Nsangu ya Mbote ya Luke 22:1-71
-
Banganga-nzambi ke na sosaka mutindu ya kufwa Yesu (1-6)
-
Kuyidika Pake ya nsuka (7-13)
-
Yesu me sala mbala ya ntete Madya ya Nkokila ya Mfumu (14-20)
-
“Muntu yina ke teka munu ke na munu na mesa” (21-23)
-
Kuswana ya ngolo samu na kuzaba nani me lutila bampangi (24-27)
-
Yesu ke na salaka luwawanu samu na kimfumu mosi (28-30)
-
Yesu me bikula ti Piere ke manga yandi (31-34)
-
Mfunu ya kuvanda ya kubongama, bambele zole (35-38)
-
Lusambu ya Yesu na zulu ya Mongo ya bayinti ya Olive (39-46)
-
Ba me kanga Yesu (47-53)
-
Piere me manga Yesu (54-62)
-
Ba me seka Yesu (63-65)
-
Lusambusu na mantwala ya kimvuka ya bakuluntu ya Bazwife (66-71)
22 Mukembo ya mampa yina ke ve na levire, yina ba ke bokilaka Pake, kumaka pene-pene.
2 Bamfumu ya banganga-nzambi na milongisi ya Musiku vanda sosa mutindu ya mbote ya kufwa yandi, samu ba vandaka na boma ya bantu.
3 Na yawu, Satana kotaka na Yuda, yina ba vanda bokilaka Iskayote. Yandi vandaka mosi ya bantumwa 12.
4 Yuda kwendaka solola na bamfumu ya banganga-nzambi mpe bamfumu ya mikengi ya tempelo, na mutindu yina yandi zola teka Yesu na maboko ya bawu.
5 Ba sepelaka mingi na yawu, mpe ba wisanaka kupesa yandi bambongo ya bisengo.
6 Yandi ndimaka, mpe bandaka kusosa ntangu ya mbote samu na kuteka Yesu na maboko ya bawu ntangu bantu zola vanda ve.
7 Kilumbu ya ntete ya mukembo ya Mampa yina ke ve na levire kumaka, kilumbu yina ba fwana kupesa munkayulu ya Pake.
8 Na yawu, Yesu filisaka Piere na Yoane, mpe zonzaka na bawu: “Beno kwenda yidikila beto madya ya Pake.”
9 Ba yufulaka yandi: “Na wapi kisika nge me zola ti beto yidika yawu?”
10 Yesu zonzaka na bawu: “Ntangu beno ke kota na mbanza, muntu mosi yina ke na nataka diyuki* ya maza ke bwabana beno. Beno landa yandi tii na kati ya yinzo yina yandi ke kota.
11 Beno zonza na mfumu ya yinzo, ‘Mulongi me yufula nge: “Na wapi kisika ya yinzo mu lenda kudya Pake na bilandi ya munu?”’
12 Muntu yango ke lakisa beno kisika mosi ya nene na zulu, yina ke na bima nyonso. Beno yidika Pake kuna.”
13 Na yawu, ba kwendaka mpe ba talaka bamambu kaka faso Yesu zabisaka bawu, mpe ba yidikaka bima nyonso samu na Pake.
14 Ntangu ngunga kumaka, Yesu vandaka na mesa na bantumwa.
15 Yandi zonzaka na bawu: “Mu vandaka na nsatu mingi ya kudya Pake yayi kintwadi na beno tekila mu tala mpasi.
16 Ya tsyeleka, mu ke na zonzaka na beno ti, mu ke kudya dyaka ve yawu tii ntangu ya ke lungana na Kimfumu ya Nzambi.”
17 Na manima ya kubaka kopo, yandi vutulaka Nzambi matondo mpe zonzaka: “Beno baka yawu mpe beno lutisa yawu na mosi na mosi na kati ya beno,
18 samu mu ke na zonzaka na beno ti banda ntangu yayi, mu ke kunwa dyaka ve vinu tii ntangu Kimfumu ya Nzambi ke kwiza.”
19 Yandi bakaka mpe dimpa, vutulaka matondo na Nzambi, zengaka yawu, pesaka yawu na bilandi, mpe zonzaka: “Ya ke na fwanisaka nzutu ya munu yina mu ke pesa samu na beno. Beno tatamana na kusala yawu samu na kubambuka munu moyo.”
20 Yandi salaka mpe mutindu mosi na kopo ya vinu ntangu ba manisaka kudya madya ya nkokila. Yandi zonzaka: “Kopo yayi ke na fwanisaka luwawanu ya malu-malu yina me salama na nzila ya menga ya munu yina ke mwangana samu na beno.
21 “Beno tala, muntu yina ke teka munu ke na munu na mesa.
