Nsangu ya Mbote ya Luke 3:1-38
3 Na mvula 15 ya luyalu ya Tibere Sezare, ntangu Ponse Pilate vandaka mfumu ya Zude, Erode* vandaka mfumu ya Galile. Filipe yaya ya yandi vandaka mfumu ya kizunga ya Iture, mpe ya Trakonite, mpe Lizanyasi vandaka mfumu ya Abilene.
2 Na ntangu ya Ane, mfumu ya banganga-nzambi mpe ya Kayife, Nzambi zabisaka mambu ya yandi na sika ya Yoane mwana ya Zakari, na ntoto ya kuyuma.
3 Na yawu, yandi kwendaka na babwala nyonso yina vandaka pene-pene ya Yordani. Yandi vanda samuna bantu na kuzwa mbotokolo, samu na kulakisa ti ba me balula ntima, samu Nzambi lemvokila masumu ya bawu,
4 mutindu ya ke ya kusonama na buku ya mbikudi Izaya: “Muntu mosi ke na zonzaka na ndinga ya ngolo na ntoto ya kuyuma: ‘Beno yidika nzila ya Yehova.* Beno sungika banzila ya yandi.
5 Ba fwana kufulusa mabenga nyonso, mpe ba fwana kukulumusa konso mongo ya nene mpe ya fioti. Banzila ya kutengama fwana kukuma ya kusungama, mpe banzila ya mabulu me fwana kuyidama,
6 mpe bantu nyonso* ke tala luvuukusu ya Nzambi.’”*
7 Na yawu, yandi bandaka kuzonza na bantu mingi yina vanda kwiza samu yandi botika bawu: “Beno bana ya bampidi,* nani me zonza na beno ti beno lenda kima nkele ya Nzambi yina ke na kwizaka?
8 Na yawu, beno sala bamambu yina ke lakisa ti beno me balula ntima. Beno banda ve na kuzonza na kati ya bantima ya beno mosi, ‘Tata ya beto ni Abrahami.’ Ya tsyeleka, mu ke na zonzaka na beno ti, Nzambi lenda basisila Abrahami bana na matadi yayi.
9 Ya tsyeleka, ba me tula soka yimeni na myanzi ya bayinti. Na yawu, bayinti nyonso yina ke butaka ve bambuma ya mbote, ba ke zenga yawu mpe ba ke losa yawu na tiya.”
10 Bantu vanda yufula yandi: “Na yawu, yinki beto me fwana kusala?”
11 Yandi zonzaka na bawu: “Bika ti muntu yina ke na bilele zole* kabula mosi na muntu yina ke na ata kima, mpe muntu yina ke na kima ya kudya sala mpe mutindu mosi.”
12 Ata bilokoti-mpaku mpe vanda kwiza kuzwa mbotokolo na sika ya yandi. Ba yufulaka yandi: “Mulongi, yinki beto me fwana kusala?”
13 Yandi zonzaka na bawu: “Beno lomba* ve ntalu ya kulutila yina ba me tula.”
14 Basoda mpe vanda yufula yandi: “Yinki beto me fwana kusala?” yandi zonzaka na bawu: “Beno baka ve mbongo ya bantu na ngolo,* mpe beno funda ve bantu na mambu ya luvunu. Kasi beno sepela kaka na difuta* yina beno ke kuzwaka.”
15 Bantu vanda vingila, mpe bawu nyonso vanda yufula na kati ya bantima: “Ni yandi ve Kristo?”
16 Na yawu, Yoane zonzaka na bawu nyonso: “Munu, mu ke na botikaka beno na maza. Kasi muntu yina me lutila munu na ngolo ke na kwizaka na manima ya munu. Mu ke ve ya kulunga samu na kunyangula* basinga ya mapapa ya yandi. Yandi ke botika beno na mpeve ya santu mpe na tiya.
