Ya Marke 12:1-44
-
Kifwani ya bisadi-bilanga yina kufwaka bantu (1-12)
-
Nzambi mpe Sezare (13-17)
-
Kyuvu na yina me tadila kuvumbuka ya bantu ya kufwa (18-27)
-
Misiku zole ya kulutila mfunu (28-34)
-
Kristo ke mwana ya Davidi? (35-37a)
-
Kusala keba na milongisi ya Musiku (37b-40)
-
Mufwidi mosi ya kento yina ke ve na lubaku me pesa bambongo zole ya fioti ya bisengo (41-44)
12 Na manima, yandi bandaka kuzonzila bawu na nzila ya bifwani: “Bakala mosi salaka bilanga ya vinu, mpe yandi zungaka yawu. Yandi timunaka dibulu samu na kukamuna bambuma ya vinu. Yandi tungaka yinzo ya mukengi na zulu mpe na manima yandi bikaka yawu na maboko ya bisadi-bilanga, mpe kwendaka na yinsi ya bunzenza.
2 Na ntangu ya kubuka bambuma, yandi filisaka kisadi mosi na sika ya bisadi-bilanga samu na kuzwa mwa bambuma ya vinu.
3 Kasi ba simbaka yandi, ba bulaka yandi, mpe ba vutulaka yandi maboko mpamba.
4 Yandi filisaka dyaka bawu kisadi ya nkaka. Ba bulaka yandi na yintu mpe ba fingaka yandi.
5 Yandi filisaka kisadi ya nkaka, kasi ba kufwaka yandi. Yandi filisaka bisadi mingi ya nkaka. Ba ya nkaka ba bulaka bawu, mpe ba ya nkaka ba kufwaka bawu.
6 Yandi vandaka na muntu ya nkaka, mwana ya yandi yina yandi vanda zolaka mingi. Na nsuka, yandi filisaka yandi. Yandi kanisaka, ‘Ba ke zitisa mwana ya munu.’
7 Kasi bisadi-bilanga yayi zonzaka na kati ya bawu na bawu, ‘Ni yandi ke byadila bilanga ya vinu yayi. Beno kwiza, beto kufwa yandi, mpe bilanga yina zola kuma ya yandi ke kuma ya beto.’
8 Na yawu, ba simbaka yandi, ba kufwaka yandi, mpe ba losaka yandi na ngaanda ya bilanga ya vinu.
9 Yinki muntu ya kuzwa bilanga ya vinu yayi ke sala? Yandi ke kwiza, yandi ke kufwa bisadi-bilanga, mpe yandi ke pesa bilanga ya vinu na bantu ya nkaka.
10 Nabunu beno tanga mambu yayi na Masonoko, ‘Ditadi yina bantu yina ke tungaka losaka, ni yawu me kuma ditadi ya kulutila mfunu yina ke na simbaka yinzo.*
11 Ya me katuka na Yehova* mpe ya ke kima mosi ya ngitukulu na meso ya beto’?”
12 Na yawu ba sosaka kusimba* yandi. Kasi ba vandaka na boma ya kimvuka ya bantu, samu ba zabaka ti ni na bawu yandi vanda kanisa ntangu yandi pesaka kifwani yayi.
13 Na yina, ba bikaka yandi mpe ba kwendaka. Na manima, ba filisaka ndambu ya Bafarize mpe bilandi ya Erode na sika ya yandi, samu na kubwila yandi na mambu yina yandi ke zonza.
14 Ntangu bantu yayi kumaka, ba zonzaka na yandi: “Mulongi, beto zaba ti nge ke zonzaka matsyeleka, mpe nge ke sosaka ve ti bantu ndima nge samu nge ke soolaka ve bizizi. Kasi nge ke longaka matsyeleka na yina me tadila Nzambi. Ya ke kwandi mbote na kufuta mpaku na Sezare to ve?
15 Beto me fwana kufuta to ve?” Samu yandi zabaka makanisi ya bawu ya yimbi, Yesu zonzaka na bawu: “Samu na yinki beno ke na sosaka kumeka munu? Beno natina munu denie* mosi.”
16 Ba nataka denie mosi mpe yandi yufulaka bawu: “Kizizi mpe nkumbu yina ke ya kusonama na zulu ya mbongo yayi ke ya nani?” Ba vutulaka yandi: “Ya kele ya Sezare.”
17 Na yina Yesu zonzaka: “Beno pesa na Sezare bima yina ke ya Sezare, kasi na Nzambi, bima yina ke ya Nzambi.” Ba yitukaka mingi na mvutu yina Yesu pesaka bawu.
18 Na manima, Basaduse yina ke zonzaka ti bantu ya kufwa ke vumbuka ve, kwizaka mpe yufulaka yandi:
19 “Mulongi, Moyize sonikilaka beto ti, kana bakala mosi me kufwa kasi yandi me bika ve mwana, mpangi ya yandi fwana kubaka kento yina yandi me bika, mpe kubutila mpangi ya yandi bana.
20 Ya vandaka na bampangi 7. Ya ntete kwelaka kento, kasi yandi kufwaka mpe bikaka ve bana.
21 Ya zole kwelaka kento yango, kasi yandi kufwaka, ata kubika bana. Ya salama mpe mutindu mosi samu na mpangi ya tatu.
22 Bawu nyonso 7 bikaka ve bana. Na nsuka, kento yango mpe kufwaka.
23 Ntangu bantu ke vumbuka na lufwa, nani ke vanda bakala ya yandi? Samu ti bawu 7 kwelaka yandi.”
24 Yesu zonzaka na bawu: “Ni na yina beno ke na vunamaka samu beno zaba ve Masonoko mpe ngolo ya Nzambi.
25 Ntembe ve, ntangu ba ke vumbuka na lufwa, babakala ke kwelana ve, mpe ba ke pesa ve bakento na makwela. Kasi ba ke vanda mutindu bambazi ya mazulu.
