Nsangu ya Mbote ya Luke 1:1-80
1 Bantu mingi salaka bangolo samu na kusonika mambu nyonso yina salamaka mpe yina beto ke ndimaka na ntima nyonso.
2 Mutindu mosi mpe, ba yina, katuka kubanda, talaka mambu yina na meso mpe kumaka basamuni ya nsangu ya Nzambi, zabisaka beto mambu yango.
3 Ni na yawu mfumu Teofile, munu mpe fyongoninaka mambu nyonso, samu na kusonikila nge yawu mutindu bamambu nyonso salamaka katuka kubanda.
4 Mu ke na salaka yawu samu nge zaba butsyeleka ya bamambu yina ba longisaka nge.
5 Ntangu Erode* vandaka mfumu ya Zude, ya vandaka na nganga-nzambi mosi na nkumbu ya Zakari. Yandi vandaka na kati ya kimvuka ya banganga-nzambi ya Abiya. Kento ya yandi vandaka muntu ya dikanda* ya Aroni. Nkumbu ya yandi vandaka Elizabete.
6 Bawu zole vandaka bantu ya lunungu* na meso ya Nzambi, mpe ba vandaka ve na mambu yina ba lenda semba bawu, samu ba vanda tumama na misiku nyonso, mpe na mambu nyonso yina Yehova* zonzaka ti bantu fwana kusala.
7 Kasi, ba vandaka ve na mwana, samu Elizabete vandaka kisita, mpe bawu zole vandaka me kuma biboba.
8 Ntangu Zakari vanda sala kisalu ya yandi ya bunganga-nzambi kintwadi na kimvuka ya yandi na mantwala ya Nzambi,
9 mutindu banganga-nzambi vanda salaka yawu,* ya kumaka mbala ya yandi ya kukota na kisika ya santu ya Yehova* samu na kuyoka pudre ya mananasi.
10 Bantu nyonso vanda sambila na ngaanda, na ngunga ya kuyoka pudre ya mananasi.
11 Mbazi ya Yehova* basikilaka Zakari. Yandi telamaka na diboko ya bakala ya mesa ya kuyoka pudre ya mananasi.
12 Ntangu Zakari talaka mbazi, yandi vanda lenda dyaka ve, mpe yandi kumaka na boma.
13 Kasi mbazi zonzaka na yandi: “Kuvanda ve na boma Zakari, samu Nzambi me kuwa ntangu nge me bondila yandi. Kento ya nge Elizabete ke butila nge mwana ya bakala mpe nge ke bokila yandi Yoane.
14 Nge ke vanda na kilengi mpe nsayi mingi, mpe bantu mingi ke yangalala ntangu yandi ke butuka,
15 samu yandi ke vanda muntu ya mfunu na meso ya Yehova.* Kasi yandi fwana kunwa ata fioti ve vinu mpe malafu yina ke kolisaka. Yandi ke vanda ya kufuluka na mpeve ya santu kubanda ntangu yina yandi ke vanda na kati ya kivumu ya mama ya yandi,*
16 mpe yandi ke vutula bana mingi ya Izraele na sika ya Yehova,* Nzambi ya bawu.
17 Dyaka, yandi ke tambula na mantwala ya Nzambi na mpeve mpe ngolo ya Eli, samu na kuvutula bantima ya batata na sika ya bana, kusadisa bantu yina ke tumamaka ve na kusadila ndwenga mutindu bantu ya lunungu,* mpe samu na kuyidikila Yehova* bantu yina ke ya kukubama.”
18 Zakari zonzaka na mbazi: “Wa’ faso mu lenda zaba ti mambu yayi ke salama? Mu ke kiboba, mpe kento ya munu mpe me nuna mingi.”
19 Mbazi vutulaka: “Mu ke Gabriele, yina ke telamaka na mantwala ya Nzambi, pene-pene ya yandi. Yandi me filisa munu samu na kuzonza na nge mpe kuzabisa nge nsangu ya mbote yayi.
20 Kasi nge ke kuma dibaba mpe nge ke lenda dyaka ve kuzonza tii kilumbu yina bamambu yayi ke salama, samu nge me kwikila ve na mambu yina mu me zabisa nge, yina ke salama na ntangu ya kulunga.”
21 Na ntangu yina, bantu vanda vingila Zakari, mpe ba kamwaka samu yandi vanda lutisa ntangu mingi na kati ya kisika ya santu.
22 Ntangu yandi basikaka, yandi vanda lenda ve kuzonza na bawu, mpe ba kwizaka zaba ti yandi talaka kima ya ngitukulu* na kati ya kisika ya santu. Yandi vanda zonzila bawu na bidimbu, kasi yandi vanda lenda ve na kuzonza.
23 Ntangu bilumbu ya kisalu ya yandi* manisaka, yandi vutukaka na yinzo ya yandi.
24 Na manima ya mwa bilumbu, Elizabete, kento ya yandi, kumaka na kivumu, mpe na kati ya bangonda tanu yandi vanda zinga ya kubumbana. Yandi vanda zonza:
25 “Yayi ni mambu yina Yehova me sala samu na munu. Yandi me tula munu dikebi samu na kukatula nsoni ya munu na kati ya bantu.”
