Bisalu ya Bantumwa 5:1-42
-
Ananiase na Safira (1-11)
-
Bantumwa ke na salaka bidimbu mingi (12-16)
-
Ba me kanga bawu na boloko mpe na manima ba me basisa bawu (17-21a)
-
Ba me nata dyaka bawu na mantwala ya Kimvuka ya nene ya bazenga mambu ya Bazwife (21b-32)
-
“Kutumama na Nzambi, kasi na bantu ve” (29)
-
-
Dilongi ya Gamaliele (33-40)
-
Kusamuna yinzo na yinzo (41, 42)
5 Muntu mosi na nkumbu ya Ananiase, kintwadi na kento ya yandi Safira, tekisaka ndambu ya ntoto ya bawu.
2 Kasi na mansweki, yandi katulaka ndambu ya mbongo, kento ya yandi zabaka yawu, mpe yandi nataka kaka ndambu ya yawu mpe tulaka yawu na makulu ya bantumwa.
3 Kasi Piere zonzaka: “Ananiase, samu na yinki nge me bika Satana kupesa nge bukindi samu na kuvuna mpeve ya santu mpe kubumba na mansweki ndambu ya mbongo ya ntoto?
4 Tekila nge tekisa ntoto yango, ya vandaka ve ya nge? Mpe na manima ya kutekisa yawu, nge vandaka kwandi ve na muswa ya kusala yina ni yina nge zolaka na mbongo yango? Samu na yinki nge kanisaka mambu ya faso yayi na ntima ya nge? Nge me vuna ve bantu, kasi Nzambi.”
5 Ntangu yandi kuwaka mambu yayi, Ananiase kubwaka mpe kufwaka. Mpe boma ya nene lwataka ba yina nyonso kuwaka yawu.
6 Na manima, bantwenya ya babakala telamaka, fukaka yandi na balele, nataka yandi na ngaanda mpe zikaka yandi.
7 Na manima ya bangunga kana tatu, kento ya yandi kwizaka. Yandi vanda zaba ve mambu yina salamaka.
8 Piere zonzaka na yandi: “Zabisa munu. Ni na ntalu yayi beno me tekisa ntoto?” Yandi zonzaka: “Ee, ni na ntalu yayi.”
9 Na yawu, Piere zonzaka na yandi: “Samu na yinki beno nyonso zole me wisana na kumeka mpeve ya Yehova?* Tala makulu ya ba yina me kwenda kunda bakala ya nge ke na mwelo, mpe ba ke nata nge.”
10 Na mbala mosi yandi kubwaka na makulu ya Piere mpe kufwaka. Ntangu bantwenya ya babakala kotaka, ba talaka yandi ya kufwa. Ba nataka yandi na ngaanda mpe kundaka yandi pene-pene na bakala ya yandi.
11 Na yawu, boma ya nene lwataka kimvuka nyonso mpe ba yina nyonso kuwaka bamambu yayi.
12 Dyaka, bantumwa vanda sala na kati ya bantu bidimbu mpe bimangu mingi.* Mpe bawu nyonso vanda vukanaka kintwadi na Kisika ya kutambula ya Salomoni.
13 Ya tsyeleka, ata muntu ya nkaka mekaka kuvukana na bawu. Ata mpila yina, bantu vanda zonzila bawu na faso ya mbote.
14 Na zulu ya mambu yayi, ba yina vanda kwikila na Mfumu vanda bwelama kaka, babakala mingi mpe bakento mingi.
15 Ba vanda basisa bambevo na babala-bala ya nene mpe ba vanda tula bawu kuna na bamfulu ya fioti mpe na bipoyi, samu ti ntangu Piere zola luta, ata mpewo ya yandi kuzwa ba ya nkaka na kati ya bawu.
16 Dyaka, bantu mingi ya babwala yina vandaka pene-pene na Yeruzalemi vanda kwiza kaka. Ba vanda nata bantu yina vanda beela mpe ba yina bampeve ya yimbi vanda kwamisa, mpe bawu nyonso vanda beluka.
17 Kasi nganga-nzambi ya nene, mpe ba yina nyonso vandaka na yandi, ba yina vandaka na mwa dibuundu ya Basaduse, telamaka mpe ba vandaka ya kufuluka na kimbanda.
18 Ba bwilaka* bantumwa mpe tulaka bawu na boloko ya bantu nyonso.
19 Kasi na mpimpa, mbazi ya Yehova* fungulaka bamwelo ya boloko, basisaka bawu na ngaanda mpe zonzaka:
20 “Beno kwenda mpe beno telama na tempelo. Beno bika ve kuzonzila bantu mambu nyonso yina me tadila luzingu yayi.”
21 Samu na kutumama na mambu yayi, na suka-suka, ba kotaka na tempelo mpe bandaka kulonga.
Ntangu nganga-nzambi ya nene, mpe ba yina vandaka na yandi kwizaka, ba vukisaka Kimvuka ya nene ya bazenga mambu ya Bazwife* mpe bakuluntu nyonso ya bana ya Izraele. Ba filisaka bantu na boloko samu ba natina bawu bantumwa.
22 Kasi ntangu bakengi ya tempelo kwendaka kuna, ba talaka ve bawu na boloko. Na yawu, ba vutukaka mpe ba pesaka bawu nsangu.
