Ya Marke 15:1-47
15 Na suka-suka, bamfumu ya banganga-nzambi, bakuluntu mpe milongisi ya Musiku, ya tsyeleka, bantu nyonso ya kimvuka ya bakuluntu ya Bazwife, vukanaka. Ba kangaka Yesu basinga, ba nataka yandi mpe ba pesaka yandi na maboko ya Pilate.
2 Pilate yufulaka Yesu: “Ni nge Mfumu ya Bazwife?” Yandi vutulaka: “Nge mosi muntu me zonza yawu.”
3 Bamfumu ya banganga-nzambi vanda funda yandi na bamambu mingi.
4 Na yawu, Pilate yufulaka dyaka yandi: “Nge ke na zonzaka ata kima? Nge ke na kuwaka ve mambu nyonso yina ba ke na zonzaka na nkumbu ya nge?”
5 Kasi, Yesu vutulaka dyaka ve mvutu. Na yawu, Pilate yitukaka mingi.
6 Na konso mukembo, Pilate vanda basisaka na boloko muntu mosi, yina bantu vanda lombaka yandi basisa.
7 Na ntangu yina, bakala mosi na nkumbu ya Barabase vandaka na boloko na bantu ya nkaka yina salaka muvusu, mpe na muvusu ya bawu, ba kufwaka muntu.
8 Na yawu, bantu mingi kwizaka mpe bandaka kulomba na Pilate na kusala mambu yina yandi vandaka na kifu ya kusalaka samu na bawu.
9 Yandi zonzaka na bawu: “Beno zola mu basisa Mfumu ya Bazwife?”
10 Ya tsyeleka, Pilate zabaka ti ni kimbanda nataka bamfumu ya banganga-nzambi na kupesa Yesu na maboko ya yandi.
11 Kasi bamfumu ya banganga-nzambi vanda sala bantu tiya samu yandi basisa bawu Barabase.
12 Pilate yufuluka dyaka bawu: “Na yawu, yinki mu me fwana kusala na muntu yina beno ke bokilaka Mfumu ya Bazwife?”
13 Ba zonzaka dyaka na ndinga ya ngolo: “Tula yandi na yinti!”*
14 Pilate zonzaka na bawu: “Samu na yinki? Wapi mambu ya yimbi yandi me sala?” Kasi ba vanda zonza dyaka na ndinga ya kulutila ngolo: “Tula yandi na yinti!”*
15 Na yina, samu Pilate vanda sosa kusepelisa bantu, yandi basisaka Barabase. Na manima ya kutumisa bantu samu ba bula Yesu bashikoti, yandi pesaka yandi samu ba koma yandi na yinti.
16 Basoda nataka yandi na ngaanda ya lupangu, na kati ya yinzo ya mfumu mpe ba vukisaka basoda nyonso.
17 Ba lwatisaka yandi kivunga ya mbwaki ya ngolo. Ba yidikilaka yandi yimpu ya kimfumu na bansende, mpe ba tulaka yawu na yintu ya yandi.
18 Mpe ba bandaka kuzonza na yandi na ndinga ya ngolo: “Mbote Mfumu ya Bazwife!”
19 Dyaka, ba vanda bula yandi didyadya na yintu, mpe kulobola yandi mante. Ba vanda fukama mpe vanda kondama* na mantwala ya yandi.
20 Ntangu ba manisaka kuseka yandi, ba katulaka yandi kivunga ya mbwaki ya ngolo mpe lwatisaka yandi bilele ya yandi. Na manima, ba nataka yandi na ngaanda samu na kukoma yandi na yinti.
21 Dyaka, ba bakaka na ngolo bakala mosi yina katukaka na bilanga mpe vanda luta kuna. Ya vandaka Simoni ya mbanza ya Sirene, tata ya Alezandre, mpe Rufuse. Ba tumisaka yandi na kunata yinti ya mpasi* ya Yesu.
22 Ba nataka yandi na kisika yina ba ke bokilaka Gologota. Ntangu ba ke bangulaka yawu, ya zola zonza: “Kisika ya Mukwa ya Yintu.”
23 Kuna, ba sosaka kupesa yandi vinu yina ba vukisaka na mire yina ke lawukisaka. Kasi yandi mangaka yawu.
24 Ba komaka yandi na yinti mpe ba bulaka dzeke samu na kukabula bilele ya yandi, samu na kuzaba nani ke baka yinki.
25 Ya vandaka pene-pene na ngunga ya 9* ya suka, ntangu ba komaka yandi na yinti.
26 Masonoko yina ba sonikaka samu na kulakisa mambu yina ba fundisaka yandi vanda zonza: “Mfumu ya Bazwife.”
27 Dyaka, ba komaka miyibi zole na bayinti pene-pene na yandi, mosi na diboko ya yandi ya bakala, ya nkaka na diboko ya yandi ya kento.
