Ya Marke 9:1-50
-
Yesu me kituka (1-13)
-
Yesu me belusa mwana mosi ya bakala yina vandaka na mpeve ya yimbi (14-29)
-
“Mambu nyonso lenda salama na muntu yina ke kwikilaka” (23)
-
-
Yesu me bikula dyaka lufwa ya yandi (30-32)
-
Bilandi me swana samu na kuzaba nani na kati ya bawu me lutila bampangi (33-37)
-
“Muntu yina ke ve mbeni ya beto ke kotilaka beto” (38-41)
-
Bima yina ke salaka ti bantu bula dibaku (42-48)
-
“Beno vanda na mungwa na kati ya beno” (49, 50)
9 Yandi zonzaka dyaka na bawu: “Ya tsyeleka, mu ke na zonzaka na beno ti, bantu ya nkaka yina kele awa ke kufwa ve, tekila ba tala Kimfumu ya Nzambi yina me kwizaka na ngolo nyonso.”
2 Na manima ya bilumbu 6, Yesu bakaka Piere, Zaki, na Yoane, mpe yandi nataka bawu na zulu ya mongo mosi ya yinda, kisika yina ba vandaka kaka bawu mosi. Mpe yandi kitukaka na mantwala ya bawu.
3 Bilele ya yandi vandaka ya kungenga, mpe ya kumaka mpembe ya kulutila. Ata muntu na ntoto ya muvimba lenda kumisa kinkuti mpembe ya mutindu yina.
4 Dyaka, Eli na Moyize basikilaka bawu, mpe ba vanda solola na Yesu.
5 Na yawu, Piere zonzaka na Yesu: “Rabi* ya ke mbote na yina beto kele awa. Bika beto yidika bayinzo tatu ya bilele, mosi samu na nge, mosi samu na Moyize, mpe mosi samu na Eli.”
6 Ya tsyeleka, Piere vanda zaba ve yinki yandi ke sala, samu ba vandaka na boma mingi.
7 Dituti mosi basikaka, fukaka bawu, mpe ndinga mosi wakanaka na kati ya dituti, mpe zonzaka: “Yayi ni Mwana ya munu yina mu ke zolaka mingi. Beno kuwa yandi.”
8 Na mbala mosi, ba talaka bisika nyonso, mpe ba talaka ti ata muntu mosi ve vandaka dyaka na bawu, katula kaka Yesu.
9 Ntangu ba vanda katuka na zulu ya mongo, Yesu niminaka bawu na ngolo nyonso na kuzonzila na ata muntu mambu yina ba talaka, tii ntangu Mwana ya muntu ke vumbuka na lufwa.
10 Ba tumamaka na* mambu yina yandi zonzaka na bawu. Kasi ba vanda solola bawu na bawu, samu na kusosa kuzaba yinki Yesu vanda sosa kuzonza, ntangu yandi zonzilaka kuvumbuka ya yandi na lufwa.
11 Ba bandaka kuyufula yandi: “Samu na yinki milongisi ya Musiku ke zonzaka ti Eli me fwana kukwiza ntete?”
12 Yandi vutulaka bawu: “Ya tsyeleka, Eli ke na kwizaka ntete, mpe ke bongisa mambu nyonso. Kasi samu na yinki Masonoko ke zonzaka ti Mwana ya muntu fwana kukutana na bampasi mingi, mpe ba ke bakila yandi mutindu kima ya nganzi?
13 Kasi mu ke na zonzaka na beno ti Eli me kwizaka. Ba salaka yandi mambu nyonso yina ba zolaka, kaka mutindu ba sonikaka yawu samu na yandi.”
14 Ntangu ba kumaka kisika yina bilandi ya nkaka vandaka, ba talaka ti bantu mingi zungaka bawu, mpe milongisi ya Musiku vanda solola na bawu.
