Ya Marke 2:1-28
2 Kasi, na manima ya mwa bilumbu, yandi kotaka dyaka na Kapenawume, mpe nsangu mwanganaka ti yandi vandaka na yinzo.
2 Bantu mingi vukanaka mpe ya vandaka dyaka ve na bisika tii pene-pene na mwelo. Mpe Yesu bandaka kuzonzila bawu mambu ya Nzambi.
3 Ba natinaka yandi muntu mosi yina vandaka kikata. Bantu yiya vandaka ya kunanguna yandi.
4 Kasi ba lendaka ve kunata yandi tii na kisika yina Yesu vandaka, samu bantu vandaka mingi. Na yawu, ba fungulaka zulu ya yinzo, na kisika yina Yesu vandaka. Na dibulu yina ba fungulaka, ba kulumunaka kipoyi yina mbevo vandaka ya kulala.
5 Ntangu Yesu talaka kiminu ya bawu, yandi zonzaka na kikata: “Mwana ya munu, nge me kuzwa mulemvo ya masumu ya nge.”
6 Kasi milongisi ya nkaka ya Musiku vandaka ya kuvanda kuna, mpe ba bandaka kukanisa na kati ya bantima ya bawu:
7 “Samu na yinki muntu yayi ke na zonzaka mutindu yayi? Yandi ke na vwezaka Nzambi. Ata muntu lenda lemvokila masumu, katula kaka Nzambi.”
8 Kasi na mbala mosi, Yesu zabaka na ntima ya yandi mambu yina ba vanda kanisa na kati-kati ya bawu. Na yawu, yandi zonzaka na bawu: “Samu na yinki beno ke na kanisaka mutindu yina na bantima ya beno?
9 Yinki me lutila mpasi na kuzonza, ‘Nge me kuzwa mulemvo ya masumu ya nge,’ to kuzonza, ‘Telama, baka kipoyi ya nge mpe tambula’?
10 Beno bika mu lakisa beno ti Mwana ya muntu ke na lutumu ya kulemvokila masumu na ntoto.” Na yawu, yandi zonzaka na kikata:
11 “Mu ke na zonzaka na nge, telama, baka kipoyi ya nge mpe kwenda na yinzo ya nge.”
12 Bakala yango telamaka mpe na mbala mosi yandi bakaka kipoyi ya yandi mpe basikaka na meso ya bantu nyonso. Bantu nyonso yitukaka mpe pesaka nkembo na Nzambi. Ba vanda zonza: “Nabunu beto tala mambu ya mutindu yayi.”
13 Yesu kwendaka dyaka pene-pene ya nzadi ya mungwa.* Bantu mingi vanda kwiza kaka na sika ya yandi, mpe yandi vanda longa bawu.
14 Ntangu Yesu vanda luta, yandi talaka Levi, mwana ya Alfe. Yandi vandaka ya kuvanda na kisika yina bantu yina ke lokotaka mpaku ke salaka. Yesu zonzaka na yandi: “Landa munu.” Na yawu, Levi telamaka mpe landaka yandi.
15 Na manima, ntangu Yesu vanda kudya* na yinzo ya Levi, bantu mingi yina ke lokotaka mpaku mpe basumuki vanda kudya kintwadi na Yesu na bilandi ya yandi. Bawu mingi vanda landa yandi.
16 Kasi ntangu milongisi ya Musiku yina vandaka Bafarize talaka ti Yesu vanda kudya na basumuki mpe na bantu yina ke lokotaka mpaku, ba bandaka kuzonza na bilandi ya Yesu: “Mulongi ya beno ke kudyaka kwandi na bantu yina ke lokotaka mpaku mpe na basumuki?”
17 Ntangu Yesu kuwaka yawu, yandi zonzaka na bawu: “Bantu yina ke ngolo ke ve na nsatu ya munganga, kasi ni bantu yina ke na beelaka ke na nsatu ya yandi. Mu kwizaka ve samu na kubokila bantu ya lunungu,* kasi basumuki.”
18 Bilandi ya Yoane na Bafarize vandaka na kifu ya kulutisaka bantangu ata kudya kima. Na yawu, ba kwizaka yufula yandi: “Samu na yinki bilandi ya Yoane na ya Bafarize ke vandaka na kifu ya kulutisaka bantangu ata kudya kima, kasi bilandi ya nge ke salaka ve yawu?”
19 Na yawu, Yesu zonzaka na bawu: “Ntangu bakala yina ke na kwelanaka ke na bandiku ya yandi, bandiku ya yandi ke ve na nsatu ya kulutisa bantangu ata kudya kima, faso yina ve? Ntangu nyonso yina bakala yina ke na kwelanaka ke na bawu, ba lenda lutisa ve bantangu ata kudya kima.
20 Kasi bilumbu ke kwiza, yina ba ke katula bakala yina ke na kwelanaka na kati ya bawu. Kuna, ba ke baka mukanu ya kulutisa bantangu ata kudya kima.
21 Ata muntu ke tungaka kitende ya lele ya malu-malu na zulu ya lele ya ntama. Kana yandi sala yawu, kitende ya malu-malu ke benda lele ya ntama, mpe ya ke pasuka dyaka mingi.
22 Dyaka, ata muntu ke tulaka vinu ya malu-malu na basaki ya kununa yina ba ke yidikaka na mpusu ya kibulu. Kana yandi sala yawu, vinu ke pasula basaki, mpe yimeni samu na vinu mpe basaki. Kasi ba ke tulaka vinu ya malu-malu na basaki ya malu-malu.”
23 Yesu na bilandi ya yandi vanda luta na bilanga kilumbu ya saba. Bilandi ya yandi bandaka kubuka bambuma ya ble.
24 Na yawu, Bafarize zonzaka na yandi: “Samu na yinki ba ke na salaka mambu yina Musiku ke niminaka na kusala kilumbu ya saba?”
25 Kasi yandi zonzaka na bawu: “Beno tangaka ve mambu yina Davidi salaka ntangu yandi vandaka dyaka ve na madya, mpe yandi na bantu ya yandi kumaka na nsatu?
26 Disolo ya Abiatare, mfumu ya banganga-nzambi, ke zonzaka ti Davidi kotaka na yinzo ya Nzambi mpe kudyaka mampa yina ba ke pesaka mutindu munkayulu na Nzambi.* Musiku vanda pesa ve bantu nzila na kudya mampa yina, kasi kaka banganga-nzambi. Yandi pesaka mpe mampa ya nkaka na bantu yina vandaka na yandi.”
27 Yandi bwelaka: “Nzambi salaka kilumbu ya saba samu na bantu, kasi yandi salaka ve bantu samu na kilumbu ya saba.”
28 Ni na yawu Mwana ya muntu ke mpe Mfumu ya saba.
Banote
^ To: “Mubu.”
^ To: “Ya kuyalumuna na mesa.”
^ To: “Kudedama.”
^ To: “Mampa ya kulakisa.” Tala Yina ya zola zonza.
