Nsangu ya Mbote ya Luke 16:1-31
16 Na manima, yandi zonzaka dyaka na bilandi ya yandi: “Ba zonzaka na muntu mosi ya mvwama ti kisadi* ya yandi vanda bebisa bimvwama ya yandi.
2 Na yawu, yandi bokilaka kisadi ya yandi mpe zonzaka, ‘Yinki mu ke na kuwaka? Sonikila munu wapi mutindu nge ke sadilaka bimvwama ya munu, samu nge lenda twadisa dyaka ve yinzo ya munu.’
3 Kisadi bandaka kuzonza na kati ya ntima, ‘Mfumu ya munu ke katula munu kisalu ya kutwadisa bimvwama ya yandi. Yinki mu ke sala? Mu ke ve na ngolo ya kusala bilanga, mpe mu ke vanda na nsoni ya kwenda lombaka bantu bima.
4 Aa! Mu zaba yinki mu ke sala, samu ntangu ba ke katula munu na kisalu, bantu yamba munu na bayinzo ya bawu.’
5 Yandi bandaka kubokila mosi na mosi ya ba yina vanda defa mfumu ya yandi. Yandi zonzaka na ya ntete, ‘Nge ke na defaka mfumu ya munu yikwa?’
6 Yandi vutulaka: ‘Bidunda* 100 ya mafuta ya Olive.’ Yandi zonzaka na yandi, ‘Mukanda ya nge ya mfuka yawu yayi. Vanda mpe sonika na mbangu 50.’
7 Na manima, yandi zonzaka na ya nkaka, ‘Nge yikwa nge ke na defaka?’ Yandi zonzaka, ‘Bangiri ya nene* 100 ya ble.’ Yandi zonzaka na yandi, ‘Mukanda ya nge ya mfuka yawu yayi. Sonika 80.’
8 Mfumu siikaka kisadi samu ata ti yandi vandaka ve muntu ya lunungu, yandi lakisaka ndwenga* na mutindu ya yandi ya kusala bamambu. Ya tsyeleka, bana ya yinza yayi* ke na ndwenga na mutindu ya bawu ya kusala bamambu bawu na bawu kulutila bana ya nsemo.
9 “Mu ke na zonzaka dyaka na beno: Beno kuzwa bandiku na nzila ya bimvwama ya kukondwa lunungu, samu ti ntangu ya ke vanda dyaka ve, ba yamba beno na bisika ya kuvanda ntangu nyonso.
10 Muntu yina ke ya kukwikama na bamambu ya fioti-fioti ke mpe ya kukwikama na bamambu ya nene. Mpe muntu yina ke ya kukondwa lunungu na bamambu ya fioti-fioti, ke mpe ya kukondwa lunungu na bamambu ya nene.
11 Na yawu, kana beno me vanda ve ya kukwikama na mutindu ya kusadila bimvwama ya kukondwa lunungu, nani ke pesa beno bimvwama ya tsyeleka?
12 Dyaka, kana beno me vanda ve ya kukwikama na mutindu ya kusadila bimvwama ya muntu ya nkaka, nani ke pesa beno kima samu na beno mosi?
13 Ata kisadi lenda sadila bamfumu zole. Kana ve, yandi ke yiina mfumu mosi mpe ke zola mfumu ya nkaka, to yandi ke vanda ya kukangama na mosi mpe ke zitisa ve ya nkaka. Beno lenda vanda ve bisadi ya Nzambi mpe ya Bimvwama.”
14 Bafarize yina vanda zolaka mbongo vanda kuwa bamambu nyonso yayi, mpe ba bandaka kuseka.
15 Na yawu, Yesu zonzaka na bawu: “Beno ke lakisaka na meso ya bantu ti beno ke bantu ya lunungu, kasi Nzambi zaba bantima ya beno, samu ti kima yina ke talanaka mfunu na meso ya bantu ke kima ya nganzi na meso ya Nzambi.
16 “Musiku mpe Bambikudi vandaka tii na ntangu ya Yoane. Banda ntangu yina, ba ke na zonzilaka nsangu ya mbote ya Kimfumu ya Nzambi, mpe bantu ya mutindu nyonso ke na nwanaka samu na kukota na kati ya Kimfumu yango.
