Nsangu ya Mbote ya Luke 8:1-56
-
Bakento yina vanda tambula na Yesu (1-3)
-
Kifwani ya muntu yina ke kundaka (4-8)
-
Samu na yinki Yesu vanda sadila bifwani (9, 10)
-
Yesu me lakisa yinki zola zonza kifwani ya muntu yina ke kundaka (11-15)
-
Ba ke tulaka ve mwinda na yisi ya kima (16-18)
-
Mama mpe bampangi ya Yesu (19-21)
-
Yesu me zunisa mupepe ya ngolo (22-25)
-
Yesu me filisa bampeve ya yimbi na kati ya bangulu (26-39)
-
Mwana ya Zayiruse ya kento, kento mosi me simba kinkuti ya Yesu (40-56)
8 Na manima, yandi kwendaka na bambanza mpe na babwala, samu na kusamuna mpe kuzonzila nsangu ya mbote ya Kimfumu ya Nzambi, mpe bantumwa 12 vandaka na yandi.
2 Ya vandaka mpe na ndambu ya bakento yina Yesu basisaka bampeve ya yimbi mpe belusaka. Na kati ya bawu ya vandaka na Maria, yina ba ke bokilaka Magdala, yina ba basisaka bampeve ya yimbi 7.
3 Ya vandaka mpe na Yoana kento ya Suza, muntu yina vanda kipeke yinzo ya Erode, Suzana mpe bakento mingi ya nkaka yina pesaka bima ya bawu samu na kusadila Yesu mpe bilandi ya yandi.
4 Ntangu bantu mingi vukanaka kintwadi na ba yina vanda kwendaka na yandi na bambanza, yandi sadilaka kifwani yayi samu na kuzonza na bawu:
5 “Muntu mosi yina ke kundaka bambuma, kwendaka kunda bambuma. Ntangu yandi vanda kunda, bambuma ya nkaka kubwaka na nzila. Ba dyataka yawu mpe bandeke kudyaka yawu.
6 Bambuma ya nkaka kubwaka na zulu ya matadi, mpe ntangu ya menaka, ya yumaka samu ya vandaka ve na maza.
7 Bambuma ya nkaka kubwaka na kati ya bansende. Bansende menaka kintwadi na bambuma, mpe ya fyetaka yawu.
8 Bambuma ya nkaka kubwaka na ntoto ya mbote, mpe ntangu ya menaka, konso mbuma butaka bambuma 100.” Na manima ya kuzonza mambu yayi, yandi zonzaka na ndinga ya ngolo: “Bika ti muntu yina ke na makutu samu na kuwa, kuwa.”
9 Na manima, bilandi ya yandi yufulaka yandi yinki kifwani yina zola zonza.
10 Yandi zonzaka na bawu: “Beno kuzwaka bweso ya kubakula mansweki ya santu ya Kimfumu ya Nzambi. Kasi samu na ba ya nkaka, ya ke kaka bifwani, samu ti ba lenda tala, kasi ba ke vanda na kati ya kidiba, mpe ba lenda kuwa, kasi ba ke bakula ve.
11 Na yawu, kifwani yayi zola zonza mambu yayi: Bambuma ke ni mambu ya Nzambi.
12 Bambuma yina kubwaka na nzila ke bantu yina ke kuwaka nsangu ya Kimfumu, mpe na manima, Dyabulu ke kwizaka mpe ke katulaka yawu na bantima ya bawu. Na yawu, ba lenda kwikila ve mpe ke vuuka ve.
13 Bambuma yina kubwaka na zulu ya matadi ke ba yina, ntangu ba ke kuwaka nsangu ya Kimfumu, ba ke ndimaka yawu na kilengi, kasi ba ke ve na myanzi. Ba ke kwikilaka kaka samu na mwa ntangu fioti, mpe ntangu bantontolo ke kwizaka, kiminu ya bawu ke kufwaka.
14 Samu na bambuma yina ba kundaka na kati ya bansende, ya ke ba yina me kuwa nsangu ya Kimfumu, kasi samu manyongo, bimvwama mpe bilengi ya luzingu ke nataka bawu, ya ke fyetaka bawu mpe ya ke salaka ti ba yela ve.
15 Bambuma yina kubwaka na ntoto ya mbote ke ba yina, na manima ya kuwa nsangu ya Kimfumu na ntima ya kitoko mpe ya mbote, ba ke bumbaka yawu mpe ba ke kangaka ntima ntangu ba ke butaka bambuma.
16 “Ata muntu ke pelisaka mwinda samu na kutula yawu na yisi ya ndonga to na yisi ya mfulu. Kasi ba ke tulaka yawu na zulu ya mesa samu ba yina ke kota tala nsemo.
