Nsangu ya Mbote ya Luke 11:1-54
11 Kilumbu mosi, Yesu vanda sambila na kisika mosi. Ntangu yandi manisaka, mosi ya bilandi ya yandi zonzaka na yandi: “Mfumu, longa beto faso ya kusambila mutindu Yoane mpe longaka na bilandi ya yandi.”
2 Yandi zonzaka na bawu: “Ntangu beno ke sambila, beno zonza: ‘Tata, bika ti nkumbu ya nge vanda ya santu.* Bika ti Kimfumu ya nge kwiza.
3 Pesa beto konso kilumbu madya* yina beto ke na yawu nsatu samu na bansatu ya beto ya konso kilumbu.
4 Lemvokila masumu ya beto, samu beto mpe ke lemvokilaka ba yina nyonso ke salaka beto yimbi,* mpe kubika ve ti beto kubwa na ntontolo.’”
5 Na manima Yesu zonzaka na bawu: “Beno kanisa ntete. Kana muntu mosi na kati ya beno ke na ndiku, mpe na kati-kati ya mpimpa yandi me kwenda na ndiku yina mpe me zonza na yandi, ‘Ndiku ya munu, defisa munu mampa tatu,
6 samu mosi ya bandiku ya munu me katuka na nzyetolo mpe me kwiza na sika ya munu, mpe mu ke na ata kima ya kupesa yandi.’
7 Kasi ndiku ya yandi vutulaka na kati ya yinzo: ‘Bika kukwamisa munu. Mwelo ya yinzo ke ya kukangama, mpe munu na bana ya munu ke na lalaka. Mu lenda vumbuka ve samu na kupesa nge kima.’
8 Mu ke na zonzaka na beno ti, ata ti yandi ke vumbuka ve samu na kupesa yandi kima samu na bundiku ya bawu, yandi ke vumbaka mpe ke pesa yandi bima nyonso yandi ke na yawu nsatu samu ndiku yango me tala ve boma ya kutatamana na kulomba.
9 Ni na yawu mu ke na zonzaka na beno, beno tatamana na kulomba mpe ba ke pesa beno. Beno tatamana na kusosa mpe beno ke kuzwa. Beno tatamana na kukonkota mpe ba ke fungudila beno,
10 samu muntu nyonso yina ke lombaka, ba ke pesa yandi, muntu nyonso yina ke sosaka, ke kuzwa, mpe muntu nyonso yina ke konkotaka, ba ke fungudila yandi.
11 Ya tsyeleka, wapi tata na kati ya beno, kana mwana ya yandi me lomba yandi mbisi, ke pesa yandi nyoka na kisika ya mbisi?
12 To kana yandi me lomba yandi diki, ke pesa yandi nkala-nseke?*
13 Ata ti beno ke bantu ya yimbi, beno zaba kupesa na bana ya beno makabu ya mbote. Na yawu, Tata yina ke na mazulu ke pesa kwandi ve mpeve ya santu na bantu yina ke lombaka yandi yawu?”
14 Na manima, yandi bingisaka mpeve mosi ya yimbi yina kumisaka muntu mosi dibaba. Ntangu mpeve ya yimbi basikaka, kibaba yango zonzaka, mpe bantu yitukaka.
15 Kasi ya ba nkaka vanda zonza: “Yandi ke bingisaka bampeve ya yimbi na ngolo ya Bezebule,* mfumu ya bampeve ya yimbi.”
16 Samu na kumeka yandi, ba ya nkaka bandaka kulomba yandi kidimbu yina zola katuka na mazulu.
17 Samu yandi zabaka mambu yina ba vanda kanisa, Yesu zonzaka na bawu: “Konso kimfumu yina ke ya kukabuka ke kufwaka, mpe konso yinzo yina ke ya kukabuka ke kubwaka.
18 Faso mosi mpe, kana Satana ke ya kukabuka, wa’ faso kimfumu ya yandi ke lenda kuvanda ya kusikama? Samu beno me zonza ti mu ke na bingisaka bampeve ya yimbi na ngolo ya Bezebule.
19 Kana mu ke bingisaka bampeve ya yimbi na ngolo ya Bezebule, na ngolo ya nani bana ya beno ke bingisaka bawu? Ni samu na yawu ba ke vanda bazuzi ya beno.
20 Kasi, kana ya ke ni na musapi ya Nzambi mu ke bingisaka bampeve ya yimbi, ya tsyeleka, Kimfumu ya Nzambi me kuma na sika ya beno.
