Ya Marke 10:1-52
-
Makwela mpe mambu ya kufwa makwela (1-12)
-
Yesu me sakumuna bana (13-16)
-
Kyuvu ya bakala mosi ya mvwama (17-25)
-
Bima yina bantu me ndima kubika samu na Kimfumu (26-31)
-
Yesu me bikula dyaka lufwa ya yandi (32-34)
-
Zaki na Yoane me lomba mambu mosi na Yesu (35-45)
-
Yesu ke ntalu ya kufuta samu na bantu mingi (45)
-
-
Yesu me belusa Bartime, bakala mosi ya meso ya kufwa (46-52)
10 Yandi katukaka kuna mpe kwendaka na bandilu* ya Zude, na simu ya nkaka ya maza ya Yordani. Bantu mingi kwizaka vukana dyaka pene-pene ya yandi. Mutindu yandi vandaka na kifu ya kusalaka yawu, yandi bandaka dyaka kulonga bawu.
2 Bafarize kwizaka pene-pene ya yandi samu na kumeka yandi. Ba yufulaka yandi kana bakala ya kukwela lenda kufwa dikwela na kento ya yandi.
3 Yandi zonzaka na bawu: “Wapi musiku Moyize pesaka beno?”
4 Ba vutulaka: “Moyize pesaka nzila na kusonika kento mukanda ya kubingisa yandi, mpe ya kufwa makwela na yandi.”
5 Kasi Yesu zonzaka: “Ni samu na ntima ngolo ya beno yandi sonikilaka beno musiku yina.
6 Kasi katuka mbandukulu, ‘yandi yidikaka bawu bakala na kento.
7 Ni na yawu, bakala ke bika tata na mama ya yandi,
8 mpe bawu zole ke kuma musuni* mosi.’ Na yawu, ba ke dyaka ve zole kasi muntu mosi.
9 Ni na yawu, bika ti ata muntu kukabula yina Nzambi me vukisa.”
10 Ntangu ba vandaka dyaka na kati ya yinzo, bilandi yufulaka yandi samu na mambu yayi.
11 Yandi zonzaka na bawu: “Konso muntu yina ke kufwa makwela na kento ya yandi, mpe ke kwelana na kento ya nkaka, yandi me sala kinsuza* na mantwala ya kento ya ntete.
12 Mpe kana kento mosi kwelana na bakala ya nkaka na manima ya kufwa dikwela na bakala ya yandi, kento yango me sala kinsuza.”*
13 Bantu natinaka yandi bana ya fioti samu yandi simba bawu. Kasi bilandi ya yandi ngalaka bawu.
14 Ntangu Yesu talaka mambu yayi, ya sepelisaka ve yandi, mpe yandi zonzaka na bawu: “Beno bika bana ya fioti kukwiza na sika ya munu. Beno sosa ve kukanga bawu nzila, samu Kimfumu ya Nzambi ke ya bantu mutindu bawu.
15 Ya tsyeleka mu ke na zonzaka na beno ti konso muntu yina ke yamba ve Kimfumu ya Nzambi mutindu mwana ya fioti, ke kota ata fioti ve na kati ya yawu.”
16 Yandi tulaka bana na nkata ya yandi mpe tulaka bawu maboko samu na kusakumuna bawu.
17 Ntangu yandi vanda kwenda na nzila, bakala mosi kwizaka na mbangu, yandi fukamaka na mantwala ya Yesu, mpe yufulaka yandi: “Mulongi ya mbote, yinki mu me fwana kusala samu na kuzwa luzingu ya ntangu nyonso?”
18 Yesu zonzaka na yandi: “Samu na yinki nge me bokila munu mbote? Ata muntu mosi ve ke mbote, katula kaka Nzambi.
19 Nge me zaba misiku: ‘Kufwa ve muntu, kusala ve kinsuza,* kulaba ve, kupesa ve kimbangi ya luvunu, kusadila ve mayuya samu na kubaka bima ya ngana, zitisa tata ya nge na mama ya nge.’”
