Nsangu ya Mbote ya Luke 5:1-39
5 Kilumbu mosi, bantu mingi vanda kuwa Yesu kulonga mambu ya Nzambi pene-pene na nzadi ya Genezareti,* mpe ba vanda fyeta yandi.
2 Yandi talaka babwatu zole ya kutelama na lweka ya nzadi. Bilobi-mbisi basikaka na babwatu yina, mpe vanda sukula bampwasa* ya bawu.
3 Yandi kotaka na bwatu mosi yina vandaka ya Simoni. Yandi lombaka na yandi na kunata yawu mwa ntama na ntoto. Na manima ya kuvanda na bwatu, Yesu bandaka kulonga bantu mingi yina vandaka kuna.
4 Ntangu yandi manisaka kuzonza, yandi zonzaka na Simoni: “Nata bwatu kisika maza ke sunda, mpe beno losa bampwasa ya beno samu na kubwila bambisi.”
5 Kasi Simoni vutulaka: “Mulongi, beto me sala ngolo mpimpa nyonso, mpe beto me kuzwa ata kima. Kasi samu nge me lomba munu, mu ke losa bampwasa.”
6 Ntangu ba salaka yawu, ba kuzwaka* bambisi mingi. Ya tsyeleka, bampwasa ya bawu bandaka kupasuka.
7 Na yawu, ba bokilaka bampangi ya bawu ya kisalu yina vandaka na bwatu ya nkaka samu ba kwiza sadisa bawu. Ba kwizaka mpe ba fulusaka babwatu nyonso zole. Ya salaka ti babwatu banda kudyama.
8 Ntangu Simoni Piere talaka yawu, yandi fukamaka na mantwala ya Yesu mpe zonzaka: “Mfumu, katuka pene-pene ya munu, samu mu ke muntu ya masumu.”
9 Ya tsyeleka, Simoni na bantu yina vandaka na yandi pamukaka mingi ntangu ba talaka lutangu ya bambisi yina ba kuzwaka.
10 Ya vandaka mpe mutindu mosi samu na Zaki na Yoane, bana ya Zebede, yina vandaka bampangi ya Simoni ya kisalu. Kasi Yesu zonzaka na Simoni: “Bika kuvanda na boma. Kubanda bubu yayi, ni bantu ya moyo nge ke bwila.”
11 Na yina, ba nataka babwatu na ntoto, ba bikaka bima nyonso mpe landaka yandi.
12 Kilumbu ya nkaka ntangu Yesu vandaka na mbanza mosi, ya vandaka na bakala mosi ya kufuluka na bwazi. Ntangu yandi talaka Yesu, yandi fukamaka na mantwala ya yandi mpe bondilaka yandi: “Mfumu, kana nge zola, nge lenda vedisa* munu.”
13 Na yawu, Yesu tambaka diboko, simbaka yandi mpe zonzaka: “Mu zola! Kuma ya kuvedila.” Na mbala mosi, bwazi ya yandi zimbanaka.
14 Na manima yandi zonzaka na bakala yango na kuzonzila yawu na ata muntu, mpe yandi zonzaka na yandi: “Kasi kwenda talana na nganga-nzambi mpe pesa dikabu mutindu Moyize lombaka yawu, samu ba zaba ti nge me kuma ya kuvedila.”
15 Ata faso yina, nsangu ya yandi vanda mwangana kaka, mpe bantu mingi vanda vukana samu na kuwa yandi mpe yandi belusa bawu na bimbevo ya bawu.
16 Kasi bambala mingi, yandi vanda kwenda na kisika yina bantu vandaka ve samu na kusambila.
17 Kilumbu mosi na kati ya bilumbu yina, ntangu Yesu vanda longa, Bafarize mpe milongisi ya Musiku yina katukaka na babwala nyonso ya Galile, ya Zude, mpe ya Yeruzalemi vandaka ya kuvanda kuna. Mpe ngolo ya Yehova* vandaka na Yesu samu yandi belusa bantu.
18 Bantu kwizaka kuna, ba nataka kikata mosi na zulu ya kipoyi. Ba vanda sosa kukotisa yandi mpe kutula yandi na mantwala ya Yesu.
19 Ba lendaka ve kukotisa yandi samu bantu vandaka mingi. Na yawu, ba kwendaka na zulu ya yinzo mpe tobolaka dibulu kuna. Ba kulumusaka yandi na zulu ya kipoyi na kati-kati ya bantu yina vandaka na mantwala ya Yesu.
