Nsangu ya Mbote ya Luke 14:1-35
-
Kilumbu ya saba, Yesu me belusa bakala mosi yina vandaka na kimbevo yina ke vimbisaka nzutu (1-6)
-
Lakisa kukuluka ntangu ba me bokila nge (7-11)
-
Bokila bantu yina ke ve na kima ya kuvutula nge (12-14)
-
Kifwani ya bantu yina zonzaka bamambu samu na kumanga kukwiza na mukembo (15-24)
-
Yina ke lombaka kuvanda kilandi (25-33)
-
Mungwa yina ke dyaka ve na ngolo ya yawu (34, 35)
14 Kilumbu mosi ya saba, Yesu kwendaka kudya na yinzo ya mfumu mosi ya Bafarize mpe ba vanda keta yandi mbote-mbote.
2 Kuna ya vandaka na bakala mosi na mantwala ya yandi yina vandaka na kimbevo yina ke vimbisaka nzutu.
3 Yesu yufulaka ba yina zabaka mbote-mbote Musiku mpe Bafarize: “Musiku ke pesaka kwandi nzila to ve ya kubelusa muntu kilumbu ya saba?”
4 Kasi ba vandaka kaka swi. Na yina, yandi simbaka bakala yango, belusaka yandi mpe zonzaka na yandi na kukwenda.
5 Na manima yandi zonzaka na bawu: “Kana beno ke na mwana to ngombe yina me kubwa na dibulu kilumbu ya saba, nani na kati ya beno ke kwenda basisa ve yandi na mbangu?”
6 Ba vanda lenda ve kupesa yandi mvutu.
7 Ntangu yandi talaka ti bantu yina ba bokilaka vanda soola samu na bawu mosi bisika yina ba bumbilaka bantu ya mfunu, yandi zonzilaka bawu kifwani. Yandi zonzaka na bawu:
8 “Ntangu ba ke bokilaka nge na mukembo ya makwela, kukwenda vanda ve na kiti yina me lutila bakiti nyonso na lukumu, samu ya lenda vanda ti ba me bokila mpe na mukembo yango muntu yina me lutila nge mfunu.
9 Na yawu, muntu yina me bokila beno nyonso zole ke kwiza zonza na nge: ‘Bika kiti ya nge na muntu yayi.’ Na yina, nge ke telama na nsoni, mpe ke kwenda vanda na kiti ya nsuka.
10 Kasi ntangu ba me bokila nge, kwenda vanda na kiti ya nsuka. Na yawu, ntangu muntu yina me bokila nge ke kwiza, yandi ke zonza na nge: ‘Ndiku ya munu, kwenda vanda na mantwala.’ Mpe, nge ke kuzwa lukumu na meso ya bantu nyonso ya nkaka yina ba me bokila.
11 Muntu nyonso yina ke zanguka, ba ke kulumusa yandi. Kasi muntu nyonso yina ke kuluka, ba ke zangula yandi.”
12 Na manima, yandi zonzaka na muntu yina bokilaka yandi: “Ntangu nge ke bokilaka bantu na kwiza kudya madya ya midi to ya nkokila, kubokila ve bandiku ya nge, bampangi ya nge, bantu ya dikanda ya nge, to bamvwama yina ke vandaka kisika mosi na nge, samu bawu mpe lenda bokila nge. Ya ke vanda mutindu ba me vutula nge mbote yina nge salaka bawu.
13 Kasi ntangu nge ke salaka mukembo, bokila bapovre, bikata, bantu ya binama ya kufwa, mpe bantu yina ke na meso ya kufwa,
14 mpe nge ke vanda na kilengi samu ba ke ve na kima ya kuvutula nge. Nzambi ke vutula nge yawu ntangu ba ke vumbula na lufwa bantu ya lunungu.”
15 Ntangu yandi kuwaka mambu yayi, mosi ya bantu yina ba bokilaka zonzaka na yandi: “Kyese na muntu yina ke kudya* na kati ya Kimfumu ya Nzambi.”
16 Yesu zonzaka na yandi: “Muntu mosi salaka mukembo ya nene, mpe yandi bokilaka bantu mingi.
17 Ntangu ngunga ya kudya kumaka, yandi filisaka kisadi ya yandi na kukwenda zonza na bantu yina yandi bokilaka, ‘Beno kwiza, samu ntangu yayi bima nyonso me bongama.’
