Ya Marke 4:1-41
-
BIFWANI YINA KE ZONZILAKA KIMFUMU (1-34)
-
Muntu yina ke kundaka (1-9)
-
Samu na yinki Yesu vanda sadila bifwani (10-12)
-
Yesu me lakisa yinki zola zonza kifwani ya muntu yina ke kundaka (13-20)
-
Ba ke tulaka ve mwinda na yisi ya kitunga (21-23)
-
Kitezolo yina beno ke sadilaka (24, 25)
-
Muntu yina me kunda mpe me kwenda lala (26-29)
-
Mbuma ya mutarde (30-32)
-
Kusadila bifwani (33, 34)
-
-
Yesu me zunisa mupepe ya ngolo (35-41)
4 Yesu bandaka dyaka kulonga pene-pene na nzadi ya mungwa,* mpe bantu mingi vukanaka pene-pene na yandi. Na yawu, yandi kotaka na bwatu, yandi vandaka mpe kwendaka mwa ntama na zulu ya maza. Kasi bantu nyonso vandaka na zyelo ya nzadi ya mungwa.
2 Yandi bandaka kulonga bawu mambu mingi na nzila ya bifwani. Ntangu yandi bandaka kulonga, yandi zonzaka na bawu:
3 “Beno kuwa. Muntu mosi yina ke kundaka bambuma, kwendaka kunda bambuma.
4 Ntangu yandi vanda kunda, bambuma ya nkaka kubwaka na nzila. Bandeke kwizaka, mpe kudyaka yawu.
5 Bambuma ya nkaka kubwaka na kati ya matadi, mpe ya menaka na mbangu, samu ntoto vandaka ve sunda.
6 Kasi ntangu ntangu basikaka, ya yokaka bayinti, mpe bayinti yumaka samu ya vandaka ve na myanzi.
7 Bambuma ya nkaka kubwaka na kati ya bansende. Bansende menaka mpe fyetaka yawu, mpe ya butaka ve.
8 Bambuma ya nkaka kubwaka na ntoto ya mbote, mpe ntangu ya basikaka, ya yelaka. Ya bandaka kubuta bambuma, mpe ya vanda buta bambuma 30, ya nkaka bambuma 60, mpe ya nkaka dyaka bambuma 100.”
9 Na manima yandi bwelaka: “Bika ti muntu yina ke na makutu samu na kuwa, kuwa.”
10 Ntangu yandi vandaka yandi mosi, bilandi ya nkaka mpe bantumwa 12 bandaka kuyufula yandi yinki zola zonza bifwani yina yandi sadilaka.
11 Yandi zonzaka na bawu: “Ba pesaka beno mansweki ya santu ya Kimfumu ya mazulu, kasi samu na bantu yina ke na ngaanda, mambu nyonso yayi ke kaka bifwani.
12 Samu ti ba lenda tala, kasi ba ke vanda na kati ya kidiba. Ba lenda kuwa, kasi ba ke bakula ve. Ni na yawu ba ke vutuka ata fioti ve na sika ya Nzambi mpe yandi ke lemvokila ve bawu.”
13 Yandi zonzaka dyaka na bawu: “Kana beno ke na zabaka ve kifwani yayi, wa’ faso beno ke bakula bifwani nyonso ya nkaka?
14 “Muntu yina ke kundaka, ke kundaka nsangu ya Kimfumu.
15 Ya ke na ba yina ke na nzila na kisika yina ba me kunda nsangu ya Kimfumu. Kasi na manima ya kuwa yawu, Satana ke kwizaka mpe ke katulaka nsangu ya Kimfumu yina ba kundaka na kati ya bawu.
16 Ya ke mpe na ba yina ba kundaka na ntoto yina ke na matadi. Na manima ya kuwa nsangu ya Kimfumu, ba ke ndimaka yawu na kilengi.
17 Kasi, ba ke ve na myanzi na kati ya bawu. Ba ke kwikilaka samu na mwa ntangu. Kasi ntangu mambu ya mpasi mpe bankwamusu ke kwizaka, samu na nsangu ya Kimfumu, ba ke bulaka dibaku.*
18 Ya ke mpe na ba yina ba kundaka na kati ya bansende. Ya ke bantu yina kuwaka nsangu ya Kimfumu.
19 Kasi manyongi samu na mambu ya yinza* yayi, ngolo yina bimvwama ke na yawu ya kuvuna bantu mpe bansatu ya mutindu na mutindu, ke kangaka nsangu ya Kimfumu, ke fyetaka yawu mpe ya ke buta dyaka ve bambuma.
20 Na kumanisa, ba yina ba kundaka na ntoto ya mbote, ke bantu yina ke kuwaka nsangu ya Kimfumu, ke ndimaka yawu, mpe ke butaka bambuma, bambala 30, 60 mpe 100.”
