Ya Marke 5:1-43
5 Na manima, ba kumaka na simu ya nkaka ya nzadi ya mungwa,* na bwala ya bantu ya Geraza.
2 Kaka ntangu Yesu basikaka na bwatu, bakala mosi yina vandaka na mpeve ya yimbi basikaka na kati-kati ya bandyamu* mpe kwizaka na sika ya Yesu.
3 Yandi vanda zingaka na kati-kati ya bandyamu, mpe tii na ntangu yina, ata muntu vanda lenda kukanga yandi basinga, ata ya vandaka ya bisengo.
4 Bambala mingi, ba vanda kangaka yandi maboko mpe makulu na basinga ya kisengo, kasi yandi vanda zengaka yawu. Ata muntu mosi ve vandaka na ngolo ya kukutika yandi.
5 Mpimpa ntangu, yandi vanda bikaka ve kuganga na kati ya bandyamu mpe na zulu ya bamongo. Mpe yandi vanda lwalisaka nzutu ya yandi na matadi.
6 Kasi ntangu yandi talaka Yesu na ntama, yandi kimaka mbangu mpe kwizaka fukama na mantwala ya yandi.
7 Yandi bandaka kuzonza na ngolo nyonso: “Yesu, Mwana ya Nzambi ya Kulutila Zulu, wapi mambu mu ke na yawu na nge? Kudya ndefi na nkumbu ya Nzambi ti nge ke kwamisa ve munu.”
8 Yandi zonzaka mutindu yina samu Yesu zabisaka yandi: “Nge mpeve ya yimbi, basika na muntu yayi.”
9 Yesu yufulaka yandi: “Nkumbu ya nge nani?” Yandi vutulaka: “Nkumbu ya munu Kimvuka, samu ti beto kele mingi.”
10 Yandi vanda bika ve kubondila Yesu na kufilisa ve bampeve yina na kizunga ya nkaka.
11 Ya vandaka na bangulu mingi yina vanda kudya na zulu ya mongo.
12 Na yawu, bampeve yango bondilaka yandi: “Filisa beto na bangulu samu beto kota na kati ya bawu.”
13 Yandi pesaka bawu muswa ya kukwenda. Bampeve ya yimbi basikaka na muntu yina, mpe ba kwendaka kota na kati ya bangulu. Lutangu ya bangulu vandaka pene-pene na 2 000. Ba katukaka na zulu ya mongo, ba kubwaka na nzadi ya mungwa, mpe ba dyamaka.
14 Bantu yina vanda kengidila bangulu kimaka, mpe ba zabisaka mambu yina salamaka na bantu ya bwala yango mpe na babwala yina vandaka pene-pene.
15 Na yawu, bantu kwizaka samu na kutala mambu yina lutaka. Ba kwizaka na sika ya Yesu, mpe ba talaka bakala yina vandaka na Kimvuka ya bampeve ya yimbi na kati ya yandi. Yandi vandaka ya kuvanda, ya kulwata bilele, mpe yandi kumaka na mabanza ya kulunga. Na yawu, ba kumaka na boma.
16 Dyaka, bantu yina talaka mambu yina salamaka, vanda zonzila bawu mambu yina kuminaka na bakala yina vandaka na bampeve ya yimbi mpe mambu yina kuminaka bangulu.
17 Na yawu, ba bandaka kubondila Yesu samu yandi katuka na kizunga ya bawu.
18 Ntangu Yesu vanda kota na bwatu, bakala yina vandaka na bampeve ya yimbi bondilaka Yesu samu yandi kwenda na yandi.
19 Kasi Yesu ndimaka ve kunata yandi mpe zonzaka na yandi: “Vutuka na dikanda ya nge, mpe zonzila bawu mambu nyonso yina Yehova* me sala samu na nge mpe faso yandi me tala nge kyadi.”
20 Bakala yango kwendaka, mpe bandaka kumwangisa na Dekapole* nsangu ya mambu nyonso yina Yesu salaka samu na yandi, mpe bantu nyonso vanda yituka.
21 Na manima, Yesu vutukaka na simu ya nkaka ya nzadi ya mungwa. Bantu mingi vukanaka pene-pene ya yandi ntangu yandi vandaka ntete pene-pene na nzadi ya mungwa.
22 Mosi ya bantwadisi ya yinzo ya lusambu ya Bazwife, na nkumbu ya Zayiruse, kwizaka, mpe ntangu yandi talaka Yesu, yandi fukamaka na mantwala ya Yesu.