20 Bakala yango zonzaka na Yesu: “Mulongi, mu ke zitisaka misiku nyonso yayi kubanda buntwenya ya munu.”
21 Yesu talaka yandi mpe zolaka yandi. Yandi zonzaka: “Ya me bikana nge sala mambu mosi. Kwenda tekisa bima yina ke na nge, kabula mbongo yina na bamputu,* mpe nge ke kuzwa bimvwama na mazulu. Na manima, kwiza mpe landa munu.”
22 Kasi bakala yango kumaka na mawa ntangu yandi kuwaka mvutu ya Yesu. Yandi kwendaka na ntima ya kufuluka na kyadi, samu yandi vandaka na bimvwama mingi.
23 Na manima ya kutala bisika nyonso, Yesu zonzaka na bilandi ya yandi: “Ya tsyeleka, ya ke vanda mpasi na bantu yina ke na mbongo na kukota na Kimfumu ya Nzambi!”
24 Mambu yina Yesu zonzaka na bilandi kamwisaka bawu. Yesu zonzaka dyaka: “Bana ya munu, ya tsyeleka, ya ke mpasi na kukota na Kimfumu ya Nzambi!
25 Ya lenda vanda pete na kibulu yina ba ke bokilaka shamo na kuluta na dibulu ya ntumbu, kasi ya ke vanda mpasi ya kulutila samu na mvwama na kukota na Kimfumu ya Nzambi.”
26 Ba yitukaka dyaka mingi, mpe ba zonzaka na yandi:* “Nani kwandi lenda vuuka?”
27 Yesu talaka bawu na kati ya meso mpe zonzaka na bawu: “Na bantu ya lenda salama ve, kasi ya ke ve mutindu yina samu na Nzambi, samu ti na Nzambi, mambu nyonso lenda salama.”
28 Piere zonzaka na yandi: “Tala, beto me bika bima nyonso mpe beto me landa nge.”
29 Yesu vutulaka: “Ya tsyeleka, mu ke na zonzaka na beno ti, konso muntu yina me bika yinzo, bayaya to baleki ya kento na ya bakala, mama to tata, bana to bilanga, samu na munu mpe samu na nsangu ya mbote,
30 ke kuzwa na ntangu yayi, bambala 100 ya kulutila, bayinzo, bayaya to baleki ya kento to ya bakala, bamama, bana, mpe bilanga, na bankwamusu, mpe na yinza* yina ke kwiza, luzingu ya ntangu nyonso.
31 Kasi bantu mingi yina ke bantu ya ntete ke kuma bantu ya nsuka, mpe bantu ya nsuka ke kuma bantu ya ntete.”
32 Ntangu ba vandaka na nzila samu na kukwenda na Yeruzalemi, Yesu vanda tambula na mantwala ya bawu. Ba yitukaka, kasi ba yina vanda landa bawu kumaka na boma. Dyaka, Yesu bendaka bantumwa 12 na lweka, mpe yandi zonzaka na bawu bamambu yina zola kumina yandi:
33 “Beno kuwa. Beto ke na kwendaka na Yeruzalemi, mpe ba ke pesa Mwana ya muntu na maboko ya bamfumu ya banganga-nzambi mpe milongisi ya Musiku. Ba ke zengila yandi lufwa, mpe ba ke pesa yandi na bantu ya makanda.
34 Mpe bantu yayi ke seka yandi, ba ke lobola yandi mante, ba ke bula yandi bashikoti, mpe ba ke kufwa yandi. Kasi na manima ya bilumbu tatu, yandi ke vumbuka na lufwa.”
35 Zaki na Yoane, bana ya Zebede, kwizaka pene-pene ya yandi mpe zonzaka: “Mulongi, beto zola ti nge sala samu na beto mambu yina beto ke lomba nge.”
36 Yandi zonzaka na bawu: “Yinki beno ke na sosaka ti mu sala samu na beno?”
37 Ba vutulaka: “Pesa beto muswa ya kuvanda, mosi na diboko ya nge ya bakala, mpe ya nkaka na diboko ya nge ya kento, ntangu nge ke vanda na kati ya nkembo ya nge.”
