Nsangu ya Mbote ya Luke 4:1-44
4 Yesu katukaka na maza ya Yordani. Yandi vandaka ya kufuluka na mpeve ya santu, mpe mpeve nataka yandi na ntoto ya kuyuma.
2 Yandi salaka bilumbu 40 kuna, mpe Dyabulu mekaka yandi. Na kati ya bilumbu yina, Yesu kudyaka ata kima. Na yawu, na manima ya bilumbu yina, yandi kumaka na nsatu.
3 Na yina, Dyabulu zonzaka na yandi: “Kana nge ke mwana ya Nzambi, zonza na ditadi yayi na kukuma dimpa.”
4 Kasi Yesu vutulaka: “Ya ke ya kusonama, ‘Muntu me fwana kuzinga ve kaka na dimpa.’”
5 Dyabulu nataka yandi na kisika mosi ya zulu, mpe lakisaka yandi na mbala mosi bimfumu nyonso ya ntoto.
6 Na manima, yandi zonzaka na Yesu: “Mu ke pesa nge lutumu nyonso yayi, mpe nkembo ya bimfumu yayi, samu ba pesaka munu yawu mpe mu ke pesaka yawu na muntu yina mu zola.
7 Na yawu, kana nge sambila munu mbala mosi kaka, nyonso yayi ke kuma ya nge.”
8 Yesu vutulaka: “Ya ke ya kusonama, ‘Nge fwana kusambila Yehova* Nzambi ya nge, mpe kaka ni na yandi nge fwana kusadila kisalu ya santu.’”
9 Na manima, Dyabulu nataka yandi na Yeruzalemi, telemisaka yandi na zulu ya kibaka* ya tempelo, mpe zonzaka na yandi: “Kana nge ke mwana ya Nzambi, losa nzutu na yisi,
10 samu ti ya ke ya kusonama, ‘Yandi ke tumisa bambazi ya yandi samu na nge, samu na kubumba nge,’
11 mpe ‘Ba ke nata nge na maboko ya bawu samu dikulu ya nge tuta ve ditadi.’”
12 Yesu vutulaka: “Ya ke ya kusonama, ‘Nge me fwana kumeka ve Yehova* Nzambi ya nge.’”
13 Na yawu, ntangu Dyabulu manisaka kumeka Yesu, yandi bikaka yandi samu na kuvingila ntangu ya nkaka ya mbote.
14 Yesu vutukaka na Galile, ya kufuluka na ngolo ya mpeve, mpe bansangu na yina me tadila mambu ya mbote yina yandi vanda sala mwanganaka na bwala nyonso.
15 Yandi bandaka kulonga na bayinzo ya bawu ya lusambu, mpe bantu nyonso vanda pesa yandi lukumu.
16 Na manima, yandi kwendaka na Nazareti, kisika yina yandi kulaka. Mutindu ya vandaka kifu ya yandi na kilumbu ya saba, yandi kotaka na yinzo ya lusambu mpe telamaka samu na kutanga.
17 Ba pesaka yandi dibuku* ya mbikudi Izaya. Yandi fungulaka yawu mpe kuzwaka kisika yina vandaka ya kusonama:
18 “Mpeve ya Yehova* ke na zulu ya munu, samu yandi me tula munu mafuta* samu na kuzabisa nsangu ya mbote na bapovre. Yandi filisaka munu samu na kusamuna kimpwanza na ba yina ke na boloko, kusamuna na ba yina ke na meso ya kufwa ti ba ke tala dyaka, mpe kubasisa na mpasi bantu yina ke na kunyokwamaka,
19 samu na kusamuna mvula yina Yehova* ke ndima.*
20 Na manima, Yesu kangaka dibuku, vutulaka yawu na kisadi ya yinzo ya lusambu, mpe yandi vandaka. Meso ya ba yina nyonso vandaka na yinzo ya lusambu vandaka kaka na zulu ya yandi.
21 Na yawu, yandi bandaka kuzonza na bawu: “Bubu yayi, masonoko yayi beno me kuwa me lungana.”
22 Bawu nyonso bandaka kuzonza mambu ya mbote na yina me tadila yandi, mpe ba yitukaka na mambu ya kitoko yina vanda basika na yinwa ya yandi, mpe ba vanda zonza: “Yayi ke ve mwana ya Yozefi?”
23 Na yawu, yandi zonzaka na bawu: “Ya tsyeleka, beno ke sadila kingana yayi samu na munu, ‘Munganga, belusa nzutu ya nge mosi. Sala mpe awa na bwala ya nge bamambu yina beto kuwaka ti nge salaka na Kapenawume.’”
24 Yandi zonzaka dyaka: “Ya tsyeleka mu ke na zonzaka na beno ti ba ke ndimaka ata mbikudi mosi na bwala ya yandi.
25 Ntembe ve, mu ke na zonzaka na beno ti ya vandaka na mifwidi mingi ya bakento na Izraele na bilumbu ya Eli, ntangu zulu kangamaka bamvula tatu mpe bangonda 6, mpe nsatu ya nene kwizaka na bwala nyonso.
