Nsangu ya Mbote ya Luke 9:1-62
-
Yesu ke na pesaka bantumwa 12 misiku samu na kisalu ya kusamuna (1-6)
-
Makanisi ya Erode me kuma kidi-kidi samu na Yesu (7-9)
-
Yesu me dikisa babakala 5 000 (10-17)
-
Piere me zonza nani kele Kristo (18-20)
-
Yesu me bikula lufwa ya yandi (21, 22)
-
Kuvanda kilandi ya tsyeleka (23-27)
-
Yesu me kituka (28-36)
-
Yesu me belusa mwana mosi ya bakala yina vandaka na mpeve ya yimbi (37-43a)
-
Yesu me bikula dyaka lufwa ya yandi (43b-45)
-
Bilandi me swana samu na kuzaba nani na kati ya bawu me lutila bampangi (46-48)
-
“Muntu yina ke ve mbeni ya beto ke kotilaka beto” (49, 50)
-
Ba me manga Yesu na bwala mosi ya bantu ya Samariya (51-56)
-
Faso ya kulanda Yesu (57-62)
9 Na manima, yandi vukisaka bantumwa 12 mpe pesaka bawu ngolo mpe lutumu samu na kubingisa bampeve ya yimbi nyonso, mpe kubelusa bimbevo.
2 Yandi filisaka bawu samu na kukwenda samuna nsangu ya Kimfumu ya Nzambi mpe kubelusa bantu.
3 Yandi zonzaka na bawu: “Beno nata ata kima samu na nzyetolo, ata yinti to saki ya kunatina madya, ata dimpa to mbongo,* ata mpe kilele ya nkaka.*
4 Kasi na konso yinzo yina beno ke kota, beno vanda kuna tii ntangu beno ke katuka kuna.
5 Kisika nyonso yina ba ke yamba ve beno, ntangu beno ke basika na mbanza yina, beno kubula fundu-fundu ya makulu ya beno, samu ya vanda kimbangi samu na bawu.
6 Na manima, ba kwendaka, ba vanda luta na babwala nyonso, vanda zonzila nsangu ya mbote, mpe vanda belusa bantu bisika nyonso.
7 Erode,* mfumu ya Galile, kuwaka mambu nyonso yina vanda salama. Makanisi ya yandi kumaka kidi-kidi samu bantu ya nkaka vanda zonza ti Yoane me vumbuka na lufwa.
8 Ya ba nkaka vanda zonza ti Eli me vutuka, mpe ya ba nkaka ti ya ke mosi ya bambikudi ya ntama yina me vumbuka na lufwa.
9 Erode zonzaka: “Mu zengaka Yoane yintu. Na yawu, nani ke muntu yina ke na salaka bamambu yina mu ke na kuwaka?” Yandi vanda sosa kutala yandi.
10 Ntangu bantumwa vutukaka, ba zabisaka Yesu mambu nyonso yina ba salaka. Na yina, yandi nataka bawu na mbanza na nkumbu ya Besayida, kisika yina ba zola vanda kaka bawu mosi.
11 Kasi ntangu bantu zabaka yawu, ba landaka yandi. Yandi yambaka bawu na ntima ya mbote, mpe bandaka kuzabisa bawu mambu yina me tadila Kimfumu ya Nzambi, mpe yandi belusaka ba yina vanda beela.
12 Bwisi bandaka kuyila. Bantumwa 12 kwizaka pene-pene na Yesu mpe zonzaka na yandi: “Zonza na bantu na kukwenda, samu ba kuzwa kisika ya kulalila mpe bima ya kudya na babwala ya fioti mpe ya nene yina ke pene-pene na awa, samu ti kisika yayi beto kele ke ntama na bwala.”
13 Kasi Yesu zonzaka na bawu: “Beno pesa bawu beno mosi kima ya kudya.” Ba zonzaka: “Beto ke kaka na mampa tanu mpe bambisi zole. Nge zola ti beto mosi beto kwenda sumbila bantu nyonso yayi madya?”
14 Ya vandaka na babakala pene-pene na 5 000. Yandi zonzaka na bilandi ya yandi: “Beno zonza na bawu na kuvanda na bikunku ya bantu 50.”
15 Ba salaka mutindu yina, mpe bantu nyonso vandaka.
16 Yandi bakaka mampa tanu mpe bambisi zole yina, yandi talaka na zulu mpe sakumunaka yawu. Na manima, yandi zengaka yawu mpe bandaka kupesa yawu na bilandi samu ba kabula yawu na bantu.
17 Bantu nyonso kudyaka mpe yukutaka. Na manima, ba lokotaka madya yina bikanaka, bitunga 12 ya bitini ya mampa.
18 Na manima, ntangu yandi vanda sambila yandi mosi, bilandi kwizaka na sika ya yandi mpe Yesu yufulaka bawu: “Samu na bantu, mu ke nani?”