21 Yandi zonzaka dyaka na bawu: “Ba ke tulaka ve mwinda na yisi ya kitunga* to na yisi ya mfulu, faso yina ve? Ya ke ni na zulu ya mesa ba ke tulaka yawu.
22 Mambu nyonso yina ke ya kubumbana ke talana, mpe ya ke ve na mambu yina ba bumbaka mbote-mbote yina ke zabana ve.
23 Bika ti muntu yina ke na makutu samu na kuwa, kuwa.”
24 Yandi bwelaka: “Beno tula dikebi na mambu yina beno ke na kuwaka. Ni kitezolo yina beno ke sadilaka, ba ke sadila mpe samu na beno. Ee, ba ke bwela dyaka beno ya kulutila.
25 Samu na muntu yina ke na bima, ba ke pesa dyaka yandi bima mingi ya nkaka. Kasi na muntu yina ke ve na kima, ba ke katula yandi ata bima ndambu yina ke na yandi.”
26 Yandi bwelaka dyaka: “Kimfumu ya Nzambi ke mutindu muntu yina ke na mwangisaka bambuma na ntoto.
27 Na mpimpa yandi ke lalaka. Na suka yandi ke vumbukaka. Bambuma ke menaka mpe ke kulaka. Kasi yandi ke zabaka ve mutindu ya ke salamaka.
28 Ntoto ke menisaka yawu mosi bambuma malembe-malembe. Ya ke basisaka ntete mwa yinti. Na manima, yinti yango ke bandaka kubasisa bambuma, mpe bambuma ke yelaka.
29 Ntangu bambuma ke yelaka, yandi ke zengaka yawu na mbele, samu ti ntangu ya kubuka bambuma me lunga.”
30 Yandi zonzaka dyaka: “Na wapi kima beto lenda fwanisa Kimfumu ya Nzambi to wapi kifwani beto lenda baka samu na kulakisa yinki ya zola zonza?
31 Ya ke mutindu mbuma ya mutarde. Ntangu ba ke kundaka yawu, ya ke mbuma ya kulutila fioti na bambuma nyonso yina ke na zulu ya ntoto.
32 Kasi na manima ya kukunda yawu, ya ke menaka mpe ke kumaka yinda kulutila bima nyonso yina ba me kunda na bilanga. Mpe samu bintala ya yinti ya yawu ke nene, bandeke ya mazulu lenda kwiza samu na kulala na yisi ya mpewo ya yawu.”
33 Yesu vanda sadilaka bifwani mingi ya mutindu yayi, samu na kulonga bawu mambu ya Nzambi, na mutindu yina ba zola lenda kubakula yawu.
34 Ya tsyeleka, yandi vanda zonzaka na bawu kaka na nzila ya bifwani. Kasi ntangu yandi vanda vukanaka kaka na bilandi ya yandi, yandi vanda bangulaka bawu mambu nyonso.
35 Kilumbu yina, ntangu nkokila kumaka, yandi zonzaka na bawu: “Beto kwenda na simu ya nkaka ya maza.”
36 Na manima ya kuzonza na bantu mingi yina vandaka kuna na kukwenda, ba nataka yandi na bwatu kaka faso yandi vandaka. Ya vandaka na babwatu ya nkaka yina vandaka kuna.
37 Mupepe mosi ya ngolo bandaka kubula, bimpo ya maza bandaka kuningisa bwatu, mpe bwatu bandaka kufuluka na maza.
38 Kasi, Yesu vanda lala na manima, mpe tulaka yintu na zulu ya kuse. Ba vumbulaka yandi mpe ba zonzaka na yandi: “Mulongi, beto ke kufwa, ya ke na salaka nge ata kima?”
39 Na yina, yandi telamaka, ngalaka mupepe mpe zonzaka na nzadi ya mungwa: “Bika makelele, vanda swi!” Na yawu, mupepe zunaka, mpe bima nyonso kumaka swi.
40 Mpe yandi zonzaka na bawu: “Samu na yinki beno ke ya kufuluka na boma?* Beno ke ntete ve na kiminu?”
41 Kasi ba vandaka kaka na boma mingi, mpe vanda yufula bawu na bawu: “Muntu yayi ke nani? Samu ti ata mupepe mpe nzadi ya mungwa ke tumamaka na yandi.”
Banote
^ To: “Mubu.”
^ To: “Ba ke kwikilaka dyaka ve.”
^ To: “Mambu ya ntangu.” Tala Yina ya zola zonza.
^ To: “Kitunga samu na kuteza bima.”
^ To : “Ke na ntima na zulu?”
