Ya Marke 8:1-38
8 Na bilumbu yina, bantu mingi vukanaka dyaka na kisika yina Yesu vandaka. Samu ba vandaka ve na kima ya kudya, Yesu bokilaka bilandi ya yandi mpe zonzaka na bawu:
2 “Mu ke na kyadi samu na bantu yayi, samu ba me lutisa bilumbu tatu na munu awa, mpe ba ke ve na kima ya kudya.
3 Kana mu vutula bawu nsatu, ba ke lemba na nzila, mpe ba ya nkaka na kati ya bawu me katuka ntama.”
4 Kasi bilandi vutulaka yandi: “Kisika yayi ke ntama na bwala. Wapi kisika muntu lenda kuzwa mampa ya kulunga samu bantu nyonso yayi kudya mpe yukuta?”
5 Na yawu, yandi yufulaka bawu: “Beno ke na mampa yikwa?” Ba zonzaka: “Mampa 7.”
6 Yandi zonzaka na bantu na kuvanda na ntoto. Na manima, yandi bakaka mampa 7 yina. Yandi vutulaka matondo na Nzambi samu na yawu, zengaka yawu, mpe pesaka yawu na bilandi ya yandi samu ba kabula yawu, mpe bilandi kabulaka yawu na bantu yina.
7 Ba vandaka mpe na mwa bambisi. Yandi sakumunaka yawu mpe yandi zonzaka na bawu na kukabula mpe yawu.
8 Bantu kudyaka mpe yukutaka. Ba lokotaka bitunga* 7 ya nene ya kufuluka na mampa yina bikanaka.
9 Ya vandaka na babakala pene-pene na 4 000. Na manima, Yesu zonzaka na bawu na kuvutuka.
10 Na mbala mosi, yandi kotaka na bwatu na bilandi ya yandi mpe kwendaka na kizunga ya Damanuta.
11 Bafarize kwizaka mpe ba bandaka kusolola na yandi. Samu na kumeka yandi, ba zonzaka na yandi na kulakisa bawu kidimbu yina me katuka na zulu.
12 Yandi pemaka na ngolo nyonso mpe zonzaka: “Samu na yinki bantu ya ntangu yayi ke na sosaka kidimbu? Ya tsyeleka, mu ke na zonzaka ti ba ke pesa bantu ya ntangu yayi ata kidimbu mosi ve.”
13 Yandi bikaka bawu, kotaka dyaka na bwatu mpe kwendaka na simu ya nkaka ya maza.
14 Kasi bilandi zimbanaka kunata mampa. Ba vandaka na ata kima na bwatu, kasi kaka dimpa mosi.
15 Yandi kebisaka bawu pwelele mutindu yayi: “Beno fungula meso. Beno sala keba na levire ya Bafarize mpe levire ya Erode.”
16 Ba bandaka kuswana bawu na bawu na yina ba vandaka ve na mampa.
17 Ntangu yandi talaka faso yina, yandi zonzaka na bawu: “Samu na yinki beno ke na swanaka na yina beno ke ve na mampa? Nabunu beno bakula? Nabunu beno vanda na mayela? Bantima ya beno ke ntete ya kukangama?
18 Ata ti beno ke na meso, kasi beno ke na talaka ve, mpe ata ti beno ke na makutu, kasi beno ke na kuwaka ve? Beno ke na zabaka dyaka ve?
19 Ntangu mu zengaka mampa tanu samu na babakala 5 000, bitunga yikwa ya kufuluka na mampa beno lokotaka?” Ba vutulaka: “12.”
20 “Ntangu mu zengaka mampa 7 samu na babakala 4 000, bitunga ya nene* yikwa ya kufuluka na mampa beno kuzwaka?” Ba zonzaka: “7.”
21 Na yawu yandi zonzaka na bawu: “Nabunu beno bakula?”
22 Ntangu ba kumaka na Besayida, ba natinaka yandi bakala mosi yina vandaka na meso ya kufwa, mpe ba bondilaka yandi na kusimba yandi.
23 Yandi simbaka bakala ya kufwa meso yina na diboko, mpe nataka yandi na ngaanda ya bwala. Yandi lobolaka mante na meso ya yandi. Na manima, yandi tulaka maboko na zulu ya yandi, mpe yufulaka yandi: “Nge ke na talaka kima?”
24 Bakala yango talaka na mantwala mpe zonzaka: “Mu ke na talaka bantu, kasi ba ke mutindu bayinti yina ke na tambulaka.”
25 Yesu tulaka dyaka maboko ya yandi na meso ya bakala yango, mpe yandi talaka pwelele. Meso ya yandi belukaka, mpe yandi lendaka kutala bima nyonso mbote-mbote.
26 Na yina, Yesu vutulaka yandi na yinzo ya yandi mpe zonzaka: “Kukota ve na bwala.”
27 Yesu na bilandi ya yandi kwendaka na babwala ya Sezarea ya Filipi. Na nzila, yandi bandaka kuyufula bilandi ya yandi: “Samu na bantu, mu ke nani?”
28 Ba zonzaka na yandi: ”Yoane Mubotiki, kasi ya ba nkaka ke zonzaka Eli, mpe ya ba nkaka, mosi ya bambikudi.”
29 Yandi yufulaka bawu: “Kasi na beno, mu ke nani?” Piere vutulaka: “Nge ke Kristo.”
30 Na yina, yandi niminaka bawu na ngolo nyonso na kuzonza na ata muntu nani yandi kele.
31 Dyaka yandi bandaka kulonga bawu ti Mwana ya muntu me fwana kukutana na bampasi mingi. Bakuluntu, bamfumu ya banganga-nzambi mpe milongisi ya Musiku ke manga yandi, ba ke kufwa yandi mpe yandi ke vumbuka na manima ya bilumbu tatu.
32 Ya tsyeleka, yandi vanda zonzila bawu yawu pwelele. Kasi Piere nataka yandi na lweka, mpe bandaka kungala yandi.
33 Yesu balukaka, talaka bilandi ya yandi, mpe sembaka Piere: “Luta na manima ya munu, Satana, samu ti makanisi ya nge ke ve makanisi ya Nzambi, kasi ya bantu.”
34 Yesu bokilaka bantu mingi yina vandaka kuna na bilandi ya yandi mpe zonzaka na bawu: “Kana muntu zola kulanda munu, bika yandi kukimanga, yandi baka yinti ya yandi ya mpasi,* mpe tatamana na kulanda munu,
35 samu konso muntu yina ke sosaka kuvuukisa luzingu* ya yandi, ke zimbisa yawu. Kasi konso muntu yina ke zimbisa luzingu ya yandi samu na munu, mpe samu na nsangu ya mbote ke vuukisa yawu.
36 Ya tsyeleka, wapi mambu ya mbote muntu ke kuzwa kana yandi kuzwa yinza nyonso mpe zimbisa luzingu* ya yandi?
37 Wapi kima muntu ke pesa samu na kusumba luzingu* ya yandi?
38 Konso muntu yina ke talaka nsoni ya munu mpe ya mambu yina mu ke zonzaka na mantwala ya bantu ya ntangu yayi yina ke ya kinsuza* mpe yina ke basumuki, Mwana ya muntu mpe ke tala nsoni ya yandi ntangu yandi ke kwiza na nkembo ya Tata ya yandi na bambazi ya santu.”
Banote
^ To: “Bitunga ya kubumba madya.”
^ To: “Bitunga ya kubumba madya.”
^ Tala Yina ya zola zonza.
^ To: “Mwela.”
^ To: “Mwela.”
^ To: “Mwela.”
^ To: “Yina ke ve ya kukwikama na Nzambi.”
