Bisalu ya Bantumwa 21:1-40
21 Na manima ya kukabuka na bawu na mpasi, beto bakaka nzila ya nzadi ya mungwa, beto kwendaka mbala mosi mpe beto kumaka na Kose. Kilumbu yina landaka, beto kumaka na Roda, mpe katuka kuna, beto kwendaka na Patara.
2 Ntangu beto kuzwaka masuwa yina vanda kwenda na Finisi, beto kotaka na kati mpe beto kwendaka.
3 Ntangu beto kumaka pene-pene na kisanga ya Shipre, beto bikaka yawu na diboko ya kento, beto bakaka nzila ya Siri mpe beto kumaka na Tire, samu ba zola basisa bima yina vandaka na kati ya masuwa kuna.
4 Beto sosaka bilandi mpe ntangu beto kuzwaka bawu, beto lutisaka bilumbu 7 kuna. Kasi na nzila ya mpeve ya santu, ba vanda bika ve kuzonza na Polo na kutula ve dikulu na Yeruzalemi.
5 Ntangu bilumbu yina beto zola lutisa kuna manisaka, beto kwendaka, beto landaka nzila ya beto, mpe bampangi nyonso, na bakento mpe bana, kwendaka filisa beto tii na ngaanda ya bwala. Beto fukamaka na zyelo ya nzadi ya mungwa, beto sambilaka
6 mpe beto pesanaka yeyeye. Na manima, beto kotaka na masuwa, mpe bawu, ba vutukaka na bayinzo ya bawu.
7 Beto katukaka na Tire mpe beto kumaka na Tolemayise. Beto pesaka bampangi mbote, mpe beto lutisaka kilumbu mosi na bawu.
8 Kilumbu yina landaka, beto katukaka kuna mpe beto kumaka na Sezarea. Beto kotaka na yinzo ya Filipe, musamuni ya nsangu ya mbote. Yandi vandaka mosi ya babakala 7, mpe beto bikanaka na yandi.
9 Bakala yango vandaka na bana ya bakento yiya yina vandaka ve ya kukwela,* mpe yina vanda bikulaka.
10 Ntangu beto lutisaka bilumbu mingi kuna, mbikudi mosi na nkumbu ya Agabuse katukaka na Zude mpe kulumukaka.
11 Yandi kwizaka na sika ya beto, yandi bakaka singa ya luketo ya Polo, yandi kangaka makulu mpe maboko ya yandi mosi na yawu mpe zonzaka: “Yayi ni mambu mpeve ya santu me zonza, ‘Muntu ya kuzwa singa ya luketo yayi, ba ke kanga yandi mutindu yayi na Bazwife na Yeruzalemi, mpe ba ke pesa yandi na maboko ya bantu ya makanda.’”
12 Ntangu beto kuwaka yawu, beto, mpe bantu yina vandaka kuna bandaka kubondila yandi na kukwenda ve na Yeruzalemi.
13 Na yawu, Polo zonzaka na bawu: “Samu na yinki beno ke na dilaka mpe beno ke na sosaka kulembisa munu ntima? Beno vanda na kundima ti mu ke ya kubongama, kaka ve samu ba kanga munu basinga, kasi mpe na kufwa na Yeruzalemi samu na nkumbu ya Mfumu Yesu.”
14 Samu beto vanda lenda ve kundimisa yandi, beto bikaka,* mpe beto zonzaka: “Bika ti luzolo ya Yehova* salama.”
15 Na manima ya bilumbu yina, beto bongamaka samu na nzyetolo, mpe beto bandaka kukwenda na Yeruzalemi.
16 Bilandi ya nkaka ya Sezarea kwendaka mpe na beto. Ba nataka beto na sika ya Nazoni, muntu ya Shipre, mosi ya bilandi ya ntete. Ni na yinzo ya yandi beto zola lala.
17 Ntangu beto kumaka na Yeruzalemi, bampangi yambaka beto na kilengi nyonso.
18 Kasi kilumbu yina landaka, Polo kwendaka na beto na sika ya Zaki, mpe bakuluntu nyonso vandaka kuna.
19 Yandi pesaka bawu mbote mpe bandaka kuzonzila bawu mosi na mosi ya bamambu yina Nzambi salaka na nzila ya kisalu ya yandi na kati ya makanda.
20 Na manima ya kuwa bamambu yayi, ba bandaka kukembila Nzambi. Kasi ba zonzaka na yandi: “Mpangi, nge ke na talaka faso mafunda ya Bazwife ke na kwikilaka, mpe bawu nyonso ke na manzangu samu na Musiku.
21 Kasi ba me kuwa ti nge ke na longaka Bazwife nyonso yina ke na kati ya makanda na kubalukila Musiku ya Moyize, ti nge ke na zonzaka na bawu na kuzengisa ve bana ya bawu kibakala, mpe na kulanda ve bansalulu yina bantu ke landaka.
