Mu lulaka ve arza, wolo to bilele ya muntu.
34 Beno zaba beno mosi ti maboko yayi lungisaka bansatu ya munu mpe ya ba yina vandaka na munu.
35 Na mambu nyonso, mu lakisaka beno ti beno me fwana kusala ngolo mutindu yayi samu na kusadisa ba yina ke ya kulemba, mpe beno me fwana kubambuka mambu yina Mfumu Yesu yandi mosi zonzaka: ‘Kilengi ya kukabula ke lutilaka ya kuzwa.’”
36 Na manima ya kuzonza mambu yayi, yandi fukamaka kintwadi na bawu nyonso mpe yandi sambilaka.
37 Ya tsyeleka, bawu nyonso dilaka mingi, mpe kubwaka Polo na nzutu,* mpe ba pesaka yandi babizu na luzolo nyonso,*
38 samu ba vandaka na kyadi mingi samu na mambu yina yandi zonzaka ti ba ke tala dyaka ve kizizi ya yandi. Na manima ba kwendaka bika Polo na masuwa.
Banote
^ To: “Mwela ya yandi ke na kati ya yandi.”
^ To: “Vandaka samu na mbote ya beno.”
^ To: “Mwela.”
^ To: “Dilongi.”
^ Na Greke: “Bwidilaka Polo na laka.”
^ To: “Na lembami nyonso.”
