Nsangu ya Mbote ya Matayi 10:1-42
10 Yesu bokilaka bilandi ya yandi 12 mpe pesaka bawu lutumu na zulu ya bampeve ya yimbi, samu na kubingisa bawu mpe kubelusa bimbevo ya mutindu na mutindu mpe binama ya kufwa ya mutindu na mutindu.
2 Yayi ni bankumbu ya bantumwa 12: Ya ntete, Simoni yina ba ke bokilaka Piere, mpe Andre leki ya yandi, Zaki mwana ya Zebede mpe Yoane leki ya yandi,
3 Filipe na Bartelemi, Toma na Matayi kilokoti-mpaku, Zaki mwana ya Alfe, Tade,
4 Simoni muntu ya Kanana,* na Yuda Iskayote yina tekaka Yesu na manima.
5 Yesu filisaka bilandi 12 yayi mpe pesaka bawu misiku yayi: “Beno kwenda ve na bantu ya makanda ya nkaka, mpe beno kota ata fioti ve na bambaza ya bwala ya Samariya.
6 Kasi beno kwenda kaka na sika ya mameme ya kuzimbana ya yinzo ya Izraele.
7 Ntangu beno ke na kwendaka, beno samuna, ‘Kimfumu ya mazulu me kuma pene-pene.’
8 Beno belusa ba yina ke na beelaka. Beno vumbula bantu ya kufwa. Beno kumisa bunkete bantu ya maladi ya bwazi. Beno bingisa bampeve ya yimbi. Beno kuzwaka ya mpamba, beno pesa ya mpamba.
9 Beno nata ve wolo, arza to kwivre* na kati ya bagode ya beno,
10 to saki ya madya samu na nzyetolo, to kilele ya nkaka,* to mapapa, to yinti, samu kisadi me fwana kuzwa madya ya yandi.
11 “Na konso mbanza to bwala yina beno ke kota, beno sosa ba yina ke ya kulunga samu na nsangu ya beno, mpe beno vanda kuna tii ntangu beno ke katuka kuna.
12 Ntangu beno ke kota na yinzo mosi, beno pesa mbote na bantu ya yinzo.
13 Kana ba yamba beno,* bika ti kizunu ya beno vanda na bawu. Kana ba yamba ve beno, bika ti kizunu ya beno vutuka na beno.
14 Kisika nyonso yina muntu ke yamba ve beno, to ke kuwa ve mambu ya beno, ntangu beno ke basika na yinzo to na mbanza yina, beno pupula fundu-fundu ya makulu ya beno.
15 Ya tsyeleka, mu ke na zonzaka na beno ti na Kilumbu ya Lusambusu, lusambusu yina bantu ya bwala yango ke kuzwa ke vanda ngolo mingi kulutila yina bwala ya Sodome na Gomore ke kuzwa.
16 “Mu ke na filisaka beno mutindu mameme na kati ya bayimbwa ya brusu. Na yawu, beno vanda ekenge mutindu banyoka, mpe beno vanda na ntima ya mpembe mutindu mabembe.
17 Beno sala keba na bantu, samu ba ke nata beno na bayinzo ya kusambisa, mpe ba ke bula beno bankuba na bayinzo ya bawu ya lusambu.
18 Ba ke nata beno na mantwala ya bamfumu ya fioti mpe ya bamfumu ya nene samu na munu. Ya ke vanda kimbangi samu na bawu mpe samu na makanda.
19 Kasi ntangu ba ke nata beno na mantwala ya bawu, beno kutala ve ntima mpasi na yina me tadila mambu yina beno ke zonza mpe mutindu beno ke zonzila yawu, samu mambu yina beno ke zonza, ba ke pesa beno yawu na ntangu yina.
20 Ya tsyeleka, kaka ni beno ve ke zonzaka, kasi ni mpeve ya Tata ya beno ke zonzaka na nzila ya beno.
21 Dyaka, mpangi ke pesa mpangi ya yandi samu ba kufwa yandi, tata ke pesa mwana ya yandi, mpe bana ke kuma bambeni ya bibuti ya bawu mpe ke sala ti ba kufwa bawu.
22 Mpe bantu nyonso ke yiina beno samu na nkumbu ya munu, kasi muntu yina ke kanga ntima* tii na nsuka, ke vuuka.
23 Ntangu ba ke talisa beno mpasi na mbanza mosi, beno kima na mbanza ya nkaka, samu ya tsyeleka mu ke na zonzaka na beno ti, beno ke luta ve na bambanza nyonso ya Izraele tii ntangu Mwana ya muntu ke kwiza.
24 “Mulongoki ke lutilaka ve mulongi ya yandi, mpe kisadi ke lutilaka ve mfumu ya yandi.