28 * ——
29 Bantu yina vanda luta vanda finga yandi, mpe ba vanda ningisa bayintu ya bawu. Ba vanda zonza: “Ee, nge yina vanda zonza ti nge zola mwangisa tempelo mpe kutunga yawu na bilumbu tatu,
30 vuukisa nzutu ya nge mosi mpe katuka na zulu ya yinti ya mpasi.”*
31 Mutindu mosi mpe, bamfumu ya banganga-nzambi mpe milongisi ya Musiku vanda seka yandi na kuzonzaka bawu na bawu: “Yandi vuukisaka bantu ya nkaka, kasi yandi ke na lendaka ve kuvuukisa nzutu ya yandi mosi!
32 Kana yandi kele Kristo, Mfumu ya Izraele, bika ti yandi katuka ntangu yayi na zulu ya yinti ya mpasi,* samu beto tala, mpe beto ke kwikila na yandi. Ata mpe ba yina ba komaka na bayinti na lweka ya yandi bandaka kufinga yandi.
33 Ntangu ya kumaka pene-pene na ngunga ya midi,* bwala nyonso kumaka na kitombi tii pene-pene na ngunga ya tatu na manima ya midi.*
34 Na ngunga ya tatu na manima ya midi,* Yesu zonzaka na ndinga ya ngolo: “Eli, Eli, lama sabakatani?” Ntangu ba ke bangulaka yawu, ya zola zonza: “Nzambi ya munu, Nzambi ya munu, samu na yinki nge me bika munu?”
35 Ntangu ba kuwaka yawu, ba ya nkaka yina vandaka ya kutelama kuna bandaka kuzonza: “Beno kuwa, yandi ke na bokilaka Eli.”
36 Muntu mosi kimaka mpe kotisaka kitende na vinu ya ngayi. Yandi tulaka yawu na yinti ya didyadya mpe pesaka yawu na Yesu samu yandi kunwa. Yandi zonzaka: “Beno vingila. Bika beto tala kana Eli ke kwiza katula yandi kuna.”
37 Yesu gangaka na ndinga ya ngolo mpe kufwaka.*
38 Lele yina ke kabulaka bisika ya santu ya tempelo pasukaka na kati-kati, kubanda na zulu tii na yisi.
39 Ntangu mfumu ya basoda yina vandaka ya kutelama na mantwala ya Yesu talaka mambu yina salamaka ntangu yandi kufwaka, yandi zonzaka: “Ya tsyeleka, muntu yayi vandaka Mwana ya Nzambi.”
40 Bakento vandaka mpe ya kutelama na ntama mpe ba vanda tala. Na kati ya bawu vandaka na Maria ya Magdala, Maria mama ya Zaki ya Ntwenya na Yoze, mpe Salome.
41 Bakento yina, vanda tambulaka na Yesu mpe vanda sadisaka yandi ntangu yandi vandaka na Galile. Ya vandaka mpe na bakento mingi ya nkaka yina kwizaka kintwadi na yandi na Yeruzalemi.
42 Samu ya vandaka Kilumbu ya Kubongama tekila kilumbu ya saba, mpe nkokila vanda kuma,
43 Yozefi, muntu ya bwala ya Arimate, kwizaka kuna. Yandi vandaka muntu ya mfunu na kati ya kimvuka ya bakuluntu ya Bazwife. Yandi mpe vanda vingila Kimfumu ya Nzambi. Na bukindi nyonso, yandi kwendaka na mantwala ya Pilate, mpe lombaka yandi mvumbi ya Yesu.
44 Kasi Pilate vanda sosa kuzaba kana Yesu kufwaka to ve. Na yawu, yandi bokilaka mfumu ya basoda mpe yufulaka yandi kana Yesu kufwaka.
45 Ntangu mfumu ya basoda zonzaka na Pilate ti yandi kufwaka, Pilate pesaka Yozefi nzila ya kubaka mvumbi ya Yesu.
46 Yandi sumbaka lele ya lino ya kitoko, mpe katulaka mvumbi ya Yesu na yinti. Yandi fukaka yawu na lele ya lino ya kitoko mpe tulaka yawu na ndyamu* yina ba timunaka na kati ya ditadi ya nene. Na manima, yandi kangaka mwelo na ditadi.
47 Kasi Maria ya Magdala na Maria mama ya Yoze bikanaka kuna na kutala kisika yina ba tulaka Yesu.
Banote
^ To: “Kufwa yandi na zulu ya yinti.”
^ To: “Kufwa yandi na zulu ya yinti.”
^ To: “Lakisaka buzitu.”
^ Tala Yina ya zola zonza.
^ Na Greke: “Ngunga ya tatu.”
^ Tala Yina ba me bwela A3.
^ Tala Yina ya zola zonza.
^ Tala Yina ya zola zonza.
^ Na Greke: “Ngunga ya 6.”
^ Na Greke: “Ngunga ya 9.”
^ Na Greke: “Ngunga ya 9.”
^ To: “Pemaka mbala ya nsuka.”
^ To: “Ndyamu ya kubambuka.”
