Nsangu ya Mbote ya Luke 18:1-43
18 Na manima, yandi pesaka bawu kifwani samu na kulakisa ti ntangu nyonso ba fwana kusambila, mpe kulemba ve.
2 Yandi zonzaka: “Na bwala mosi, ya vandaka na zuzi mosi yina vanda kimaka ve Nzambi mpe vanda zitisaka ata muntu.
3 Kaka na bwala yango, ya vandaka na mufwidi mosi ya kento yina vanda kwendaka talaka yandi ntangu nyonso samu na kuzonza na yandi, ‘Sala ti mu nunga na mantwala ya muntu yina beto na yandi ke na lusambusu.’
4 Na kati ya mwa bantangu, zuzi vanda mangaka. Kasi na manima, yandi zonzaka na yandi mosi, ‘Ya tsyeleka, mu ke kimaka ve Nzambi mpe mu ke zitisaka ata muntu.
5 Kasi samu mufwidi ya kento yayi ke na bikaka ve kukwamisa munu, mu ke sala ti yandi nunga na lusambusu, samu yandi bika dyaka kukwiza mpe kulembisa munu na mambu yina yandi ke na lombaka.’”*
6 Na manima Mfumu zonzaka: “Beno me kuwa mambu yina zuzi yayi zonzaka ata ti yandi vandaka ve muntu ya lunungu!
7 Beno me kanisa ti Nzambi ke zenga ve mambu na lunungu samu na bantu yina yandi soolaka, ba yina ke didilaka yandi mpimpa ntangu, na ntangu yina yandi ke na lakisaka bawu ntima ya yinda?
8 Mu ke na zonzaka na beno ti yandi ke zenga mambu mbangu-mbangu na lunungu samu na bawu. Kasi ntangu Mwana ya muntu ke kwiza, yandi ke kutana kwandi kiminu ya faso yayi* na zulu ya ntoto?”
9 Yandi pesaka dyaka kifwani yayi samu na ba yina vanda kanisa ti ba ke bantu ya lunungu mpe yina vanda tala bampangi mutindu bantu ya mpamba:
10 “Bantu zole kwendaka sambila na tempelo. Mosi vandaka Mufarize mpe ya nkaka kilokoti-mpaku.
11 Mufarize telamaka mpe bandaka kusambila na kati ya ntima, ‘O Nzambi, mu ke na tondaka nge samu ti mu ke ve mutindu bantu nyonso ya nkaka, yina ke miyibi, bantu ya yimbi mpe ya kinsuza, to mutindu kilokoti-mpaku yayi.
12 Mu ke bakaka mukanu ya kumanga kudya bambala zole na lumingu, mpe mu ke pesaka kikunku mosi na kati ya bikunku 10 ya bima nyonso yina mu ke kuzwaka.’
13 Kasi kilokoti-mpaku telamaka mwa ntama, mpe yandi vanda zola ata fioti ve kunanguna meso na zulu. Yandi vanda bika ve kubula maboko na ntulu samu na kulakisa mawa mpe vanda zonza, ‘O Nzambi, tala munu kyadi* samu ti mu ke muntu ya masumu.’
14 Mu ke na zonzaka na beno ti ntangu bakala yayi vutukaka na yinzo, na meso ya Nzambi, yandi vandaka muntu ya lunungu kulutila Mufarize yina, samu muntu nyonso yina ke zanguka, ba ke kulumusa yandi, kasi muntu nyonso yina ke kuluka, ba ke zangula yandi.”
15 Bantu vanda natina mpe yandi bana ya bawu ya fioti samu yandi simba bawu. Kasi ntangu bilandi talaka mutindu yina, ba bandaka kungala bawu.
16 Kasi Yesu bokilaka bana ya fioti na sika ya yandi mpe yandi zonzaka: “Beno bika bana ya fioti kukwiza na sika ya munu. Beno sosa ve kukanga bawu nzila, samu Kimfumu ya Nzambi ke ya bantu mutindu bawu.
17 Ya tsyeleka mu ke na zonzaka na beno ti, muntu yina ke yamba ve Kimfumu ya Nzambi mutindu mwana ya fioti, ke kota ata fioti ve na kati ya yawu.”
18 Mfumu mosi ya Bazwife yufulaka yandi: “Mulongi ya mbote, yinki mu me fwana kusala samu na kuzwa luzingu ya ntangu nyonso?”
19 Yesu zonzaka na yandi: “Samu na yinki nge me bokila munu mbote? Ata muntu mosi ve ke mbote katula kaka Nzambi.
20 Nge zaba misiku: ‘Kusala ve kinsuza, kufwa ve muntu, kulaba ve, kupesa ve kimbangi ya luvunu, zitisa tata ya nge na mama ya nge.’”
