Ya Marke 13:1-37
13 Ntangu yandi vanda basika na tempelo, mosi ya bilandi ya yandi zonzaka na yandi: “Mulongi, tala matadi mpe bayinzo ya kitoko yayi!”
2 Kasi Yesu zonzaka na yandi: “Nge ke na talaka bayinzo ya nene yayi? Mu ke na zonzaka na beno ti, ata ditadi mosi ve ke bikana awa na zulu ya ditadi ya nkaka. Nyonso ke kubwa.”
3 Ntangu yandi vandaka ya kuvanda na zulu ya mongo ya bayinti ya Olive yina vanda talasana na tempolo, Piere, Zaki, Yoane mpe Andre, yufulaka yandi na mansweki:
4 “Zabisa beto, wapi ntangu mambu yayi ke salama, mpe wapi yina ke vanda kidimbu yina ke lakisa ti mambu nyonso yayi me fwana kukuma na nsuka?”
5 Na yawu, Yesu bandaka kuzonza na bawu: “Beno sala keba samu ata muntu vuna beno,
6 samu bantu mingi ke kwiza na nkumbu ya munu, mpe ke zonza, ‘Mu ke Kristo,’ mpe ba ke vuna bantu mingi.
7 Dyaka, ntangu beno ke kuwa makelele ya bamvita mpe bansangu ya bamvita, beno tekita ve na boma. Mambu yayi me fwana kusalama, kasi ya ke vanda ve ntete nsuka ya yinza.
8 “Samu yinsi mosi ke nwanisa yinsi ya nkaka, mpe kimfumu mosi ke nwanisa kimfumu ya nkaka. Ntoto ke ningana na bisika ya mutindu na mutindu. Bansatu mpe ke vanda. Bamambu yayi ke vanda kubanda ya bampasi ya ngolo.
9 “Kasi beno, beno sala keba. Bantu ke nata beno na bayinzo ya kusambisa, mpe ba ke bula beno na bayinzo ya lusambu. Ba ke nata beno na mantwala ya bamfumu ya fioti mpe ya bamfumu ya nene samu na munu. Ya ke vanda kimbangi samu na bawu.
10 Dyaka, na bayinsi nyonso ba me fwana kusamuna ntete nsangu ya mbote.
11 Ntangu ba ke simba beno samu na kunata beno na bazuzi, beno tala ve ntima mpasi na yina beno ke zonza. Kasi mambu ni mambu yina beno ke kuwa na ngunga yina, beno zonza yawu, samu ni beno ve ke zonza, kasi ni mpeve ya santu.
12 Dyaka, mpangi ke pesa mpangi ya yandi samu ba kufwa yandi, tata ke pesa mwana ya yandi, bana ke telemina bibuti ya bawu, mpe ke pesa bawu samu ba kufwa bawu.
13 Mpe bantu nyonso ke yiina beno samu na nkumbu ya munu. Kasi, muntu yina ke kanga ntima tii na nsuka, ke vuuka.
14 “Kasi ntangu beno ke tala kima ya nganzi yina ke mwangisaka nyonso, ya kuvanda na kisika yina ya fwana kuvanda ve, (bika ti muntu yina ke na tangaka bakula yawu mbote-mbote), bika ti bantu yina ke vandaka na zude, banda kukima na zulu ya bamongo.
15 Bika ti muntu yina ke na zulu ya yinzo kukulumuka ve, mpe kukota ve na yinzo samu na kubaka kima.
16 Bika ti muntu yina ke na bilanga kuvutukila ve bima yina ke na manima, samu na kubaka kinkuti ya yandi.
17 Kyadi na bakento yina ke vanda na bivumu, mpe na bakento yina ke pesa ntete bana mabene na bilumbu yina.
18 Beno tatamana na kusambila samu mambu yayi kubwa ve na ntangu ya madidi ya ngolo,
19 samu na bilumbu yina, ya ke vanda na mpasi, mpasi yina me salamaka ntete ve katuka kubanda ya yinza yina Nzambi yidikaka tii ntangu yina, mpe ya ke salama dyaka ve.
20 Ya tsyeleka, kana Yehova* kumisaka ve nkufi lutangu ya bilumbu yango, ata muntu zola vuuka. Kasi samu na ba yina yandi me soola, yandi me kumisa bilumbu yango nkufi.
21 “Dyaka, kana muntu zonza na beno, ‘Kristo kele awa,’ to ‘Yandi ke kuna,’ beno kwikila ve yandi,
22 samu ba-Kristo ya luvunu mpe bambikudi ya luvunu ke basika. Ba ke sala bimangu mpe bamambu ya ngitukulu samu na kusosa kuzimbisa bantu yina Nzambi soolaka.
23 Na yawu beno, beno sala keba. Mu me zabisa beno bamambu nyonso tekila ya kuma.
24 “Kasi na bilumbu yina, na manima ya mpasi yango, ntangu ke kuma kitombi, ngonda ke pesa ve nsemo ya yawu,
25 bambwetete ke katuka na zulu mpe ke kubwa, mpe bima ya ngolo yina ke na mazulu ke ningana.
26 Mpe na ntangu yina, ba ke tala Mwana ya muntu kukwiza na kati ya matuti, na ngolo mingi mpe nkembo.
27 Yandi ke filisa bambazi, mpe ke vukisa bantu yina yandi soolaka katuka bisika yiya ya ntoto, kubanda na nsuka ya ntoto tii nsuka ya mazulu.
28 “Beno longoka na yinti ya bafige: Ntangu bintala* ya yawu ya fioti ke kumaka pete-pete, mpe makasa ya malu-malu ke basikaka, beno ke zabaka ti ntangu ya bamvula me kuma pene-pene.
29 Mutindu mosi mpe, ntangu beno ke tala bamambu yayi kusalama, beno zaba ti yandi me kuma pene-pene na mwelo.
30 Ya tsyeleka, mu ke na zonzaka na beno ti bantu ya ntangu yayi ke luta ata fioti ve tekila bamambu nyonso yayi salama.
31 Zulu na ntoto ke luta, kasi mambu yina mu me zonza ke luta ata fioti ve.
32 “Na yina me tadila kilumbu mpe ngunga yina, ata muntu me zaba yawu, ya vanda bambazi na mazulu to Mwana, kasi kaka Tata me zaba yawu.
33 Beno sala keba, beno lala ve, samu beno zaba ve na wapi ntangu, ntangu yina ba tulaka ke kubwa.
34 Ya ke mutindu muntu yina ke na kwendaka na yinsi ya bunzenza. Yandi me bika yinzo ya yandi mpe yandi me pesa yawu na maboko ya bisadi ya yandi. Yandi me pesa kisalu na mosi na mosi ya bawu, mpe yandi me zonza na muntu yina ke kengidilaka mwelo na kuvanda ekenge.
35 Ni na yawu, beno vanda ekenge samu beno zaba ve ntangu yina mfumu ya yinzo ke kwiza, kana yandi ke vutuka na nkokila to na kati-kati ya mpimpa, to ntangu nsusu ya ntete ke kokolaka to na suka,
36 samu ti ntangu yandi ke vutuka na mbalakata, yandi kwiza kuta ve beno ya kulala.
37 Mambu yayi yina mu ke na zonzaka na beno, mu ke na zonzaka yawu na bantu nyonso: Beno vanda ekenge.”