26 Ntangu kivumu ya yandi kumaka na bangonda 6, Nzambi filisaka mbazi Gabriele, na Nazareti, mbanza mosi ya Galile,
27 na sika ya mwana ya kento mosi na nkumbu ya Maria, yina zabaka ntete ve babakala. Mwana ya kento yayi vandaka na nsilulu ya makwela na bakala mosi na nkumbu ya Yozefi, ya dikanda ya Davidi.
28 Ntangu mbazi kotaka, yandi zonzaka na Maria: “Mbote ya nge, kento yina Nzambi me sakumuna mingi. Yehova ke na nge.”
29 Mambu yina mbazi zonzilaka yandi ningisaka yandi mingi, mpe yandi vanda sosa kuzaba yinki mbote ya mutindu yayi zola zonza.
30 Na yawu, mbazi zonzaka na yandi: “Kutala ve boma Maria, samu ti Nzambi me sepela na nge.
31 Tala! Nge ke kuzwa kivumu, mpe nge ke buta mwana ya bakala. Nge ke bokila yandi Yesu.
32 Yandi ke vanda muntu ya mfunu, mpe ba ke bokila yandi Mwana ya Muntu ya Kulutila Zulu. Yehova* Nzambi ke pesa yandi kiti ya kimfumu ya Davidi, nkooko ya yandi.
33 Yandi ke yala yinzo ya Yakobi samu na ntangu nyonso, mpe Kimfumu ya yandi ke suka ve.”
34 Kasi Maria zonzaka na mbazi: “Wapi mutindu mambu yayi lenda salama, samu ti nabunu mu vukisa nzutu na bakala?”
35 Mbazi vutulaka: “Mpeve ya santu ke kulumuka na zulu ya nge, mpe ngolo ya Muntu ya Kulutila Zulu ke fuka nge na mpewo ya yawu. Ni na yawu, mwana yina ke butuka, ba ke bokila yandi santu, Mwana ya Nzambi.
36 Mpe tala! Elizabete, muntu ya dikanda ya nge, me kuzwa mpe kivumu ya mwana ya bakala na buboba ya yandi. Bantu vanda bokila yandi kisita, kasi ntangu yayi yandi me kuma na kivumu ya bangonda 6,
37 samu mambu yina Nzambi ke zonzaka ke lunganaka kaka.”
38 Na yina Maria zonzaka: “Mu ke kisadi ya Yehova.* Bika ti mambu nyonso salama mutindu nge me zonza.” Na manima, mbazi bikaka yandi.
39 Mwa ntangu na manima, Maria kwendaka na mbangu nyonso na ntoto ya bamongo, na mbanza mosi ya Zude.
40 Yandi kotaka na yinzo ya Zakari mpe pesaka Elizabete mbote.
41 Kaka na ntangu yina Elizabete kuwaka mbote ya Maria, mwana yina vandaka na kati ya kivumu ya yandi ninganaka mpe Elizabete fulukaka na mpeve ya santu.
42 Yandi zonzaka na ndinga ya ngolo: “Ba me sakumuna nge kulutila bakento nyonso, mpe ba me sakumuna mbuma ya kivumu ya nge!
43 Mu ke nani na kuzwa bweso ti mama ya Mfumu ya munu kwiza tala munu?
44 Ya tsyeleka, ntangu mu me kuwa mbote yina nge me pesa munu, mwana yina ke na kati ya kivumu ya munu me ningana na nsayi.
45 Kilengi mpe na kento yina kwikilaka, samu mambu yina Yehova* zabisaka yandi ke lungana yawu nyonso.”
46 Maria zonzaka: “Mwela* ya munu ke na kembilaka Yehova,*
47 mpe mpeve ya munu lenda bika ve kuvanda ya kufuluka na nsayi samu na Nzambi, Muvuukisi ya munu,
48 samu yandi me tula dikebi na kisadi ya yandi ya kento, ata ti yandi ke muntu ya mpamba. Ni na yawu, banda bubu yayi, bantu ya bantangu nyonso ke bokila munu kento ya nsayi,
49 samu muntu ya ngolo me sala bamambu ya nene samu na munu, mpe nkumbu ya yandi kele santu.
50 Samu na mankululu, yandi ke talaka kyadi ya ba yina ke talaka yandi boma.
51 Yandi me sala bisalu ya nene na diboko ya yandi. Yandi me mwangisa bantu yina ke na lunangu na kati ya mabanza ya bantima ya bawu.
52 Yandi me kulumusa bantu ya ngolo na bakiti ya bawu ya kimfumu, mpe yandi me zangula bantu ya kukuluka.
53 Yandi me sala ti bantu yina ke na nsatu, yukuta na bima ya mbote, mpe yandi me vutula bamvwama maboko mpamba.
54 Yandi me sadisa kisadi ya yandi Izraele samu na kubambuka nsilulu ya yandi ya kulakisa ntima ya kyadi samu na ntangu nyonso,
55 kaka mutindu yandi zonzilaka yawu na bankooko ya beto, na Abrahami mpe na bana* ya yandi.”
