Bisalu ya Bantumwa 22:1-30
22 “Babakala, bampangi mpe batata, beno kuwa mambu yayi yina mu ke zabisa beno samu na kunwanina nzutu ya munu.”
2 Ntangu ba kuwaka yandi vanda zonza na bawu na ndinga ya Ki-Ebre, ba kumaka dyaka swi ya kulutila. Na yawu yandi zonzaka:
3 “Mu ke Zwife. Mu butukaka na Tarse ya Silisi, kasi mu kotaka na mbanza yayi, mpe ni Gamaliele muntu longaka munu. Ba longaka munu na kuzitisa mbote-mbote Musiku ya Moyize, mpe mu vandaka na tiya samu na Nzambi, kaka mutindu beno nyonso bubu yayi.
4 Mu nyokolaka bantu yina ke landaka Nzila yayi mpe mu kufwaka bawu. Mu vanda kanga babakala mpe bakento basinga mpe kutula bawu na boloko.
5 Nganga-nzambi ya nene mpe kimvuka nyonso ya bakuluntu lenda pesa kimbangi na mambu yayi. Mu kuzwaka mpe na sika ya bawu mikanda samu na bampangi ya Damase mpe mu vandaka na nzila samu na kukwenda kanga ba yina vandaka kuna, mpe kunata bawu ya kukangama na basinga na Yeruzalemi, samu ba pesa bawu kitumbu.
6 “Kasi ntangu mu vanda kwenda mpe mu kumaka ntama mingi ve na Damase, pene-pene ya midi, na mbala mosi, nsemo mosi ya ngolo katukaka na zulu mpe ngengaka zinga-zinga ya munu.
7 Mu kubwaka na ntoto mpe mu kuwaka ndinga yina zonzaka na munu, ‘Solo, Solo, samu na yinki nge ke na nyokolaka munu?’
8 Mu vutulaka, ‘Mfumu, nge ke nani?’ Yandi zonzaka na munu, ‘Mu ke Yesu, muntu ya Nazareti, yina nge ke na nyokolaka.’
9 Bantu yina vandaka na munu talaka nsemo yango, kasi ba vanda kuwa ve ndinga ya muntu yina vanda zonza na munu.
10 Na yawu mu zonzaka: ‘Mfumu, yinki mu me fwana kusala?’ Mfumu zonzaka na munu: ‘Telama, kwenda na Damase, mpe kuna ba ke zonzila nge mambu nyonso yina ba me zenga ti nge me fwana kusala.’
11 Samu mu vanda lenda ve kutala ata kima samu na ngolo ya nsemo yina, bantu yina vandaka na munu simbaka munu na diboko mpe nataka munu na Damase.
12 “Ananiase, bakala mosi yina vanda kimaka Nzambi mpe vanda landaka Musiku, mpe yina vandaka na nkumbu ya mbote na sika ya Bazwife nyonso yina vanda vandaka kuna,
13 kwizaka na sika ya munu. Yandi telamaka pene-pene ya munu mpe zonzaka na munu: ‘Solo, mpangi ya munu, bika ti nge tala dyaka.’ Kaka na ntangu yina, mu nangunaka meso mpe mu talaka yandi.
14 Yandi zonzaka: ‘Nzambi ya bankooko ya beto soolaka nge samu nge longoka kuzaba luzolo ya yandi, mpe nge tala muntu ya lunungu mpe nge kuwa ndinga ya yandi,
15 samu nge me fwana kuvanda mbangi ya yandi samu na kuzabisa bantu nyonso mambu yina nge me tala mpe nge me kuwa.
16 Ntangu yayi, yinki nge ke na vingilaka? Telama mpe kuzwa mbotokolo mpe bokila nkumbu ya yandi samu Nzambi lemvokila masumu ya nge.’
17 “Kasi ntangu mu vutukaka na Yeruzalemi mpe mu vanda sambila na kati ya tempelo, mu kuzwaka kimona-meso,
18 mpe mu talaka yandi vanda zonza na munu: ‘Sala mbangu, katuka na nswalu na Yeruzalemi, samu ba ke ndima ve kimbangi ya nge na yina me tadila munu.’
19 Mu zonzaka: ‘Mfumu, bawu mosi ba zaba mbote-mbote ti mu vanda kwendaka na mosi na mosi ya bayinzo ya lusambu ya Bazwife samu na kutula na boloko mpe kubula ba yina vanda kwikila na nge,
20 mpe ntangu ba mwangisaka menga ya mbangi ya nge Etiene, mu vandaka ya kutelama kuna, mu ndimaka yawu mpe mu vanda bumba bilele ya bantu yina vanda kufwa yandi.’
21 Ata mpila yina, yandi zonzaka na munu: ‘Kwenda, samu mu ke filisa nge na sika ya makanda yina ke ntama.’”
22 Ba kuwaka yandi tii ntangu yandi zonzaka mambu yayi. Na manima ba zangulaka bandinga mpe ba zonzaka: “Beno kufwa muntu ya mutindu yayi. Yandi me bonga ve kuvanda moyo!”
23 Samu ba vanda zonza na ndinga ya ngolo, vanda losa bilele ya bawu mpe vanda losa fundu-fundu na zulu,
24 komanda ya basoda tumisaka ba nata Polo na lupangu ya basoda. Yandi zonzaka ba bula yandi bashikoti samu yandi zonza, samu yandi vanda sosa kuzaba mbote-mbote samu na yinki bantu vanda zonza na ndinga ya ngolo mutindu yina samu na Polo.
25 Kasi ntangu ba lalisaka yandi samu na kubula yandi, Polo zonzaka na mfumu ya basoda yina vanda ya kutelama kuna: “Musiku ke pesaka kwandi beno nzila ya kubula Muroma yina ba me sambisa ve?”*
26 Ntangu mfumu ya basoda kuwaka yawu, yandi kwendaka na sika ya komanda mpe zabisaka yandi yawu. Yandi zonzaka na yandi: “Yinki nge ke sala? Muntu yayi ke Muroma.”
27 Na yawu, komanda kwizaka pene-pene ya Polo mpe yufulaka yandi: “Zonzila munu, nge ke Muroma?” Yandi zonzaka: “Ee.”
28 Komanda zonzaka: “Mu futaka mbongo mingi samu na kuzwa muswa ya kuvanda muntu ya Roma.” Polo zonzaka: “Kasi munu, mu butukaka na yawu.”
29 Kaka na ntangu yina, bantu yina vanda sosa kubula yandi bashikoti samu yandi zonza, katukaka pene-pene ya yandi. Mpe ntangu komanda kwizaka zaba ti Polo vanda Muroma, yandi kumaka na boma samu yandi kangaka yandi basinga ya bisengo.
30 Kilumbu yina landaka, samu yandi vandaka na nsatu ya kuzaba ya tsyeleka samu na yinki Bazwife vanda funda Polo, yandi fungulaka yandi mpe tumisaka bamfumu ya banganga-nzambi mpe Kimvuka ya nene nyonso ya bazenga mambu ya Bazwife* na kuvukana. Na manima, yandi kulumusaka Polo mpe telemisaka yandi na kati-kati ya bantu.
