Nsangu ya Mbote ya Luke 10:1-42
-
Yesu me filisa bilandi 70 na kukwenda samuna (1-12)
-
Kyadi na babwala yina me balula ve ntima (13-16)
-
Kuvutuka ya bilandi 70 (17-20)
-
Yesu me kumisa Tata ya yandi na yina yandi ndimaka bantu ya kukuluka (21-24)
-
Kifwani ya muntu mosi ya Samariya ya ntima ya mbote (25-37)
-
Yesu me kwenda tala Marta na Maria (38-42)
10 Na manima ya mambu yayi, Mfumu soolaka bilandi 70 ya nkaka. Yandi filisaka bawu zole-zole na mantwala ya yandi na bambanza nyonso mpe bisika nyonso yina yandi mosi zola kwenda.
2 Yandi zonzaka na bawu: “Ya tsyeleka, kisalu ya kuyonzika bambuma ke nene, kasi bantu samu na kusala yawu ke ndambu. Ni yawu yina, beno bondila Mfumu ya kisalu ya kuyonzika bambuma na kufilisa bisadi na kisalu ya yandi ya kuyonzika bambuma.
3 Beno kwenda! Mu ke na filisaka beno mutindu mameme na kati ya bayimbwa ya brusu.
4 Beno baka ve saki ya kunatina mbongo to saki ya kunatina madya to mapapa, mpe beno pesa ata muntu mbote* na nzila.
5 Na konso yinzo yina beno ke kota, beno zonza ntete: ‘Bika ti kizunu vanda na yinzo yayi.’
6 Kana ya ke na ndiku ya kizunu kuna, kizunu ya beno ke bikana na zulu ya yandi. Kasi kana ya ke ve na ndiku ya kizunu kuna, kizunu ya beno ke vutuka na beno.
7 Beno vanda na yinzo yina ke na ndiku ya kizunu. Beno kudya mpe beno kunwa bima yina ba ke pesa beno, samu kisadi me lunga kuzwa difuta ya yandi. Beno katuka ve na yinzo yina samu na kukwenda lala na yinzo ya nkaka.
8 “Dyaka, na konso mbanza yina beno ke kota mpe yina ba me yamba beno, beno kudya bima yina ba ke tula na mantwala ya beno.
9 Beno belusa ba yina ke na bimbevo bisika yina, mpe beno zonza na bawu: ‘Kimfumu ya Nzambi me kuma pene-pene na beno.’
10 Kasi na konso mbanza yina beno ke kota mpe ba me yamba ve beno, beno basika na banzila ya nene mpe beno zonza:
11 ‘Ata fundu-fundu ya bwala ya beno yina me kangama na makulu ya beto, beto me kubula yawu samu na kuvutula beno yawu. Kasi beno fwana kuzaba ti Kimfumu ya Nzambi me kuma pene-pene.’
12 Mu ke na zonzaka na beno ti lusambusu yina bantu ya bwala yango ke kuzwa, ke vanda ngolo mingi kulutila yina bantu ya Sodome ke kuzwa.
13 “Kyadi samu na nge Korazini! Kyadi samu na nge Besayida! samu kana bimangu yina salamaka na beno salamaka na Tire, mpe na Sidoni, banda ntama, ba zola lwata bangoto, mpe ba zola vanda na kati ya bombi ya tiya, samu na kulakisa ti ba balulaka bantima.
14 Ni na yawu, lusambusu yina beno ke kuzwa ke vanda ngolo mingi kulutila yina Tire mpe Sidoni ke kuzwa.
15 Mpe nge Kapenawume, nge kanisa ti Nzambi ke zangula nge tii na zulu? Nge ke kulumuka tii na Ndyamu.*
16 “Konso muntu yina me kuwa beno me kuwa mpe munu, mpe konso muntu yina me manga kuwa beno, me manga mpe kuwa munu. Dyaka, muntu yina me manga kuwa munu, me manga kuwa muntu yina filisaka munu.”
17 Na manima, bilandi 70 vutukaka na kilengi mpe zonzaka: “Mfumu, ata mpe bampeve ya yimbi ke tumamaka na beto ntangu beto ke sadilaka nkumbu ya nge.”
18 Yandi zonzaka na bawu: “Mu me tala yimeni Satana me katuka na zulu mpe me kubwa mutindu nsemo ya kidumu.
19 Beno kuwa! Mu me pesa beno lutumu ya kudyata na yisi ya makulu ya beno banyoka, mpe bankala-nseke,* mpe lutumu ya kununga ngolo nyonso ya mbeni, mpe ata kima mosi ve ke sala beno yimbi.
20 Ata faso yina, beno yangalala ve samu bampeve ya yimbi ke tumamaka na beno. Kasi beno yangalala samu bankumbu ya beno me sonama na mazulu.”
21 Kaka na ntangu yina, mpeve ya santu fulusaka yandi na kilengi, mpe yandi zonzaka: “Tata, Mfumu ya mazulu na ya ntoto, mu ke na kumisaka nge na mantwala ya bantu samu nge me bumba mbote-mbote mambu yayi na bantu ya ndwenga mpe ya mayela, mpe nge me lakisa yawu na bana ya fioti. Ee Tata, ni nge mosi zolaka ti ya vanda mutindu yayi.
