Nsangu ya Mbote ya Matayi 11:1-30
11 Ntangu Yesu manisaka kupesa misiku na bilandi ya yandi 12, yandi katukaka na kisika yina. Yandi kwendaka longa mpe kusamuna na bambanza ya kizunga yina.
2 Kasi ntangu Yoane kuwaka na boloko mambu yina Yesu vanda sala, yandi filisaka bilandi ya yandi
3 samu na kuyufula na Yesu: “Ni nge ke Muntu yina ba zonzaka ti yandi ke kwiza, to beto me fwana kuvingila muntu ya nkaka?”
4 Yesu vutulaka na bawu: “Beno kwenda zonza na Yoane mambu yina beno ke na kuwaka, mpe ke na talaka:
5 Bantu ya meso ya kufwa ke na talaka, bantu ya makulu ya kufwa ke na tambulaka, bantu yina ke na maladi ya bwazi* ke na belukaka, bantu ya makutu ya kufwa ke na waka, bantu ya kufwa ke na vumbukaka, mpe bamputu* ke na kuwaka nsangu ya mbote.
6 Kilengi na muntu yina me tala ve na munu kima yina ke sala ti yandi bula dibaku.”
7 Ntangu bilandi ya Yoane kwendaka, Yesu bandaka kuzonzila Yoane na bantu yina vandaka kuna: “Yinki beno kwendaka tala na ntoto ya kuyuma? Yinti ya didyadya yina mupepe vanda ningisa?
8 Beno basikaka samu na kwenda tala yinki? Bakala mosi yina lwataka bilele ya ntalu?* Bantu yina ke lwataka bilele ya ntalu ke vandaka na bayinzo ya bamfumu.
9 Kasi samu na yinki beno basikaka kwandi? Samu na kutala mbikudi? Ya tsyeleka mu ke na zabisaka beno ti yandi me lutila na ntama mbikudi.
10 Yoane ke muntu yina ba sonikaka na kati ya dibuku ya Nzambi, ‘Tala, mu ke na filisaka kinati-nsangu ya munu na mantwala ya nge,* samu na kuyidika nge nzila.’
11 Ya tsyeleka mu ke na zonzaka na beno ti, na kati ya bantu yina bakento butaka, ata muntu me lutila Yoane Mubotiki. Kasi muntu ya kulutila fioti na kati ya Kimfumu ya mazulu, me lutila Yoane.
12 Katuka bilumbu ya Yoane Mubotiki tii bubu yayi, bantu ke na nwaninaka Kimfumu ya mazulu, mpe ba yina ke na nwaninaka yawu na ngolo ke na bakaka yawu.
13 Ya tsyeleka, bawu nyonso, Bambikudi mpe Musiku, bikulaka tii na ntangu ya Yoane.
14 Mpe kana beno zola kundima yawu, yandi kele Eli yina fwana kukwiza.’
15 Bika ti muntu yina ke na makutu kuwa.
16 “Na nani mu ke fwanisa bantu ya ntangu yayi? Ba ke mutindu bana ya fioti yina ke ya kuvanda na kati ya bazandu, mpe ke na zonzaka na ndinga ya ngolo na bandiku ya bawu yina ba ke sakanaka,
17 ‘Beto yimbilaka beno banzimbu, kasi beno binaka ve. Beto yimbilaka beno banzimbu ya mawa, kasi beno dilaka ve.’*
18 Mutindu mosi, ntangu Yoane kwizaka, yandi vanda kudya ve mpe kunwa ve. Kasi bantu zonzaka ti yandi ke na mpeve ya yimbi.
19 Mwana ya muntu me kwiza, yandi ke kudyaka, mpe ke kunwaka, kasi bantu ke na zonzaka, ‘Muntu yayi ke na muyibi ya kudya, mpe yandi ke kunwaka vinu mingi. Yandi ke ndiku ya ba yina ke lokotaka mpaku mpe ya basumuki.’ Kasi ndwenga ke talanaka* na bisalu ya yawu.”*
20 Na manima, yandi bandaka kusemba bambanza yina yandi salaka bimangu mingi, samu bantu ya bambanza yango balulaka ve bantima ya bawu:
21 “Kyadi samu na nge Korazini! Kyadi samu na nge Besayida! Samu kana bimangu yina salamaka na beno salamaka na Tire, mpe na Sidoni, banda ntama, ba zola lwata bangoto, mpe kupakula dibufu ya tiya, samu na kulakisa ti ba balulaka bantima.
22 Ni na yawu mu ke na zonzaka na beno ti, na Kilumbu ya Lusambusu, lusambusu yina beno ke kuzwa ke vanda ngolo mingi kulutila yina Tire mpe Sidoni ke kuzwa.
23 Mpe nge Kapenawume, nge kanisa ti Nzambi ke zangula nge tii na zulu? Nge ke kulumuka tii na Ndyamu.* Ya tsyeleka, kana bimangu yina salamaka na sika ya nge salamaka na Sodome, ya zola vanda kaka tii bubu yayi.
24 Ni na yawu mu ke na zonzaka na beno ti na Kilumbu ya Lusambusu, lusambusu yina beno ke kuzwa ke vanda ngolo mingi kulutila yina bwala ya Sodome ke kuzwa.”
25 Na ntangu yina, Yesu zonzaka: “Tata, Mfumu ya mazulu na ya ntoto, mu ke na kumisaka nge na mantwala ya bantu, samu nge me bumba mambu yayi na bantu ya ndwenga mpe ya mayela, mpe nge me lakisa yawu na bana ya fioti.
26 Ee Tata, ni nge mosi zolaka ti ya vanda mutindu yayi.
27 Tata ya munu pesaka munu bima nyonso. Ata muntu mosi ve me zaba mbote-mbote Mwana katula Tata, mpe ata muntu mosi ve me zaba mbote-mbote Tata katula kaka Mwana, mpe konso muntu yina Mwana me zola kulakisa Tata.
28 Beno kwiza na munu, beno nyonso yina ke na talaka mpasi mpe ke na nataka kilo ya mingi, mpe mu ke pesa beno ngolo.
29 Beno ndima kiyeko ya munu, mpe beno longoka na sika ya munu samu mu ke na lembami mpe ntima ya kukuluka, mpe beno* ke kuzwa ngolo.
30 Ntembe ve, kiyeko ya munu ke ve mpasi* na kunata mpe kizitu ya munu ke ve kilo.”
Banote
^ Tala noti ya Matayi 8:2.
^ To: “Pauvre.”
^ To: “Bilele ya kitoko?”
^ Na Greke: “Na mantwala ya kizizi ya nge.”
^ Na Greke: “Beno bulaka ve banzutu ya beno na mawa.”
^ To: “Ke talanaka ya kudedama.”
^ To: “Na mambu yina ya ke butaka.”
^ To: “Hadesi.” Ya ke ndyamu ya bantu nyonso. Tala Yina ya zola zonza.
^ To: “Myela ya beno.”
^ To: “Kiyeko ya munu ke pete.”