15 Ntangu bantu talaka Yesu, ba yitukaka mingi, mpe ba kwendaka na mbangu na sika ya yandi samu na kupesa yandi mbote.
16 Yesu yufulaka: “Wapi mambu beno ke na sololaka na bawu?”
17 Muntu mosi na kati ya bawu vutulaka yandi: “Mulongi, mu me natina nge mwana ya munu ya bakala, samu yandi ke na mpeve yina ke kumisaka yandi dibaba.
18 Konso ntangu yina ya ke simbaka yandi, ya ke losaka yandi na ntoto, mafulu ke basikaka mwana na yinwa, yandi ke kwetisaka meno, mpe ngolo ya yandi ke manisaka. Mu me lomba na bilandi ya nge na kubingisa mpeve yina, kasi ba me lenda ve.”
19 Yesu zonzaka na bawu: “Beno bantu ya ntangu yayi, beno ke bantu yina ke ve na kiminu. Tii wapi ntangu mu ke vanda kaka na beno? Tii wapi ntangu mu fwana kukanga ntima na bamambu ya beno? Beno nata yandi na sika ya munu.”
20 Na yina, ba natinaka yandi mwana yango. Ntangu mpeve talaka Yesu, na mbala mosi yandi ningisaka mwana na ngolo nyonso. Mwana kubwaka mpe vanda baluka na ntoto. Mafulu vanda basika yandi na yinwa.
21 Yesu yufulaka na tata ya mwana yina: “Ya me sala bantangu yikwa yina mambu yayi ke kuminaka yandi?” Yandi vutulaka: “Banda bumwana ya yandi.
22 Bambala ya nkaka, mpeve yango ke losaka yandi na tiya to na maza samu na kufwa yandi. Kana nge lenda sala kima, tala beto kyadi mpe sadisa beto.”
23 Yesu zonzaka na yandi: “Samu na yinki nge me zonza na munu, ‘Kana nge lenda’? Mambu nyonso lenda salama na muntu yina ke kwikilaka.”
24 Na mbala mosi, tata ya mwana zonzaka na ndinga ya ngolo: “Mu ke na kwikilaka. Sadisa munu kisika yina mu ke ve na kiminu!”
25 Ntangu Yesu talaka ti bantu vanda kwiza na mbangu kisika yina ba vandaka, yandi ngalaka mpeve ya yimbi yina mpe zonzaka: “Nge mpeve yina ke kumisaka mwana dibaba mpe ke kufwaka yandi makutu, mu ke na zonzaka na nge na kubasika na yandi, mpe na kukota dyaka ve ata fioti na yandi.”
26 Mpeve gangaka, ningisaka mwana na ngolo nyonso mpe basikaka. Mwana kumaka mutindu muntu ya kufwa, mpe bantu mingi vanda zonza ti yandi me kufwa.
27 Kasi, Yesu simbaka mwana na diboko, telemisaka yandi, mpe mwana telamaka.
28 Ntangu Yesu kotaka na yinzo, na kisika yina ba vandaka kaka bawu mosi, bilandi yufulaka yandi: “Samu na yinki beto lendaka ve kubingisa mpeve yina?”
29 Yandi vutulaka bawu: “Kaka na nzila ya lusambu ba lenda basisa mpeve ya mutindu yayi.”
30 Ba katukaka kuna, mpe ba lutaka na Galile. Kasi Yesu zolaka ve ti bantu zaba kisika yina yandi kele,
31 samu yandi vanda sosa kulonga bilandi ya yandi. Yandi vanda zonza na bawu: “Ba ke teka mwana ya muntu na maboko ya bantu mpe ba ke kufwa yandi, kasi bilumbu tatu na manima ya lufwa ya yandi, yandi ke vumbuka.”
32 Kasi ba bakulaka ve mambu yina yandi vanda zonza, mpe ba vandaka na boma ya kuyufula yandi.
33 Na manima, ba kumaka na Kapenawume. Ntangu ba vandaka na kati ya yinzo, Yesu yufulaka bawu: “Wapi mambu beno vanda solola na nzila?”
