Bisalu ya Bantumwa 24:1-27
24 Na manima ya bilumbu tanu, nganga-nzambi ya nene Ananiase kwizaka na mwa bakuluntu mpe na muntu mosi na nkumbu ya Tertuluse yina ba nataka samu na kunwanina bawu, mpe ba kwendaka funda Polo na mantwala ya mfumu ya kizunga.
2 Ntangu ba bokilaka yandi, Tertuluse bandaka kufunda Polo. Yandi zonzaka:
“Mutindu beto ke na kizunu ya nene samu na nge, mpe mutindu, samu na mayela ya nge bamambu ke na bongamaka na bwala yayi,
3 ntangu nyonso mpe dyaka na bisika nyonso, beto zola kuvutula nge matondo mingi samu na bamambu nyonso yayi, Felikse, Muntu ya Nene.
4 Kasi samu na kubaka ve nge ntangu mingi, mu ke na bondilaka nge na ntima ya nge ya mbote na kuwa beto mwa ndambu.
5 Beto me tala ti muntu yayi ke muntu mosi yina ke kotisaka mvwanzi.* Yandi ke nataka Bazwife nyonso ya ntoto ya muvimba na kusala muvusu, mpe yandi ke ntwadisi mosi ya kinzambi-nzambi ya bantu ya Nazareti.
6 Yandi vanda sosa mpe kukumisa tempelo mvindu, ni na yawu beto bwilaka yandi.
7 * ——
8 Ntangu nge ke yufula yandi byuvu nge mosi, nge ke tala ti bamambu nyonso yayi beto me zonza samu na yandi ke ya tsyeleka.”
9 Bazwife mpe bandaka kufunda Polo. Ba vanda zonza ti mambu yayi vandaka ya tsyeleka.
10 Ntangu mfumu ya kizunga lombaka na Polo na kuzonza, Polo zonzaka:
“Mu zaba ti ya me sala bamvula mingi nge ke zuzi ya dikanda yayi. Ni na yawu mu me ndima kuzonza na ntima mosi samu na kunwanina nzutu ya munu.
11 Mutindu nge mosi lenda sosa kuzaba yawu, nabunu bilumbu 12 lunga, katuka ntangu yina mu kwendaka sambila na Yeruzalemi,
12 mpe ba talaka ve munu na kati ya tempelo ti mu ke na swanaka na muntu, to ti mu ke na nataka bantu na kusala muvusu, ya vanda na kati ya bayinzo ya lusambu ya Bazwife, to na kati ya mbanza.
13 Ba ke lenda mpe ve kulakisa nge kana bamambu yayi ba ke na fundaka munu ntangu yayi ke ya tsyeleka.
14 Kasi mu ke na kundimaka na mantwala ya nge ti, ni na kulandaka nzila yina ba ke na bokilaka kinzambi-nzambi, mu ke na sadilaka Nzambi ya bankooko ya munu kisalu ya santu. Mu ke kwikilaka na mambu nyonso yina ke na kati ya Musiku mpe yina ba sonikaka na Bambikudi,
15 mpe mu ke na kivuvu yayi na Nzambi, kivuvu yina bantu yayi mpe ke na vingilaka ya lungana, ti bantu ya lunungu mpe bantu yina ke ve na lunungu ke vumbuka na lufwa.
16 Ni na yawu, mu ke na salaka bangolo ntangu nyonso samu mu vanda na ntima ya kuvedila* na mantwala ya Nzambi mpe ya bantu.
17 Na yawu, na manima ya bamvula mingi yina mu vandaka ve, mu kwizaka samu na kupesa makabu ya kyadi na dikanda ya munu, mpe kupesa makabu na Nzambi.
18 Ntangu mu vanda sala bamambu yina, ba kutaka munu na tempelo. Mu vandaka ya kuvedisa nzutu mutindu Musiku ke lombaka yawu. Mu vukisaka ve bantu mingi mpe mu tulaka ve mvwanzi. Kasi ya vandaka na Bazwife ya nkaka ya kizunga ya Aziya kuna,
19 yina zola vanda mpe awa na mantwala ya nge samu na kufunda munu kana ya tsyeleka ba kuzwaka na sika ya munu mambu ya yimbi.
20 Bika bantu yina kele awa zonza bawu mosi wapi mambu ya yimbi ba talaka na munu ntangu mu vandaka ya kutelama na mantwala ya Kimvuka ya nene ya bazenga mambu ya Bazwife,*
21 katula kaka dyambu mosi yayi yina mu zonzaka na ndinga ya ngolo ntangu mu vandaka ya kutelama na kati-kati ya bawu: ‘Ni samu na mvumbukulu ya bantu ya kufwa ba ke na sambisaka munu bubu yayi na mantwala ya beno!’”
22 Kasi samu Felikse zabaka mbote-mbote bamambu yina me tadila Nzila yayi, yandi zonzaka na bawu na kukwiza kilumbu ya nkaka, mpe yandi zonzaka: “Mu ke zenga mambu ya beno ntangu Lizyase, komanda ya basoda ke kwiza.”
23 Mpe yandi zonzaka na mfumu ya basoda ti ba bika Polo na boloko kasi ba pesa yandi nzila ya kusala mwa bamambu, mpe ti ba bika bampangi ya yandi sadisa yandi.
24 Mwa bilumbu na manima, Felikse kwizaka na kento ya yandi Drusila, yina vandaka Zwife. Yandi bokilaka Polo mpe kuwaka yandi kuzonzila mambu yina me tadila kiminu na Kristo Yesu.
25 Kasi ntangu Polo zonzilaka mambu yina me tadila lunungu, kukutika nzutu mpe lusambusu yina ke kwiza, Felikse kumaka na boma, mpe yandi zonzaka: “Nge lenda kwenda ya nge. Mu ke bokila dyaka nge ntangu mu ke kuzwa ntangu.”
26 Kasi yandi vandaka mpe na kivuvu ti Polo zola pesa yandi mbongo. Ni na yawu yandi vanda bokila yandi bambala mingi samu na kusolola na yandi.
27 Kasi ntangu bamvula zole lutaka, Porsiyuse Festuse bakaka kisika ya Felikse. Mpe samu Felikse vanda sosa ti Bazwife sepela na yandi, yandi bikaka Polo na boloko.
Banote
^ To: “Ke tulaka muvusu.” Na Greke: “Muntu yayi ke maladi ya yimbi.”
^ Tala Yina ba me bwela A3.
^ To: “Mu vanda na ata mambu yina ba lenda semba.”
^ Na Greke: “Sanedreni.” Tala Yina ya zola zonza.
