Bisalu ya Bantumwa 23:1-35
23 Polo talaka mbote-mbote Kimvuka ya nene ya bazenga mambu ya Bazwife* mpe zonzaka: “Babakala, bampangi, mu me dyatila na mantwala ya Nzambi na ntima ya kuvedila tii bubu yayi.”
2 Na mbala mosi, nganga-nzambi ya nene Ananiase tumisaka ba yina vandaka ya kutelama pene-pene ya Polo na kubula yandi mbata na yinwa.
3 Na yawu Polo zonzaka na yandi: “Nzambi ke bula nge, nge kibaka yina ba me kumisa mpembe. Nge ke ya kuvanda awa na kusambisa munu na kulandaka Musiku, mpe nge mosi ke na zitisaka ve Musiku na kuzonzaka ti ba bula munu.”
4 Ba yina vandaka ya kutelama kuna zonzaka: “Nge ke na fingaka nganga-nzambi ya nene ya Nzambi?”
5 Polo zonzaka: “Bampangi, mu zabaka ve ti yandi ke nganga-nzambi ya nene. Ntembe ve, ya ke ya kusonama, ‘Nge me fwana kuzonzila ve yimbi ya mfumu ya dikanda ya nge.’”
6 Polo zabaka ti kitini mosi ya Kimvuka ya nene ya bazenga mambu ya Bazwife vandaka na Basaduse, mpe ya nkaka na Bafarize. Na yawu yandi zonzaka na bawu na ndinga ya ngolo: “Babakala, bampangi, mu ke Mufarize, mwana ya Bafarize. Ya ke ni samu na kivuvu ya mvumbukulu ya bantu ya kufwa ba ke na sambisaka munu.”
7 Ntangu yandi zonzaka mambu yayi, Bafarize na Basaduse bandaka kuswana mpe ba kabukaka.
8 Ya tsyeleka, Basaduse ke zonzaka ti mvumbukulu ya bantu ya kufwa kele ve, bambazi kele ve, mpe bampeve kele ve. Kasi Bafarize ke ndimaka* mambu nyonso yayi.
9 Na yawu, muvusu kumaka dyaka ngolo ya kulutila. Mpe milongisi ya Musiku ya nkaka yina vandaka na kimvuka ya Bafarize telamaka mpe bandaka kuswana na ngolo nyonso, na kuzonzaka: “Beto ke na talaka ata mambu ya yimbi na muntu yayi, kasi kana mpeve to mbazi zonzaka na yandi . . .”
10 Ntangu kuswana kumaka dyaka ngolo, komanda ya basoda kumaka na boma ti ba zenga Polo na bitini. Yandi tumisaka basoda na kukulumuka samu na kukatula Polo na kati-kati ya bantu, mpe kunata yandi na lupangu ya basoda.
11 Kasi mpimpa yina landaka, Mfumu telamaka pene-pene ya yandi mpe zonzaka: “Vanda na bukindi, samu kaka mutindu nge vanda me pesa mbote-mbote kimbangi samu na munu na Yeruzalemi, mutindu mosi mpe nge ke pesa kimbangi na Roma.”
12 Ntangu bwisi kutsyaka, Bazwife salaka mfundu mpe ba kudyaka ndefi ti ba ke kudya ve mpe ke kunwa ve kana ba kufwa ve Polo.
13 Ba yina salaka mfundu mpe kudyaka ndefi yayi vandaka bantu kuluta 40.
14 Bantu yango kwendaka na sika ya bamfumu ya banganga-nzambi mpe ya bakuluntu mpe zonzaka na bawu: “Beto me kudya ndefi ti beto ke kudya ata kima kana beto kufwa ve Polo.
15 Na yawu, beno, kintwadi na Kimvuka ya nene ya bazenga mambu ya Bazwife, beno zonza na komanda na kunatina beno yandi. Beno sala mutindu beno ke na sosaka kuzaba mbote-mbote mambu ya yandi, kasi tekila yandi kuma pene-pene, beto ke vanda ya kubongama samu na kufwa yandi.”
16 Ntyo, mwana ya kibusi ya Polo kuwaka mfundu yina ba salaka. Yandi kotaka na lupangu ya basoda mpe kwendaka zonzila yawu na Polo.
