Nsangu ya Mbote ya Luke 24:1-53
24 Na suka-suka ya kilumbu ya ntete ya lumingu, ba kwizaka na ndyamu* na bamafuta ya nsunga ya kitoko yina ba yidikaka.
2 Kasi ba talaka ti ba katulaka ditadi yina vandaka na ndyamu.*
3 Ntangu ba kotaka, ba talaka ve mvumbi ya Mfumu Yesu.
4 Na ntangu mayela manisaka bawu samu na mambu yayi, babakala zole na bilele yina vanda ngenga telamaka pene-pene ya bawu.
5 Bakento kumaka na boma, mpe vanda tala kaka na ntoto. Na yawu, babakala yango zonzaka na bawu: “Samu na yinki beno ke na sosaka muntu ya moyo na kati ya bantu ya kufwa?
6 Yandi ke ve awa, kasi yandi me vumbuka na lufwa. Beno bambuka moyo na bamambu yina yandi zonzaka na beno ntangu yandi vandaka ntete na Galile:
7 ti, ba fwana kupesa Mwana ya muntu na maboko ya basumuki, ba ke kufwa yandi na zulu ya yinti mpe na kilumbu ya tatu yandi ke vumbuka.”
8 Na yawu ba bambukaka moyo na bamambu yina yandi zonzaka.
9 Ba bikaka ndyamu* mpe ba kwendaka zabisa bamambu nyonso yayi na bantumwa 11 mpe na bilandi nyonso ya nkaka.
10 Ya vandaka Maria ya Magdala, Yoana mpe Maria mama ya Zaki. Dyaka bakento ya nkaka yina vandaka na bawu vanda vutukila kuzonza bamambu mosi na sika ya bantumwa.
11 Kasi bantumwa vanda tala ti bamambu yina bakento vanda zonza vandaka mambu ya buzoba, mpe ba kwikilaka ve bawu.
12 Kasi Piere telamaka mpe kimaka mbangu na ndyamu.* Ntangu yandi kondamaka, yandi talaka kaka balele ya lino. Na yawu, yandi vutukaka mpe yandi vanda yituka mingi na mambu yina salamaka.
13 Kaka na kilumbu yina, bilandi zole vanda kwenda na bwala mosi yina ba ke bokilaka Emayuse, yina vandaka na bakilometre kana 11* na Yeruzalemi,
14 mpe ba vanda solola na bamambu nyonso yina salamaka.
15 Ntangu ba vanda solola mpe vanda zonzila mambu yayi, Yesu yandi mosi kwizaka pene-pene ya bawu mpe bandaka kutambula na bawu.
16 Kasi ba vanda lenda ve kuzaba yandi.
17 Yandi zonzaka na bawu: “Na yinki beno ke na sololaka ntangu beno ke na tambulaka?” Na kyadi nyonso ba telamaka.
18 Mosi ya bawu na nkumbu ya Keleopasi zonzaka na yandi: “Nge ke nzenza yina ke vandaka na kisika ya yandi mosi na Yeruzalemi, mpe nge zaba ve mambu yina me salama kuna bilumbu yayi?”
19 Yandi yufulaka bawu: “Wapi mambu?” Ba zonzaka na yandi: “Mambu yina me kumina Yesu muntu ya Nazareti. Na mantwala ya Nzambi mpe ya bantu nyonso, yandi lakisaka ti yandi vandaka mbikudi ya ngolo, kaka ve na bamambu yina yandi salaka, kasi mpe na bamambu yina yandi zonzaka.
20 Bamfumu ya banganga-nzambi mpe bamfumu ya beto pesaka yandi samu ba zengila yandi lufwa, mpe ba komaka yandi na zulu ya yinti.
21 Beto vandaka na kivuvu ti muntu yayi vandaka muntu yina zola vuukisa Izraele. Na zulu ya nyonso yayi, bubu yayi ya me sala bilumbu tatu yina bamambu yayi salamaka.
22 Dyaka, bakento ya nkaka na kati ya beto kamwisaka beto mingi. Na suka-suka, ba kwendaka na ndyamu,*
23 mpe ntangu ba talaka ve mvumbi ya yandi, ba kwizaka zonza ti ba talaka mpe kima ya ngitukulu: bambazi yina zonzaka ti yandi ke moyo.
24 Na yawu, bantu ya nkaka yina vandaka na beto kwendaka na ndyamu* mpe ba talaka bamambu kaka mutindu bakento zonzaka, kasi ba talaka ve Yesu.”
25 Yandi zonzaka na bawu: “Beno bantu yina ke ve na mayela mpe yina ke kwikilaka ve na mbangu bamambu nyonso yina bambikudi zonzaka!
26 Ya lungaka kwandi ve ti Kristo kutana na bamambu yayi samu na kukota na kati ya nkembo ya yandi?”
27 Mpe kubanda na Moyize na Bambikudi nyonso, yandi bangulaka bawu bamambu nyonso yina Masonoko ke zonzaka samu na yandi.