22 Na yawu, yinki beto lenda sala samu na mambu yayi? Yawu ti, ba ke kuwa ti nge me kuma awa.
23 Sala mambu yayi beto ke na zonzaka na nge: Beto ke na babakala yiya yina salaka nsilulu.
24 Baka babakala yango mpe kwenda vedisa nzutu kintwadi na bawu mutindu Musiku ke lombaka, mpe futila bawu mbongo samu ba katula bawu bansuki. Na yawu, bantu nyonso ke zaba ti mambu yina ba kuwaka na yina me tadila nge ke ve ya tsyeleka, kasi ti nge ke dyatilaka na mutindu yina me fwanana, mpe ti nge mpe ke zitisaka Musiku.
25 Na yina me tadila bandimi yina ke na kati ya makanda, beto filisaka bawu mukanda samu na kuzabisa bawu mukanu yina beto bakaka, ti ba me fwana kumanga bima yina ba pesaka na munkayulu na biteki, menga, bibulu yina ba me kufwa na kukangaka kupema ya bawu* mpe kinsuza.”*
26 Kilumbu yina landaka, Polo bakaka bantu yango, mpe kwendaka vedisa nzutu kintwadi na bawu mutindu Musiku ke lombaka yawu. Yandi kotaka na tempelo, samu na kuzabisa wapi ntangu bilumbu ya kuvedisa nzutu zola manisa, mpe wapi ntangu ba zola pesa dikabu samu na mosi na mosi ya bawu.
27 Ntangu bilumbu 7 yango zola manisa, Bazwife ya Aziya talaka Polo na tempelo. Na yawu, ba nataka bantu mingi yina vandaka kuna na kusala muvusu, mpe ba bwilaka yandi.
28 Ba vanda zonza na ndinga ya ngolo: “Bantu ya Izraele, beno kwiza sadisa beto! Ni bakala yayi ke na longaka bantu nyonso ya bisika nyonso na kutelemina bantu ya beto, Musiku mpe kisika yayi. Mpe na zulu ya yawu, yandi me kotisa ata mpe Bagreke na kati ya tempelo mpe yandi me kumisa kisika ya santu yayi mvindu.”
29 Ba zonzaka mambu yayi samu ba vanda me tala Trofime muntu ya Efeze na kati ya mbanza na Polo, mpe ba vanda kanisa ti ni Polo kotisaka yandi na kati ya tempelo.
30 Mvwanzi kotaka na bwala nyonso. Bantu kimaka mbangu na tempelo. Ba kangaka Polo mpe ba bendaka yandi na ngaanda ya tempelo, mpe na mbala mosi ba kangaka bamwelo.
31 Ntangu ba vanda sosa kufwa yandi, nsangu kumaka na komanda ya basoda, ti Yeruzalemi nyonso vandaka na muvusu.
32 Na mbala mosi yandi bakaka basoda mpe bamfumu ya basoda, mpe yandi kimaka mbangu na sika ya bawu. Ntangu ba talaka komanda ya basoda mpe basoda, ba bikaka kubula Polo.
33 Komanda ya basoda kumaka pene-pene, yandi kangaka Polo mpe zonzaka ti ba kanga yandi basinga ya bisengo zole. Na manima, yandi yufulaka nani yandi vandaka mpe yinki yandi salaka.
34 Kasi na kati ya bantu mingi yina vandaka kuna, ba ya nkaka vanda zonza na ndinga ya ngolo mambu mosi mpe ba ya nkaka mambu ya nkaka. Samu makelele vandaka mingi na kati ya bantu, yandi lendaka ve kuzaba mambu yina salamaka. Na yawu, yandi tumisaka ba nata yandi na lupangu ya basoda.
35 Kasi ntangu Polo kumaka na eskalye, basoda nangunaka yandi samu bantu vanda sosa kutalisa yandi mpasi.
36 Ya tsyeleka, bantu mingi vanda landa bawu mpe vanda zonza na ndinga ya ngolo: “Kufwa yandi!”
37 Ntangu ba zola kotisa yandi na lupangu ya basoda, Polo zonzaka na komanda ya basoda: “Mu lenda zonzila nge mwa mambu?” Yandi vutulaka: “Nge ke zonzaka Greke?
38 Ni nge ve muntu ya Ezipte yina ntama mingi ve nataka bantu na kusala muvusu, mpe yina nataka na ntoto ya kuyuma bantu 4 000 yina vandaka na bambele?”
39 Polo zonzaka na yandi: “Mu ke Zwife ya Tarse, na Silisi, muntu ya bwala yina ke ya kuzabana. Mulemvo ya nge, bika mu zonza na bantu.”
40 Ntangu komanda ya basoda pesaka yandi nzila ya kuzonza, Polo telamaka na zulu ya eskalye, mpe yandi salaka kidimbu na diboko ya yandi samu bantu vanda swi. Ntangu bantu nyonso kumaka swi, yandi zonzaka na bawu na ndinga ya Ki-Ebre:
Banote
^ Na Greke: “Yina zabaka ve babakala.”
^ Na Greke: “Beto kumaka swi.”
^ Tala Yina ba me bwela A5.
^ To: “Yina ba me kufwa kasi menga ya bawu me tanga ve.”
^ Na ndinga ya Greke, por·nei′a. Tala Yina ya zola zonza.