23 Ba zonzaka: “Beto me tala boloko ya kukangama ngolo, mpe bakengi vanda ya kutelama na bamwelo. Kasi ntangu beto me fungula yawu, beto me tala ata muntu na kati.”
24 Ntangu mfumu ya bakengi ya tempelo mpe bamfumu ya banganga-nzambi kuwaka mambu yayi, mayela manisaka bawu samu ba vanda zaba ve wapi mutindu mambu yayi zola manisa.
25 Kasi muntu mosi kwizaka mpe zabisaka bawu: “Babakala yina beno tulaka na boloko ke na tempelo, mpe ba ke na longaka bantu.”
26 Na yawu, mfumu ya bakengi ya tempelo kwendaka kintwadi na bakengi ya yandi mpe ba bakaka bawu kasi na ngolo ve, samu ba vandaka na boma bantu bula bawu matadi.
27 Ba nataka bawu mpe telemisaka bawu na mantwala ya Kimvuka ya nene ya bazenga mambu ya Bazwife. Na manima, nganga-nzambi ya nene yufulaka bawu
28 mpe zonzaka: “Beto pesaka beno musiku pwelele na kubika kulonga na nkumbu yina. Kasi beno tala! Beno me fulusa Yeruzalemi na malongi ya beno, mpe beno me baka mukanu ya kutula menga ya muntu yayi na zulu ya beto.”
29 Piere mpe bantumwa ya nkaka vutulaka: “Beto me fwana kutumama na Nzambi,* kasi na bantu ve.
30 Nzambi ya bankooko ya beto vumbulaka na lufwa Yesu, yina beno kufwaka ntangu beno tulaka yandi na zulu ya yinti.
31 Nzambi zangulaka muntu yayi na diboko ya yandi ya bakala, samu yandi vanda Ntwadisi mpe Muvuukisi, samu na kupesa Izraele nzila ya kubalula ntima mpe ya kuzwa mulemvo ya masumu.
32 Mpe beto ke bambangi ya bamambu yayi, mutindu mosi na mpeve ya santu yina Nzambi me pesa na ba yina ke tumamaka na yandi.”*
33 Ntangu ba kuwaka yawu, ba fulukaka na nkele* mpe ba vanda sosa kufwa bawu.
34 Kasi Mufarize mosi na nkumbu ya Gamaliele, telamaka na kati ya Kimvuka ya nene ya bazenga mambu ya Bazwife. Yandi vandaka mulongi ya Musiku, mpe bantu nyonso vanda pesaka yandi buzitu. Yandi pesaka musiku ya kubasisa babakala yayi na ngaanda samu na mwa ntangu.
35 Na manima yandi zonzaka: “Babakala ya Izraele, beno sala keba na mambu yina beno ke na kanisaka kusala bantu yayi.
36 Na kifwani, ntama mingi ve, Tewudase telamaka mpe vanda zonza ti yandi vandaka muntu ya mfunu, mpe babakala kana 400 kotaka na kimvuka ya yandi, kasi ba kufwaka yandi, mpe ba yina nyonso vanda landa yandi mwanganaka mpe zimbanaka.
37 Na manima, Yuda, muntu ya Galile, telamaka na kilumbu ya kusonikisa bankumbu mpe yandi bendaka bantu mingi na manima ya yandi. Yandi mpe kufwaka mpe ba yina nyonso vanda landa yandi mwanganaka.
38 Ni na yawu, na mutindu bamambu ke na kwendilaka, mu ke na zonzaka na beno, beno kota ve na mambu ya bantu yayi, beno bika bawu. Samu ti kana mabanza yayi to kisalu yayi me katuka na bantu, ya ke mwangana.
39 Kasi kana ya me katuka na Nzambi, beno ke lenda ve kubwisa bawu. Beno sala keba. Ntangu ya nkaka beno lenda talana mutindu bantu yina ke na nwanisaka Nzambi.”
40 Ba kuwaka dilongi ya yandi, ba bokilaka bantumwa, bulaka bawu bashikoti mpe pesaka bawu musiku na kubika kuzonza na nkumbu ya Yesu, mpe ba bikaka bawu ba kwenda.
41 Na yawu, ba katukaka na mantwala ya Kimvuka ya nene ya bazenga mambu ya Bazwife. Ba vandaka na kilengi samu Nzambi talaka bawu mutindu bantu ya kulunga na kutala mpasi na nkumbu ya Yesu.
42 Mpe bilumbu nyonso, na tempelo mpe na yinzo na yinzo, ata kulemba, ba vanda bika ve kulonga mpe kuzabisa nsangu ya mbote na yina me tadila Kristo, Yesu.
Banote
^ Tala Yina ba me bwela A5.
^ To: “Mpe bidimbu mingi yina ke lakisaka bamambu yina ke kwiza.”
^ To: “Kangaka.”
^ Tala Yina ba me bwela A5.
^ Na Greke: “Sanedreni.” Tala Yina ya zola zonza.
^ To: “Kutumama na Nzambi samu yandi ke mfumu.”
^ To: “Ke tumamaka na yandi samu yandi ke mfumu.”
^ To: “Ya lwalisaka bawu.”
