Bisalu ya Bantumwa 8:1-40
8 Kasi, Solo ndimaka ti ba kufwa Etiene.
Banda kilumbu yina, ba bandaka kunyokola mingi kimvuka yina vandaka na Yeruzalemi. Bantu nyonso, katula kaka bantumwa, mwanganaka na babwala ya Zude na ya Samariya.
2 Kasi babakala yina vandaka na boma ya Nzambi nataka Etiene samu na kukunda yandi, mpe ba dilaka yandi mingi.
3 Kasi Solo bandaka kunyokola dibuundu. Yandi vanda kota na mosi na mosi ya bayinzo, yandi vanda basisa bakento na babakala, mpe vanda losa bawu na boloko.
4 Ba yina nyonso mwanganaka, vanda zonzila nsangu ya mbote ya dyambu ya Nzambi bisika nyonso yina ba vanda kwenda.
5 Na yawu, Filipe kwendaka na bwala* ya Samariya mpe bandaka kusamuna bamambu yina me tadila Kristo.
6 Na bumosi, bantu mingi vanda teka dikebi na mambu yina Filipe vanda zonza ntangu ba vanda kuwa yandi, mpe vanda tala bimangu yina yandi vanda sala.
7 Bantu mingi vandaka na bampeve ya mvindu, mpe bampeve yango vanda ganga na ndinga ya ngolo, mpe vanda basika. Dyaka, bantu mingi yina vandaka na binama ya kufwa mpe ba yina vandaka na binama yina vanda ninganaka ve, vanda beluka.
8 Na yawu, kilengi mingi vandaka na mbanza yina.
9 Ntyo na mbanza yina, ya vandaka na bakala mosi na nkumbu ya Simoni yina vanda salaka maji* mpe yina vanda kamwisaka bantu ya Samariya. Yandi vanda zonzaka ti yandi ke muntu ya nene.
10 Bantu nyonso, kubanda na muntu yina vanda ata fioti ve mfunu, tii na muntu ya kulutila mfunu, ba vanda teka yandi dikebi mpe ba vanda zonza: “Muntu yayi ke Ngolo ya Nzambi, yina ba ke bokilaka Yaya.”
11 Na yawu, ba vanda tekaka yandi dikebi samu banda ntama, yandi vanda kamwisaka bawu na bansalulu ya yandi ya maji.*
12 Kasi ntangu ba kwikilaka Filipe yina vanda zabisa nsangu ya mbote na yina me tadila Kimfumu ya Nzambi mpe nkumbu ya Yesu Kristo, ba bandaka kuzwa mbotokolo, bakento mpe babakala.
13 Simoni mpe kumaka mundimi, mpe na manima ya kuzwa mbotokolo, yandi vandaka ntangu nyonso na Filipe. Yandi vanda kamwa na kutala bimangu mpe bamambu ya ngitukulu yina vanda salama.
14 Ntangu bantumwa yina vandaka na Yeruzalemi kuwaka ti bantu ya Samariya ndimaka dyambu ya Nzambi, ba filisaka Piere na Yoane na sika ya bawu.
15 Ntangu ba kumaka, ba sambidilaka bawu samu ba kuzwa mpeve ya santu,
16 samu ya kwizaka ntete ve na zulu ya ata mosi na kati ya bawu, kasi ba kuzwaka kaka mbotokolo na nkumbu ya Mfumu Yesu.
17 Na yawu, ba tulaka maboko na zulu ya bawu mpe ba bandaka kuzwa mpeve ya santu.
18 Ntangu Simoni talaka ti bantu vanda kuzwa mpeve ntangu bantumwa vanda tula bawu maboko, yandi sosaka kupesa bawu mbongo.
19 Yandi zonzaka: “Beno pesa munu mpe lutumu yayi, samu muntu nyonso yina mu ke tula maboko kuzwa mpeve ya santu.”
20 Kasi Piere zonzaka na yandi: “Bika ti mbongo ya nge kufwa kintwadi na nge, samu nge kanisaka ti nge lenda kuzwa na mbongo dikabu yina Nzambi ke pesaka ya mpamba.
21 Nge ke na ata dikabu to ata kima ya kusala na mambu yayi, samu ntima ya nge ke ve ya kusungama na meso ya Nzambi.
22 Na yawu, balula ntima na mambu ya nge ya yimbi, mpe bondila Yehova* samu, kana ya lenda salama, yandi lemvokila nge samu na mabanza ya yimbi ya ntima ya nge,
23 samu mu ke na talaka ti nge ke ngamba-ndudi* mpe kisadi ya bamambu yina ke ve na lunungu.”