19 Ba vutulaka: “Yoane Mubotiki, kasi ya ba nkaka ke zonzaka Eli, mpe ya ba nkaka mosi ya bambikudi ya ntama yina me vumbuka na lufwa.”
20 Yandi yufulaka bawu: “Kasi na beno, mu ke nani?” Piere vutulaka: “Nge ke Kristo ya Nzambi.”
21 Na manima, yandi kebisaka bawu na kuzonzila mambu yayi na ata muntu.
22 Yandi zonzaka dyaka: “Mwana ya muntu me fwana kukutana na bampasi mingi. Ba ke manga yandi na bakuluntu, na bamfumu ya banganga-nzambi, na milongisi ya Musiku mpe ba ke kufwa yandi, mpe kilumbu ya tatu, Nzambi ke vumbula yandi.”
23 Na manima, Yesu zonzaka na bantu nyonso: “Kana muntu zola kulanda munu, bika yandi kukimanga, yandi baka yinti ya yandi ya mpasi* kilumbu na kilumbu, mpe tatamana na kulanda munu.
24 Ntembe ve, muntu yina ke sosa kuvuukisa luzingu* ya yandi ke zimbisa yawu. Kasi muntu yina ke zimbisa luzingu* ya yandi samu na munu, ke vuukisa yawu.
25 Ya tsyeleka, wapi mambu ya mbote muntu ke kuzwa kana yandi kuzwa yinza nyonso, kasi zimbisa luzingu ya yandi to bebisa yawu?
26 Muntu yina ke talaka nsoni ya munu mpe ya mambu yina mu ke zonzaka, Mwana ya muntu mpe ke tala nsoni ya yandi, ntangu yandi ke kwiza na nkembo ya yandi, ya Tata ya yandi, mpe ya bambazi ya santu.
27 Kasi mu ke na zonzaka na beno ti ya tsyeleka, bantu ya nkaka yina kele awa ke kufwa ve tekila ba tala Kimfumu ya Nzambi.
28 Bilumbu 8 na manima ya kuzonza bamambu yayi, Yesu bakaka Piere, Yoane na Zaki, mpe ba kwendaka na zulu ya mongo samu na kusambila.
29 Ntangu yandi vanda sambila, kizizi ya yandi sobaka, mpe bilele ya yandi kumaka mpembe ya kulutila.
30 Na mbala mosi, babakala zole vanda solola na Yesu. Ya vandaka Moyize na Eli.
31 Ba talanaka na nkembo, mpe ba bandaka kuzonzila kukwenda ya Yesu yina zola lungana na Yeruzalemi.
32 Piere na ba yina vandaka na yandi vandaka na pongi ya ngolo, kasi ntangu ba vumbukaka, ba talaka nkembo ya Yesu mpe babakala zole yina vandaka na yandi.
33 Ntangu babakala zole yango vanda bika Yesu, Piere zonzaka na Yesu: “Mulongi, ya ke mbote na yina beto kele awa. Bika beto yidika bayinzo tatu ya bilele, mosi samu na nge, mosi samu na Moyize, mpe mosi samu na Eli.” Kasi yandi vanda zaba ve mambu yina yandi vanda zonza.
34 Ntangu yandi vanda zonza mambu yayi, dituti mosi basikaka mpe bandaka kufuka bawu. Ntangu ba kotaka na kati ya dituti, ba kumaka na boma.
35 Na manima, ndinga mosi wakanaka na kati ya dituti mpe zonzaka: “Yayi ni Mwana ya munu yina mu me soola. Beno kuwa yandi.”
36 Ntangu ndinga vanda zonza, ba talaka Yesu vandaka kaka yandi mosi. Ba vandaka swi, mpe na bilumbu yina, ba zabisaka na ata muntu bamambu yina ba talaka.
37 Kilumbu yina landaka, ntangu ba katukaka na mongo, bantu mingi kwizaka bwabana Yesu.
38 Na kati ya bantu, bakala mosi zonzaka na ndinga ya ngolo: “Mulongi, mu ke na bondilaka nge, sadisa* mwana ya munu, samu ni mwana kaka mosi yayi ke na munu.
39 Mpeve mosi ya yimbi ke simbaka yandi mpe na mbala mosi mwana ke bandaka kuganga. Mpeve yango ke ningisaka mwana na ngolo nyonso, mafulu ke basikaka yandi na yinwa, mpe yandi ke bikaka yandi na mpasi na manima ya kulwalisa yandi.
40 Mu bondilaka bilandi ya nge na kubingisa mpeve yina, kasi ba lendaka ve.”
41 Yesu zonzaka: “Beno bantu ya ntangu yayi, beno ke bantu ya yimbi, mpe yina ke ve na kiminu. Tii wapi ntangu mu me fwana kuvanda na beno mpe kukanga ntima na bamambu ya beno? Nata mwana ya nge awa.”