17 Mambu nyonso yina ke ya kubumbana ke kuma pwelele mpe mambu nyonso yina ba bumbaka mbote-mbote ke zabana mpe ke talana pwelele.
18 Na yawu, beno sala keba na mutindu beno ke kuwaka, samu ti na muntu yina ke na bima, ba ke pesa dyaka yandi bima mingi ya kulutila. Kasi na muntu yina ke na ata kima, ba ke katula yandi ata bima yina yandi ke na kanisaka ti yandi ke na yawu.”
19 Na manima, mama ya yandi mpe baleki ya yandi kwizaka samu na kutala yandi. Kasi ba vanda lenda ve kukuma na kisika yina yandi vandaka samu bantu vandaka mingi.
20 Na yawu ba zonzaka na yandi: “Mama ya nge na baleki ya nge ke na ngaanda. Ba ke na sosaka kutala nge.”
21 Yesu vutulaka: “Mama ya munu mpe bampangi ya munu ke ba yina ke kuwaka mambu ya Nzambi mpe ke sadilaka yawu.”
22 Kilumbu mosi, Yesu na bilandi ya yandi kotaka na bwatu, mpe yandi zonzaka na bawu: “Beto kwenda na simu ya nkaka ya maza.” Ba kwendaka.
23 Kasi ntangu ba vanda kwenda, Yesu lalaka. Mupepe ya ngolo bandaka kuningisa maza, maza bandaka kufuluka na bwatu mpe ya bandaka kudyama.
24 Na yawu, bilandi kwendaka vumbula Yesu mpe zonzaka na yandi: “Mulongi, Mulongi, beto ke kufwa!” Na yina Yesu telamaka, ngalaka mupepe mpe maza yina vanda pupa mingi. Ya zunaka mpe ya kumaka swi.
25 Na manima, yandi zonzaka na bawu: “Wapi kiminu ya beno?” Kasi ba vandaka ya kufuluka na boma mpe yitukaka mingi, mpe ba vanda zonza bawu na bawu: “Muntu yayi ke nani? Samu yandi me lomba na nzadi ya mungwa mpe mupepe na kutumama na yandi mpe ya me tumama.”
26 Ba kumaka na bwala ya bantu ya Geraza yina ke na simu ya nkaka ya maza ya Galile.
27 Ntangu Yesu basikaka na bwatu, bakala mosi ya bwala yango yina vandaka na bampeve ya yimbi bwabanaka yandi. Banda ntama, yandi vanda lwata dyaka ve bilele mpe yandi vanda zinga ve na yinzo, kasi na kati-kati ya bandyamu.*
28 Ntangu yandi talaka Yesu, yandi gangaka, fukamaka na mantwala ya yandi, mpe na ngolo nyonso yandi zonzaka: “Yesu, Mwana ya Nzambi ya Kulutila Zulu, wapi mambu mu ke na yawu na nge? Mu ke na bondilaka nge, kukwamisa ve munu.”
29 (Yandi zonzaka mutindu yina samu Yesu tumisaka mpeve ya yimbi na kubasika na bakala yango. Bambala mingi mpeve yango vanda kotila yandi* mpe bantu vanda kangaka yandi basinga ya bisengo na makulu mpe na maboko mpe vanda kengidila yandi. Kasi yandi vanda zengaka yawu, mpe mpeve ya yimbi vanda nataka yandi na bisika yina bantu kele ve.)
30 Yesu yufulaka yandi: “Nkumbu ya nge nani?” Yandi vutulaka: “Kimvuka,” samu bampeve ya yimbi mingi kotilaka yandi.
31 Ba vanda bondila Yesu na kufilisa ve bawu na dibulu ya yinda.
32 Ya vandaka na kikunku ya nene ya bangulu yina vanda kudya na zulu ya mongo. Na yawu, ba bondilaka yandi na kupesa bawu muswa ya kukota na kati ya bangulu, mpe Yesu pesaka bawu muswa.
33 Bampeve ya yimbi basikaka na kati ya muntu yina mpe ba kwendaka kota na kati ya bangulu. Bangulu katukaka na zulu ya mongo, ba kubwaka na maza mpe ba dyamaka.
34 Ntangu bantu yina vanda kengidila bangulu talaka mambu yina salamaka, ba kimaka mpe ba zabisaka yawu na bantu ya bwala yango mpe na babwala yina vandaka pene-pene.
35 Bantu basikaka samu na kutala mambu yina salamaka. Ba kwizaka na sika ya Yesu mpe ba talaka bakala yina bampeve ya yimbi basikaka. Yandi vandaka ya kulwata bilele, yandi kumaka na mabanza ya kulunga, mpe yandi vandaka ya kuvanda na makulu ya Yesu. Na yawu, ba kumaka na boma.
