Nsangu ya Mbote ya Luke 12:1-59
-
Levire ya Bafarize (1-3)
-
Kuvanda na boma ya Nzambi, kasi ya bantu ve (4-7)
-
Kundima Kristo na mantwala ya bantu (8-12)
-
Kifwani ya mvwama mosi ya kizoba (13-21)
-
Beno bika kuvanda na manyongi (22-34)
-
Kikunku ya fioti (32)
-
-
Kuvanda ekenge (35-40)
-
Kisadi ya kukwikama mpe kisadi yina ke ve ya kukwikama (41-48)
-
Kizunu ve, kasi kukabuka (49-53)
-
Mfunu ya kuzaba mbote-mbote bantangu (54-56)
-
Kuyidika bamambu (57-59)
12 Na ntangu yina, mafunda ya bantu vukanaka kisika mosi mpe ba vanda dyata bampangi. Yesu bandaka kuzonza ntete na bilandi ya yandi: “Beno sala keba na levire ya Bafarize yina kele luvunu.
2 Kasi mambu nyonso yina ba bumbaka mbote-mbote ke talana, mpe mambu nyonso ya mansweki ke zabana.
3 Na yawu, mambu ni mambu yina beno ke zonzaka na kati ya mpimpa ke wakana na ntangu mpe mambu yina beno ke zonzaka na ndinga ya yisi na kati ya bayinzo ya beno, ba ke samuna yawu na mantwala ya bantu nyonso.*
4 Dyaka, mu ke na zonzaka na beno bandiku ya munu, beno vanda ve na boma ya ba yina ke kufwaka nzutu, mpe na manima lenda sala dyaka ve kima ya nkaka.
5 Kasi mu ke lakisa beno muntu yina beno fwana kuvanda na boma ya yandi: Beno vanda na boma ya muntu yina na manima ya kufwa, ke na ngolo ya kulosa na Gehena.* Ya tsyeleka, mu ke na zonzaka na beno, beno vanda na boma ya muntu yina.
6 Ba ke tekisaka banswini tanu na bambongo zole ya kisengo ya mfunu mingi ve,* faso yina ve? Kasi Nzambi ke zimbanaka ata mosi na kati ya bawu.
7 Na yina me tadila beno, ata lutangu nyonso ya bansuki ya yintu ya beno, Nzambi me zaba yawu. Beno vanda ve na boma, beno ke mfunu kulutila banswini mingi.
8 “Mu ke na zonzaka na beno ti muntu nyonso yina me ndima munu na mantwala ya bantu, Mwana ya muntu mpe ke ndima yandi na mantwala ya bambazi ya Nzambi.
9 Kasi muntu yina me manga munu na mantwala ya bantu, ba ke manga mpe yandi na mantwala ya bambazi ya Nzambi.
10 Muntu nyonso yina ke zonza mambu ya yimbi na yina me tadila Mwana ya muntu, ba ke lemvokila yandi. Kasi konso muntu yina ke vweza mpeve ya santu, ba ke lemvokila ve yandi.
11 Ntangu ba ke nata beno na mantwala ya bantu mingi yina me vukana,* na mantwala ya bantu ya luyalu to bamfumu, beno tala ve ntima mpasi na yina me tadila mutindu beno ke nwanina banzutu ya beno to mambu yina beno ke zonza,
12 samu mpeve ya santu ke longa beno mambu yina beno ke zonza kaka na ntangu yina.”
13 Muntu mosi na kati ya bantu mingi yina vandaka kuna zonzaka na yandi: “Mulongi, zonza na mpangi ya munu ya bakala na kukabula na munu bima yina tata ya beto bikilaka beto.”
14 Yesu vutulaka yandi: “Nge, nani me tula munu zuzi to zenga-mambu na kati ya beno zole?”
15 Na manima, yandi zonzaka na bawu: “Beno fungula mbote-mbote meso, mpe beno losa lukoso* ya mutindu nyonso, samu ti, ata ntangu muntu ke vandaka na bima mingi, luzingu ya yandi ke katukaka ve na bima yina yandi ke na yawu.”
16 Na manima yandi pesaka bawu kifwani. Yandi zonzaka: “Ntoto ya muntu mosi ya mvwama butaka mingi.
17 Na yawu yandi bandaka kuzonza na yisi ya ntima, ‘Awa mu ke dyaka ve na kisika ya kutula bima. Wapi kisika mu ke bumba bambuma nyonso yayi mu me buka na bilanga ya munu?’
18 Na manima yandi zonzaka, ‘Mu ke sala mutindu yayi: Mu ke mwangisa bayinzo nyonso yina mu ke bumbaka bambuma, mpe mu ke tunga bayinzo ya kulutila nene. Mu ke tula na kati bambuma ya munu nyonso mpe bima ya munu nyonso,
19 mpe mu ke zonza na munu mosi:* “Nge* ke na bima mingi yina nge me bumba samu na bamvula mingi. Pema, kudya, kunwa mpe sepela.”’
20 Kasi Nzambi zonzaka na yandi, ‘Kizoba, na mpimpa yayi kaka nge ke kufwa.* Na yawu, nani ke baka bima nyonso yina nge me bumba?’