26 Na yina me tadila kuvumbuka ya bantu ya kufwa, beno tangaka ve na buku ya Moyize, na disolo yina ke zonzilaka yinti ya bansende, mambu yayi yina Nzambi zonzilaka yandi: ‘Mu ke Nzambi ya Abrahami, Nzambi ya Izaki, mpe Nzambi ya Yakobi’?
27 Yandi ke Nzambi ya bantu ya moyo, kasi ya bantu ya kufwa ve. Beno ke na vunamaka mingi.”
28 Mulongisi mosi ya Musiku vandaka na kati ya bawu mpe kuwaka masolo ya bawu. Samu yandi talaka ti Yesu pesaka bawu mvutu ya kulunga, yandi yufulaka yandi: “Wapi yina kele musiku ya ntete* na kati ya misiku nyonso?”
29 Yesu vutulaka: “Ya ntete ni yayi, ‘Kuwa, O Izraele, Yehova* Nzambi ya beto ke Yehova* mosi kaka,
30 mpe nge fwana kuzola Yehova* Nzambi ya nge na ntima ya nge nyonso, na mwela* ya nge nyonso, na makanisi ya nge nyonso mpe na ngolo ya nge nyonso.’
31 Ya zole ni yayi, ‘Nge fwana kuzola mpangi ya nge mutindu nge mosi.’ Ya ke ve na musiku ya nkaka yina me lutila misiku yayi.”
32 Mulongisi ya Musiku zonzaka na yandi: “Mulongi, nge me pesa mvutu ya mbote. Ya ke ya kukwelana na matsyeleka. Yandi ke mosi mpe ya nkaka kele ve, mpe katula yandi, ya nkaka kele ve.’
33 Kana muntu zola yandi na ntima ya yandi nyonso, na mayela ya yandi nyonso mpe na ngolo ya yandi nyonso, mpe yandi zola mpangi ya yandi mutindu yandi mosi, ya me lutila mfunu na minkayulu nyonso yina ba ke yokaka ya muvimba, mpe minkayulu ya nkaka.”
34 Samu Yesu talaka ti yandi pesaka mvutu na mayela nyonso, yandi zonzaka na yandi: “Nge ke ve ntama na Kimfumu ya Nzambi.” Na manima, ata muntu kuzwaka dyaka ngolo ya kuyufula yandi kyuvu.
35 Kasi ntangu Yesu vanda longa na tempelo, yandi zonzaka: “Samu na yinki milongisi ya Musiku ke zonzaka ti Kristo ke mwana ya Davidi?
36 Na ngolo ya mpeve ya santu, Davidi yandi mosi zonzaka, ‘Yehova* zonzaka na Mfumu ya munu: “Vanda na diboko ya munu ya bakala tii ntangu mu ke tula bambeni ya nge na yisi ya makulu ya nge.”’
37 Davidi yandi mosi bokilaka yandi Mfumu. Na yawu, wa’ faso yandi lenda vanda dyaka mwana ya yandi?”
Kimvuka ya nene ya bantu vanda kuwa yandi na kilengi.
38 Na ntangu yandi vanda longa, yandi zonzaka dyaka: “Beno sala keba na milongisi ya Musiku. Ba zola kutambula na bilele ya yinda bisika nyonso, mpe ti bantu pesa bawu mbote na buzitu na bazandu,
39 kuvanda na bakiti ya ntete* na bayinzo ya lusambu, mpe bakiti yina ba me bumbila bantu ya mfunu na bafeti.
40 Ba ke bakaka bima nyonso ya bayinzo ya mifwidi ya bakento, mpe ba ke salaka balusambu ya yinda samu na kutalana. Bantu yayi ke kuzwa kitumbu ya kulutila ngolo.”*
41 Na manima, yandi vandaka na mantwala ya babwatu ya makabu, mpe yandi vanda tala mutindu bantu vanda tula mbongo na kati. Bamvwama mingi vanda tula bambongo mingi ya bisengo.
42 Mufwidi mosi ya kento yina vandaka ve na lubaku, kwizaka mpe tulaka bambongo zole ya fioti ya bisengo* ya mfunu mingi ve.
43 Na yawu, yandi bokilaka bilandi ya yandi mpe zonzaka na bawu: “Ya tsyeleka, mu ke na zonzaka na beno ti, mufwidi ya kento yayi yina ke ve na lubaku me tula dikabu ya kulutila ntalu na bantu nyonso ya nkaka yina me tula mbongo na kati ya babwatu ya makabu.
44 Ya tsyeleka, bawu nyonso me tula mbongo yina lutilaka na zulu ya bimvwama ya bawu, kasi kento yayi yina ke ve na lubaku* me tula bima nyonso yina yandi vandaka na yawu, nyonso yina yandi vandaka na yawu samu na kuzinga.”
Banote
^ Na Greke: “Yintu ya nsongi.”
^ Tala Yina ba me bwela A5.
^ To: “Kukanga.”
^ Tala Yina ba me bwela B14.
^ To: “Ya kulutila mfunu.”
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ Tala Yina ya zola zonza.
^ Tala Yina ba me bwela A5.
^ To: “Ya kulutila kitoko.”
^ To: “Ya kulutila dema.”
^ Na Greke: “Balepta zole, yina ke pesaka kadrani mosi.” Tala Yina ba me bwela B14.
^ To: “Ya mputu.”
