Bisalu ya Bantumwa 4:1-37
-
Ba me bwila Piere na Yoane (1-4)
-
Lutangu ya babakala yina me kwikila me kuma 5 000 (4)
-
-
Lusambusu na mantwala ya Kimvuka ya nene ya bazenga mambu ya Bazwife (5-22)
-
“Beto lenda bika ve kuzonzila” (20)
-
-
Lusambu samu na kulomba bukindi (23-31)
-
Bilandi ke na kabulaka bawu na bawu bima yina ba ke na yawu (32-37)
4 Ntangu Piere na Yoane vanda zonza na bantu, banganga-nzambi, mfumu ya bakengi ya tempelo, mpe Basaduse kwizilaka bawu.
2 Ba vandaka na nkele samu bantumwa vanda longa bantu, mpe vanda zonzila pwelele ti Yesu vumbukaka na lufwa.
3 Na yawu, ba bwilaka* bawu mpe ba tulaka bawu na boloko tii kilumbu yina landaka, samu ya vanda me kuma mpimpa.
4 Kasi mingi ya ba yina kuwaka diskure* yango kwikilaka, mpe lutangu ya babakala kumaka kana 5 000.
5 Kilumbu yina landaka, bamfumu, bakuluntu, mpe milongisi ya Musiku vukanaka kintwadi na Yeruzalemi,
6 na Ane mfumu ya banganga-nzambi, Kayife, Yoane, Alezandre, mpe ba yina nyonso vandaka bantu ya dikanda ya mfumu ya banganga-nzambi.
7 Ba telemisaka Piere na Yoane na kati-kati ya bawu, mpe ba bandaka kuyufula bawu: “Na ngolo ya nani to na nkumbu ya nani beno me sala mambu yayi?”
8 Na yawu, Piere, yina vandaka ya kufuluka na mpeve ya santu zonzaka na bawu:
“Bamfumu ya bantu mpe bakuluntu,
9 kana ba ke na sambisaka beto bubu yayi samu na mambu ya mbote yina me salama na kikata mosi, mpe beno ke na sosaka kuzaba nani me sala ti muntu yayi beluka,
10 bika ti beno nyonso mpe bantu nyonso ya Izraele zaba ti ni na nkumbu ya Yesu Kristo, muntu ya Nazareti, yina beno kufwaka na zulu ya yinti, kasi yina Nzambi vumbulaka na lufwa, ni na nzila ya yandi muntu yayi ke ya kutelama awa, na mantwala ya beno, na mavimpi ya mbote.
11 Yesu yango kele ditadi yina beno ba yina ke tungaka, bakilaka mutindu kima ya mpamba, mpe yina me kuma ditadi ya kulutila mfunu yina ke simbaka yinzo.*
12 Dyaka, luvuukusu ke katukaka na muntu ya nkaka ve, samu ya ke ve na nkumbu ya nkaka yina ba me pesa na ntoto na kati ya bantu, yina beto me fwana kuvuuka na nzila ya yawu.”
13 Ntangu ba talaka kukasuka* ya Piere na Yoane, mpe ba zabaka ti ba kotaka ve* mpe ba vandaka bantu ya mpamba, ba pamukaka mpe ba kwizaka zaba ti ba vandaka na Yesu.
14 Ntangu ba vanda tala bakala yina belukaka, ya kutelama kintwadi na bawu, ba vandaka na ata mvutu ya kupesa na mambu yayi.
15 Na yawu, ba tumisaka bawu na kubasika na yinzo ya balukutakanu ya Kimvuka ya nene ya bazenga mambu ya Bazwife,* mpe ba bandaka kusolola bawu na bawu.
16 Ba vanda zonza: “Yinki beto ke sala na bantu yayi? Samu ya tsyeleka, kidimbu mosi ya nene me salama na nzila ya bawu, yina me talana pwelele na bantu nyonso yina ke vandaka na Yeruzalemi, mpe beto lenda manga ve yawu.
17 Na yawu, samu mambu yango mwangana ve ya kulutila na kati ya bantu, bika beto pesa bawu boma mpe beto zonza na bawu na kuzonza dyaka ve na ata muntu mambu na nkumbu yayi.”
18 Na yawu, ba bokilaka bawu mpe ba pesaka bawu musiku ya kuzonza to kulonga ata kima mosi ve na nkumbu ya Yesu.
19 Kasi Piere na Yoane vutulaka: “Kana ya ke mbote na meso ya Nzambi ti beto kuwa beno na kisika ya kuwa Nzambi, ni beno mosi ke tala.
20 Kasi samu na beto, beto lenda bika ve kuzonzila bamambu yina beto me tala mpe beto me kuwa.”
21 Na yawu, na manima ya kupesa dyaka bawu boma, ba bikaka bawu ba kwenda, samu ba kuzwaka ve mambu yina vanda lomba ti ba pesa bawu kitumbu, mpe samu na bantu, samu bawu nyonso vanda kembila Nzambi samu na mambu yina salamaka.