24 Simoni vutulaka: “Beno bondila Yehova* samu na munu, samu ata mosi ya bamambu yina beno me zonza kumina munu.”
25 Ntangu ba manisaka kupesa kimbangi mbote-mbote, mpe ba manisaka kuzonza dyambu ya Yehova,* ba vutukaka na Yeruzalemi, mpe na nzila, ba vanda zonzila nsangu ya mbote na babwala mingi ya bantu ya Samariya.
26 Kasi mbazi ya Yehova* zonzaka na Filipe: “Telama mpe kwenda na sude, na nzila yina ke katukaka na Yeruzalemi mpe ke kwendaka na Gaza.” (Ya ke nzila ya ntoto ya kuyuma.)
27 Yandi telamaka mpe kwendaka. Yandi kutanaka na kalaka mosi* ya bwala ya Ityopi. Muntu yango vandaka muntu ya nene yina vanda sadila Kandase, mfumu ya kento ya bantu ya Ityopi, mpe ni yandi vanda bumbaka bimvwama ya yandi nyonso. Yandi vanda me kwenda na Yeruzalemi samu na kusambila,
28 mpe yandi vanda vutuka ya kuvanda na zulu ya pusu-pusu ya yandi. Yandi vanda tanga na ndinga ya ngolo mbikudi Izaya.
29 Na yawu, mpeve zonzaka na Filipe: “Kwenda pene-pene ya pusu-pusu yina.”
30 Filipe kimaka mbangu pene-pene na pusu-pusu mpe yandi kuwaka muntu ya Ityopi vanda tanga na ndinga ya ngolo mbikudi Izaya. Filipe yufulaka yandi: “Nge ke na bakulaka* kwandi mambu yina nge ke na tangaka?”
31 Yandi zonzaka: “Wapi mutindu mu lenda bakula kana muntu lakisa ve munu?” Na yawu, yandi lombaka na Filipe na kukota na pusu-pusu mpe na kuvanda kintwadi na yandi.
32 Kitini ya Masonoko yina yandi vanda tanga vanda zonza: “Mutindu dimeme yina ba me nata samu na kufwa yandi, mpe mutindu mwana ya dimeme yina me bikana swi na mantwala ya muntu yina ke zenga yandi mika, yandi me fungula ve yinwa ya yandi.
33 Ntangu ba fwisaka yandi nsoni, ba zengaka ve mambu ya yandi na lunungu. Nani ke zonzila mulonga ya bankooko ya yandi? Samu ba me katula luzingu ya yandi na ntoto.”
34 Bakala yango zonzaka na Filipe: “Mulemvo ya nge, mbikudi ke na zonzilaka mambu yayi samu na nani, samu na yandi mosi to samu na muntu ya nkaka?”
35 Filipe bandaka kuzonza, mpe kubanda na masonoko yayi, yandi zabisaka yandi nsangu ya mbote na yina me tadila Yesu.
36 Ntangu ba vanda kwenda, ba kumaka kisika mosi yina vandaka na maza, mpe bakala yango zonzaka: “Tala, maza yawu yayi. Yinki ke na kangaka munu nzila na kuzwa mbotokolo?”
37 ——*
38 Na yawu, yandi tumisaka ba telemisa pusu-pusu, mpe yandi na Filipe kwendaka na kati ya maza, mpe Filipe botikaka yandi.
39 Ntangu ba basikaka na maza, mpeve ya Yehova* nataka Filipe na mbangu kisika ya nkaka, mpe bakala yango vanda tala dyaka ve yandi, kasi yandi landaka nzila ya yandi na kilengi.
40 Kasi Filipe kwendaka na Ashdodi mpe vanda bika ve kuzonzila nsangu ya mbote na babwala nyonso tii yandi kumaka na Sezarea.
Banote
^ To ya lenda vanda: “Na bwala mosi.”
^ Ya kele kusala bamambu ya ngitukulu na ngolo ya bampeve ya yimbi.
^ Ya kele kusala bamambu ya ngitukulu na ngolo ya bampeve ya yimbi.
^ Tala Yina ba me bwela A5.
^ To: “Poison ya ndudi.”
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ To: “Kalaka mosi yina vanda salaka na yinzo ya mfumu.”
^ To: “Zabaka.”
^ Tala Yina ba me bwela A3.
^ Tala Yina ba me bwela A5.