17 Ya tsyeleka, zulu na ntoto lenda zimbana, kasi ata mwa kisono mosi ve ya kulutila fioti na kati ya Musiku ke kondwa kulungana.
18 “Konso bakala yina me kufwa makwela na kento ya yandi mpe me kwelana na kento ya nkaka me sala kinsuza, mpe muntu yina me kwelana na kento yina bakala me kufwa makwela, me sala kinsuza.
19 “Ya vandaka na bakala mosi ya mvwama yina vanda lwataka bilele ya mbwaki-viole mpe ya lino. Yandi vanda nataka luzingu ya bilengi mpe ya bantu ya mbongo.
20 Ba vanda tulaka na mantwala ya mwelo ya yandi bakala mosi na nkumbu ya Lazare, yina vanda lombaka bima mpe yina nzutu ya yandi vandaka ya kufuluka na bamputa.
21 Yandi vandaka na nsatu ya kudya bima yina vanda kubwa na mesa ya muntu ya mvwama yina, mpe bayimbwa vanda kwizaka pelaka bamputa ya yandi.
22 Na manima, bakala yina vanda lombaka bima kufwaka, mpe bambazi nataka yandi na lweka* ya Abrahami.
“Muntu ya mvwama mpe kufwaka, mpe ba zikaka yandi.
23 Na kati ya Ndyamu,* ntangu yandi vanda tala mpasi, yandi nangunaka meso, mpe talaka na ntama Abrahami, na Lazare na lweka* ya yandi.
24 Na yawu, yandi bokilaka mpe zonzaka, ‘Tata Abrahami, tadila munu kyadi. Filisa Lazare na kukwenda kotisa nsongi ya musapi ya yandi na maza samu na kukumisa ludimi ya munu madidi, samu ti mu ke na talaka mpasi na tiya ya ngolo yayi.’
25 Kasi Abrahami vutulaka, ‘Mwana, bambuka moyo ti nge vandaka na bima mingi ya mbote na luzingu ya nge, kasi Lazare talaka mpasi mingi. Ntangu yayi, ba ke na bombaka yandi awa, kasi nge, nge ke na talaka mpasi.
26 Dyaka, dibulu mosi ya nene ke na kabulaka beto na beno. Ya ke na salaka ti bantu yina zola kukatuka awa samu na kukwiza na beno lenda sala ve yawu, mpe bantu lenda katuka ve kisika beno kele samu na kukwiza na beto.’
27 Muntu yango zonzaka, ‘Kana ni faso yina, tata, mu ke na lombaka na nge na kufilisa yandi na yinzo ya tata ya munu,
28 samu yandi kebisa bampangi ya munu ya babakala tanu samu ba bika kukwiza na kisika ya mpasi yayi.’
29 Kasi Abrahami zonzaka, ‘Ba ke na Moyize mpe Bambikudi. Bika ba kuwa bawu.’
30 Muntu yango zonzaka, ‘Ve, mutindu yina ve tata Abrahami. Kasi kana muntu mosi na kati ya bantu ya kufwa kwenda tala bawu ba ke balula ntima.’
31 Kasi Abrahami zonzaka na yandi, ‘Kana ba me manga kuwa Moyize na Bambikudi, ba ke ndima mpe ve na kuwa muntu yina me vumbuka na lufwa.’”
Banote
^ “Kisadi yina ke twadisaka kisalu ya yinzo mpe bisadi ya nkaka ya yinzo.
^ To: “Babati.” Bati mosi vanda kota balitre 22. Tala Yina ba me bwela B14.
^ To: “Bakore.” Kore mosi vanda kota balitre 220. Tala Yina ba me bwela B14.
^ To: “Mayela.”
^ To: “Ntangu yayi.” Tala Yina ya zola zonza (Mambu ya ntangu mosi).
^ Na Greke: “Na ntulu.”
^ To: “Hadesi.” Ya ke ndyamu ya bantu nyonso. Tala Yina ya zola zonza.
^ Na Greke: “Na ntulu.”
