Bisalu ya Bantumwa 9:1-43
-
Solo na nzila samu na kukwenda na Damase (1-9)
-
Ba me filisa Ananiase samu na kusadisa Solo (10-19a)
-
Solo me samuna mambu yina me tadila Yesu na bwala ya Damase (19b-25)
-
Solo me kwenda na Yeruzalemi (26-31)
-
Piere me belusa Eneyasi (32-35)
-
Ba me vumbula na lufwa Dorkase, muntu yina vanda kabulaka (36-43)
9 Kasi Solo yina vanda bika ve kupesa bilandi ya Mfumu boma mpe vandaka na nsatu ya ngolo ya kufwa bawu, kwendaka tala nganga-nzambi ya nene,
2 mpe lombaka yandi mikanda samu na bayinzo ya lusambu ya Bazwife yina vandaka na Damase, samu yandi kanga na basinga, mpe yandi nata na Yeruzalemi muntu nyonso ya Nzila, ya vanda bakento to babakala.
3 Ntangu yandi vanda kwenda mpe kumaka pene-pene ya Damase, na mbala mosi nsemo mosi ya ngolo katukaka na zulu mpe ngengaka zinga-zinga ya yandi.
4 Yandi kubwaka na ntoto mpe kuwaka ndinga mosi yina zonzaka na yandi: “Solo, Solo, samu na yinki nge ke na nyokolaka munu?”
5 Yandi yufulaka: “Mfumu, nge ke nani?” Mfumu zonzaka: “Mu ke Yesu, muntu yina nge ke na nyokolaka.
6 Telama, mpe kota na mbanza, mpe ba ke zonza na nge yinki nge me fwana kusala.”
7 Babakala yina vanda sala nzyetolo na yandi vandaka ya kutelama, mpe ba vanda lenda kuzonza ata dyambu. Ya tsyeleka, ba vanda kuwa ndinga mosi, kasi ba vanda tala ata muntu.
8 Solo telamaka, mpe ata ti meso ya yandi vandaka mwasi, yandi vanda lenda kutala ata kima. Na yawu, ba simbaka yandi na diboko mpe nataka yandi na Damase.
9 Na kati ya bilumbu tatu, yandi vanda tala ata kima, yandi vanda kudya ve mpe kunwa ve.
10 Na mbanza ya Damase, ya vandaka na kilandi mosi na nkumbu ya Ananiase, mpe Mfumu zonzaka na yandi na kimona-meso: “Ananiase!” Ananiase vutulaka: “Mfumu, munu yandi yayi.”
11 Mfumu zonzaka na yandi: “Telama, kwenda na bala-bala yina ba ke bokilaka Kusungama, mpe na yinzo ya Yuda, sosa kutala muntu mosi ya bwala ya Tarse, na nkumbu ya Solo. Yandi ke na sambilaka,
12 mpe na kimona-meso, yandi me tala muntu mosi na nkumbu ya Ananiase, kukota mpe kutula yandi maboko samu yandi tala dyaka.”
13 Kasi Ananiase vutulaka: “Mfumu, mu me kuwa na bantu mingi mambu yina me tadila muntu yayi, mpe mambu nyonso ya yimbi yina yandi salaka na basantu ya nge na Yeruzalemi.
14 Awa, yandi ke na lutumu yina bamfumu ya banganga-nzambi me pesa yandi samu na kukanga* ba yina nyonso ke bokilaka nkumbu ya nge.”
15 Kasi Mfumu zonzaka na yandi: “Kwenda, samu muntu yayi ke kisalulu yina mu me soola samu na kunata nkumbu ya munu na sika ya makanda, ya bamfumu, mpe ya bana ya Izraele.
16 Mu ke lakisa yandi pwelele mambu nyonso ya mpasi yina yandi fwana kutala samu na nkumbu ya munu.”
17 Na yawu, Ananiase kwendaka mpe kotaka na yinzo. Yandi tulaka maboko ya yandi na zulu ya Solo mpe zonzaka: “Mpangi ya munu Solo, Mfumu Yesu, yina basikilaka nge na nzila ntangu nge vanda kwiza, me filisa munu samu ti nge tala dyaka mpe nge fuluka na mpeve ya santu.”
18 Na mbala mosi, bima yina vandaka mutindu makalu ya mbisi katukaka na meso ya yandi, mpe kubwaka. Yandi talaka dyaka, mpe yandi telamaka mpe kuzwaka mbotokolo.
19 Na manima, yandi kudyaka mpe kumaka dyaka na ngolo.
Yandi lutisaka mwa bilumbu na bilandi yina vandaka na Damase,
20 mpe na mbala mosi yandi bandaka kusamuna na bayinzo ya lusambu ya Bazwife, mambu yina me tadila Yesu, ti yandi vandaka Mwana ya Nzambi.
21 Kasi bantu nyonso yina vanda kuwa yandi vanda yituka, mpe vanda zonza: “Yayi ke ve muntu yina vanda nyokola mingi bantu ya Yeruzalemi yina ke bokilaka nkumbu ya Yesu? Yandi kwizaka ve awa na dikanisi ya kukanga bawu mpe kunata bawu* na bamfumu ya banganga-nzambi?”