36 Bantu yina talaka mambu yina salamaka zabisaka bawu mutindu bakala yina vandaka na bampeve ya yimbi belukaka.
37 Na manima, bantu mingi ya bwala ya Geraza lombaka na Yesu na kubika bwala ya bawu samu ba fulukaka na boma mingi. Na yawu yandi kotaka na kati ya bwatu samu na kukwenda.
38 Muntu yina Yesu bingisaka bampeve ya yimbi bondilaka Yesu ti yandi kwenda na Yesu. Kasi Yesu zonzaka na yandi na kuvutuka. Yandi zonzaka:
39 “Vutuka na yinzo ya nge, mpe zonzila mambu yina Nzambi me sala samu na nge.” Na yawu yandi kwendaka, mpe yandi vanda zonzila na mbanza nyonso mambu yina Yesu salaka samu na yandi.
40 Ntangu Yesu vutukaka na babwala ya Galile, bantu mingi yambaka yandi na kilengi nyonso samu bawu nyonso vanda vingila yandi.
41 Na yina, bakala mosi na nkumbu ya Zayiruse kwizaka kuna. Yandi vandaka ntwadisi ya yinzo ya lusambu. Yandi kubwaka na makulu ya Yesu, mpe bandaka kubondila yandi na kukwiza na yinzo ya yandi,
42 samu mwana ya yandi ya kento, mwana kaka mosi* yina yandi butaka, yina vandaka na bamvula kana 12, vandaka pene-pene na lufwa.
Ntangu Yesu vanda kwenda, bantu mingi vanda fyetikisa yandi.
43 Na kati ya bawu, ya vandaka na kento mosi yina vanda basikaka menga katuka bamvula 12, mpe ata muntu lendaka kubelusa yandi.
44 Yandi pusanaka na manima ya Yesu, mpe simbaka nsongi ya kinkuti ya yandi. Na mbala mosi menga vanda basika dyaka ve yandi.
45 Yesu yufulaka: “Nani me simba munu?” Ntangu bawu nyonso vanda manga, Piere zonzaka: “Mulongi, bantu mingi ke na zungaka nge mpe ke na fyetikisaka nge.”
46 Kasi Yesu zonzaka: “Ya ke na muntu me simba munu, samu mu zaba ti ngolo me basika na nzutu ya munu.”
47 Ntangu kento yango talaka ti yandi lendaka dyaka ve kubumbana, yandi kwizaka na kutekita nyonso, mpe kubwaka na mantwala ya Yesu. Yandi zonzaka na mantwala ya bantu nyonso, samu na yinki yandi simbaka Yesu mpe faso yandi belukaka na mbala mosi.
48 Kasi Yesu zonzaka na yandi: “Mwana ya munu ya kento, kiminu ya nge me belusa nge. Kwenda na kizunu.”
49 Tekila Yesu manisa kuzonza, muntu mosi yina katukaka na yinzo ya Zayiruse, kwizaka mpe zonzaka: “Mwana ya nge ya kento me kufwa. Kukwamisa dyaka ve Mulongi.”
50 Ntangu Yesu kuwaka yawu, yandi zonzaka na Zayiruse: “Kuvanda ve na boma, vanda kaka na kiminu, mpe yandi ke vuuka.”
51 Ntangu Yesu kumaka na yinzo, yandi bikaka ata muntu kota na yandi katula kaka Piere, Yoane, Zaki, mpe tata na mama ya mwana ya kento.
52 Bantu nyonso vanda dila, mpe vanda bula banzutu ya bawu na mawa. Na yawu Yesu zonzaka: “Beno bika kudila, samu yandi me kufwa ve, kasi yandi ke na lalaka.”
53 Na yawu, ba bandaka kuseka yandi na ngolo samu ba zabaka ti yandi kufwaka.
54 Yesu simbaka mwana yango na diboko, mpe zonzaka na yandi: “Mwana, telama!”
55 Mpeve ya yandi* vutukaka mpe na mbala mosi yandi telamaka. Yesu lombaka ti ba pesa mwana kima ya kudya.
56 Bibuti ya yandi fulukaka na kilengi. Kasi Yesu zonzaka na bawu na kuzonza na ata muntu mambu yina me salama.
Banote
^ To: “Bandyamu ya kubambuka.”
^ To ya lenda vanda: “Banda ntama, mpeve vanda kangaka yandi ngolo.”
^ Na Greke: “Mwana kaka mosi ya kubutuka.”
^ To: “Ngolo ya yandi ya luzingu.”