22 Ya tsyeleka, Mwana ya muntu ke kufwa mutindu ba zonzilaka yawu. Kasi kyadi na muntu yina ke teka yandi.”
23 Na yawu, ba bandaka kusolola bawu na bawu, samu na kuzaba nani kwandi na kati ya bawu zola sala yawu.
24 Kasi ba bandaka mpe kuswana na ngolo nyonso bawu na bawu samu na kuzaba nani na kati ya bawu ba vanda tala mutindu muntu yina me lutila bampangi.
25 Kasi, yandi zonzaka na bawu: “Bamfumu ya makanda ke yalaka na zulu ya bantu na ngolo nyonso, mpe ba yina ke na lutumu na zulu ya bawu, ba ke bokilaka bawu Bantu ya mbote.
26 Beno, beno me fwana ve kuvanda mutindu bawu. Kasi bika ti muntu ya kulutila nene na kati ya beno kuma mutindu leki ya beno, mpe muntu yina ke twadisaka kuma mutindu muntu yina ke sadilaka bampangi.
27 Na muntu yina ke na mesa,* na muntu yina ke na sadilaka bampangi, nani me lutila? Ya tsyeleka, ni muntu yina ke na mesa. Kasi mu ke na kati ya beno mutindu muntu yina ke na sadilaka bampangi.
28 “Kasi beno, beno ke ba yina bikanaka ntangu nyonso na munu na kati ya bampasi ya munu,
29 mpe mu ke na salaka luwawanu na beno samu na Kimfumu, kaka mutindu Tata ya munu salaka luwawanu na munu samu na kimfumu mosi,
30 samu beno kudya mpe kunwa na mesa ya munu na Kimfumu ya munu, mpe beno vanda na bakiti ya kimfumu samu na kusambisa makanda 12 ya Izraele.
31 “Simoni, Simoni, tala! Satana lombaka beno nyonso samu na kupupula beno mutindu ble.
32 Kasi mu bondilaka Nzambi samu na nge, samu kiminu ya nge lemba ve, mpe nge, ntangu nge ke vutuka, kindisa bampangi ya nge.”
33 Na yawu Piere zonzaka na yandi: “Mfumu, mu ke ya kubongama samu na kukwenda na nge ya vanda na boloko to na lufwa.”
34 Kasi Yesu vutulaka yandi: “Piere, mu ke na zonzaka na nge ti, tekila nsusu ya bakala kokola bubu yayi, bambala tatu nge ke zonza ti nge zaba ve munu.”
35 Yandi zonzaka dyaka na bawu: “Ntangu mu filisaka beno na ata saki ya mbongo, saki ya madya mpe mapapa, beno kondwaka ata kima ve, faso yina ve?” Ba vutulaka: “Ni faso yina!”
36 Yandi zonzaka na bawu: “Kasi ntangu yayi, bika ti muntu yina ke na saki ya mbongo, baka yawu. Mutindu mosi mpe muntu yina ke na saki ya madya baka yawu, mpe bika ti muntu yina ke ve na mbele na kunwana, tekisa kinkuti ya yandi samu na kusumba mbele,
37 samu mu ke na zonzaka na beno ti mambu yayi yina ba sonikaka fwana kulungana na munu, ‘Ba tangaka yandi na kati ya bimpumbulu.’ Ya tsyeleka, mambu yina me tadila munu ke na lunganaka.”
38 Na yawu, ba zonzaka: “Mfumu, tala, beto ke na bambele zole.” Yandi zonzaka na bawu: “Ya ke lunga.”
39 Ntangu yandi basikaka, yandi kwendaka na Mongo ya bayinti ya Olive, mutindu yandi vandaka na kifu ya kusalaka yawu, mpe bilandi landaka yandi.
40 Ntangu yandi kumaka kuna, yandi zonzaka na bawu: “Beno tatamana na kusambila samu beno kubwa ve na ntontolo.”
41 Na manima, yandi bikaka bawu mpe kwendaka mwa ntama.* Yandi fukamaka mpe bandaka kusambila.
42 Yandi zonzaka: “Tata, kana nge zola, katula kopo yayi na sika ya munu. Kasi bika ti luzolo ya nge salama, kasi ya munu ve.”
43 Na manima, mbazi mosi yina katukaka na mazulu talanaka na yandi, mpe pesaka yandi ngolo.
44 Kasi, samu yandi vandaka na mpasi mingi na ntima, yandi vanda bika ve kusambila na ntima ya yandi nyonso. Kutukuta ya yandi kumaka mutindu mabete ya menga yina vanda kubwa na ntoto.
45 Ntangu yandi manisaka kusambila, yandi telamaka mpe vutukaka kisika bilandi ya yandi vandaka. Yandi kutanaka bawu ya kulala, samu kyadi lembisaka bawu.
46 Yandi zonzaka na bawu: “Samu na yinki beno ke na lalaka? Beno telama mpe beno tatamana na kusambila samu beno kubwa ve na ntontolo.”
47 Ntangu yandi vanda zonza ntete, bantu mingi kumaka kisika yina. Ni muntu yina ba vanda bokila Yuda, mosi ya bantumwa 12, vanda nata bawu. Yandi kwizaka pene-pene ya Yesu samu na kupesa yandi bizu.
