Bisalu ya Bantumwa 26:1-32
26 Agripa zonzaka na Polo: “Nge lenda zonza samu na kunwanina nzutu ya nge.” Na yawu, Polo nangunaka diboko mpe zonzaka:
2 “Mfumu Agripa, na yina me tadila mambu nyonso yina Bazwife ke na fundaka munu, mu ke na kilengi ya kunwanina nzutu ya munu na mantwala ya nge bubu yayi,
3 mingi-mingi samu nge ke muntu yina me zaba mbote-mbote bansalulu nyonso ya Bazwife mpe bamambu yina ba ke swaninaka. Ni na yawu, mu ke na bondilaka nge na kuwa munu na ntima ya yinda nyonso.
4 “Ya tsyeleka, mutindu mu dyatilaka banda buntwenya ya munu na kati ya dikanda* ya munu mpe na Yeruzalemi, me zabana mbote-mbote na Bazwife nyonso
5 yina zabaka munu na ntama. Kana ba zola, ba lenda pesa kimbangi ti mu zingaka mutindu Mufarize na kulandaka malongi ya kitini ya dibuundu ya beto yina ke na misiku ya kulutila ngolo.
6 Kasi ntangu yayi ba ke na sambisaka munu samu mu ke na kivuvu na nsilulu yina Nzambi pesaka na bankooko ya beto,
7 nsilulu yina makanda 12 ya beto ke na kivuvu ti ya ke lungana, na mutindu ba ke na sadilaka yandi kisalu ya santu na bangolo nyonso mpimpa ntangu. Ni samu na kivuvu yina, Bazwife ke na fundaka munu, O mfumu.
8 “Samu na yinki beno ke na ndimaka ve ti Nzambi ke vumbulaka bantu ya kufwa?
9 Samu na munu, mu ndimaka ti mu lungaka kusala nyonso samu na kunwanisa nkumbu ya Yesu muntu ya Nazareti.
10 Ya tsyeleka, ni yawu mu salaka na Yeruzalemi, mpe mu tulaka basantu mingi na boloko samu mu kuzwaka lutumu na sika ya bamfumu ya banganga-nzambi, mpe ntangu ba vanda sosa kufwa bawu, mu vanda kotila ba yina vanda ndima yawu.
11 Bambala mingi, na bayinzo ya lusambu ya Bazwife, mu vanda pesa bawu kitumbu mpe kusosa na ngolo na kunata bawu na kumanga kiminu ya bawu. Mpe samu mu vandaka na nkele mingi samu na bawu, mu kwendaka tii na kunyokola bawu ata na bambanza ya ntama.
12 “Ni na yawu mu kwendaka na Damase, na lutumu mpe muswa yina mu kuzwaka na bamfumu ya banganga-nzambi.
13 O mfumu, ntangu mu vandaka na nzila na ngunga ya midi, nsemo mosi yina vanda ngenga kulutila ntangu, katukaka na zulu mpe ngengaka zinga-zinga ya munu mpe ya ba yina vanda sala nzyetolo na munu.
14 Ntangu beto nyonso kubwaka na ntoto, mu kuwaka ndinga mosi kuzonza na munu na ndinga ya Ki-Ebre: ‘Solo, Solo, samu na yinki nge ke na nyokolaka munu? Nge ke na talisaka nzutu ya nge mosi mpasi mutindu ngombe yina ke na nwanaka na nsongi ya yinti* ya mfumu ya yandi.’
15 Kasi mu zonzaka: ‘Mfumu, nge ke nani?’ Mfumu vutulaka: ‘Mu ke Yesu, muntu yina nge ke na nyokolaka.
16 Kasi awa, katuka na ntoto mpe telama. Ni samu na mambu yayi mu me basikila nge, samu na kusoola nge mutindu kisadi mpe mbangi ya bamambu yina nge me tala mpe ya bamambu yina mu ke lakisa nge na yina me tadila munu.
17 Mpe mu ke vuukisa nge na maboko ya bantu yayi mpe ya makanda, kisika mu ke na filisaka nge,
18 samu na kufungula bawu meso, samu na kukatula bawu na mpimpa mpe kunata bawu na nsemo, mpe kukatula bawu na lutumu ya Satana samu ba kwiza na sika ya Nzambi, samu ba kuzwa mulemvo ya masumu mpe dikabu na kati-kati ya ba yina me kuma santu na nzila ya kiminu ya bawu na munu.’
19 “Ni na yawu mfumu Agripa, mu salaka ve yintu ngolo na kimona-meso yina katukaka na zulu.
20 Kasi mu kwendaka ntete na bantu ya Damase, mpe na manima, na bantu yina vanda vanda na Yeruzalemi, na bwala nyonso ya Zude mpe na makanda nyonso. Mu vanda nata nsangu ti ba me lunga kubalula ntima mpe kuvutuka na sika ya Nzambi, na kusalaka bisalu yina ke lakisa ti ba me balula ntima.
21 Ni samu na mambu yayi Bazwife bwilaka munu na kati ya tempelo mpe sosaka kufwa munu.
22 Kasi samu mu me kuzwa lubakusu yina me katuka na Nzambi, tii bubu yayi mu ke na bikaka ve kupesa kimbangi na mantwala ya bantu ya mpamba, mpe ya bantu ya mfunu. Mu ke na zonzaka ve mambu ya nkaka, kasi kaka yina Bambikudi mpe Moyize bikulaka,
23 ti Kristo zola tala mpasi, mpe samu yandi ke muntu ya ntete na kuvumbuka na lufwa, yandi zola samuna nsemo na bantu yayi mpe na makanda.”
24 Ntangu Polo vanda zonza bamambu yayi samu na kunwanina nzutu ya yandi, Festuse zonzaka na ndinga ya ngolo: “Polo, nge me lawuka! Kulongoka mingi ke na nataka nge na bulawu.”
25 Kasi Polo zonzaka: “Mu me lawuka ve Festuse, Muntu ya Nene, kasi mu ke na zonzaka bamambu ya tsyeleka mpe yina ke ya kulunga.
26 Ya tsyeleka, mfumu yina mu ke na zonzaka pwelele na mantwala ya yandi, zaba mbote-mbote bamambu yayi. Mu ke na kundima ti ya ke ve na mambu na kati ya bamambu yayi yina yandi zaba ve, samu ya me salama ve na mansweki.
27 Mfumu Agripa, nge ke kwikilaka Bambikudi? Mu zaba ti nge ke kwikilaka.”
28 Kasi Agripa zonzaka na Polo: “Na mwa ntangu fioti nge ke ndimisa munu na kukuma Mukristo.”
29 Na yawu Polo zonzaka: “Mu ke na sambilaka Nzambi ti ya vanda na manima ya ntangu fioti, to na manima ya bantangu mingi, kaka nge ve, kasi mpe bantu nyonso yina ke na kuwaka munu bubu yayi, kuma mutindu munu, kasi na basinga ya bisengo yayi ve.”
30 Na manima, mfumu telamaka kintwadi na mfumu ya kizunga, na Berenise mpe bantu yina vandaka ya kuvanda na bawu.
31 Kasi ntangu ba vanda kwenda, ba vanda zonza bawu na bawu: “Muntu yayi me sala ata mambu yina ke lomba ti ba kufwa yandi to ba tula yandi na boloko.”
32 Agripa zonzaka na Festuse: “Ba zola bika muntu yayi kwenda kana yandi lombaka ve ti ba sambisa yandi na sika ya Sezare.”