26 Kasi ba filisaka Eli na ata mosi ya bakento yina, kaka na mufwidi ya kento ya bwala ya Sarefati na ntoto ya Sidoni.
27 Mutindu mosi mpe na ntangu ya mbikudi Elize, bantu mingi ya bwazi* vandaka na Izraele, kasi yandi belusaka* ata mosi na kati ya bawu, kaka Naamani muntu ya Siri.”
28 Ntangu ba kuwaka mambu yayi, ba yina nyonso vandaka na yinzo ya lusambu fulukaka na nkele.
29 Ba telamaka mpe nataka yandi na mbangu na ngaanda ya mbanza. Ba nataka yandi na nsongi ya mongo yina ba tungaka mbanza ya bawu, samu na kulosa yandi yintu na yisi.
30 Kasi yandi lutaka na kati-kati ya bawu, mpe kwendaka.
31 Yandi kwendaka na Kapenawume, mbanza mosi ya Galile. Yandi vanda longa bantu na kilumbu ya saba.
32 Ba vanda pamuka na faso ya yandi ya kulonga samu yandi vanda zonza na lutumu.
33 Na yinzo ya lusambu, ya vandaka na bakala mosi yina vandaka na mpeve mosi ya mvindu. Yandi zonzaka na ndinga ya ngolo:
34 “Yesu, muntu ya Nazareti, wapi mambu nge ke na yawu na beto? Nge me kwiza samu na kufwa beto? Mu zaba mbote-mbote nani nge kele, Santu ya Nzambi.”
35 Kasi Yesu ngalaka yandi mpe zonzaka: “Kanga yinwa ya nge mpe basika na yandi.” Na manima ya kulosa bakala yango na ntoto na kati-kati ya bawu, mpeve ya yimbi basikaka ata kutalisa yandi mpasi.
36 Na yawu, bawu nyonso yitukaka, mpe bandaka kuzonza bawu na bawu: “Yayi wapi mutindu ya kuzonza? Yandi ke na tumisaka bampeve ya yimbi na lutumu mpe ngolo, mpe ba ke na basikaka.”
37 Na yawu, nsangu na yina me tadila yandi vanda bika ve kumwangana na bisika nyonso ya kizunga.
38 Na manima ya kukatuka na yinzo ya lusambu, yandi kwendaka na yinzo ya Simoni. Mama ya kento ya Simoni vandaka na fievre ya ngolo, mpe ba lombaka na Yesu na kusadisa yandi.
39 Na yawu, yandi kondamaka pene-pene na yandi, ngalaka fievre yango, mpe ya manisaka. Na mbala mosi, yandi telamaka mpe yandi bandaka kuyidika madya samu na bawu.
40 Kasi ntangu bwisi vanda yila, ba yina nyonso vandaka na bantu yina vanda beela bimbevo ya mutindu na mutindu nataka bawu na sika ya yandi. Yandi belusaka bawu na kutulaka maboko ya yandi na zulu ya mosi na mosi ya bawu.
41 Bampeve ya yimbi mpe basikaka na bantu mingi. Ba vanda zonza na ngolo: “Nge ke Mwana ya Nzambi.” Kasi yandi ngalaka bawu. Yandi niminaka bawu na kuzonza, samu ba zabaka ti yandi vandaka Kristo.
42 Ntangu bwisi kutyaka, Yesu basikaka mpe kwendaka na kisika yina vandaka ve na bantu. Kasi bantu mingi bandaka kusosa yandi mpe kwizaka na kisika yina yandi vandaka. Ba sosaka kukanga yandi nzila samu yandi kwenda ve ntama na bawu.
43 Kasi yandi zonzaka na bawu: “Mu me fwana kuzonzila mpe nsangu ya mbote ya Kimfumu ya Nzambi na bambanza ya nkaka, samu ni na yawu ba filisaka munu.”
44 Na yawu, yandi kwendaka samuna na bayinzo ya lusambu ya bwala ya Zude.
Banote
^ Tala Yina ba me bwela A5.
^ To: “Kisika ya kulutila zulu.”
^ Tala Yina ba me bwela A5.
^ Na Greke: “Rulo.” Ya ke mukanda ya yinda yina ba me yidika na mpusu ya kibulu mpe yina ba me futika na mwa yinti ya fioti.
^ Tala Yina ba me bwela A5.
^ To: “Soola.” Tala Yina ya zola zonza.
^ Tala Yina ba me bwela A5.
^ To: “Yina bantu lenda sala ti Yehova ndima bawu.”
^ To: “Lèpre.” Ya kele maladi ya ngolo yina ke dyaka mpusu, mpe bisika ya nkaka ya nzutu ya muntu.
^ Na Greke: “Vedisa.”
