Bisalu ya Bantumwa 27:1-44
27 Ntangu ba bakaka mukanu ti beto ke kwenda na Itali na masuwa, ba pesaka Polo mpe bantu ya nkaka ya boloko na maboko ya mfumu mosi ya basoda na nkumbu ya Yuliuse ya kimvuka ya basoda ya Oguste.
2 Beto kotaka na masuwa ya Adalamite, yina zola luta na bapore mingi yina ke pene-pene ya maza ya kizunga ya Aziya, mpe beto kwendaka. Aristarke muntu ya Masedwane ya bwala ya Tesalonika vandaka na beto.
3 Kilumbu yina landaka, beto kumaka na Sidoni. Yuliuse lakisaka Polo ntima ya mbote, mpe yandi pesaka yandi nzila ya kukwenda na sika ya bandiku ya yandi, samu ba kipe yandi.
4 Ntangu beto katukaka kuna, beto bakaka nzila ya nzadi ya mungwa. Beto lutaka na lweka ya Shipre samu na kukima mupepe yina vanda katuka na mantwala ya beto.
5 Beto lutaka na kati-kati ya nzadi ya mungwa pene-pene ya Silisi mpe Pamfili, mpe beto kumaka na pore ya Mira na Lisi.
6 Kuna, mfumu ya basoda kuzwaka masuwa mosi ya Alezandriya yina vanda kwenda na Itali, mpe yandi kotisaka beto na kati ya yawu.
7 Na manima ya kukwenda malembe-malembe bilumbu mingi, beto kumaka na Kinide na mpasi. Samu mupepe vanda pesa ve beto nzila ya kukwenda na mantwala, beto lutaka na lweka ya Krete na Salmone samu na kubumbana.
8 Na manima ya kuluta na mpasi na lweka ya maza, beto kumaka na kisika yina ba ke bokilaka Bapore ya Kitoko yina vandaka pene-pene ya mbanza ya Lase.
9 Ntangu mingi lutaka, mpe nzyetolo na masuwa kumaka yimbi mingi samu ti, ata ntangu ya kulutisa ntangu ata kudya kima, yina vanda salamaka na kilumbu ya kufuka masumu, lutaka. Na yawu, Polo pesaka dikanisi mosi.
10 Yandi zonzaka na bawu: “Bampangi, mu ke na talaka ti nzyetolo yayi ke nata mpasi mpe ke bebisa bima mingi, kaka ve bima yina ke na kati ya masuwa, na masuwa yawu mosi, kasi mpe luzingu* ya beto.”
11 Kasi mfumu ya basoda kuwaka muntu yina ke nataka masuwa mpe muntu ya kuzwa masuwa, na kisika ya kuwa mambu yina Polo zonzaka.
12 Samu pore yango vandaka ve mbote samu na kulutisa ntangu ya madidi, bantu mingi pesaka dikanisi ti beto katuka kuna, samu na kutala kana ba lenda kuma na Feniksi samu na kulutisa ntangu ya madidi kuna. Feniksi ke pore mosi ya Krete yina ke talaka na nore-esti mpe na sude-esti.
13 Ntangu mupepe yina katukaka na sude vanda fula malembe, ba kanisaka ti ba lungisaka dikanisi ya bawu. Ba nangunaka kizundu* yina vanda kangimisaka masuwa, mpe ba bandaka kuluta pene-pene na kisanga ya Krete.
14 Kasi ntangu fioti na manima, mupepe mosi ya ngolo yina ba ke bokilaka Erakiloni* bandaka kubula kisanga yina.
15 Samu mupepe vanda bula masuwa na ngolo nyonso, mpe masuwa vanda lenda ve kukwenda na mantwala, beto bikaka mupepe nata beto kisika ya zola nata beto.
16 Na manima, samu na kubumbana, beto lutaka na lweka ya kisanga mosi ya fioti, na nkumbu ya Koda. Ata faso yina, beto nwanaka mingi samu na kulenda kubaka bwatu ya fioti* yina ba vanda tulaka na manima ya masuwa.
17 Na manima ya kukotisa yawu na masuwa, ba sadilaka basinga ya nene samu na kukanga balweka nyonso ya masuwa samu ya mwangana ve. Samu ba vandaka na boma ya kukangama na zyelo ya Sirtisi,* ba bwisaka bima yina ke tambusaka masuwa mpe ba bikaka ti mupepe nata bawu.
18 Kasi samu mupepe ya ngolo yango vanda ningisa beto mingi, na kilumbu yina landaka ba bandaka kulosa bima samu na kukatula kilo na masuwa.
19 Mpe na kilumbu ya tatu, bawu mosi losaka bima yina ba ke sadilaka na masuwa.
20 Samu ntangu mpe bambwetete talanaka ve na kati ya bilumbu mingi, mpe mupepe ya ngolo* vanda bula beto, beto vandaka dyaka ve na ata kivuvu ti beto ke vuuka.
21 Ba lutisaka bilumbu mingi ata kudya kima. Na manima, Polo telamaka na kati-kati ya bawu, mpe zonzaka: “Bampangi, kana beno kuwaka malongi ya munu, mpe beno bakaka ve nzila ya nzadi ya mungwa ntangu beto vandaka na Krete, beno zola bwabana ve mambu ya mpasi yayi, mpe bima zola beba ve.
22 Kasi ntangu yayi mu ke na lombaka na beno na kuvanda na bukindi, samu ata muntu* mosi na kati ya beno ke kufwa, kaka masuwa ke bebana.