23 Yandi bondilaka Yesu bambala mingi, mpe zonzaka: “Mwana ya munu ya fioti ya kento ke na beelaka mingi.* Mulemvo, kwiza mpe tula yandi maboko samu yandi beluka mpe yandi vuuka.”
24 Na yawu, Yesu kwendaka na yandi. Bantu mingi vanda landa yandi mpe ba vanda fyetikisa yandi na balweka nyonso.
25 Na kati ya bawu ya vandaka na kento mosi yina menga vanda basikaka katuka bamvula 12.
26 Yandi talaka mpasi mingi na sika ya minganga mingi, mpe yandi manisaka mbongo ya yandi nyonso. Yandi belukaka ve, kasi mpasi ya yandi vanda lutila kaka.
27 Ntangu yandi kuwaka mambu yina bantu vanda zonza na nkumbu ya Yesu, yandi kotaka na kati-kati ya bantu, kwizaka na manima ya Yesu, mpe simbaka kinkuti ya yandi,
28 samu yandi vanda zonza: “Kana mu simba kaka kinkuti ya yandi, mu ke beluka.”
29 Na mbala mosi, menga vanda basika dyaka ve yandi, mpe yandi zabaka na nzutu ya yandi ti yandi me beluka na kimbevo ya mpasi yina.
30 Kaka na ntangu yina, Yesu kwizaka zaba ti ngolo basikaka na nzutu ya yandi. Yandi balukaka na sika ya bantu mpe yufulaka: “Nani me simba kilele ya munu ya zulu?”
31 Bilandi ya yandi vutulaka: “Nge ke na talaka ti bantu ke na fyetikisaka nge, mpe nge ke na yufulaka, ‘Nani me simba munu?’”
32 Kasi Yesu vanda tala na bisika nyonso samu na kuzaba nani salaka mutindu yina.
33 Kento yango vanda tekita na boma samu yandi zabaka mambu yina kuminaka yandi. Na yawu, yandi kwizaka fukama na mantwala ya Yesu, mpe zonzilaka yandi mambu nyonso.
34 Yesu zonzaka na yandi: “Mwana ya munu ya kento, kiminu ya nge me belusa nge. Kwenda na kizunu, mpe beluka na maladi ya nge ya mpasi.”
35 Tekila Yesu manisa na kuzonza, bantu ya nkaka yina katukaka na yinzo ya Zayiruse, kwizaka mpe zonzaka: “Mwana ya nge ya kento me kufwa. Samu na yinki kukwamisa dyaka mulongi?”
36 Kasi Yesu kuwaka mambu yina ba vanda zonza, mpe yandi zonzaka na Zayiruse: “Kuvanda ve na boma,* kwikila kaka.”
37 Na yina, Yesu niminaka bantu na kukwenda na yandi. Yandi nataka kaka Piere, Zaki mpe Yoane, leki ya Zaki.
38 Ntangu ba kumaka na yinzo ya Zayiruse, makelele vandaka mingi kuna, samu bantu vanda dila, mpe ba vanda kufwa na kudila na kugangaka na ngolo nyonso.
39 Na manima ya kukota na yinzo, Yesu zonzaka na bawu: “Samu na yinki beno ke na dilaka mpe ke na salaka makelele mingi? Mwana me kufwa ve, kasi yandi ke na lalaka.”
40 Na yawu, ba bandaka kuseka yandi na ngolo. Yandi basisaka bantu nyonso na ngaanda. Yandi bakaka tata na mama ya mwana, mpe kintwadi na bilandi ya yandi, ba kotaka na kisika yina mwana vandaka.
41 Yesu bakaka diboko ya mwana, mpe zonzaka: “Talita kumi,” yina zola zonza: “Mwana ya munu ya kento, mu ke na zonzaka na nge, telama!”
42 Na mbala mosi, mwana telamaka mpe tambulaka. (Yandi vandaka na bamvula 12.) Ntangu ba talaka mambu yayi, ba vanda lenda dyaka ve kuzonza, samu ba vandaka na kilengi ya kulutila.
43 Kasi bambala mingi yandi niminaka bawu* na kuzonza mambu yayi ata na muntu mosi ve, mpe yandi zonzaka na bawu na kupesa mwana madya.
Banote
^ To: “Mubu.”
^ To: “Bandyamu ya kubambuka.”
^ Tala Yina ba me bwela A5.
^ To: “Kizunga ya Bambanza 10.”
^ To: “Ke ve ntama na lufwa.”
^ To: “Bika kuvanda na boma.”
^ To: “Niminaka bawu na ngolo nyonso.”
