Na Filemo 1:1-25
1 Munu Polo, muntu yina ke na boloko samu na Kristo Yesu mpe Timote mpangi ya beto, beto ke na sonikilaka Filemo mpangi ya beto ya kisalu yina beto ke zolaka mingi.
2 Mpe na Afiya mpangi ya beto ya kento mpe na Arshipe yina ke soda mutindu beto mpe na kimvuka yina ke vukanaka na yinzo ya yandi:
3 Bika ti ntima ya kulutila mbote mpe kizunu ya Nzambi Tata ya beto mpe ya Mfumu Yesu Kristo vanda na beno.
4 Mu ke vutulaka ntangu nyonso matondo na Nzambi ya munu, ntangu mu ke zonzilaka nge na balusambu ya munu.
5 Samu mu ke na kuwaka nsangu ya kiminu ya nge mpe luzolo yina nge ke na yawu samu na Mfumu Yesu mpe samu na basantu.
6 Mu ke na sambilaka ti kiminu yina nge, mpe yina ba ya nkaka ke na yawu nata nge na kuzaba mambu nyonso ya mbote yina beto ke na yawu na nzila ya Kristo.
7 Mpangi, mu kuzwaka kilengi mingi mpe ngolo ntangu mu kuwaka nsangu ya luzolo ya nge, samu bantima ya basantu me kuzwa bukindi na nzila ya nge.
8 Ni na yawu, ata ti na nkumbu ya Kristo mu ke na kimpwanza ya kulutila ya kulomba na nge na kusala mambu yina ke mbote,
9 kasi mu ke na bondilaka nge samu ti mu zaba luzolo ya nge, munu Polo mu ke muntu ya kununa, ee ntangu yayi mu ke na boloko samu na Kristo Yesu.
10 Mu ke na bondilaka nge samu na mwana ya munu Onezime yina mu me kuma tata ya yandi awa na boloko.
11 Yandi vandaka ntete ve mfunu samu na nge, kasi ntangu yayi yandi ke mfunu samu na nge mpe samu na munu.
12 Mu ke na vutulaka yandi na sika ya nge, ee Onezime yina mu ke zolaka mingi.
13 Mu zola ti yandi bikana awa na munu samu yandi tatamana na kusadila munu na kisika ya nge na ntangu yina mu ke na boloko samu na nsangu ya mbote.
14 Kasi, kana nge pesa ve munu muswa, mu ke sala ata kima. Ntangu nge ke sala mambu ya mbote yayi, mu zola ve ti nge sala yawu na bantima zole, kasi nge sala yawu samu nge me zola kusala yawu.
15 Ntangu ya nkaka ya lenda vanda ti Onezime kimaka nge samu na mwa ntangu kaka,* samu ti yandi vanda dyaka na nge ntangu nyonso.
16 Dyaka ve mutindu ngaamba kasi ya kulutila ngaamba, mutindu mpangi yina ba ke zolaka mingi, mingi-mingi na munu, kasi na mutindu ya kulutila na nge, na kinsuni mpe na Mfumu.
17 Na yawu, kana nge ke bakilaka munu mutindu ndiku ya nge,* yamba yandi na kilengi nyonso mutindu nge zola yamba munu.
18 Dyaka, kana yandi salaka nge yimbi to kana yandi ke na mfuka ya nge, tula yawu na nkumbu ya munu.
19 Munu Polo, mu ke na sonikilaka nge na maboko ya munu mosi, mu ke futa nge mfuka ya nge, kasi mu ke zonza ve na nge ti nge ke na kudefaka munu luzingu ya nge.
20 Ya tsyeleka mpangi, bika mu kuzwa lubakusu yayi na sika ya nge na nkumbu ya Mfumu, pesa ntima ya munu ngolo na nkumbu ya Kristo.
21 Mu ke na kiminu ti nge ke sala yina mu ke na lombaka nge. Ni na yawu mu ke na sonikilaka nge, samu mu zaba ti nge ke sala mingi kulutila yina mu ke na zonzaka.
22 Kasi, mu ke na lombaka mpe nge ti nge yidikila munu kisika ya kulala, samu mu ke na kivuvu ti na nzila ya balusambu ya beno ba ke vutula munu na sika ya beno.
23 Epafraze yina ke ndiku ya munu na boloko na bumosi na Kristo Yesu me filisa nge bambote,
24 mpe Marke, Aristarke, Demase mpe Luke bampangi ya munu ya kisalu me filisa mpe nge bambote.
25 Bika ti ntima ya kulutila mbote ya Mfumu Yesu Kristo vanda na mpeve yina beno ke na lakisaka.