21 Ni yawu ke kumina muntu yina ke bumbaka bimvwama samu na yandi mosi, kasi ke ve mvwama na meso ya Nzambi.”
22 Na manima, yandi zonzaka na bilandi ya yandi: “Ni na yawu mu ke na zonzaka na beno. Beno bika kuvanda na manyongi samu na luzingu* ya beno, na yina me tadila yinki beno ke kudya, to samu na banzutu ya beno, na yina me tadila yinki beno ke lwata.
23 Ya tsyeleka, luzingu* me lutila mfunu na madya mpe nzutu me lutila mfunu na bilele.
24 Beno tala bandeke yina ba ke bokilaka bankwankwa.* Ba ke kundaka ve mpe ba ke yonzikaka ve bambuma. Dyaka, ba ke ve na kisika ya kubumba bima. Kasi Nzambi ke dikisaka bawu. Beno ke kwandi ve mfunu mingi kulutila bandeke?
25 Nani na kati ya beno, na manyongi ya yandi, lenda kumisa luzingu ya yandi mwa fioti yinda?
26 Ni na yawu, kana beno lenda sala ve mambu ya fioti yayi, samu na yinki beno ke na talaka ntima mpasi samu na bamambu ya nkaka?
27 Beno kanisa na mutindu bifulu ya bilanga ke kulaka: Ya ke salaka ve mpe ya ke tungaka ve bilele. Kasi mu ke na zonzaka na beno ti ata Salomoni na bunene ya yandi nyonso, yandi lwataka ve kitoko mutindu mosi ya bifulu yayi.
28 Na yawu, kana ni faso yina Nzambi ke lwatisaka matiti ya bilanga yina kele bubu yayi, kasi mbasi ba ke losa yawu na tiya, yandi ke lwatisa beno ya kulutila, beno bantu ya kiminu ya fioti.
29 Ni na yawu, beno bika kutala ntima mpasi na kusosaka yinki beno ke kudya mpe yinki beno ke kunwa, mpe beno bika kuvanda na manyongi ya kulutila.
30 Samu ni bima nyonso yayi bantu ya makanda ya yinza ke sosaka na ngolo nyonso. Kasi Tata ya beno zaba ti beno ke na nsatu ya bima yayi.
31 Kasi beno tatamana na kusosa Kimfumu ya yandi, mpe ba ke bwela beno bima nyonso yayi.
32 “Beno vanda ve na boma kikunku ya fioti,* samu Tata ya beno me ndima kupesa beno Kimfumu.
33 Beno tekisa bima yina ke na beno mpe beno pesa makabu ya kyadi.* Beno sala basaki ya kunatina mbongo yina ke bebaka ve, kimvwama na mazulu yina ke manisa ve, kisika muyibi ke kumaka ve mpe banselele ke kudyaka ve.
34 Samu ti kisika yina kimvwama ya beno kele, ni kuna mpe bantima ya beno ke vanda.
35 Beno lwata bilele mpe beno vanda ya kubongama,* mpe beno sala ti bamwinda ya beno vanda ya kupelisa.
36 Beno me bonga kuvanda mutindu bantu yina ke na vingilaka mfumu ya bawu vutuka na mukembo ya makwela, samu na kufungula yandi mwelo na mbala mosi ntangu yandi ke kwiza, mpe ke konkota.
37 Kyese na bisadi yina mfumu ke kutana bawu ekenge ntangu yandi ke kwiza! Ya tsyeleka, mu ke na zonzaka na beno ti yandi ke lwata bilele ya kisalu* mpe yandi ke lomba na bawu na kuvanda na mesa, mpe yandi ke kwiza, mpe ke pesa bawu madya.
38 Kyese na bawu kana yandi kwiza na ntangu ya zole* ya kukengidila to ata mpe na ntangu ya tatu* mpe yandi kutana bawu ya kubongama.
39 Kasi beno simba mambu yayi: Kana mfumu ya yinzo zabaka na wapi ngunga muyibi zola kwiza, yandi zola bika ve muyibi kota na yinzo ya yandi.
40 Beno mpe beno vanda ya kubongama samu ti Mwana ya muntu ke kwiza na ngunga yina beno lenda kanisa ve ti yandi ke kwiza.”
41 Na manima Piere zonzaka: “Mfumu, nge ke na zonzilaka kifwani yayi kaka samu na beto to samu na bantu nyonso?”
42 Mfumu zonzaka: “Nani ya tsyeleka ke kisadi ya kukwikama, kisadi* ya mayela,* yina mfumu ya yandi ke tula na zulu ya bisadi ya yandi,* samu na kupesa bawu madya yina me lunga na bawu na ntangu ya kulunga?
