Ya Marke 7:1-37
7 Bafarize na ndambu ya milongisi ya Musiku yina katukaka na Yeruzalemi, vukanaka pene-pene ya Yesu.
2 Ba talaka bilandi ya nkaka ya Yesu kudya na maboko ya mvindu, ya zola zonza maboko yina ba me sukula ve.*
3 (Ya tsyeleka, Bafarize na Bazwife nyonso ke kudyaka ve kana ba me sukula ve maboko tii na dikodi. Ba ke salaka yawu samu ba ke ya kukangama na misiku ya bankooko.
4 Mpe ntangu ba ke katukaka na zandu, ba ke kudyaka ve kana ba me yobila ntete ve. Ba ke zitisaka mpe misiku mingi ya nkaka ya bankooko ya bawu, mutindu kubotika bakopo, banzungu yina ba yidikaka na ntoto, mpe bandonga ya kwivre.)
5 Na yawu, Bafarize na milongisi ya Musiku yayi yufulaka na Yesu: “Samu na yinki bilandi ya nge ke tumamaka ve na misiku ya bankooko? Samu na yinki ba ke sukulaka ve maboko ya bawu tekila ba kudya?”
6 Yandi vutulaka bawu: “Izaya bikulaka mambu ya tsyeleka samu na beno bantu ya luvunu,* mutindu ya ke ya kusonama, ‘Bantu yayi ke zitisaka munu kaka na bikoba ya bawu, kasi bantima ya bawu ke ntama mingi na munu.
7 Ba ke na sambilaka munu, kasi ya ke ya mpamba, samu malongi ya bawu ke misiku yina ke katukaka na bantu.’
8 Beno ke losaka musiku ya Nzambi mpe ke kangamaka na misiku ya bantu.”
9 Dyaka, yandi zonzaka na bawu: “Beno ke na mangaka na mayela nyonso musiku ya Nzambi, samu na kubumba misiku ya bankooko ya beno.
10 Na kifwani Moyize zonzaka, ‘Zitisa tata ya nge na mama ya nge,’ mpe, ‘Ba fwana kufwa muntu yina ke finga* tata to mama ya yandi.’
11 Kasi beno, beno ke zonzaka, ‘Kana muntu zonza na tata to na mama ya yandi, “Bima yina mu zola pesa nge samu na kusadisa nge, ke korbani (ya zola zonza, dikabu yina mu pesaka nsilulu ti mu ke pesa yawu na Nzambi),”’
12 beno ke na pesaka dyaka ve muntu yango nzila ya kusala ata kima samu na tata to mama ya yandi.
13 Na mutindu yina, beno ke na manisaka mfunu ya mambu ya Nzambi samu na misiku ya bankooko ya beno, yina beno ke pesaka na bantu ya nkaka. Beno ke salaka mpe mambu mingi ya faso yina.”
14 Yandi bokilaka dyaka bantu mingi na sika ya yandi mpe zonzaka na bawu: “Beno kuwa munu beno nyonso mpe beno bakula.
15 Ata kima mosi ve ya ngaanda mpe yina ke kotaka na muntu lenda kumisa yandi mvindu. Kasi ni bima yina ke katukaka na muntu ke kumisaka yandi mvindu.”
16 * ——
17 Ntangu Yesu bikaka bantu, yandi kotaka na yinzo mpe bilandi ya yandi bandaka kuyufula yandi na yina me tadila kifwani yina yandi zonzilaka.
18 Yandi zonzaka na bawu: “Beno mpe ke ve na mayela mutindu bawu? Beno zaba ve ti ata kima yina ke katukaka na ngaanda mpe ke kotaka na muntu lenda kumisa yandi mvindu,
19 samu ya ke kotaka ve na ntima, kasi ya ke kotaka na kivumu mpe na manima ya ke kwendaka na kabine?” Na kuzonzaka mutindu yayi, Yesu lakisaka ti madya nyonso ke ya kuvedila.
20 Dyaka, yandi zonzaka: “Ni bima yina ke basikaka na muntu ke kumisaka yandi mvindu.
21 Ya tsyeleka, ni na ntima ya muntu ke katukaka makanisi ya yimbi yina ke nataka na kinsuza,* muyibi, kufwa bampangi,
22 bansalulu ya kinsuza,* lukoso, kusala bantu yimbi, luvunu, ndyatulu ya busafu,* kulula bima ya bampangi, kufinga, lunangu, mpe kuvanda na ntima ngolo.
