Nsangu ya Mbote ya Luke 17:1-37
17 Na manima, Yesu zonzaka na bilandi ya yandi: “Bamambu yina ke salaka ti bantu bula dibaku ke kondwa ve kukwiza. Kasi kyadi na muntu yina ke nataka yawu.
2 Ya ke vanda mbote ba kanga yandi ditadi ya nene na laka mpe ba losa yandi na nzadi ya mungwa. Kusala yandi mutindu yina me lutila mbote ti yandi sala ti mosi ya bana ya fioti yayi bula dibaku.
3 Beno sala keba. Kana mpangi ya nge me sala disumu, ngala yandi, mpe kana yandi me balula ntima, lemvokila yandi.
4 Ata ti yandi me sala nge mambu ya yimbi bambala 7 na kilumbu mpe me vutuka na sika ya nge bambala 7 mpe me zonza, ‘Mu me balula ntima,’ nge fwana kulemvokila yandi.”
5 Bantumwa zonzaka na Mfumu: “Kulisa kiminu ya beto.”
6 Mfumu vutulaka: “Kana kiminu ya beno ke nene mutindu mbuma ya mutarde, beno ke zonza na yinti yayi ya bambutu ya ndombe,* ‘Timuka awa mpe kwenda mena na kati ya nzadi ya mungwa!’ mpe ya ke tumama na beno.”
7 “Nani na kati ya beno kana yandi ke na kisadi yina ke salaka bilanga to yina ke vingilaka mameme, ke zonza na yandi ntangu yandi ke katuka na bilanga, ‘Kwiza vanda na mbangu na mesa mpe kudya?’
8 Kasi yandi ke zonza na yandi, ‘Lambila munu madya. Lwata bilele ya kisalu mpe sadila munu tii ntangu mu ke manisa kudya mpe kunwa. Na manima, nge lenda kudya mpe kunwa.’
9 Yandi ke tonda kwandi kisadi yayi samu yandi me sala mambu yina ba lombaka yandi? Ve.
10 Mutindu mosi mpe, ntangu beno ke sala mambu nyonso yina ba lombaka beno na kusala, beno zonza, ‘Beto ke kaka bisadi ya mpamba. Mambu yina beto me sala ke mambu yina beto me lunga kusala.’”
11 Ntangu yandi vanda kwenda na Yeruzalemi, yandi lutaka na kati-kati ya Samariya mpe Galile.
12 Ntangu yandi vanda kota na bwala mosi, bantu 10 yina vandaka na maladi ya bwazi bwabanaka yandi. Kasi ba telamaka mwa ntama na yandi.
13 Ba zonzaka na ndinga ya ngolo: “Yesu, Mulongi, tala beto kyadi!”
14 Ntangu Yesu talaka bawu, yandi zonzaka na bawu: “Beno kwenda talana na banganga-nzambi.” Ntangu ba vanda kwenda, ba kumaka ya kuvedila.
15 Ntangu mosi na kati ya bawu talaka ti yandi belukaka, yandi vutukaka mpe vanda kembila Nzambi na ndinga ya ngolo.
16 Yandi fukamaka na mantwala ya Yesu kizizi na ntoto mpe tondaka yandi. Ntyo yandi vandaka muntu ya Samariya.
17 Yesu zonzaka: “Bawu nyonso 10 kumaka ya kuvedila. Ni faso yina ve? Ba ya nkaka 9 yina, wapi bawu?
18 Katula kaka muntu ya yinsi ya nkaka yayi, ata muntu ya nkaka me vutuka samu na kupesa Nzambi nkembo?”
19 Yesu zonzaka na muntu yango: “Telama mpe kwenda. Kiminu ya nge me belusa nge.”
20 Bafarize yufulaka Yesu wapi ntangu Kimfumu ya Nzambi ke kwiza. Yandi zonzaka na bawu: “Kimfumu ya Nzambi ke kwiza ve na mutindu yina bantu nyonso ke tala yawu pwelele.
21 Bantu ke zonza ve, ‘Beno tala, yawu yayi awa!’ to ‘Yawu yina!’ Ya tsyeleka, Kimfumu ya Nzambi ke na kati-kati ya beno.”
22 Yandi zonzaka na bilandi ya yandi: “Bilumbu ke kwiza yina beno ke vanda na nsatu ya kutala kilumbu mosi na kati ya bilumbu ya Mwana ya muntu, kasi beno ke tala ve yawu.
23 Bantu ke zonza na beno, ‘Beno tala, yandi ke kuna!’ to ‘Yandi kele awa!’ Kasi beno basika ve mpe beno landa ve bawu.
24 Mutindu nsemo ya kidumu* ke ngengaka katuka na kitini mosi ya zulu tii na kitini ya nkaka, ni mutindu yina mpe Mwana ya muntu ke vanda na kilumbu ya yandi.
25 Kasi, yandi me fwana kutala ntete bampasi mingi mpe bantu ya ntangu yayi ke manga yandi.
26 Dyaka, na bilumbu ya Mwana ya muntu, bamambu ke salama kaka faso ya salamaka na bilumbu ya Nowe.
27 Bantu vanda kudya, kunwa, babakala vanda kwela, mpe ba vanda pesa bakento na makwela tii kilumbu Nowe kotaka na bwatu. Mvula ya nene nokaka mpe kufwaka bawu nyonso.
28 Ya ke salama mpe mutindu ya salamaka na bilumbu ya Loti. Bantu vanda kudya, kunwa, kusumba, kutekisa, kukunda, kutunga.
29 Kasi kilumbu yina Loti basikaka na Sodome, mvula ya tiya mpe ya matadi yina vanda basisa tiya katukaka na zulu, ya nokaka, mpe kufwaka bawu nyonso.
30 Ya ke vanda mutindu mosi na kilumbu yina Mwana ya muntu ke talana.
31 “Kilumbu yina, bika ti muntu yina ke na zulu ya yinzo, kasi yandi ke na bima na kati ya yinzo, kukulumuka ve samu na kubaka yawu. Mutindu mosi mpe, muntu yina ke na bilanga fwana kuvutukila ve bima yina ke na manima.
32 Beno bambuka moyo na kento ya Loti.
33 Muntu yina ke sosaka kukengidila luzingu* ya yandi ke zimbisa yawu. Kasi muntu yina ke zimbisa yawu ke bumba yawu moyo.
34 Mu ke na zonzaka na beno ti, na mpimpa yina, bantu zole ke vanda na zulu ya mfulu mosi. Ba ke baka mosi, kasi ba ke bika ya nkaka.
35 Ya ke vanda na bakento zole yina ke vanda na kisalu ya kunika bambuma. Ba ke baka mosi kasi ba ke bika ya nkaka.”
36 * ——
37 Ba zonzaka na Yesu: “Mfumu, wapi kisika?” Yandi zonzaka na bawu: “Kisika yina mvumbi ke vandaka ni kisika yina mpe bandeke yina ba ke bokilaka bambemba* ke vukana.”
Banote
^ Ya ke yinti ya ngolo, yina ntela ya yawu lenda kuma tii na bametre 6. Makasa ya yawu ke mutindu ntima, mpe bambuma ya yawu ke vandaka mbwaki ya ngolo to ndombe.
^ To: “Éclair.”
^ To: “Mwela.”
^ Tala Yina ba me bwela A3.
^ To: “Ba aigles.”
