Nsangu ya Mbote ya Luke 2:1-52
2 Na bilumbu yina, Sezare Oguste basisaka musiku samu bantu ya ntoto nyonso* sonikisa bankumbu.
2 Kusonikisa yayi ya bankumbu salamaka mbala ya ntete ntangu Kirinuse vandaka mfumu ya Siri.
3 Na yawu, muntu nyonso kwendaka sonikisa nkumbu na bwala ya yandi.
4 Ni na yawu, Yozefi mpe katukaka na mbanza ya Nazareti na Galile, mpe kwendaka na Zude na mbanza ya Davidi yina ba ke bokilaka Betelemi, samu yandi vandaka muntu ya yinzo mpe ya dikanda ya Davidi.
5 Yandi kwendaka sonikisa nkumbu ya yandi kintwadi na Maria yina kumaka kento ya yandi, mutindu ba pesaka yandi nsilulu. Maria vandaka ve ntama na kubuta.
6 Ntangu ba vandaka kuna, ntangu ya yandi ya kubuta lungaka.
7 Yandi butaka mwana ya bakala, mwana ya yandi ya ntete. Yandi fukaka yandi na balele, mpe lalisaka yandi na kati ya kisika yina bibulu ke kudyaka, samu ba kuzwaka ve kisika ya kulala na yinzo ya banzenza.
8 Na kizunga yina, ya vandaka mpe na mivungi yina vanda zinga na ngaanda, mpe vanda kengidila mameme ya bawu na mpimpa.
9 Na mbala mosi, mbazi ya Yehova* telamaka na mantwala ya bawu, mpe nkembo ya Yehova* zungaka bawu na nsemo.* Ba kumaka na boma mingi.
10 Kasi mbazi zonzaka na bawu: “Beno vanda ve na boma samu mu ke na zabisaka beno nsangu ya mbote yina ke pesa bantu nyonso kilengi mingi.
11 Bubu yayi, ba me butila beno muvuukisi na mbanza ya Davidi. Ni yandi Kristo, Mfumu.
12 Ni na kidimbu yayi beno ke zaba yandi: Beno ke tala mwana ya fioti yina ba me fuka na balele, ya kulala na kisika yina bibulu ke kudyaka.”
13 Na mbala mosi, kimvuka ya nene ya basoda ya mazulu,* kintwadi na mbazi yayi, bandaka kukembila Nzambi na kuzonzaka:
14 “Nkembo na Nzambi kuna na mazulu, mpe kizunu na ntoto na kati ya bantu yina Nzambi ke ndimaka.”*
15 Ntangu bambazi bikaka bawu mpe vutukaka na zulu, mivungi bandaka kuzonza bawu na bawu: “Beto kwenda na Betelemi samu na kutala mambu yina me salama, yina Yehova me zabisa beto.”
16 Na mbangu nyonso ba kwendaka mpe talaka Maria na Yozefi, mpe mwana ya fioti vandaka ya kulala na kati ya kisika yina bibulu ke kudyaka.
17 Ntangu ba talaka mutindu yina, ba zonzilaka nsangu yina ba zonzaka na bawu na yina me tadila mwana ya fioti yina.
18 Ba yina nyonso kuwaka mambu yina mivungi zonzaka na bawu, yitukaka mingi.
19 Kasi Maria vanda bumba bamambu nyonso yina ba vanda zonza mpe yandi vanda yindula na yawu na kati ya ntima ya yandi.
20 Na manima, mivungi vutukaka. Ba vanda kembila mpe kukumisa Nzambi samu na mambu nyonso yina ba kuwaka mpe talaka, kaka mutindu ba zabisaka bawu yawu.
21 Na manima ya bilumbu 8, ntangu kilumbu ya kuzengisa mwana kibakala kumaka, ba pesaka yandi nkumbu Yesu. Ni nkumbu yina mbazi pesaka, tekila Maria kuzwa kivumu.
22 Dyaka, ntangu ya kumaka ntangu ya kuvedisa bawu, mutindu Musiku ya Moyize ke lombaka, ba nataka yandi na Yeruzalemi samu na kulakisa yandi na Yehova,*
23 kaka mutindu ya ke ya kusonama na Musiku ya Yehova:* “Konso mwana ya ntete ya bakala,* ba me fwana kubokila yandi santu samu na Yehova.”*
24 Ba pesaka munkayulu mutindu Musiku ya Yehova* ke tubaka yawu, biduka* zole to bana zole ya mabembe.
25 Na Yeruzalemi, ya vandaka na bakala mosi na nkumbu ya Simeyoni. Yandi vandaka muntu ya lunungu,* mpe yandi vandaka na boma ya Nzambi. Yandi vanda vingila ntangu yina Nzambi ke katula kyadi ya Izraele, mpe mpeve ya santu vandaka na zulu ya yandi.