28 Na manima, ba kumaka pene-pene na bwala yina ba vanda kwenda, mpe yandi salaka mutindu yandi vanda zola kuluta bwala yango.
29 Kasi ba salaka yandi tiya na kuzonzaka: “Vanda kaka na beto awa, samu nkokila ke dyaka ve ntama, mpe na mwa ntangu fioti, bwisi ke yila.” Na yawu yandi kotaka na yinzo samu na kuvanda na bawu.
30 Ntangu yandi vanda kudya* na bawu, yandi bakaka dimpa, sakumunaka yawu, zengaka yawu mpe pesaka bawu yawu.
31 Na yawu meso ya bawu fungukaka pwelele, mpe ba zabaka yandi. Kasi yandi zimbanaka na mantwala ya bawu.
32 Ba bandaka kuzonza na bampangi: “Bantima ya beto vanda toka kwandi ve ntangu yandi vanda solola na beto na nzila? Ntangu yandi vanda bangudila* beto pwelele Masonoko?”
33 Ba telamaka na mbala mosi mpe vutukaka na Yeruzalemi. Ba kutanaka na bantumwa 11 yina vukanaka na bilandi ya nkaka.
34 Ba yina bilandi zole yayi kutanaka zonzaka na bawu: “Ya tsyeleka, Mfumu me vumbuka na lufwa, mpe yandi me talana na Piere.”
35 Na manima, bawu mpe zonzilaka bawu bamambu yina lutaka na nzila, mpe mutindu ba kwizaka zaba ti ya vandaka ni yandi, ntangu yandi zengaka dimpa.
36 Ntangu ba vanda zonzila bamambu yayi, Yesu yandi mosi talanaka na kati-kati ya bawu mpe zonzaka na bawu: “Kizunu vanda na beno.”
37 Kasi samu ba vanda tekita na boma, ba kanisaka ti ba talaka mpeve.
38 Na yawu yandi zonzaka na bawu: “Samu na yinki mabanza ya beno me kuma kidi-kidi mpe samu na yinki bantima ya beno me fuluka na bantembe?
39 Beno tala maboko mpe makulu ya munu. Ya ke ni munu. Beno simba munu mpe beno tala, samu mpeve ke ve na musuni mpe mikwa mutindu beno ke na talaka ti mu ke na yawu.”
40 Ntangu yandi vanda zonza yawu, yandi lakisaka bawu maboko mpe makulu ya yandi.
41 Kasi samu ba fulukaka na kilengi, mpe vanda yituka mingi, ba vanda lenda ve kundima yawu. Na yawu yandi zonzaka na bawu: “Beno ke na kima ya kudya awa?”
42 Ba pesaka yandi ndambu ya mbisi ya maza ya kuyoka.
43 Yandi bakaka yawu mpe kudyaka yawu na meso ya bawu.
44 Na manima yandi zonzaka na bawu: “Ntangu mu vandaka ntete na beno, mu zonzaka na beno ti bamambu nyonso yina ke ya kusonama samu na munu na kati ya Musiku ya Moyize, na kati ya Bambikudi mpe Bankunga fwana kulungana.”
45 Na manima yandi fungulaka bawu mayela samu ba bakula mbote-mbote nsasa ya Masonoko,
46 mpe yandi zonzaka na bawu, “Yayi ni mambu yina ba sonikaka: Kristo zola tala mpasi mpe zola vumbuka na lufwa na kilumbu ya tatu,
47 mpe na nkumbu ya yandi ba zola samuna na makanda nyonso kubanda na Yeruzalemi, ti bantu fwana kubalula ntima samu na kuzwa mulemvo ya masumu ya bawu.
48 Beno fwana kuvanda bambangi ya bamambu yayi.
49 Beno kuwa. Mu ke filisa beno kima yina Tata ya munu pesaka nsilulu. Kasi beno, beno vanda kaka na kati ya mbanza tii ntangu yina ngolo yina ke katuka na mazulu ke lwata beno.”
50 Na manima yandi nataka bawu na ngaanda ya mbanza tii na Betani. Yandi nangunaka maboko mpe sakumunaka bawu.
51 Ntangu yandi vanda sakumuna bawu, yandi kabukaka na bawu mpe yandi kwendaka na mazulu.
52 Ba fukamaka* na mantwala ya yandi, mpe na manima ba vutukaka na Yeruzalemi ya kufuluka na kilengi.
53 Ntangu nyonso ba vandaka na tempelo na kukembilaka Nzambi.
Banote
^ To: “Ndyamu ya kubambuka.”
^ To: “Ndyamu ya kubambuka.”
^ To: “Ndyamu ya kubambuka.”
^ To: “Ndyamu ya kubambuka.”
^ Na Greke: “Basitade 60.” Sitade mosi kele bametre 185.
^ To: “Ndyamu ya kubambuka.”
^ To: “Ndyamu ya kubambuka.”
^ To: “Ya kuyalumuna na mesa.”
^ To: “Kufungula.”
^ To: “Lakisaka buzitu.”