22 Ya tsyeleka, muntu yina belukaka na manima ya kimangu* yango vandaka na bamvula kuluta 40.
23 Ntangu ba bikaka bawu ba kwenda, Piere na Yoane kwendaka na sika ya bilandi ya nkaka mpe ba zabisaka bawu mambu yina bamfumu ya banganga-nzambi mpe bakuluntu zonzaka na bawu.
24 Ntangu ba kuwaka yawu, na bumosi ba sambilaka Nzambi mpe ba zonzaka:
“Mfumu ya Kulutila Nene, nge ke Muntu yina salaka zulu, ntoto, nzadi ya mungwa, mpe bima nyonso yina ke na kati ya yawu,
25 mpe yina zonzaka na manima ya mpeve ya santu, na nzila ya yinwa ya nkooko ya beto Davidi kisadi ya nge: ‘Samu na yinki makanda me kuma kidi-kidi, mpe bantu ya makanda me yindula na mambu ya mpamba?
26 Bamfumu ya ntoto me telama, mpe bantwadisi me vukana kintwadi mutindu muntu mosi samu na kutelemina Yehova* mpe muntu ya yandi yina ba tulaka mafuta.’*
27 Ntembe ve, Erode na Ponse Pilate, bantu ya makanda mpe bantu ya Izraele vukanaka kintwadi na mbanza yayi samu na kunwanisa kisadi ya nge ya santu Yesu, yina nge tulaka mafuta,
28 samu na kusala mambu yina diboko ya nge mpe luzolo* ya nge kanisaka na mantwala ti ya ke salama.
29 Ntangu yayi Yehova,* tula dikebi na mutindu ba ke na sosaka kupesa beto boma, mpe pesa bisadi ya nge makoki ya kubika ve kuzonza mambu ya nge na bukindi nyonso,
30 ntangu nge ke na tambaka diboko ya nge samu na kubelusa, mpe ntangu bidimbu mpe bimangu* ke na salamaka na nzila ya nkumbu ya kisadi ya nge ya santu Yesu.”
31 Ntangu ba manisaka kubondila Nzambi, kisika yina ba vandaka ya kuvukana kintwadi ninganaka, mpe bawu nyonso fulukaka na mpeve ya santu, mpe ba vanda zonzila mambu ya Nzambi na bukindi nyonso.
32 Dyaka, bantu mingi yina kwikilaka vandaka kaka na ntima mosi mpe dibanza* mosi, mpe ata mosi na kati ya bawu vanda zonza ti bima yina yandi vandaka na yawu vandaka ya yandi mosi. Kasi ba vanda tula kintwadi bima nyonso yina vandaka na bawu.
33 Mpe na ngolo ya mingi, bantumwa tatamanaka na kupesa kimbangi na yina me tadila mvumbukulu ya Mfumu Yesu, mpe ntima ya kulutila mbote vandaka mingi na zulu ya bawu nyonso.
34 Ntembe ve, ata muntu na kati ya bawu vanda kondwa kima, samu ti ba yina nyonso vandaka na bilanga to bayinzo vanda tekisa yawu, mpe vanda nata mbongo yina ba kuzwaka,
35 mpe ba vanda tula yawu na makulu ya bantumwa. Na manima ba vanda kabula yawu na muntu na muntu na kutadilaka bansatu ya yandi.
36 Na yawu Yozefi, yina bantumwa vanda bokilaka mpe Barnabasi (yina zola zonza ntangu ba ke bangulaka yawu, “Muntu yina ke kindisaka bampangi”),* muntu ya dikanda ya Levi, mwana ya bwala ya Shipre,
37 vandaka na mwa lupangu. Yandi tekisaka yawu mpe nataka mbongo mpe tulaka yawu na makulu ya bantumwa.
Banote
^ To: “Kangaka.”
^ To: “Kinzonzi.”
^ Na Greke: “Yintu ya nsongi.”
^ To: “Bukindi.”
^ To: “Ba longokaka ve.” Ya zola zonza ti ba kotaka ve na lekole ya Barabi, kasi ve ti ba zabaka ve kutanga mpe kusonika.
^ Na Greke: “Sanedreni.” Tala Yina ya zola zonza.
^ To: “Kidimbu.”
^ Tala Yina ba me bwela A5.
^ To: “Kristo ya yandi.”
^ To: “Mukanu,” “dilongi.”
^ Tala Yina ba me bwela A5.
^ To: “Mpe bidimbu yina ke lakisaka bamambu yina ke kwiza.”
^ Na Greke: “Mwela.” Tala Yina ya zola zonza.
^ Na Greke: “Mwana ya lukindusu.”