23 Na mpimpa yayi, mbazi mosi ya Nzambi ya kuzwa munu mpe yina mu ke sadilaka kisalu ya santu telamaka pene-pene ya munu,
24 mpe zonzaka: ‘Kuvanda ve na boma Polo. Nge me fwana kutelama na mantwala ya Sezare, mpe kuwa! Nzambi ke vuukisa luzingu ya nge mpe ya ba yina nyonso ke na nge na kati ya masuwa.’
25 Na yawu, beno vanda na kibakala bampangi, samu mu ke kwikilaka Nzambi ti ya ke salama kaka mutindu ba zabisaka munu.
26 Kasi beto ke kangama na zyelo ya kisanga mosi.”
27 Ntangu beto lutisaka bilumbu 14 mpe bampimpa 14 na nzadi ya mungwa mpe mupepe vanda ningisa beto na nzadi ya mungwa ya Adria, na kati-kati ya mpimpa bisadi ya masuwa vanda tala ti beto bandaka kukuma pene-pene ya mwa ntoto mosi faso yayi.
28 Ba sosaka kuzaba sunda ya maza. Ba kuzwaka bametre kana 36.* Na yawu, ba kwendaka dyaka mwa mantwala mpe ba sosaka dyaka kuzaba sunda. Ba kuzwaka bametre kana 27.*
29 Mpe samu ba vandaka na boma ti beto ke kwenda tuta matadi ya nene, ba losaka bizundu* yiya na manima ya masuwa, mpe ba vandaka na nsatu ti suka kuma.
30 Kasi ntangu bantu yina ke salaka na masuwa bandaka kusosa kukima mpe ba bwisaka na nzadi ya mungwa bwatu ya fioti yina ke vandaka na masuwa, na kuvunaka ti ba vanda sosa kubwisa bizundu* yina vandaka na mantwala ya masuwa,
31 Polo zonzaka na mfumu ya basoda mpe na basoda: “Kana bantu yayi bikana ve na kati ya masuwa, beno lenda vuuka ve.”
32 Na yawu, basoda zengaka basinga ya bwatu ya fioti, mpe ba bikaka ya kubwa na maza.
33 Ntangu fioti tekila bwisi kutsya, Polo kindisaka bawu nyonso na kudya mwa kima. Yandi zonzaka: “Bubu yayi ke kilumbu ya 14, yina beno ke na vingilaka na ntima na zulu, mpe beno me tula ata kima na yinwa.
34 Na yawu, mu ke na lombaka na beno na kudya mwa kima. Ya ke samu na mbote ya beno mosi, samu ata muntu mosi ve na kati ya beno ke zimbisa ata disuki mosi ya yintu ya yandi.”
35 Na manima ya kuzonza mambu yayi, yandi bakaka dimpa, vutulaka Nzambi matondo na mantwala ya bawu nyonso, yandi zengaka yawu mpe bandaka kudya.
36 Na yawu, bawu nyonso kuzwaka mwa ngolo mpe bandaka kudya mwa kima.
37 Beto nyonso, beto vandaka bantu* 276 na kati ya masuwa.
38 Ntangu ba kudyaka mpe ba yukutaka, ba losaka ble na nzadi ya mungwa samu na kukatula kilo na masuwa.
39 Ntangu suka kumaka, ba talaka bwala mosi yina ba zabaka ve. Kasi na mwa ntama, ba talaka kitini mosi ya ntoto kisika maza ke ya kukota na kati mpe ba bakaka mukanu ti, kana ba ke lenda, ba ke kwenda kangimisa masuwa kuna.
40 Na yawu, ba zengaka basinga ya bizundu* mpe ba bikaka ya kubwa na nzadi ya mungwa. Dyaka, ba nyangulaka basinga ya bayinti yina vanda twadisaka masuwa, mpe na manima ya kunanguna lele yina vandaka na mantwala ya masuwa samu mupepe bula yawu, ba bandaka kukwenda na zyelo ya nzadi ya mungwa.
41 Ntangu ba kumaka na kisika ya zyelo yina nzadi ya mungwa vanda bula na balweka nyonso zole, ba kangimisaka masuwa kuna. Mantwala ya masuwa kangamaka na zyelo mpe vanda ningana dyaka ve. Mpe bimpo* ya ngolo bandaka kupasula manima ya masuwa na bitini mingi.
42 Na yawu, basoda bakaka mukanu ya kufwa bantu nyonso ya boloko samu ata muntu mosi kota na maza mpe kima.
43 Kasi mfumu ya basoda bakaka mukanu ya kuvuukisa Polo, mpe yandi kangaka bawu nzila ya kulungisa dikanisi ya bawu. Yandi zonzaka na bantu yina zabaka kusaba na kukota na nzadi ya mungwa mpe ba tekila na ntoto.
44 Ba yina bikanaka landaka bawu, ba ya nkaka na zulu ya mabaya, mpe ba ya nkaka na zulu ya bitini ya masuwa. Ni mutindu yina bawu nyonso kumaka mbote na ntoto.
Banote
^ To: “Bamwela.”
^ Ya ke kima ya kilo yina ba vanda yidikaka na yinti to na kisengo mpe ba vanda losaka na maza samu masuwa vanda kisika mosi.
^ Ya kele mupepe ya nore-esti.
^ Ya ke mwa bwatu ya fioti yina ba lenda sadila samu na kuvuukisa bantu.
^ Tala Yina ya zola zonza.
^ Na Greke: “Ya fioti ve.”
^ To: “Mwela.”
^ Na Greke: “Orgwiya 20.” Tala Yina ba me bwela B14.
^ Tala Yina ba me bwela B14.
^ Tala noti ya verse 13.
^ Tala noti ya verse 13.
^ To: “Bamwela.”
^ Tala noti ya verse 13.
^ To: “Ba vagues.”