17 Na yawu, Polo bokilaka mosi ya bamfumu ya basoda mpe zonzaka na yandi: “Nata ntwenya ya bakala yayi na komanda ya basoda samu yandi ke na mambu ya kuzonzila yandi.”
18 Yandi nataka yandi na komanda ya basoda mpe zonzaka: “Polo, muntu yina ke na boloko me bokila munu mpe me lomba na munu na kunatina nge ntwenya ya bakala yayi samu yandi ke na mambu ya kuzonzila nge.”
19 Komanda ya basoda simbaka yandi na diboko, bendaka yandi na lweka, mpe yufulaka yandi: “Wapi mambu nge ke na sosaka kuzonza na munu?”
20 Yandi vutulaka: “Bazwife me wisana samu na kulomba na nge ti mbasi nge nata Polo na mantwala ya Kimvuka ya nene ya bazenga mambu ya Bazwife, mutindu ba ke na nsatu ya kuzaba mbote-mbote mambu ya yandi.
21 Kasi kuwa bawu ve, samu bantu ya bawu kuluta 40 ke na vingilaka yandi ya kubumbana, mpe ba kudyaka ndefi ti ba ke kunwa ve mpe ke kudya ve kana ba kufwa ve yandi. Awa, ba ke ya kubongama, mpe ba ke na vingilaka kaka nge pesa bawu nzila.”
22 Na yawu, komanda ya basoda bikaka ntwenya ya bakala yayi kwenda, na manima ya kupesa yandi musiku yayi: “Kuzonza na ata muntu ti nge me zonzila munu mambu yayi.”
23 Na manima yandi bokila bamfumu zole ya basoda mpe zonzaka na bawu: “Beno bongisa basoda 200, basoda 70 yina ke nataka bampunda, mpe basoda 200 yina ke nwanaka na madyonga samu ba kwenda na Sezarea na ngunga ya 9 ya nkokila.*
24 Beno bongisa mpe bampunda samu na Polo, samu na kunata yandi, yandi kuma mbote na sika ya Felikse, mfumu ya kizunga.”
25 Mpe yandi sonikaka mambu yayi na mukanda:
26 “Munu, Klode Lizyase, mu ke na sonikilaka nge, Mfumu Felikse, Muntu ya Nene: Mbote ya nge!
27 Bazwife bwilaka bakala yayi mpe ba vanda sosa kufwa yandi, kasi mu kwizaka mbangu na basoda ya munu mpe mu vuukisaka yandi, samu mu kuwaka ti yandi ke Muroma.
28 Samu mu vanda sosa kuzaba mbote-mbote mambu yina ba vanda fundisa yandi, mu nataka yandi na mantwala ya Kimvuka ya nene ya bazenga mambu ya bawu.
29 Mu kwizaka tala ti ba vanda funda yandi na mambu yina me tadila Musiku ya bawu. Kasi ya vandaka na ata dyambu yina vanda lomba ti ba kufwa yandi to ba tula yandi na boloko.
30 Kasi samu ba me zabisa munu ti ya ke na mfundu ya kusala bakala yango yimbi, mu ke na filisaka nge yandi na mbala mosi mpe mu ke na lombaka bantu yina me funda yandi, ba kwiza funda yandi na mantwala ya nge.”
31 Na yawu, basoda bakaka Polo mutindu ba tumisaka bawu mpe ba nataka yandi na mpimpa na Antipatrisi.
32 Kilumbu yina landaka, ba bikaka basoda yina vanda nata bampunda ba kwenda na yandi. Kasi bawu, ba vutukaka na lupangu ya basoda.
33 Basoda yina vanda nata bampunda kotaka na Sezarea mpe pesaka mfumu ya kizunga mukanda, mpe ba nataka Polo na mantwala ya yandi.
34 Yandi tangaka yawu, mpe yufulaka wapi kizunga Polo katukaka. Yandi kwizaka zaba ti yandi vandaka muntu ya Silisi.
35 Yandi zonzaka: “Mu ke kuwa nge mbote-mbote ntangu bantu yina ke na fundaka nge ke kuma.” Mpe yandi tumisaka ba kengidila yandi mbote-mbote na yinzo ya mfumu Erode.
Banote
^ Na Greke: “Sanedreni.” Tala Yina ya zola zonza.
^ To: “Ke zonzaka pwelele.”
^ Na Greke: “Na ngunga ya tatu ya mpimpa.”