21 Yandi zonzaka: “Mu ke zitisaka misiku nyonso yayi kubanda buntwenya ya munu.”
22 Na manima ya kuwa mambu yayi, Yesu zonzaka na yandi, “Ya ke ntete na mambu mosi yina nge me fwana kusala: Tekisa bima nyonso yina ke na nge, kabula mbongo yina na bapovre, mpe nge ke kuzwa kimvwama na mazulu. Na manima, kwiza mpe landa munu.”
23 Ntangu bakala yango kuwaka mambu yayi, ntima ya yandi fulukaka na kyadi samu yandi vandaka na bimvwama mingi.
24 Yesu talaka yandi mpe zonzaka: “Ya tsyeleka, ya ke vanda mpasi na bantu yina ke na mbongo na kukota na Kimfumu ya Nzambi!
25 Ntembe ve, ya ke pete mingi na kibulu yina ba ke bokilaka shamo na kuluta na dibulu ya ntumbu ya bilele, kasi ya ke vanda mpasi ya kulutila samu na mvwama na kukota na Kimfumu ya Nzambi.”
26 Ba yina vanda kuwa zonzaka: “Nani kwandi lenda vuuka?”
27 Yesu zonzaka: “Mambu yina bantu lenda sala ve, Nzambi lenda sala yawu.”
28 Kasi Piere zonzaka: “Tala, beto me bika bima yina beto vandaka na yawu mpe beto me landa nge.”
29 Yesu zonzaka na bawu: “Ya tsyeleka, mu ke na zonzaka na beno ti, konso muntu yina me bika yinzo to kento, bayaya to baleki, bibuti to bana, samu na Kimfumu ya Nzambi,
30 ke kuzwa na ntangu yayi bima ya kulutila, mpe na yinza* yina ke kwiza, luzingu ya ntangu nyonso.”
31 Na manima, Yesu bendaka bantumwa 12 na lweka mpe yandi zonzaka na bawu: “Beno kuwa. Beto ke na kwendaka na Yeruzalemi, mpe bamambu nyonso yina bambikudi sonikaka na yina me tadila Mwana ya muntu ke lungana.*
32 Ba ke pesa yandi na maboko ya bantu ya makanda, ba ke seka yandi, ba ke finga yandi, mpe ba ke lobola yandi mante.
33 Na manima ya kubula yandi bashikoti, ba ke kufwa yandi, kasi na kilumbu ya tatu yandi ke vumbuka na lufwa.”
34 Kasi bilandi bakulaka ata mambu mosi na kati ya bamambu yayi, samu ya vandaka ya kubumbama samu na bawu, mpe ba zabaka ve yinki bamambu yayi vanda sosa kuzonza.
35 Ntangu Yesu kumaka pene-pene na mbanza ya Yeriko, muntu mosi ya meso ya kufwa vandaka ya kuvanda na nzila mpe vanda lomba bantu bima.
36 Ntangu yandi kuwaka makelele ya bantu mingi yina vanda luta, yandi bandaka kuyufula yinki vanda salama.
37 Ba zonzaka na yandi: “Ni Yesu muntu ya Nazareti muntu ke na lutaka!”
38 Na yawu, yandi zonzaka na ndinga ya ngolo: “Yesu, Mwana ya Davidi, tadila munu kyadi!
39 Ba yina vanda tambula na mantwala bandaka kusemba yandi, mpe vanda zonza na yandi na kukanga yinwa ya yandi. Ata faso yina, yandi vanda zonza dyaka na ndinga ya kulutila ngolo: “Mwana ya Davidi, tadila munu kyadi!”
40 Na yawu, Yesu telamaka mpe yandi zonzaka ti ba natina yandi muntu yango. Ntangu yandi kumaka pene-pene na Yesu, Yesu yufulaka yandi:
41 “Yinki nge ke na sosaka ti mu sala samu na nge?” Yandi zonzaka: “Mfumu, bika ti mu tala dyaka.”
42 Yesu zonzaka na yandi: “Ti tala. Kiminu ya nge me belusa nge.”
43 Na mbala mosi yandi talaka dyaka mpe yandi bandaka kulanda Yesu na kukembilaka Nzambi. Ntangu ba talaka mutindu yina, bantu nyonso mpe bandaka kukumisa Nzambi.
Banote
^ To: “Kubula munu makofi tii mu ke lemba.”
^ Na Greke: “Kiminu.”
^ To: “Lakisa munu ntima ya kyadi.”
^ To: “Ntangu.” Tala Yina ya zola zonza (Mambu ya ntangu mosi).
^ To: “Salama.”