22 Kasi Solo vanda kuzwa kaka ngolo mingi, mpe Bazwife yina vandaka na Damase, vandaka dyaka ve na mambu ya kuzonza ntangu yandi vanda lakisa bawu pwelele ti Yesu ke Kristo.
23 Na manima ya bilumbu mingi, Bazwife salaka mfundu samu na kufwa yandi.
24 Kasi Solo kwizaka zaba mfundu yina ba salaka. Ba vanda kengidila mpe mbote-mbote bamwelo ya bwala mpimpa ntangu samu na kufwa yandi.
25 Na yawu, mpimpa mosi bilandi ya yandi bakaka yandi, tulaka yandi na kati ya kitunga mpe kulumusaka yandi na dibulu mosi yina vandaka na kibaka.
26 Ntangu yandi kumaka na Yeruzalemi, yandi salaka nyonso samu na kukutana na bilandi, kasi bawu nyonso vandaka na boma ya yandi, samu ba ndimaka ve ti yandi vandaka kilandi.
27 Na yawu, Barnabasi kwizaka sadisa yandi mpe nataka yandi na sika ya bantumwa. Yandi zonzilaka bawu pwelele faso Solo talaka Mfumu na nzila, faso yandi sololaka na yandi mpe faso yandi zonzilaka nkumbu ya Yesu na bukindi nyonso na Damase.
28 Na yawu, yandi bikanaka kintwadi na bawu. Yandi vanda tambula ya yandi* na Yeruzalemi, mpe vanda zonzila na bukindi nkumbu ya Mfumu.
29 Yandi vanda solola mpe vanda sala ntembe na Bazwife yina vanda zonzaka Greke, kasi ba vanda sosa kufwa yandi.
30 Ntangu bampangi kuwaka mambu yayi, ba nataka yandi na mbanza ya Sezarea, mpe ba filisaka yandi na bwala ya Tarse.
31 Ya tsyeleka, dibuundu yina vandaka na Zude nyonso, na Galile mpe na Samariya kotaka na ntangu ya kizunu mpe ya vanda kuma ngolo samu ya vanda tambula na boma ya Yehova,* mpe na ngolo yina katukaka na mpeve ya santu, ya vanda kula kaka.
32 Ntangu Piere vanda tambula na bwala nyonso, yandi kwizaka mpe na sika ya basantu yina vanda zinga na Lida.
33 Kuna yandi kutanaka na bakala mosi na nkumbu ya Eneyasi, yina salaka bamvula 8 ya kulala na mfulu, samu yandi vanda kikata.
34 Piere zonzaka na yandi: “Eneyasi, Yesu Kristo me belusa nge. Telama mpe yidika mfulu ya nge.” Na mbala mosi yandi telamaka.
35 Ntangu bantu nyonso yina vanda zinga na Lida mpe na Sharoni, ntoto yina ke ve na bamongo, talaka yandi, ba kwikilaka na Mfumu.
36 Na Zope, ya vandaka na kilandi mosi na nkumbu ya Tabita, yina zola zonza, “Dorkase,”* ntangu ba ke bangulaka yawu. Yandi vanda salaka bamambu mingi ya mbote, mpe vanda pesaka bantu makabu mingi ya kyadi.
37 Kasi na bilumbu yina, yandi kubwaka maladi mpe kufwaka. Na yawu, ba sukulaka yandi mpe ba lalisaka yandi na shambre ya zulu.
38 Samu mbanza ya Lida vandaka pene-pene na Zope, ntangu bilandi kuwaka ti Piere vandaka na mbanza yango, ba filisaka bantu zole samu na kubondila yandi: “Mulemvo, kwiza na sika ya beto na mbangu.”
39 Na yina, Piere telamaka mpe kwendaka kintwadi na bawu. Ntangu yandi kumaka, ba nataka yandi na shambre ya zulu, mpe mifwidi nyonso ya bakento kwizaka na sika ya yandi. Ba vanda dila mpe ba vanda lakisa yandi binkuti mingi mpe bivunga* yina Dorkase yidikaka ntangu yandi vandaka moyo.
40 Na yawu, Piere basisaka bantu nyonso, yandi fukamaka mpe sambilaka. Yandi balukaka na sika ya mvumbi mpe zonzaka: “Tabita, telama!” Yandi fungulaka meso, mpe ntangu yandi talaka Piere, yandi vandaka.
41 Piere pesaka yandi diboko mpe telemisaka yandi. Na manima, yandi bokilaka basantu mpe mifwidi ya bakento mpe lakisaka bawu Tabita ya moyo.
42 Mambu yango zabanaka na Zope nyonso, mpe bantu mingi kwikilaka na Mfumu.
43 Piere bikanaka mwa bilumbu mingi na Zope, na sika ya Simoni yina vanda bongisaka bampusu ya bibulu.
Banote
^ Na Greke: “Kukanga na basinga.”
^ Na Greke: “Dikanisi ya kunata bawu ya kukangama na basinga.”
^ Na Greke: “Kota mpe kubasika.”
^ Tala Yina ba me bwela A5.
^ Nkumbu Dorkase na Greke mpe Tabita na Ki-Arami, zola zonza kibulu yina ba ke bokilaka nsiese.
^ To: “Bilele ya zulu.”