18 Kasi samu na kumanga, bawu nyonso bandaka kuzonza bamambu ya mutindu na mutindu. Ya ntete zonzaka, ‘Mu sumbaka bilanga mpe mu ke na nsatu ya kukwenda tala yawu. Mulemvo, mu ke lenda ve kukwiza.’
19 Ya nkaka zonzaka, ‘Mu sumbaka bangombe 10, mpe mu ke na kwendaka tala yawu mbote-mbote. Mulemvo, mu ke lenda ve kukwiza.’
20 Ya nkaka dyaka zonzaka, ‘Mu me kwela ntama mingi ve. Na yawu, mu ke lenda ve kukwiza.’
21 Kisadi kwendaka, mpe zabisaka mambu nyonso yayi na mfumu ya yandi. Na manima, mfumu ya yinzo kumaka na nkele mpe zonzaka na kisadi ya yandi, ‘Kwenda mbangu na babala-bala ya nene, mpe na banzila ya bambanza, mpe nata bapovre, bikata, bantu ya kufwa meso, mpe bantu ya binama ya kufwa.’
22 Ntangu kisadi vutukaka, yandi zonzaka, ‘Mfumu, mu me sala mambu yina nge tumisaka munu, kasi bisika ya kuvanda ke ntete.’
23 Na yawu, mfumu zonzaka na kisadi, ‘Kwenda na banzila ya nene mpe na banzila ya fioti, mpe ndimisa bantu na kukwiza samu yinzo ya munu fuluka.
24 Ya tsyeleka, mu ke na zonzaka na beno ti, ata muntu na kati ya bantu yina mu bokilaka, ke meka madya ya munu ya mukembo.’”
25 Bantu mingi vanda sala nzyetolo na yandi. Yesu balukaka mpe zonzaka na bawu:
26 “Kana muntu kwiza na sika ya munu mpe yiina ve* tata ya yandi, mama ya yandi, kento ya yandi, bana ya yandi, bampangi ya yandi ya bakala, mpe bampangi ya yandi ya kento, ee ata mpe luzingu* ya yandi mosi, yandi lenda vanda ve kilandi ya munu.
27 Konso muntu yina me baka ve yinti ya yandi ya mpasi,* mpe me landa ve munu, lenda kuma ve kilandi ya munu.
28 Na kifwani, nani na kati ya beno kana yandi zola kutunga yinzo ya yinda, ke vanda ntete ve samu na kutala mbongo yina ya ke lomba yandi, mpe kutala kana yandi ke na mbongo ya kulunga samu na kumanisa yawu?
29 Kana ve, yandi lenda tula yisi ya yawu, kasi kuvanda ve na makoki ya kumanisa yawu, mpe bantu nyonso yina ke tala yawu ke banda kuseka yandi.
30 Ba ke zonza, ‘Muntu yayi bandaka kutunga, kasi yandi me lenda ve kumanisa.’
31 To kana mfumu mosi zola kunwanisa mfumu ya nkaka, yandi ke vanda ve ntete na bantu yina ke pesa yandi malongi samu na kutala kana na basoda 10 000 yina ke na yandi, yandi ke lenda kunwanisa mfumu yina ke na kwizaka na basoda 20 000?
32 Kana yandi me tala ti yandi ke lenda ve, ntangu mfumu ya nkaka ke ntete ntama, yandi ke filisa kimvuka ya mifidisi* samu na kulomba kizunu.
33 Mutindu mosi mpe, ata muntu na kati ya beno yina me pesa ve yeyeye na* bima ya yandi nyonso, lenda kuma kilandi ya munu.
34 “Ya tsyeleka, mungwa ke kima ya mbote. Kasi, kana mungwa ke dyaka ve na ngolo ya yawu, yinki ba lenda sala samu na kuvutula ngolo ya yawu?
35 Ya ke dyaka ve na mfunu samu na ntoto to samu na kuvukisa yawu na matufi ya bibulu yina ke bongisaka ntoto ya bilanga. Bantu ke losa yawu. Bika ti muntu yina ke na makutu samu na kuwa, kuwa.”
Banote
^ Na Greke: “Kudya mampa.”
^ To: “Zola ve munu kulutila.”
^ To: “Mwela.”
^ Tala Yina ya zola zonza.
^ To: “Ba ambassadeurs.” Ambassadeur kele kisadi yina mfumu ya bwala ke filisaka samu na kuvanda nzonzi ya yandi na bwala ya bunzenza.
^ To: “Me bika ve.”