23 Bima nyonso ya yimbi yayi ke katukaka na ntima ya muntu mpe ke kumisaka yandi mvindu.”
24 Yandi katukaka na kisika yina mpe kwendaka na kizunga ya Tire na ya Sidoni. Kuna, yandi kotaka na yinzo. Yandi zolaka ve ti bantu zaba, kasi yandi lendaka ve kubumbana.
25 Na mbala mosi, kento mosi yina mwana ya yandi ya fioti ya kento vandaka na mpeve ya yimbi, kuwaka nsangu ya Yesu. Yandi kwizaka mpe kubwaka na makulu ya yandi.
26 Kento yango vandaka Mugreke, muntu ya bwala ya Finisi ya Siri.* Yandi vanda bika ve kubondila Yesu samu yandi bingisa mpeve ya yimbi yina vandaka na mwana ya yandi ya kento.
27 Kasi Yesu zonzaka na yandi: “Bika ntete ti bana yukuta, samu ya ke ve mbote na kubaka dimpa ya bana mpe kulosila yawu na bana ya bayimbwa.”
28 Kasi yandi vutulaka: “Ee, mfumu, ata bana ya bayimbwa na yisi ya mesa ke kudyaka madya yina bana ya fioti ke bwisaka.”
29 Na yawu Yesu zonzaka na yandi: “Samu nge me zonza mambu yayi, kwenda. Mpeve ya yimbi me basika na mwana ya nge ya kento.”
30 Ntangu kento yango kumaka na yinzo ya yandi, mwana yango ya fioti vandaka ya kulala na mfulu mpe mpeve ya yimbi vandaka me basika.
31 Ntangu Yesu katukaka na kizunga ya Tire mpe vutukaka, yandi lutaka na Sidoni samu na kukwenda na nzadi ya mungwa* ya Galile, mpe yandi lutaka na kizunga ya Dekapole.*
32 Ba natinaka yandi bakala mosi yina vandaka na makutu ya kufwa, mpe yina vanda zonzaka ve mbote-mbote. Ba bondilaka yandi na kutula yandi maboko.
33 Yandi nataka yandi na lweka, ntama na kisika yina bantu mingi vandaka. Na manima yandi tulaka misapi ya yandi na makutu ya bakala yango, yandi losaka mante, mpe yandi simbaka yandi na ludimi.
34 Na manima, Yesu talaka na zulu, yandi pemaka na ngolo nyonso mpe yandi zonzaka: “Efata,” yina zola zonza, “Funguka.”
35 Na yawu, makutu ya muntu yango fungukaka, ludimi ya yandi nyangukaka, mpe yandi bandaka kuzonza mbote-mbote.
36 Yesu niminaka bawu na kuzonzila yawu na ata muntu. Kasi mutindu yandi vanda lutilaka na kunimina bawu, ba vanda lutilaka mpe na kumwangisa nsangu.
37 Ya tsyeleka, bantu yitukaka mingi, mpe ba zonzaka: “Bamambu nyonso yina yandi ke salaka ke mbote. Yandi ke salaka ti ata mpe bantu ya makutu ya kufwa kuwa, mpe mababa zonza.”
Banote
^ Bafarize na Bazwife ya nkaka vanda sukulaka maboko na kulandaka bansalulu ya bawu
^ To: “Bantu yina ke mbote kaka na meso.”
^ To: “Ke zonzila yimbi ya.”
^ Tala Yina ba me bwela A3.
^ Ndinga ya Greke ke sadilaka banzonzolo zole: moi·khei′a mpe por·nei′a. Tala Yina ya zola zonza.
^ Na Greke, moi·khei′a. Tala Yina ya zola zonza.
^ To: “Ya kukondwa nsoni.” Na Greke, a·sel′gei·a. Tala Yina ya zola zonza.
^ To: “Muntu yina butukaka na Finisi ya Siri.”
^ To: “Mubu.”
^ To: “Kizunga ya Bambanza 10.”