38 Kasi Yesu zonzaka na bawu: “Beno me zaba ve mambu yina beno ke na lombaka munu. Beno lenda kunwa kwandi kopo yina mu ke na kunwaka, to kuzwa mbotokolo yina mu ke na kuzwaka?
39 Ba zonzaka na yandi: “Ee, beto lenda kunwa.” Na yawu, Yesu zonzaka na bawu: “Kopo yina mu ke na kunwaka, beno ke kunwa yawu, mpe mbotokolo yina mu ke na kuzwaka, beno ke kuzwa yawu.
40 Kasi ni na munu ve na kusoola nani ke vanda na diboko ya munu ya bakala mpe ya kento. Bisika yina kele ya ba yina ba yidikilaka yawu.”
41 Ntangu bilandi 10 ya nkaka kuwaka mambu yina, ba dasukilaka Zaki na Yoane.
42 Kasi Yesu bokilaka bawu mpe zonzaka na bawu: “Beno zaba ti ba yina ke talanaka ti ba ke* bamfumu ya makanda, ke yalaka na zulu ya bantu na ngolo nyonso, mpe bantu ya nene ke salaka ti bantu vanda kaka na yisi ya bawu.
43 Ya fwana kuvanda ve mutindu yayi na kati ya beno. Kasi konso muntu yina zola kukuma muntu ya nene na kati ya beno fwana kuvanda kisadi ya beno.
44 Mpe konso muntu yina zola kuvanda muntu ya ntete na kati ya beno, fwana kuvanda mundongo ya bantu nyonso.
45 Samu ata mpe Mwana ya muntu me kwiza ve na yinza samu ba sadila yandi, kasi yandi me kwiza samu na kusadila mpe na kupesa luzingu* ya yandi mutindu ntalu ya kufuta samu na bantu mingi.”
46 Na manima, ba kumaka na Yeriko. Kasi ntangu Yesu, bilandi ya yandi na bantu mingi yina vandaka na bawu vanda basika na Yeriko, Bartime mwana ya Time yina vandaka na meso ya kufwa, mpe yina vanda lombaka bantu bima, vandaka ya kuvanda na nzila.
47 Ntangu yandi kuwaka ti ya vandaka Yesu, muntu ya Nazareti, yandi bandaka kuzonza na ndinga ya ngolo: “Yesu Mwana ya Davidi, tadila munu kyadi!”
48 Kasi bantu bandaka kungala yandi mpe zonzaka na yandi na kuvanda swi. Ata faso yina, yandi vanda zonza dyaka na ndinga ya kulutila ngolo: “Mwana ya Davidi, tadila munu kyadi!”
49 Na yawu, Yesu telamaka, mpe zonzaka: “Beno bokila yandi.” Ba bokilaka muntu yango ya meso ya kufwa, mpe zonzaka na yandi: “Vanda na kibakala. Telama, yandi ke na bokilaka nge.”
50 Yandi losaka kinkuti ya yandi, telamaka na mbangu mpe kwendaka pene-pene ya Yesu.
51 Yesu yufulaka yandi: “Yinki nge ke na sosaka ti mu sala samu na nge?” Muntu ya meso ya kufwa zonzaka na yandi: “Rabuni,* bika ti mu tala dyaka.”
52 Yesu zonzaka na yandi: “Kwenda, kiminu ya nge me belusa nge.” Na mbala mosi yandi talaka dyaka, mpe bandaka kulanda Yesu.
Banote
^ To: “Ba frontières.”
^ To: “Nzutu.”
^ Na Greke, moi·khei′a. Tala Yina ya zola zonza.
^ Na Greke, moi·khei′a. Tala Yina ya zola zonza.
^ Na Greke, moi·khei′a. Tala Yina ya zola zonza.
^ To: “Ba pauvres.”
^ To ya lenda vanda: “Bawu na bawu.”
^ To: “Mambu ya ntangu.” Tala Yina ya zola zonza.
^ To: “Ba yina ke ya kuzabana mutindu.”
^ To: “Mwela.”
^ Ya zola zonza “Mulongi.”