48 Kasi Yesu zonzaka na yandi: “Yuda, nge ke na tekisaka Mwana ya muntu na bizu?”
49 Ntangu ba yina vandaka na lweka ya yandi talaka mambu yina zola salama, ba zonzaka: “Mfumu, nge zola beto bula bawu na bambele ya beto?”
50 Mosi na kati ya bawu bulaka kisadi ya nganga-nzambi ya nene, mpe zengaka yandi dikutu ya lweka ya bakala.
51 Kasi Yesu zonzaka: “Beno bika, ya me lunga.” Yandi simbaka dikutu ya muntu yango mpe belusaka yawu.
52 Na manima, Yesu zonzaka na bamfumu ya banganga-nzambi, bamfumu ya mikengi ya tempelo mpe na bakuluntu yina kwizaka samu na kusimba yandi: “Beno me kwiza na bambele mpe bayinti mutindu mu ke muyibi?
53 Ntangu mu vandaka na beno na tempelo bilumbu nyonso, beno kangaka ve munu. Kasi yayi ke ngunga ya beno mpe ya lutumu ya mpimpa.”
54 Na manima, ba kangaka yandi, ba nataka yandi mpe ba kotisaka yandi na yinzo ya nganga-nzambi ya nene. Kasi Pierre vanda landa bawu na ntama.
55 Ba yidikaka tiya na kati-kati ya ngaanda ya lupangu mpe ba vandaka kintwadi. Piere vandaka mpe na kati-kati ya bawu.
56 Kisadi mosi ya kento talaka Piere ya kuvanda pene-pene ya tiya. Yandi talaka Piere mbote-mbote mpe zonzaka: “Bakala yayi mpe vandaka na yandi.”
57 Kasi yandi wanganaka mpe zonzaka: “Kento, mu zaba ve yandi.”
58 Mwa ntangu fioti na manima, muntu ya nkaka talaka yandi mpe zonzaka: “Nge mpe ke mosi ya bawu.” Kasi Piere zonzaka: “Ve, munu ve.”
59 Na manima ya ngunga mosi, muntu ya nkaka dyaka zonzaka na ngolo nyonso: “Ya tsyeleka, muntu yayi mpe vandaka na yandi. Ntembe ve, yandi ke muntu ya Galile.”
60 Kasi Piere zonzaka: “Mu zaba ve mambu yina nge ke na zonzaka.” Na mbala mosi, ntangu yandi vandaka nabunu yandi manisa kuzonza, nsusu ya bakala kokolaka.
61 Na ntangu yina, Mfumu balukaka mpe talaka Piere na meso, mpe Piere bambukaka moyo mambu yina Mfumu zabisaka yandi: “Tekila nsusu ya bakala kokola bubu yayi, nge ke manga munu bambala tatu.”
62 Na yawu, Pierre basikaka na lupangu mpe kufwaka na kudila.
63 Bantu yina vanda kengidila Yesu bandaka kuseka yandi mpe kubula yandi.
64 Na manima ya kukanga yandi kizizi, ba zonzaka: “Bikula. Nani me bula nge?”
65 Ba vanda zonza dyaka mambu mingi ya nkaka samu na kufinga yandi.
66 Ntangu suka kumaka, kimvuka ya bakuluntu ya bantu, ya zola zonza bamfumu ya banganga-nzambi mpe milongisi ya Musiku, vukanaka. Ba nataka Yesu na yinzo ya balukutakanu ya Kimvuka ya nene ya bazenga mambu ya Bazwife,* mpe ba zonzaka:
67 “Kana nge ke Kristo, zonzila beto yawu.” Kasi yandi zonzaka na bawu: “Ata ti mu zonzila beno yawu, beno ke kwikila ata fioti ve.
68 Dyaka, kana mu yufula beno kyuvu, beno ke pesa ve munu mvutu.
69 Kasi banda ntangu yayi, Mwana ya muntu ke vanda na diboko ya bakala ya Nzambi ya ngolo.”*
70 Bawu nyonso zonzaka: “Na yawu, nge ke Mwana ya Nzambi?” Yandi zonzaka na bawu: “Ni beno mosi ke na zonzaka ti mu ke Mwana ya Nzambi.”
71 Ba zonzaka: “Beto ke kwandi dyaka na nsatu ya kimbangi ya nkaka? Ya tsyeleka beto mosi me kuwa yawu na yinwa ya yandi mosi.”
Banote
^ Ya ke kima mosi yina ba ke yidikaka na bantoto samu na kubumba maza mpe bima ya nkaka na kati.
^ To: “Ya kuyalumuna na mesa.”
^ Na Greke: Na kisika yina, kana muntu me losa ditadi, ya ke kuma.
^ Na Greke: “Sanedreni.” Tala Yina ya zola zonza.
^ Na Greke: “Diboko ya bakala ya ngolo ya Nzambi.”