22 Tata ya munu pesaka munu bima nyonso. Ata muntu mosi ve me zaba Mwana katula Tata, mpe ata muntu mosi ve me zaba Tata katula kaka Mwana, mpe konso muntu yina Mwana me zola kulakisa Tata.”
23 Na manima, yandi sololaka na bilandi ya yandi ntangu ba vandaka kaka bawu mosi, mpe zonzaka na bawu: “Kilengi na meso yina ke na talaka bamambu yina beno ke na talaka.
24 Ya tsyeleka mu ke na zonzaka na beno ti bambikudi mingi mpe bamfumu vandaka na nsatu ya kutala bamambu yina beno ke na talaka, kasi ba talaka ve yawu, mpe ba vandaka na nsatu ya kuwa bamambu yina beno ke na kuwaka, kasi ba kuwaka ve yawu.”
25 Na manima, muntu mosi yina zabaka mbote-mbote Musiku telamaka samu na kumeka yandi: “Mulongi, yinki mu me fwana kusala samu na kuzwa luzingu ya ntangu nyonso?”
26 Yesu zonzaka na yandi: “Yinki ke ya kusonama na kati ya Musiku? Wapi mambu nge ke tangaka kuna?”
27 Yandi vutulaka na Yesu: “‘Nge fwana kuzola Yehova* Nzambi ya nge na ntima ya nge nyonso, na mwela* ya nge nyonso, na ngolo ya nge nyonso mpe na makanisi ya nge nyonso’ mpe ‘kuzola mpangi ya nge mutindu nge mosi.’”
28 Yesu zonzaka na yandi: “Nge me pesa mvutu ya mbote, tatamana kusala mutindu yina mpe nge ke kuzwa luzingu.”
29 Kasi samu muntu yango vanda sosa kulakisa ti yandi ke muntu ya lunungu, yandi yufulaka Yesu: “Nani ya tsyeleka ke mpangi ya munu?”
30 Yesu vutulaka: “Muntu mosi katukaka na Yeruzalemi, mpe vanda kwenda na Yeriko. Na nzila, miyibi bwilaka yandi, botolaka yandi bima nyonso, mpe bulaka yandi. Ba bikaka yandi pene-pene na lufwa, mpe ba kwendaka.
31 Mwa ntangu fioti na manima, nganga-nzambi mosi vanda katuka na Yeruzalemi, mpe vanda luta na nzila yina. Ntangu yandi talaka muntu yango, yandi lutaka na lweka ya nkaka ya nzila.
32 Levite mosi kumaka mpe na kisika yango. Ntangu yandi talaka muntu yina, yandi lutaka na lweka ya nkaka ya nzila.
33 Kasi muntu mosi ya Samariya yina vanda luta na nzila kumaka kisika yina muntu yango vandaka, mpe ntangu yandi talaka yandi, yandi kumaka na kyadi mingi.
34 Na yawu, yandi kwizaka pene-pene ya yandi, tulaka mafuta mpe vinu na bamputa ya yandi, mpe kangaka yandi bitende. Na manima, yandi tulaka yandi na zulu ya kibulu ya yandi, nataka yandi na yinzo ya banzenza mpe sadisaka yandi.
35 Kilumbu yina landaka, yandi bakaka badenie zole, mpe pesaka yawu na muntu ya kuzwa yinzo ya banzenza, mpe zonzaka na yandi: ‘Kipe yandi mpe mbongo nyonso yina nge ke bwela na zulu ya mbongo yayi, mu ke vutula nge yawu ntangu mu ke vutuka.’
36 Na nge, nani na kati ya bawu tatu yayi me lakisa ti yandi ke mpangi ya muntu yina kubwaka na maboko ya miyibi?”
37 Muntu yango vutulaka: “Ni muntu yina me fwidila yandi kyadi.” Na yawu, Yesu zonzaka na yandi: “Kwenda, nge mpe sala mutindu mosi.”
38 Na manima, ba kwendaka mpe ba kotaka na bwala mosi. Kuna, kento mosi na nkumbu ya Marte yambaka Yesu na yinzo ya yandi.
39 Kento yango vandaka na leki ya kento na nkumbu ya Maria. Maria kwendaka vanda pene-pene ya makulu ya Mfumu mpe vanda kuwa mambu yina Mfumu vanda zonza.*
40 Kasi Marte vandaka na bisalu mingi ya kusala. Na yawu, yandi kwizaka pene-pene na Yesu mpe zonzaka: “Mfumu, ya ke na salaka nge ata kima na kutala ti leki ya munu me bika munu munu mosi na bisalu mingi? Zonza na yandi na kukwiza sadisa munu.”
41 Mfumu zonzaka na yandi: “Marte, Marte, nge ke na talaka ntima mpasi mpe nge ke na nyongaka samu na bima mingi.
42 Kasi bima fioti ke mfunu to mosi kaka. Maria me soola kikunku ya mbote* mpe ba ke katula ve yandi yawu.”
Banote
^ To: “Beno yambasana na ata muntu.”
^ To: “Hadesi.” Ya ke ndyamu ya bantu nyonso. Tala Yina ya zola zonza.
^ To: “Ba scorpions.”
^ Tala Yina ba me bwela A5.
^ Tala Yina ya zola zonza.
^ Na Greke: “Mambu ya yandi.”
^ To: “Ya kulutila mbote.”
