Bisalu ya Bantumwa 6:1-15
6 Na bilumbu yina, ntangu bilandi vanda kuma mingi, Bazwife yina vanda zonza Greke bandaka kunyunguta samu na Bazwife yina vanda zonza Ki-Ebre, samu ba vanda kipe ve mifwidi ya bawu ya bakento ntangu ba vanda kabula bima bilumbu nyonso.
2 Na yawu, bantumwa 12 vukisaka bilandi mingi yina, mpe zonzaka: “Ya ke ve mbote* ti beto bika mambu ya Nzambi samu na kukabula madya na bamesa.
3 Na yawu bampangi, beno soola na kati ya beno, babakala 7 yina ke ya kuzabana mutindu bantu ya mbote, yina ke ya kufuluka na mpeve mpe ndwenga, samu beto tula bawu samu na kukipe mambu ya mfunu yayi.
4 Kasi beto, beto ke kukipesa na lusambu mpe na kisalu ya kulonga dyambu ya Nzambi.”
5 Mambu yina ba zonzaka sepelisaka bantu nyonso, mpe ba soolaka Etiene, muntu mosi yina vandaka ya kufuluka na kiminu mpe na mpeve ya santu. Ba soolaka mpe Filipe, Prokore, Nikanore, Timone, Parmenase, mpe Nikola, muntu mosi ya Antyose yina ndimaka dibuundu ya Bazwife.
6 Ba nataka bawu na sika ya bantumwa mpe na manima ya kusambila, ba tulaka bawu maboko.
7 Na yawu, dyambu ya Nzambi vanda mwangana kaka, mpe lutangu ya bilandi vanda kuma kaka mingi na Yeruzalemi mpe banganga-nzambi mingi bandaka kutumama na kiminu.
8 Nzambi vandaka na Etiene. Nzambi pesaka yandi ngolo mingi, mpe yandi vanda sala bimangu ya ngitukulu* mpe bidimbu ya nene na kati ya bantu.
9 Kasi bantu ya nkaka ya Kimvuka ya Bangaamba Yina Kuzwaka Kimpwanza kwizaka kintwadi na bantu ya Sirene, ya Alezandriya, mpe na ba ya nkaka ya Silisi mpe ya Aziya, samu na kuswanisa Etiene.
10 Kasi ba vanda lenda ve kutelama na mantwala ya ndwenga ya yandi mpe mpeve yina vanda nata yandi na kuzonza.
11 Na yawu, na mansweki, ba ndimisaka bantu samu ba zonza: “Beto me kuwa muntu yayi kuzonza bamambu samu na kufinga Moyize na Nzambi.”
12 Ba salaka ti bantu, bakuluntu mpe milongisi ya Musiku dasukila Etiene. Na mbala mosi, ba kwizaka, ba bwilaka yandi na ngolo, mpe ba nataka yandi na mantwala ya Kimvuka ya nene ya bazenga mambu ya Bazwife.*
13 Ba nataka mpe bambangi ya luvunu yina zonzaka: “Muntu yayi ke na bikaka ve kuzonza bamambu ya yimbi na yina me tadila kisika ya santu yayi mpe Musiku.
14 Na kifwani, beto kuwaka yandi kuzonza ti Yesu yango, muntu ya Nazareti ke mwangisa kisika yayi mpe ke soba bansalulu yina Moyize bikilaka beto.”
15 Ba yina nyonso vandaka na Kimvuka ya nene ya bazenga mambu ya Bazwife palumunaka Etiene meso, mpe ba talaka ti kizizi ya Etiene vandaka mutindu kizizi ya mbazi.
Banote
^ Na Greke: “Ya ke sepelisa ve beto.”
^ To: “Bidimbu yina ke lakisaka bamambu yina ke kwiza.”
^ Na Greke: “Sanedreni.” Tala Yina ya zola zonza.
