Bisalu ya Bantumwa 25:1-27
25 Ntangu Festuse kumaka na kizunga yina, mpe bandaka kuyala, na manima ya bilumbu tatu, yandi katukaka na Sezarea mpe kwendaka na Yeruzalemi.
2 Bamfumu ya banganga-nzambi na bantu ya mfunu na kati ya Bazwife fundaka Polo na sika ya yandi. Ba bondilaka Festuse
3 na kundima kufilisa Polo na Yeruzalemi. Ba vandaka na dikanisi ya kubasikila Polo na nzila mpe kufwa yandi.
4 Kasi Festuse zonzaka ti Polo ke bikana na Sezarea, mpe ti yandi mosi zola vutuka kuna na mwa ntangu fioti.
5 Yandi zonzaka: “Kana ya tsyeleka bakala yayi me sala mambu ya yimbi, bika ti ba yina ke na lutumu na kati ya beno kwiza na munu samu na kufunda yandi.”
6 Na manima ya kulutisa bilumbu 8 to 10 na kati-kati ya bawu, yandi vutukaka na Sezarea. Kilumbu yina landaka, yandi vandaka na kisika ya kusambisa mpe zonzaka ba nata Polo.
7 Ntangu yandi kotaka, Bazwife yina katukaka na Yeruzalemi zungaka yandi. Ba vanda funda yandi na bamambu mingi ya ngolo, yina ba vanda lenda ve kulakisa ti ya vandaka ya tsyeleka.
8 Kasi samu na kunwanina nzutu ya yandi, Polo zonzaka: “Mu me sala ata disumu mosi ve na Musiku ya Bazwife, na tempelo to na Sezare.”
9 Samu Festuse vandaka na nsatu ya kusepelisa Bazwife, yandi zonzaka na Polo: “Nge zola kukwenda na Yeruzalemi samu ba sambisa nge kuna na mantwala ya munu samu na bamambu yayi?”
10 Kasi Polo vutulaka: “Mu ke ya kutelama na mantwala ya kisika ya kusambisa ya Sezare, kisika yina ba me fwana kusambisa munu. Mu me sala Bazwife ata mambu ya yimbi. Nge mosi mpe me tala yawu mbote-mbote.
11 Kana ya tsyeleka mu ke muntu ya yimbi, mpe kana mu me sala mambu yina ke lomba ti ba kufwa munu, mu ke manga ve kufwa. Kasi kana mambu yina ba ke na fundaka munu ke ve ya tsyeleka, ata muntu ke na lutumu ya kupesa munu na maboko ya bawu, kaka samu na kusepelisa bawu. Mu me lomba ti ba sambisa munu na sika ya Sezare.”
12 Na yawu, Festuse sololaka na ba yina ke pesaka yandi malongi, mpe na manima yandi zonzaka: “Nge me lomba ba sambisa nge na sika ya Sezare, nge ke kwenda na sika ya Sezare.”
13 Na manima ya mwa bilumbu, mfumu Agripa na Berenise kwizaka na Sezarea samu na kutala Festuse.
14 Samu ba lutisaka mwa bilumbu kuna, Festuse zabisaka mfumu mambu ya Polo. Yandi zonzaka:
“Ya ke na bakala mosi awa yina Felikse bikaka na boloko,
15 mpe ntangu mu vandaka na Yeruzalemi, bamfumu ya banganga-nzambi mpe bakuluntu ya Bazwife fundaka yandi na sika ya munu, mpe lombaka ti ba pesa yandi kitumbu.
16 Kasi mu zonzaka na bawu ti Baroma ke ve na nsalulu ya kupesa muntu na maboko ya bantu kaka samu na kusepelisa bantu. Ya me lunga ntete ti muntu yina ba me funda kutana mbombo na mbombo na ba yina me funda yandi, mpe kuzwa bweso ya kunwanina nzutu ya yandi.
17 Na yawu, ntangu ba kumaka awa, mu lutisaka ve ntangu, kasi kilumbu yina landaka mu vandaka na kisika ya kusambisa mpe mu tumisaka ti ba natina munu muntu yango.
18 Ntangu ba yina fundaka yandi kwizaka, ba fundilaka yandi ata dyambu mosi ya yimbi yina mu vanda kanisa.
19 Ba vanda swana kaka na yandi na yina me tadila faso ya bawu ya kusambila nzambi,* mpe samu na bakala mosi na nkumbu ya Yesu, yina kufwaka, kasi yina Polo ke na bikaka ve kuzonza ti yandi ke moyo.
20 Samu mu vanda zaba ve faso ya kumanisa kuswana yina, mu lombaka na yandi kana yandi zolaka kukwenda na Yeruzalemi mpe ba sambisa yandi kuna samu na bamambu yango.
21 Kasi ntangu Polo lombaka ti yandi bikana na boloko samu na kuvingila mukanu ya Muntu ya Lukumu,* mu tumisaka ti ba bumba yandi kuna tii ntangu mu ke filisa yandi na sika ya Sezare.”
22 Agripa zonzaka na Festuse: “Mu zola kuwa muntu yango munu mosi.” Festuse zonzaka: “Mbasi nge ke kuwa yandi.”
23 Na yawu, kilumbu yina landaka, Agripa na Berenise kwizaka na matalana nyonso, mpe kotaka na kisika ya kusambisa kintwadi na bakomanda ya basoda, mpe na babakala ya mfunu ya mbanza. Mpe ntangu Festuse tumisaka ba nata Polo, ba nataka yandi.
24 Festuse zonzaka: “Mfumu Agripa mpe beno nyonso yina kele awa na beto, beno tala bakala yayi yina Bazwife nyonso ya mbanza ya Yeruzalemi mpe ya awa lombaka munu, mpe zonzaka na ndinga ya ngolo ti yandi me fwana kufwa.
25 Kasi mu kwizaka tala ti yandi me sala ata kima yina me lomba ti yandi kufwa. Na yawu, ntangu muntu yango yandi mosi lombaka ti ba sambisa yandi na sika ya Muntu ya Lukumu, mu bakaka mukanu ya kufilisa yandi.
26 Kasi samu na yandi, ya tsyeleka mu ke na ata kima ya kusonikila Mfumu ya munu. Ni na yawu, mu me nata yandi na mantwala ya beno nyonso, kasi mingi-mingi na mantwala ya nge Mfumu Agripa, samu na manima ya lusambusu, mu lenda kuzwa mwa mambu ya kusonika,
27 samu ya ke talana buzoba na kufilisa muntu yina ke na boloko, kasi kuzonza ve mambu yina ba ke na fundaka yandi.”