26 Dyaka, Nzambi zabisaka yandi na nzila ya mpeve ya santu ti yandi ke kufwa ve kana yandi tala ntete ve Kristo ya Yehova.*
27 Ngolo ya mpeve nataka yandi na kukwenda na tempelo. Ntangu bibuti ya Yesu nataka yandi samu na kusala yandi mambu yina Musiku vanda lomba na kusala,
28 Simeyoni bakaka mwana na maboko ya yandi, kembilaka Nzambi mpe zonzaka:
29 “Ntangu yayi, Mfumu ya Kulutila Nene, nge ke na bikaka kisadi ya nge kwenda* na kizunu, mutindu nge zonzaka yawu,
30 samu meso ya munu me tala muntu yina ke vuukisa bantu,
31 nzila yina nge me yidika na meso ya bawu nyonso,
32 nsemo samu na kukatula lele yina ke fukaka meso ya makanda mpe nkembo ya dikanda ya nge Izraele.”
33 Tata na mama ya mwana vanda yituka na bamambu yina ba vanda zonza samu na yandi.
34 Dyaka, Simeyoni sakumunaka bawu mpe zonzaka na Maria mama ya mwana: “Kuwa! Mwana yayi ke muntu yina ba me soola samu na kubwisa to kutelemisa bantu mingi na Izraele, mpe samu na kuvanda kidimbu yina bantu ke manga.
35 Ya tsyeleka, mbele ya yinda ke tobola nge* samu mambu yina ke na kati ya bantima ya bantu mingi zabana.”
36 Ya vandaka mpe na mbikudi mosi ya kento na nkumbu ya Ana, mwana ya Fanwele, ya dikanda ya Asere. Kento yayi nunaka mingi. Yandi zingaka na bakala ya yandi bamvula 7 na manima ya makwela* ya bawu.
37 Yandi vandaka mufwidi mpe yandi kumaka na bamvula 84. Yandi vanda kwizaka ntangu nyonso na tempelo. Yandi vanda salaka kisalu ya santu mpimpa ntangu na kulutisaka bantangu ata kudya kima, mpe na kubondilaka Nzambi.
38 Kaka na ntangu yina, yandi kwizaka pene-pene, mpe bandaka kuvutula Nzambi matondo, mpe kuzonzila mwana na sika ya bantu nyonso yina vanda vingila ti Nzambi vuukisa Yeruzalemi.
39 Ntangu ba manisaka kusala mambu nyonso yina musiku ya Yehova* lombaka, ba vutukaka na Galile na mbanza ya bawu Nazareti.
40 Mwana vanda kula mpe vanda kuma ngolo. Yandi vandaka ya kufuluka na ndwenga mpe Nzambi vanda ndima kaka yandi.
41 Konso mvula, bibuti ya yandi vandaka na kifu ya kukwendaka na Yeruzalemi samu na mukembo ya Pake.
42 Ntangu yandi kumaka na bamvula 12, ba kwendaka samu na mukembo kaka mutindu ba vanda salaka yawu.
43 Ntangu mukembo manisaka, ba vutukaka. Kasi, Yesu bikanaka na Yeruzalemi, mpe bibuti ya yandi zabaka ve.
44 Ba vanda kanisa ti yandi vandaka na bantu yina vanda sala nzila na bawu. Na manima ya kutambula kilumbu ya muvimba, ba bandaka kusosa yandi na kati ya bantu ya dikanda ya bawu, mpe bantu yina ba zabaka.
45 Kasi ba talaka ve yandi. Na yawu, ba vutukaka na Yeruzalemi mpe sosaka yandi bisika nyonso.
46 Na manima ya bilumbu tatu, ba talaka yandi na tempelo. Yandi vandaka ya kuvanda na kati-kati ya milongi. Yandi vanda kuwa bawu mpe kuyufula bawu byuvu.
47 Kasi bantu nyonso yina vanda kuwa yandi, vanda yituka na mayela ya yandi mpe bamvutu ya yandi.
48 Ntangu bibuti ya yandi talaka yandi, ya kamwisaka bawu, mpe mama ya yandi zonzaka na yandi: “Mwana ya munu, samu na yinki nge me sala beto faso yayi? Munu na tata ya nge beto me tala ntima mpasi na kusosa nge.”
49 Kasi yandi zonzaka na bawu: “Samu na yinki beno vanda sosa munu? Beno zabaka ve ti mu me fwana kuvanda na yinzo ya Tata ya munu?”
50 Kasi ba bakulaka ve mambu yina yandi vanda zonza na bawu.
51 Yandi vutukaka na bawu na Nazareti, mpe yandi vanda tumamaka na bawu. Dyaka, mama ya yandi vanda bumba mbote-mbote mambu nyonso yayi na ntima ya yandi.
52 Yesu vanda kula na ndwenga mpe na nzutu, mpe Nzambi na bantu vanda sepelaka na yandi.
Banote
^ Na Greke: “Ntoto nyonso yina bantu ke vandaka.”
^ Tala Yina ba me bwela A5.
^ Tala Yina ba me bwela A5.
^ To: “Lumière.”
^ To: “Bambazi.”
^ Na Greke: “Bantu ya bumbote.”
^ Tala Yina ba me bwela A5.
^ Na Greke: “Konso mwana ya bakala yina me fungula kivumu.”
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ Ya ke bandeke ya fioti.
^ To: “Kudedama.”
^ Tala Yina ba me bwela A5.
^ To: “Kufwa.”
^ To: “Mwela ya nge.”
^ Na Greke: “Banda ntangu yina yandi zabaka ntete ve babakala.”
^ Tala Yina ba me bwela A5.