56 Maria bikanaka na Elizabete bangonda kana tatu, mpe na manima yandi vutukaka na yinzo ya yandi.
57 Ntangu lungaka samu Elizabete buta, mpe yandi butaka mwana ya bakala.
58 Bantu yina vanda zinga pene-pene na yandi mpe bantu ya dikanda ya yandi kuwaka ti Yehova* talaka yandi kyadi mingi mpe ba sepelaka kintwadi na yandi.
59 Na kilumbu ya 8, ba kwizaka samu na kuzenga mwana kibakala, mpe ba vanda zola kupesa yandi nkumbu ya tata ya yandi Zakari.
60 Kasi mama ya yandi zonzaka: “Ve, nkumbu ya yandi ke vanda Yoane.”
61 Ba zonzaka na yandi: “Ata muntu na dikanda ya nge ke na nkumbu yayi.”
62 Na yawu, ba salaka bidimbu samu na kuyufula na tata ya mwana wapi nkumbu yandi vanda zola ba pesa mwana.
63 Yandi lombaka mwa dibaya mpe sonikaka: “Nkumbu ya yandi Yoane.” Na yina, bawu nyonso kamwaka mingi.
64 Kaka na ntangu yina, yinwa mpe ludimi ya yandi fungukaka. Yandi bandaka kuzonza mpe kukumisa Nzambi.
65 Bantu nyonso yina vanda zinga pene-pene na bawu kumaka na boma, mpe ba vanda zonzila mambu yango na kati ya bwala nyonso ya bamongo ya Zude.
66 Ba yina nyonso kuwaka mambu yango yindulaka na yawu. Ba vanda yufula na kati ya bantima: “Mwana yayi ke kuma nani?” Ya tsyeleka, diboko ya Yehova* vandaka na yandi.
67 Zakari, tata ya yandi fulukaka na mpeve ya santu mpe bikulaka:
68 “Nkembo na Yehova* Nzambi ya Izraele, samu yandi me tula dikanda ya yandi dikebi mpe yandi me kuula bawu.
69 Yandi me pesa beto muvuukisi ya ngolo* na kati ya dibuta ya Davidi kisadi ya yandi,
70 kaka mutindu yandi zonzaka yawu na yinwa ya bambikudi ya yandi ya ntama.
71 Yandi pesaka nsilulu ti yandi ke vuukisa beto na bambeni ya beto, mpe na ba yina nyonso ke yiinaka beto.
72 Yandi ke tala beto kyadi mutindu yandi pesaka nsilulu na bankooko ya beto. Yandi ke bambuka moyo luwawanu ya yandi ya santu,
73 ndefi yina yandi zengaka na nkooko ya beto Abrahami,
74 samu ti na manima ya kuvuukisa beto na maboko ya bambeni, yandi pesa beto bweso ya kusadila yandi kisalu ya santu na ata boma,
75 na kukwikama mpe lunungu* bilumbu nyonso ya luzingu ya beto.
76 Kasi nge mwana ya fioti, ba ke bokila nge mbikudi ya Muntu ya Kulutila Zulu, samu nge ke tambula na mantwala ya Yehova* samu na kuyidikila yandi nzila,
77 samu na kuzabisa bantu ya yandi ti yandi ke vuukisa bawu na kulemvokilaka masumu ya bawu.
78 Nzambi ya beto ke sala mambu nyonso yayi samu yandi zaba kutala bantu kyadi. Samu na ntima ya kyadi yina, beto ke tala nsemo yina ke katuka na zulu mpe ke ngenga mutindu nsemo* ya ntangu yina ke basikaka na suka-suka,
79 samu na kupesa nsemo na ba yina ke ya kuvanda na kati ya kitombi, mpe na kati ya mpewo ya lufwa, mpe kutambusa makulu ya beto na nzila ya kizunu.”
80 Mwana yango kulaka mpe yelaka na kimpeve.* Yandi vanda zinga na kati ya ntoto ya kuyuma, tii na kilumbu yina yandi kwizaka talana pwelele na bantu ya Izraele.
Banote
^ Tala Yina ya zola zonza.
^ Na Greke: “Na kati ya bana ya kento ya Aroni.”
^ To: “Kudedama.”
^ Tala Yina ba me bwela A5.
^ To: “Mutindu ya vandaka nsalulu ya bawu.”
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ Na Greke: “Tekila yandi butuka.”
^ Tala Yina ba me bwela A5.
^ To: “Kudedama.”
^ Tala Yina ba me bwela A5.
^ To: “Kimona-meso.”
^ Na Greke: “Kisalu ya yandi ya santu.”
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ Ya zola zonza: “Kimuntu ya munu nyonso.”
^ Tala Yina ba me bwela A5.
^ Na Greke: “Mbuma.”
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ Na Greke: “Dimpoka ya kuvuuka.”
^ To: “Ludedomo.”
^ Tala Yina ba me bwela A5.
^ To: “Lumière.”
^ Na Greke: “Kumaka ngolo na mpeve.”