34 Ba vandaka kaka swi, samu ti na nzila ba vanda swana samu na kuzaba nani na kati ya bawu me lutila bampangi.
35 Na yina, yandi kwendaka vanda, bokilaka bantumwa 12 mpe zonzaka na bawu: “Kana muntu zola kuvanda muntu ya ntete, yandi me fwana kuvanda muntu ya nsuka na kati ya bantu nyonso mpe kisadi ya bantu nyonso.”
36 Na manima, Yesu bakaka mwana ya fioti mpe telemisaka yandi na kati-kati ya bawu. Yandi tulaka maboko ya yandi na zulu ya mapeka ya mwana, mpe zonzaka na bawu:
37 “Konso muntu yina me yamba mosi ya bana ya fioti mutindu yandi yayi na nkumbu ya munu, me yamba mpe munu. Mpe konso muntu yina me yamba munu me yamba ve kaka munu, kasi mpe muntu yina filisaka munu.”
38 Yoane zonzaka na yandi: “Mulongi, beto talaka muntu mosi yina vanda bingisa bampeve ya yimbi na nkumbu ya nge. Mpe beto sosaka kunimina yandi samu yandi ke ve na kati ya bantu yina ke landaka beto.”
39 Kasi Yesu vutulaka: “Beno sosa ve kunimina yandi samu ti ata muntu lenda sala kimangu na nkumbu ya munu, mpe na mbala mosi kubanda kutonga munu.
40 Muntu yina ke ve mbeni ya beto ke kotilaka beto.
41 Konso muntu yina ke pesaka beno kopo ya maza ya kunwa samu beno ke bantu ya Kristo, ya tsyeleka, mu ke na zonzaka na beno ti yandi ke zimbisa ata fioti ve difuta ya yandi.
42 Kasi konso muntu yina ke salaka ti mosi ya bana ya fioti yayi yina ke na kiminu na munu bula dibaku, ya ke vanda mbote kana ba kanga yandi ditadi ya nene* na laka mpe ba losa yandi na nzadi ya mungwa.*
43 “Kana diboko ya nge ke salaka ti nge bula dibaku, zenga yawu. Ya me lutila mbote na nge na kuzwa luzingu na diboko mosi na kisika ba losa nge na maboko nyonso zole na Gehena,* na kati ya tiya yina ba lenda kufwa ve.
44 * ——
45 Kana dikulu ya nge ke salaka ti nge bula dibaku, zenga yawu. Ya me lutila mbote na nge na kuzwa luzingu na kisika ba losa nge na makulu nyonso zole na Gehena.*
46 * ——
47 Dyaka, kana disu ya nge ke salaka ti nge bula dibaku, losa yawu ntama na nge. Ya me lutila mbote na nge na kukota na Kimfumu ya Nzambi na disu mosi na kisika ba losa nge na meso nyonso zole na kati ya Gehena,*
48 kisika yina bantunga ke kufwaka ve mpe tiya ke kufwaka ve.
49 “Ba me fwana kutula muntu nyonso tiya mutindu ba ke tulaka mungwa na madya.
50 Mungwa ke kima ya mbote. Kasi, kana mungwa ke dyaka ve na ngolo ya yawu, yinki ba lenda sala samu na kuvutula ngolo ya yawu? Beno vanda na mungwa na kati ya beno mpe beno bumba kizunu beno na beno.”
Banote
^ Ya zola zonza, “Mulongi.”
^ To ya lenda vanda: “Ba bumbaka samu na bawu mosi.”
^ Tala noti ya Matayi 18:6
^ To: “Mubu.”
^ Tala Yina ya zola zonza.
^ Tala Yina ba me bwela A3.
^ Tala Yina ya zola zonza.
^ Tala Yina ba me bwela A3.
^ Tala Yina ya zola zonza.