42 Ntangu mwana yango vanda kwiza, mpeve ya yimbi losaka yandi na ntoto mpe ningisaka yandi na ngolo nyonso. Kasi Yesu ngalaka mpeve ya mvindu yina, belusaka mwana ya bakala mpe pesaka yandi na tata ya yandi.
43 Bantu nyonso yitukaka samu na ngolo ya ngitukulu ya Nzambi.
Ntangu bantu nyonso vanda yituka na mambu nyonso yina yandi vanda sala, yandi zonzaka na bilandi ya yandi:
44 “Beno kuwa mbote-mbote, mpe beno bambukila mambu yayi. Ba ke teka Mwana ya muntu na maboko ya bantu.”
45 Kasi ba bakulaka ve mambu yina yandi vanda zonza. Ya tsyeleka, ya vandaka ya kubumbana na bawu samu ba bakula yawu ve, mpe ba vandaka na boma ya kuyufula yandi kyuvu na mambu yayi.
46 Na manima, bilandi bandaka kuswana bawu na bawu samu na kuzaba nani na kati ya bawu me lutila bampangi.
47 Yesu zabaka mambu yina vandaka na bantima ya bawu. Na yawu, yandi bakaka mwana ya fioti, telemisaka yandi pene-pene ya yandi,
48 mpe zonzaka na bawu: “Muntu yina me yamba mwana ya fioti yayi na nkumbu ya munu, me yamba munu mpe. Muntu yina me yamba munu, me yamba mpe muntu yina filisaka munu. Ya tsyeleka, muntu yina ke dyatila mutindu muntu ya fioti na kati ya beno, ni yandi muntu ya nene.”
49 Yoane zonzaka: “Mulongi, beto talaka muntu mosi yina vanda bingisa bampeve ya yimbi na nkumbu ya nge, mpe beto sosaka kunimina yandi samu yandi ke ve mosi ya bilandi ya nge.”
50 Kasi Yesu vutulaka: “Beno sosa ve kunimina yandi, samu muntu yina ke ve mbeni ya beno, ke kotilaka beno.”
51 Samu ntangu yina Yesu zola kwenda na zulu kumaka pene-pene,* yandi bakaka mukanu ya kukwenda na Yeruzalemi.
52 Na yawu, yandi filisaka binati-nsangu na mantwala ya yandi. Ba kwendaka mpe ba kotaka na bwala mosi ya bantu ya Samariya samu na kubongisa nkwizulu ya yandi.
53 Kasi ba yambaka ve yandi samu yandi bakaka mukanu ya* kukwenda na Yeruzalemi.
54 Ntangu bilandi ya yandi Zaki na Yoane talaka yawu, ba zonzaka na yandi: “Mfumu, nge zola ti beto tumisa tiya na kukatuka na zulu mpe kufwa bawu?”
55 Kasi yandi balukaka na sika ya bawu mpe sembaka bawu.
56 Na yawu ba kwendaka na bwala ya nkaka.
57 Ntangu ba vanda kwenda na nzila, muntu mosi zonzaka na yandi: “Mu ke landa nge kisika nyonso nge ke kwenda.”
58 Kasi Yesu zonzaka na yandi: “Mibaku* ke na mabulu yina ba ke bumbanaka, mpe bandeke ke na manzanza ya bawu, kasi Mwana ya muntu ke ve na kisika ya kupemisa yintu.”
59 Na manima yandi zonzaka na muntu ya nkaka: “Landa munu.” Bakala yango zonzaka: “Mfumu, pesa munu nzila ya kukwenda kunda ntete tata ya munu.”
60 Yesu zonzaka na yandi: “Bika bantu ya kufwa kunda bantu ya bawu ya kufwa, kasi nge, kwenda zonzila Kimfumu ya Nzambi.”
61 Muntu ya nkaka dyaka zonzaka: “Mu ke landa nge Mfumu, kasi bika ntete mu kwenda pesa yeyeye na dikanda ya munu.”
62 Yesu zonzaka na yandi: “Muntu yina me simba kima samu na kubanda kusaba bilanga mpe ke na talaka na manima, me bonga ve samu na Kimfumu ya Nzambi.”
Banote
^ Na Greke: “Arza.”
^ Na Greke: “Bilele zole.”
^ Ya ke ni Erode Antipasi. Tala Yina ya zola zonza.
^ Tala Yina ya zola zonza.
^ To: “Mwela.”
^ To: “Mwela.”
^ Na Greke: “Tala.”
^ Na Greke: “Zola lunga.”
^ Na Greke: “Yandi tulaka kizizi ya yandi na.”
^ To: “Ba renards.”