21 Ntangu muntu mosi ya ngolo yina ke na binwanunu ya kulunga ke kebaka yinzo ya yandi, bima ya yandi ke vanda ya kubumbana mbote.
22 Kasi, kana muntu ya kulutila yandi ngolo me kwiza nwanisa yandi mpe me nunga yandi, muntu ya kulutila ngolo ke botola yandi binwanunu nyonso yina yandi ke tudilaka ntima, mpe ke kabula bima nyonso yina yandi me botola yandi.
23 Muntu yina ke ve kintwadi na munu ke mbeni ya munu, mpe muntu yina ke vukisaka ve bantu na munu ke mwangisaka.
24 “Ntangu mpeve ya mvindu ke basikaka na muntu, yandi ke lutaka na bisika yina ke ya kuyuma, samu na kusosa kisika ya kupema. Na manima ya kuzwa ve yawu, yandi ke zonzaka, ‘Mu ke vutuka na yinzo ya munu, kisika yina mu katukaka.’
25 Ntangu yandi ke kumaka kuna, yandi ke talaka ti ba me kombola yinzo mpe ba me bongisa yawu.
26 Na manima, yandi ke kwenda baka bampeve ya nkaka 7 ya kulutila yandi yimbi. Ba ke kota, mpe ba ke vanda kuna. Na yawu, luzingu ya muntu yina ke kuma yimbi kulutila mbala ya ntete.”
27 Ntangu yandi vanda zonza mambu yayi, kento mosi na kati-kati ya bantu zonzaka na yandi na ndinga ya ngolo: “Kyese na kivumu yina nataka nge mpe na mabene yina nge kunwaka!”
28 Kasi Yesu zonzaka: “Ve. Kasi kyese na bantu yina ke kuwaka mambu ya Nzambi mpe ke tumamaka na yawu.”
29 Ntangu bantu vanda kuma mingi na sika ya yandi, yandi bandaka kuzonza: “Bantu ya ntangu yayi ke bantu ya yimbi. Ba ke na sosaka kidimbu, kasi kidimbu yina ba ke pesa bawu ke kaka ni kidimbu ya Yona.”
30 Ya tsyeleka, kaka mutindu Yona kumaka kidimbu samu na bantu ya Ninive, Mwana ya muntu mpe ke vanda kidimbu samu na bantu ya ntangu yayi.
31 Na Kilumbu ya Lusambusu, mfumu ya kento ya sude ke vumbuka kintwadi na bantu ya ntangu yayi, mpe yandi ke lakisa ti ba ke bantu ya yimbi, samu yandi katukaka ntama samu na kuwa mayela ya Salomoni. Kasi beno tala, ya ke na muntu awa yina me lutila Salomoni.
32 Na Kilumbu ya Lusambusu, bantu ya Ninive ke vumbuka kintwadi na bantu ya ntangu yayi, mpe ba ke lakisa ti bantu ya ntangu yayi ke bantu ya yimbi, samu ti bawu, ba balulaka bantima ntangu Yona samunaka. Kasi beno tala, ya ke na muntu awa yina me lutila Yona.
33 Na manima ya kupelisa mwinda, ba ke tulaka ve yawu na kisika ya kubumbana, to na yisi ya kitunga.* Kasi ba ke tulaka yawu na zulu ya mesa, samu ba yina ke kota tala nsemo.
34 Disu ya nge ke mutindu mwinda ya nzutu ya nge. Ntangu disu ya nge ke talaka kaka kima mosi,* nzutu ya nge nyonso ke ngengaka.* Kasi ntangu ya ke lulaka,* nzutu ya nge mpe ke vandaka mpimpa.
35 Ni na yawu, sala keba samu nsemo yina ke na kati ya nge vanda ve mpimpa.
36 Na yawu, kana nzutu ya nge nyonso ke na ngengaka, mpe ata kisika ya yawu ke mpimpa, ya ke ngenga mutindu mwinda ntangu ya ke pesaka nge nsemo.”
37 Ntangu yandi zonzaka mambu yayi, Mufarize mosi bokilaka yandi na yinzo ya yandi samu na kudya. Na yawu, yandi kotaka na yinzo mpe vandaka na mesa.