43 Kyese na kisadi yina, kana mfumu ya yandi ntangu yandi ke kwiza, kuta yandi na kati ya kisalu yango.
44 Ya tsyeleka, mu ke na zonzaka na beno ti mfumu ya yandi ke tula yandi na zulu ya bima ya yandi nyonso.
45 Kasi kana kisadi yango zonza na kati ya ntima, ‘Mfumu ya munu ke na kwizaka ve na mbangu,’ mpe kana yandi banda kubula bisadi ya kento mpe ya bakala, kudya, kunwa mpe kukola malafu,
46 mfumu ya kisadi yayi ke kwiza na kilumbu yina kisadi ke na vingilaka ve yandi, mpe na ngunga yina yandi zaba ve. Mfumu ke semba yandi na ngolo nyonso mpe ke tula yandi na kisika mosi na bantu yina ke ve ya kukwikama.
47 Kisadi yango yina bakulaka mambu yina mfumu zolaka kasi bongamaka ve to salaka ve mambu yina yandi lombaka,* ba ke bula yandi nkuba.
48 Kasi muntu yina me bakula ve mambu yina mfumu zolaka mpe me sala bamambu yina me lunga ti ba bula yandi nkuba, ba ke bula yandi ndambu. Ya tsyeleka, muntu yina ba me pesa mingi, ba ke lomba yandi mingi, mpe muntu yina ba me pesa biyeko mingi, ba ke lomba yandi mingi kulutila yina ba ke lombaka.
49 “Mu kwizaka samu na kutula tiya na ntoto. Yinki mu ke zola dyaka kusala kana ba me pelisa yimeni tiya yango?
50 Kasi ya ke na mbotokolo yina mu me fwana kuzwa, mpe mu ke na talaka mpasi tii ntangu ya ke suka.
51 Beno kanisa ti mu kwizaka samu na kutula kizunu awa na zulu ya ntoto? Ve, mu ke na zonzaka na beno ti mu kwizaka samu na kukabula bantu.
52 Ya tsyeleka, banda ntangu yayi dikanda yina ke na bantu tanu ke kabuka. Bantu tatu ke wisana ve na bantu zole, mpe bantu zole ke wisana ve na bantu tatu.
53 Ba ke kabuka. Tata ke wisana ve na mwana ya yandi ya bakala, mpe mwana ya bakala ke wisana ve na tata ya yandi. Mama ke wisana ve na mwana ya yandi ya kento, mpe mwana ya kento ke wisana ve na mama. Mama ke wisana ve na kento ya mwana ya yandi ya bakala, mpe kento ke wisana ve na bokilo ya yandi ya kento.
54 Yandi zonzaka dyaka na bantu mingi yina vandaka kuna: “Ntangu beno ke talaka dituti yina me basika na westi, na mbala mosi beno ke zonzaka, ‘Mvula ya mupepe ya ngolo ke na kwizaka,’ mpe ya ke salamaka.
55 Ntangu beno ke talaka mupepe yina ke katukaka na sude, beno ke zonzaka, ‘Ya ke vanda na bantangu ya ngolo,’ mpe ya ke salamaka.
56 Beno bantu ya luvunu, beno zaba kutanga mbote-mbote bidimbu ya ntoto mpe ya mazulu. Kasi samu na yinki beno ke na zabaka ve kutanga mbote-mbote mambu yina ke na salamaka ntangu yayi?
57 Samu na yinki beno ke na lendaka ve kubakula beno mosi mambu yina ke ya kulunga?
58 Na kifwani, kana nge ke na mambu na muntu mpe beno ke na kwendaka na sika ya mfumu, sala nyonso na kuwisana na yandi ntangu beno ke ntete na nzila. Kana ve, yandi ke nata nge na zuzi mpe zuzi ke pesa nge na maboko ya soda, mpe soda ke tula nge na boloko.
59 Mu ke na zonzaka na nge ti ya tsyeleka, nge ke lenda ve kubasika na boloko tii nge ke futa pata ya nsuka ya mfuka ya nge.”*
Banote
^ Na Greke: “Na zulu ya yinzo.”
^ Tala Yina ya zola zonza.
^ Na Greke: “Na ntalu ya ba-asarioni zole.” Tala Yina ba me bwela B14.
^ To ya lenda vanda: “Ya bayinzo ya lusambu ya Bazwife.”
^ To: “Kulula.”
^ To: “Mwela ya munu.”
^ To: “Mwela, nge.”
^ To: “Ba ke lomba nge mwela ya nge.”
^ To: “Mwela.”
^ To: “Mwela.”
^ To: “Ba corbeaux.”
^ To: “Kikunku ya fioti ya mameme.”
^ To: “Makabu na bapovre.” Tala Yina ya zola zonza.
^ Na Greke: “Baluketo ya beno vanda ya kunyema.”
^ To: “Yandi ke nyema luketo.”
^ To: “Kubanda pene-pene ya ngunga ya 9 ya mpimpa, tii na midi ya mpimpa.”
^ To: “Kubanda na midi ya mpimpa tii pene-pene na ngunga ya tatu ya suka-suka.”
^ To: “Kisadi yina ke twadisaka yinzo mpe bisadi ya nkaka.”
^ To: “Ya ndwenga.”
^ To: “Bisadi ya yinzo.”
^ To: “Mambu ya kukwelana na luzolo ya yandi.”
^ Na Greke: “Leptoni ya nsuka.” Tala Yina ba me bwela B14.