17 Yandi me simba na diboko kima yina yandi ke sadila samu na kupupula bambuma. Yandi ke katula mvindu nyonso na kisika yina yandi ke tutaka bambuma samu na kukatula yawu bampusu, mpe yandi ke vukisa ble na kisika ya kubumba bima, kasi yandi ke yoka bampusu na tiya yina ba lenda kufwa ve.”
18 Yandi pesaka mpe malongi mingi ya nkaka, mpe yandi bikaka ve kuzabisa bantu nsangu ya mbote.
19 Kasi Yoane sembaka Erode mfumu ya kizunga samu na Erodiade, kento ya yaya ya yandi yina yandi bakaka, mpe samu na bamambu ya nkaka ya yimbi yina yandi salaka.
20 Erode salaka dyaka mambu ya nkaka ya yimbi: Yandi tulaka Yoane na boloko.
21 Na ntangu yina bantu nyonso kuzwaka mbotokolo, Yesu mpe kuzwaka mbotokolo. Ntangu yandi vanda sambila, zulu fungukaka.
22 Mpeve ya santu yina talanaka mutindu dibembe, kulumukaka na zulu ya yandi, mpe ndinga mosi wakanaka na zulu: “Nge ke mwana ya munu yina mu ke zolaka mingi. Mu me ndima nge.”
23 Ntangu Yesu bandaka kisalu ya yandi, yandi vandaka na bamvula pene-pene na 30, mpe mutindu bantu vanda kanisa, yandi vandaka mwanaya Yozefi,mwana ya Heli,
24 mwana ya Matati,mwana ya Levi,mwana ya Melki,mwana ya Yanayi,mwana ya Yozefi,
25 mwana ya Matatyase,mwana ya Amose,mwana ya Nahume,mwana ya Eseli,mwana ya Nagayi,
26 mwana ya Maate,mwana ya Matatyase,mwana ya Semeyine,mwana ya Yoseki,mwana ya Yoda,
27 mwana ya Yowanane,mwana ya Reza,mwana ya Zorobabele,mwana ya Seyaltyele,mwana ya Neri,
28 mwana ya Melki,mwana ya Adi,mwana ya Kosame,mwana ya Elemadame,mwana ya Ere,
29 mwana ya Yesu,mwana ya Eliezere,mwana ya Yorime,mwana ya Matati,mwana ya Levi,
30 mwana ya Simeyoni,mwana ya Yuda,mwana ya Yozefi,mwana ya Yoname,mwana ya Eleyakime,
31 mwana ya Meleya,mwana ya Mena,mwana ya Matata,mwana ya Natani,mwana ya Davidi,
32 mwana ya Yese,mwana ya Obede,mwana ya Boaze,mwana ya Salmone,mwana ya Nashone,
33 mwana ya Aminadabi,mwana ya Arni,mwana ya Ezerone,mwana ya Pereze,mwana ya Yuda,
34 mwana ya Yakobi,mwana ya Izaki,mwana ya Abrahami,mwana ya Tera,mwana ya Naore,
35 mwana ya Seruge,mwana ya Rewu,mwana ya Pelege,mwana ya Ebere,mwana ya Shela,
36 mwana ya Kayinami,mwana ya Arpakasade,mwana ya Seme,mwana ya Nowe,mwana ya Lameki
37 mwana ya Metusela,mwana ya Enoki,mwana ya Yarede,mwana ya Mahalalele,mwana ya Kayinami,
38 mwana ya Enoshe,mwana ya Sete,mwana ya Adami,mwana ya Nzambi.
Banote
^ Ya ke ni Erode Antipasi. Tala Yina ya zola zonza.
^ Tala Yina ba me bwela A5.
^ Na Greke: “Musuni nyonso.”
^ To: “Nzila yina Nzambi ke sadilaka samu na kuvuukisa.”
^ Ya ke mutindu mosi ya banyoka. Na lumputu ba ke bokilaka yawu vipère.
^ To: “Kilele ya nkaka.”
^ To: “Baka.”
^ To: “Beno botola ve mbongo ya bantu.”
^ To: “Bima.”
^ To: “Kufungula.”