38 Kasi Mufarize yango yitukaka ntangu yandi talaka ti Yesu sukulaka* ntete ve maboko tekila yandi kudya.
39 Kasi Mfumu zonzaka na yandi: “Beno Bafarize beno ke sukulaka ngaanda ya kopo mpe ya ndonga, kasi na kati, beno ke ya kufuluka na lukoso mpe mambu ya yimbi.
40 Bizoba! Muntu yina yidikaka ngaanda yidikaka mpe kati, mpila yina ve?
41 Kasi ntangu beno ke pesaka makabu ya kyadi,* beno pesa bima yina ke katukaka na kati, mpe beno ke vanda ya kuvedila na mambu nyonso.
42 Kyadi na beno Bafarize, samu beno ke pesaka Nzambi kikunku mosi na kati ya bikunku 10 ya bima yina beno ke kundaka, mutindu mante, peganoni, mpe bandunda nyonso ya nkaka. Kasi beno ke talaka lunungu mpe luzolo ya Nzambi mutindu bima ya mpamba. Ya tsyeleka, beno fwana kupesa bima yina, kasi kutula ve na lweka bamambu ya nkaka.
43 Kyadi na beno Bafarize, samu ti beno ke zolaka bakiti ya ntete* na bayinzo ya lusambu mpe ti bantu pesa beno mbote na buzitu na bazandu.
44 Kyadi na beno samu beno ke mutindu bandyamu* yina ke talanaka ve mbote-mbote,* yina bantu ke tambulaka na zulu ya yawu ata kuzaba!”
45 Muntu mosi yina zabaka mbote-mbote Musiku zonzaka na yandi: “Mulongi, na kuzonzaka mutindu yina, nge ke na fingaka beto mpe.”
46 Yesu zonzaka na yandi: “Kyadi na beno mpe bantu yina me zaba mbote-mbote Musiku, samu beno ke pesaka bantu bifunda ya kilo ya kunata, kasi beno, beno ke simbaka ve bifunda yango ata na musapi mosi.
47 “Kyadi na beno samu beno ke tungaka bandyamu* ya bambikudi, kasi ni bankooko ya beno kufwaka bawu.
48 Ya tsyeleka, beno ke bambangi ya mavanga ya bankooko ya beno. Ata mpila yina, beno ke ndimaka mavanga yango. Ba kufwaka bambikudi, kasi beno ke tungaka bandyamu samu na bambikudi.
49 Ni na yawu, Nzambi na ndwenga ya yandi zonzaka: ‘Mu ke filisa bawu bambikudi mpe bantumwa. Ba ke kufwa ba ya nkaka, mpe ba ke nyokola ba ya nkaka,
50 samu ba lomba na bantu ya ntangu yayi menga ya bambikudi nyonso yina mwanganaka katuka kubanda ya yinza,
51 kubanda na menga ya Abele tii na menga ya Zakari yina ba kufwaka na kati-kati ya kisika ya kuyoka minkayulu mpe tempelo.’ Ya tsyeleka, mu ke na zonzaka na beno ti ba ke lomba yawu na bantu ya ntangu yayi.
52 “Kyadi na beno yina me zaba mbote-mbote Musiku, samu beno me katula fungula ya luzabu. Beno mosi ke kotaka ve, mpe beno ke sosaka kukanga nzila na ba yina ke kotaka!”
53 Ntangu yandi basikaka na yinzo yina, milongisi ya Musiku mpe Bafarize bandaka kusala yandi tiya mingi mpe kuyufula yandi byuvu mingi ya nkaka.
54 Ba vanda keta yandi zonza mambu yina zola sala ti ba kanga yandi.
Banote
^ To: “Bika ti ba bakila nkumbu ya nge mutindu kima ya santu.”
^ To: “Dimpa.”
^ Na Greke: “Ke defaka beto.”
^ To: “Scorpion.”
^ Nkumbu yina ba ke sadilaka samu na Satana.
^ To: “Kitunga yina ba ke sadilaka samu na kuzaba kilo ya bima.”
^ To: “Ke talaka pwelele.” Na Greke: “Ke mpamba.”
^ To: “Ke fulukaka na nsemo.”
^ Na Greke: “Yimbi.”
^ Bafarize na Bazwife ya nkaka vanda sukulaka maboko na kulandaka bansalulu ya bawu.
^ To: “Makabu na bapovre.” Tala Yina ya zola zonza.
^ To: “Ya kulutila mbote.”
^ To: “Bandyamu ya kubambuka.”
^ To: “Yina ba me tula ve bidimbu.”
^ To: “Bandyamu ya kubambuka.”
