Ya Marke 3:1-35
3 Yandi kotaka dyaka na yinzo mosi ya lusambu ya Bazwife. Bakala mosi yina vandaka na diboko ya kuyuma* vandaka kuna.
2 Na yawu, Bafarize vanda keta yandi mbote-mbote samu na kutala kana yandi ke belusa bakala yina kilumbu ya saba. Ba vanda sosa dyambu samu na kufunda yandi.
3 Yandi zonzaka na bakala yina vandaka na diboko ya kuyuma: “Telama, mpe kwiza awa na kati-kati.”
4 Na manima, yandi yufulaka na bawu: “Musiku ke pesaka muswa na kilumbu ya saba na kusala mambu ya mbote to ya yimbi, na kuvuukisa luzingu* to na kufwa yawu?” Kasi ba vandaka kaka swi.
5 Yesu talaka bawu na nkele. Yandi vandaka ya kufuluka na mawa samu na ntima ya bawu ya ngolo. Na manima, yandi zonzaka na bakala yina: “Tamba diboko ya nge.” Yandi tambaka diboko, mpe diboko ya yandi belukaka.
6 Bafarize basikaka, mpe ba vukanaka na mbangu na bantu ya Erode samu na kufwa yandi.
7 Kasi Yesu na bilandi ya yandi kwendaka na nzadi ya mungwa.* Bantu mingi yina katukaka na Galile mpe na Zude landaka yandi.
8 Bantu mingi ya nkaka katukaka na Yeruzalemi, na Idume, na simu ya nkaka ya Yordani mpe na bizunga yina vandaka pene-pene ya Tire na ya Sidoni, mpe kwizaka na sika ya yandi ntangu ba kuwaka bamambu nyonso yina Yesu vanda salaka.
9 Yandi zonzaka na bilandi ya yandi na kubumbila yandi bwatu ya fioti samu ti bimvuka ya bantu fyetikisa ve yandi.
10 Samu yandi belusaka bantu mingi, bantu nyonso yina vandaka na bimbevo ya ngolo vanda kwizaka bawu mingi na sika ya yandi samu na kusimba yandi.
11 Ata bampeve ya yimbi vanda fukamaka na mantwala ya yandi ntangu ba vanda talaka yandi, mpe ba vanda zonzaka na ndinga ya ngolo: “Nge ke Mwana ya Nzambi.”
12 Kasi bambala mingi, yandi niminaka bawu na ngolo nyonso na kuzonza nani yandi kele.
13 Yandi kwendaka na mongo mpe bokilaka ba yina yandi soolaka, mpe ba kwizaka na sika ya yandi.
14 Yandi soolaka* bantu 12, yina yandi bokilaka bantumwa, ba yina zolaka vanda na yandi mpe yina yandi zolaka filisa samu na kwenda samuna.
15 Yandi pesaka mpe bawu lutumu ya kubingisa bampeve ya yimbi.
16 Yayi ni bankumbu ya bantu 12 yina yandi soolaka: “Simoni yina yandi pesaka mpe nkumbu ya Piere,
17 Zaki mwana ya Zebede mpe Yoane leki ya yandi (yandi pesaka mpe bawu nkumbu ya Bwanengese, yina zola zonza “Bana ya kidumu”),*
18 Andre, Filipe, Bartelemi, Matayi, Toma, Zaki mwana ya Alfe, Tade, Simoni muntu ya Kanana,*
19 mpe Yuda Iskayote, yina tekaka Yesu na manima.
Na manima, yandi kotaka na yinzo.
20 Dyaka, bantu mingi vukanaka mpe ya salaka ti Yesu na bilandi ya yandi vandaka lenda ve kudya ata mwa kima.
21 Kasi ntangu bantu ya dikanda ya yandi kuwaka yawu, ba kwizaka samu na kubwila yandi, samu ba vanda zonza: “Yandi me lawuka.”
22 Milongisi ya Musiku yina katukaka na Yeruzalemi vanda zonza: “Bezebule* me kotila yandi, mpe yandi ke bingisaka bampeve ya yimbi na ngolo ya mfumu ya bampeve ya yimbi.”
23 Na yawu, yandi bokilaka bawu mpe zonzaka na bawu na nzila ya bifwani: “Wa’ faso Satana lenda bingisa Satana?
24 Kana kimfumu me kabuka, ya ke lenda ve kutelama.
25 Mpe kana yinzo ke ya kukabuka, ya ke lenda ve kusikama.
26 Na yawu, kana Satana telemina yandi mosi mpe kuma ya kukabuka, yandi ke lenda ve kutelama, kasi yandi ke kufwa.
27 Ya tsyeleka, ata muntu lenda kota na yinzo ya muntu mosi ya ngolo mpe kulaba bima ya yandi, kana yandi kanga ve ntete muntu ya ngolo basinga. Kaka na manima ya kusala faso yina yandi ke lenda kuyiba bima ya yinzo ya muntu yina.
28 Ya tsyeleka, mu ke na zonzaka na beno ti bantu ke kuzwa mulemvo ya masumu nyonso ya bawu, mpe na bifingu* nyonso yina ba ke zonzaka.
29 Kasi konso muntu yina ke vweza mpeve ya santu, Nzambi ke lemvokila yandi ata fioti ve. Yandi me sumuka samu na ntangu nyonso.”
30 Yandi zonzaka yawu samu ba vanda zonza: “Yandi ke na mpeve ya yimbi.”
31 Mama ya yandi mpe baleki ya yandi ya bakala kwizaka, mpe vandaka ya kutelama na ngaanda. Ba filisaka muntu samu na kubokila yandi.
32 Yandi vandaka ya kuvanda na kati ya bantu mingi. Ba zonzaka na yandi: “Mama ya nge mpe baleki ya nge ke na ngaanda, ba ke na sosaka nge.”
33 Kasi yandi vutulaka na bawu: “Nani ke mama ya munu mpe bampangi ya munu?”
34 Yandi talaka bantu yina vandaka ya kuvanda pene-pene na yandi mpe zonzaka: “Tala, mama ya munu mpe bampangi ya munu, bawu yayi.
35 Konso muntu yina ke salaka luzolo ya Nzambi, ni yandi muntu ke mpangi ya munu ya bakala, mpangi ya munu ya kento, mpe mama ya munu.”
Banote
^ To: “Kufwa.”
^ To: “Mwela.”
^ To: “Mubu.”
^ To: “Tulaka.”
^ To: “Tonnerre.”
^ Ntangu ya nkaka ya zola zonza “muntu ya tiya,” kasi ve ti yandi vandaka muntu ya mbanza ya Kanana to ya mbanza ya Kana.
^ Nkumbu yina ba ke sadilaka samu na Satana.
^ To: “Kuvweza.”
