Ya Marke 11:1-33
11 Ntangu ba vandaka ntama mingi ve na Yeruzalemi, pene-pene ya Betefaze na Betani, na mongo ya bayinti ya Olive, yandi filisaka bilandi ya yandi zole,
2 mpe zonzaka na bawu: “Beno kwenda na bwala yina beno ke na talaka na mantwala. Kaka na ntangu yina beno ke kota, beno ke tala mwana ya mbuluku* mosi yina ba me kanga singa, mpe yina nabunu muntu vandila. Beno fungula yawu mpe beno nata yawu awa.
3 Kana muntu yufula beno, ‘Samu na yinki beno ke na salaka yawu?’ Beno zonza na yandi, ‘Mfumu ke na nsatu ya yawu, mpe yandi ke vutula yawu na mbangu.’”
4 Na yawu, ba kwendaka mpe ba talaka mwana ya mbuluku mosi ya kukanga na mwelo, na ngaanda, na bala-bala, mpe ba fungulaka yawu.
5 Kasi bantu ya nkaka yina vandaka kuna zonzaka na bawu: “Samu na yinki beno ke na fungulaka mwana ya mbuluku?”
6 Bilandi ya Yesu zonzaka na bawu kaka mutindu Yesu zonzilaka bawu, mpe bantu yango bikaka ba kwenda.
7 Ba natinaka Yesu mwana ya mbuluku, ba tulaka bilele ya bawu na zulu ya yawu, mpe Yesu vandilaka yawu.
8 Dyaka, bantu mingi tandaka bilele ya bawu na nzila. Ba ya nkaka zengaka makasa na bilanga.
9 Ba yina vanda kwenda na mantwala mpe na manima ya yandi vanda zonza na ngolo: “Nzambi, beto ke na bondilaka nge, vuukisa! Bika ti muntu yina ke na kwizaka na nkumbu ya Yehova* kuzwa lusakumunu!
10 Bika Nzambi sakumuna Kimfumu yina ke na kwizaka, Kimfumu ya tata ya beto Davidi! Beto ke na bondilaka nge, vuukisa, nge yina ke na mazulu!”
11 Yesu kotaka na Yeruzalemi, mpe kwendaka na tempelo mpe yandi talaka bisika nyonso yina vandaka pene-pene ya yandi. Kasi samu bwisi bandaka kuyila, yandi kwendaka na Betani na bantumwa 12.
12 Kilumbu yina landaka, ntangu ba vanda katuka na Betani, yandi kumaka na nsatu.
13 Yandi talaka na ntama yinti mosi ya bafige yina vandaka na makasa. Yandi kwendaka tala kana yandi lenda kuzwa bambuma. Kasi ntangu yandi kumaka, yandi takala ata kima, kaka makasa, samu ya vandaka ve ntangu ya bafige.
14 Na yawu, Yesu zonzaka na yinti ya bafige: “Ata muntu ke kudya dyaka bambuma ya nge.” Bilandi ya yandi vanda kuwa.
15 Na manima, ba kumaka na Yeruzalemi. Yesu kotaka na tempelo mpe bandaka kubingisa bantu yina vanda tekisa mpe vanda sumba bima na kati kuna. Yandi bwisaka bamesa ya bantu yina vanda soba mbongo, mpe bakiti ya ba yina vanda tekisa mabembe.
16 Mpe yandi bikaka ata muntu kuluta na tempelo na bima.
17 Yandi vanda longa mpe zonzaka na bawu: “Ya ke ya kusonama, ‘Ba ke bokila yinzo ya munu, yinzo ya lusambu samu na makanda nyonso.’ Kasi beno me kumisa yawu yinzo ya miyibi.”
18 Bamfumu ya banganga-nzambi na milongisi ya Musiku kuwaka yawu, mpe ba bandaka kusosa faso ya kufwa Yesu, samu ba vandaka na boma ya yandi na yina bantu nyonso vanda kamwaka na malongi ya yandi.
19 Ntangu bwisi bandaka kuyila, ba basikaka na mbanza.
20 Na suka-suka, ntangu ba vanda luta, ba talaka yinti ya bafige yina yumaka yimeni, tii na myanzi ya yawu.
21 Piere bambukaka moyo mpe zonzaka na Yesu: “Rabi tala! Yinti ya bafige yina nge lokaka me yuma.”
22 Yesu zonzaka na bawu: “Beno vanda na kiminu na Nzambi.
23 Ya tsyeleka, mu ke na zonzaka na beno ti, kana muntu zonza na mongo yayi, ‘Katuka awa mpe kwenda kubwa na nzadi ya mungwa,’* mpe kana yandi sala ve ntembe na kati ya ntima ya yandi mpe ke na kiminu ti mambu yina yandi me zonza ke salama, ya ke salama.
24 Ni na yawu, mu ke na zonzaka na beno ti, mambu nyonso yina beno ke lombaka na lusambu, beno kwikila ti beno me kuzwa yawu, mpe beno ke kuzwa yawu.
25 Dyaka, ntangu beno ke na sambilaka, beno lemvokila bamambu nyonso ya yimbi yina bantu me sala beno, samu Tata ya beno yina ke na mazulu lemvokila mpe beno masumu ya beno.”
26 * ——
27 Ba vutukaka dyaka na Yeruzalemi. Ntangu yandi vanda tambula na kati ya tempelo, bamfumu ya banganga-nzambi, milongisi ya Musiku na bakuluntu kwizaka na sika ya yandi,
28 mpe zonzaka na yandi: “Na lutumu ya nani nge ke na salaka mambu yayi? Nani zonzaka na nge na kusala yawu?”
29 Yesu zonzaka na bawu: “Mu ke yufula beno mambu mosi. Beno pesa munu mvutu. Mpe mu ke zonza na beno na lutumu ya nani mu ke na salaka bamambu yayi.
30 Mbotokolo ya Yoane katukaka na zulu to na bantu? Beno pesa munu mvutu.”
31 Ba bandaka kukanisa bawu na bawu, mpe kuzonza: “Kana beto zonza ‘Na zulu,’ yandi ke zonza na beto, ‘Kasi samu na yinki beno kwikilaka ve yandi?’
32 Kasi kana beto meka kuzonza, ‘Na bantu?’ Ba vandaka na boma ya bantu, samu ti na bantu nyonso, ya tsyeleka Yoane vandaka mbikudi.
33 Na yawu, ba zonzaka na Yesu: “Beto zaba ve.” Yesu vutulaka na bawu: “Munu mpe mu ke zonza ve na beno na lutumu ya nani mu ke na salaka bamambu yayi.”
Banote
^ Mbuluku ke kibulu mosi yina ke mutindu mpunda to cheval. Na lumputu ba ke bokilaka yawu âne.
^ Tala Yina ba me bwela A5.
^ To: “Mubu.”
^ Tala Yina ba me bwela A3.
