Bisalu ya Bantumwa 28:1-31
28 Ntangu beto vuukaka, beto kwizaka zaba ti nkumbu ya kisanga yango vandaka Malta.
2 Bantu ya kisika yina* lakisaka beto ntima ya mbote na faso mosi ya ngitukulu. Ba namisaka tiya, mpe ba yambaka beto nyonso na ntima ya mbote samu mvula vanda noka mpe madidi vandaka.
3 Kasi ntangu Polo lokotaka kikunku ya bankuni mpe tulaka yawu na tiya, mpidi mosi basikaka samu na tiya mpe kangamaka na diboko ya yandi.
4 Ntangu bantu ya kisika yina talaka nyoka me kangama na diboko ya yandi, ba bandaka kuzonza bawu na bawu: “Ntembe ve, muntu yayi kufwaka muntu. Mpe ata ti yandi me vuuka na nzadi ya mungwa, Lunungu* me pesa ve yandi nzila ya kubikana dyaka moyo.”
5 Yandi ningisaka diboko. Na yawu, nyoka kubwaka na tiya, mpe yandi talaka ve mpasi.
6 Kasi ba vanda kanisa ti yandi ke vimba to yandi ke kubwa mbala mosi mpe ke kufwa. Ntangu ba vingilaka ntangu mingi mpe talaka ti ata kima ya yimbi kuminaka yandi, ba sobaka makanisi ya bawu mpe bandaka kuzonza ti yandi vandaka nzambi.
7 Pene-pene na kisika yina, ya vandaka na bantoto ya mfumu ya kisanga yango, nkumbu ya yandi Publuse. Yandi yambaka beto na faso mosi ya mbote mpe beto lutisaka bilumbu tatu kuna.
8 Ntyo, tata ya Publuse vanda lala samu yandi vanda beela fievre mpe pulu-pulu ya menga. Polo kwendaka na sika ya yandi mpe sambilaka. Yandi tulaka yandi maboko mpe yandi belukaka.
9 Na manima ya mambu yayi, bantu ya nkaka ya kisanga yango, yina vanda beela, bandaka kukwiza na sika ya Polo mpe ba belukaka.
10 Ba pesaka mpe beto makabu mingi samu na kukumisa beto. Ntangu beto zola landa nzyetolo ya beto na maza, ba pesaka beto bima nyonso yina beto vandaka na yawu nsatu.
11 Na manima ya bangonda tatu, beto kotaka na masuwa mosi yina vandaka na kidimbu mosi na mantwala, yina ba sonikaka na zulu ya yawu “Bana ya Zeusi.” Masuwa yango katukaka na Alezandriya mpe ya vanda me lutisa ntangu ya madidi na kisanga yina.
12 Beto kumaka na Sirakuse mpe beto lutisaka bilumbu tatu kuna.
13 Ntangu beto katukaka kuna, beto landaka nzila ya beto mpe beto kumaka na Regiumi. Kilumbu yina landaka, mupepe mosi yina katukaka na sude bandaka kufula, mpe beto kumaka na Puteoli na manima ya bilumbu zole.
14 Kuna, beto kutanaka na bampangi mpe ba bondilaka beto na kubikana na bawu bilumbu 7. Na manima, beto bakaka nzila ya Roma.
15 Ntangu bampangi ya Roma kuwaka ti beto vanda kwiza, ba kwizaka tii na zandu ya Apiyusi mpe na Bayinzo Tatu samu na kubwabana beto. Ntangu Polo talaka bawu, yandi vutulaka Nzambi matondo mpe kuzwaka bukindi.
16 Nsuka-nsuka ntangu beto kumaka na Roma, ba pesaka Polo muswa ya kuvanda na yinzo ya yandi mosi, na soda yina vanda kengidila yandi.