25 Ya me lunga na mulongoki na kukuma mutindu mulongi ya yandi, mpe na kisadi kukuma mutindu mfumu ya yandi. Kana bantu me bokila mfumu ya yinzo Bezebule,* ba ke bokila mpe bantu ya yinzo ya yandi mutindu mosi.
26 Na yawu, beno vanda ve na boma ya bawu, samu mambu nyonso yina ke ya kubumbana, ke talana mpe mambu nyonso ya mansweki ke zabana.
27 Mambu yina mu ke zonzaka na beno na mpimpa, beno zonza yawu na ntangu, mpe mambu yina beno ke kuwaka na ndinga ya yisi, beno samuna yawu na mantwala ya bantu nyonso.*
28 Beno vanda ve na boma ya ba yina ke kufwaka nzutu kasi lenda kufwa ve mwela.* Kasi beno vanda na boma ya muntu yina lenda kufwa mwela mpe nzutu na kati ya Gehena.*
29 Ba ke tekisaka banswini zole na mbongo ya fioti mingi,* faso yina ve? Kasi ntangu ata mosi na kati ya bawu ke kubwaka na ntoto, Tata ya beno ke zabaka yawu.
30 Na yina me tadila beno, ata lutangu ya bansuki ya yintu ya beno, Nzambi me zaba yawu.
31 Na yawu, beno vanda ve na boma, beno ke mfunu kulutila banswini mingi.
32 “Konso muntu yina me ndima munu na mantwala ya bantu, munu mpe ke ndima yandi na mantwala ya Tata ya munu yina ke na mazulu.
33 Kasi konso muntu yina me manga munu na mantwala ya bantu, munu mpe ke manga yandi na mantwala ya Tata ya munu yina ke na mazulu.
34 Beno kanisa ve ti mu kwizaka awa na ntoto samu na kutula kizunu. Mu kwizaka ve samu na kutula kizunu, kasi mbele.
35 Mu kwizaka samu na kukabula mwana ya bakala na tata ya yandi, mwana ya kento na mama ya yandi, mpe kento na bokilo ya yandi ya kento.
36 Ya tsyeleka, bambeni ya muntu ke vanda bantu ya yinzo ya yandi mosi.
37 Konso muntu yina ke zolaka tata to mama ya yandi kulutila munu, ke ve ya kulunga samu na kuvanda kilandi ya munu, mpe konso muntu yina ke zolaka mwana ya yandi ya bakala to mwana ya yandi ya kento kulutila munu, ke ve ya kulunga samu na kuvanda kilandi ya munu.
38 Konso muntu yina me ndima ve yinti ya yandi ya mpasi,* mpe me landa ve munu ke ve ya kulunga samu na kuvanda kilandi ya munu.
39 Konso muntu yina ke sosaka kuvuukisa luzingu* ya yandi ke zimbisa yawu, kasi konso muntu yina me zimbisa luzingu* ya yandi samu na munu ke kuzwa yawu.
40 “Konso muntu yina me yamba beno me yamba mpe munu, mpe konso muntu yina me yamba munu, me yamba mpe muntu yina filisaka munu.
41 Muntu yina ke yambaka mbikudi samu yandi ke mbikudi, ke kuzwa difuta yina mbikudi ke kuzwaka, mpe muntu yina ke yambaka muntu ya lunungu* samu yandi ke muntu ya lunungu, ke kuzwa difuta yina muntu ya lunungu ke kuzwaka.
42 Konso muntu yina me pesa mwa kopo ya maza ya madidi na mosi ya bantu ya mpamba yayi samu yandi ke kilandi ya munu, ya tsyeleka mu ke na zonzaka na beno ti, yandi ke kondwa ve kuzwa difuta ya yandi.”
Banote
^ Ntangu ya nkaka ya zola zonza “muntu ya tiya,” kasi ve ti yandi vandaka muntu ya mbanza ya Kanana to ya mbanza ya Kana.
^ To: “Nsongo.”
^ Na Greke: “Bilele zole.”
^ Na Greke: “Ke ya kulunga.”
^ To: “Me kanga ntima.”
^ Nkumbu yina ba ke sadilaka samu na Satana, mfumu ya bampeve ya yimbi.
^ Na Greke: “Na zulu ya bayinzo.”
^ To: “Luzingu.” Ya zola zonza kivuvu ya luzingu.
^ Tala Yina ya zola zonza.
^ Na Greke: “Na ntalu ya Asarioni mosi.” Tala Yina ba me bwela B14.
^ Tala Yina ya zola zonza.
^ Na Greke: “Mwela.”
^ Na Greke: “Mwela.”
^ To: “Kudedama.”