20 Ntangu Yesu talaka kiminu ya bawu, yandi zonzaka: “Mpangi ya munu, nge me kuzwa mulemvo ya masumu ya nge.”
21 Milongisi ya Musiku na Bafarize bandaka kuzonza bawu na bawu: “Nani ke muntu yayi yina ke na fingaka Nzambi? Nani dyaka lenda lemvokila masumu katula kaka Nzambi?”
22 Kasi Yesu zabaka makanisi ya bawu, mpe yandi zonzaka na bawu: “Samu na yinki beno ke na makanisi ya mutindu yina na bantima ya beno?
23 Yinki me lutila mpasi na kuzonza, ‘Nge me kuzwa mulemvo ya masumu ya nge,’ to kuzonza, ‘Telama mpe tambula’?
24 Beno bika mu lakisa beno ti Mwana ya muntu ke na lutumu ya kulemvokila masumu na ntoto.” Na yawu, yandi zonzaka na kikata: “Mu ke na zonzaka na nge, telama, baka kipoyi ya nge mpe kwenda na yinzo ya nge.”
25 Bakala yango telamaka na mantwala ya bawu, bakaka kima yina yandi vanda lalila, mpe ntangu yandi vanda kwenda na yinzo ya yandi, yandi vanda kembila Nzambi.
26 Bawu nyonso yitukaka mingi mpe bandaka kukembila Nzambi. Ba fulukaka na boma, mpe vanda zonza: “Bubu yayi, beto me tala bamambu ya ngitukulu.”
27 Na manima ya mambu yayi, Yesu basikaka mpe talaka kilokoti-mpaku mosi na nkumbu ya Levi, ya kuvanda na biro ya bilokoti-mpaku. Yandi zonzaka na yandi: “Landa munu.”
28 Yandi telamaka, bikaka bima nyonso na manima, mpe bandaka kulanda Yesu.
29 Na manima, Levi salaka feti ya nene samu na Yesu na yinzo ya yandi. Ya vandaka na bilokoti-mpaku mingi mpe bantu ya nkaka yina vanda kudya* na bawu.
30 Na yawu, Bafarize na milongisi ya bawu ya Musiku bandaka kunyunguta, mpe kuzonza na bilandi ya Yesu: “Samu na yinki beno ke kudyaka mpe ke kunwaka na bilokoti-mpaku mpe basumuki?”
31 Yesu vutulaka: “Bantu yina ke na mavimpi ya mbote ke ve na nsatu ya munganga, kasi ni bantu yina ke na beelaka ke na nsatu ya yandi.
32 Mu me kwiza ve samu na kubokila bantu ya lunungu,* kasi basumuki samu ba balula ntima.”
33 Ba zonzaka na yandi: “Bilandi ya Yoane ke bakaka ntangu nyonso mukanu ya kulutisa bantangu ata kudya kima mpe kubondila Nzambi. Bilandi ya Bafarize mpe ke salaka yawu, kasi bilandi ya nge ke kudyaka mpe ke kunwaka.”
34 Yesu zonzaka na bawu: “Beno lenda zonza ve na bandiku ya bakala yina ke na kwelanaka na kubaka mukanu ya kulutisa bantangu ata kudya kima, ntangu bakala yina ke na kwelanaka ke na bawu. Faso yina ve?
35 Kasi bilumbu ke kwiza, yina ba ke katula na kati ya bawu bakala yina ke na kwelanaka. Kuna, ba ke baka mukanu ya kulutisa bantangu ata kudya kima.”
36 Yandi pesaka dyaka bawu kifwani: “Ata muntu ke zengaka kitende ya lele ya malu-malu samu na kutunga yawu na lele ya ntama. Kana yandi sala yawu, kitende ya lele ya malu-malu ke pasula lele ya ntama, mpe ya ke simba ve na lele ya ntama.
37 Dyaka, ata muntu ke tulaka vinu ya malu-malu na basaki ya kununa yina ba me yidika na mpusu ya kibulu. Kana yandi sala yawu, vinu ya malu-malu ke pasula basaki mpe ya ke mwangana, mpe basaki ke beba.
38 Kasi ba me fwana kutula vinu ya mala-malu na basaki ya malu-malu.
39 Ata muntu ke na nsatu ya vinu ya malu-malu na manima ya kunwa vinu ya ntama, samu yandi ke zonza, ‘Ya ntama ke kitoko.’”
Banote
^ Ya ke ni nzadi ya mungwa ya Galile.
^ To: “Ba filets.”
^ Na Greke: “Ba bwilaka.”
^ To: “Belusa.”
^ Tala Yina ba me bwela A5.
^ To: “Ya kuyalumuna na mesa.”
^ To: “Kudedama.”