17 Na manima ya bilumbu tatu, yandi bokilaka bantu ya mfunu ya Bazwife. Ntangu ba vukanaka, yandi zonzaka na bawu: “Babakala, bampangi, mu salaka ata dyambu mosi ve ya yimbi na bantu to na bansalulu ya bankooko ya beto. Ata mpila yina, ba kangaka munu na boloko na Yeruzalemi mpe ba pesaka munu na maboko ya Baroma.
18 Na manima ya kuyufula munu byuvu, ba zola basisa munu samu ba kuzwaka ata kima na munu yina zola lomba ti ba kufwa munu.
19 Kasi samu Bazwife mangaka ti ba bika munu, ya bikanaka kaka na munu na kulomba ti ba sambisa munu na sika ya Sezare. Kasi ya vandaka ve samu ti mu vandaka na dyambu ya kufunda dikanda ya munu.
20 Ni na yawu, mu me lomba na kutala beno mpe kusolola na beno. Mpamba ve ni samu na kivuvu ya Izraele mu ke na basinga ya bisengo yayi.”
21 Ba zonzaka na yandi: “Beto kuzwaka ve mikanda yina me katuka na Zude samu na nge. Mpe ata mpangi mosi yina me katuka kuna me zonzila to me zabisa beto mambu ya yimbi na yina me tadila nge.
22 Kasi beto me kanisa ti ya ke mbote beto kuwa mabanza ya nge, samu ya tsyeleka, beto zaba ti na bisika nyonso ba ke na zonzilaka mambu ya yimbi samu na kinzambi-nzambi yayi.”
23 Ba wisanaka na kilumbu yina ba zola talana dyaka, mpe ba kwizaka mingi ya kulutila na kisika yina yandi vanda vanda. Kubanda suka tii nkokila, yandi vanda sadila Musiku ya Moyize mpe Bambikudi samu na kusadisa bawu na kubakula bamambu, na kupesaka mbote-mbote kimbangi na yina me tadila Kimfumu ya Nzambi samu na kundimisa bawu na kukwikila na Yesu.
24 Ba ya nkaka bandaka kukwikila bamambu yina yandi vanda zonza, kasi ba ya nkaka kwikilaka ve.
25 Samu ba vanda wisana ve bawu na bawu, ba bandaka kukwenda, mpe Polo zonzaka mambu yayi:
“Mpeve ya santu zonzaka tsyeleka na bankooko ya beto na nzila ya mbikudi Izaya,
26 ‘Kwenda zonza na bantu yayi: “Ya tsyeleka, beno ke kuwa, kasi beno ke bakula ve. Mpe beno ke tala, kasi beno ke vanda na kati ya kidiba,
27 samu bantima ya bantu yayi me kuma ngolo. Ba me kanga makutu mpe meso ya bawu samu ti ba tala ve ata fioti na meso ya bawu, ba kuwa ve na makutu ya bawu, ba bakula ve na bantima ya bawu, mpe ba vutuka ve na sika ya munu samu mu belusa bawu.”’
28 Na yawu, beno fwana kuzaba ti nsangu ya luvuukusu yina me katuka na Nzambi, yina beno me manga, ba me filisa yawu na makanda. Ya tsyeleka, bawu, ba ke kuwa yawu.”
29 * ——
30 Yandi bikanaka bamvula zole ya muvimba na yinzo yina yandi vanda futila. Yandi vanda yambaka na ntima ya mbote nyonso ba yina nyonso vanda kwizaka talaka yandi.
31 Yandi vanda samuna bawu Kimfumu ya Nzambi mpe kulonga mambu yina me tadila Yesu Kristo na ata boma,* mpe ata muntu mosi ve vanda kanga yandi nzila.
Banote
^ To: “Bantu yina ke zonzaka ndinga ya banzenza.”
^ Na ndinga ya Greke, Di′ke. Ntangu ya nkaka ya zola zonza nzambi ya kento yina ke vutulaka yimbi samu lunungu vanda, to ya zola zonza kaka lunungu.
^ Tala Yina ba me bwela A3.
^ To: “Na bukindi nyonso.”
